Askim

Sapos ol i putim plasma o narapela samting bilong blut i go long kaikai, Kristen i mas tingim dispela, o nogat?

Sapos i gat as na Kristen i ting ol i bin putim blut bilong animal o samting bilong blut i go insait long kaikai em i laik baim, orait, Kristen i mas tingting gut long dispela samting. Tasol sapos i no gat as bilong tingting planti long dispela samting, maski long tingim.

Long pastaim tru God i bin tambuim ol man long kaikai blut. (Stat 9:​3, 4) God i tok, blut i makim laip, na laip em presen God i givim long ol man. I gat wanpela wok tasol yumi ken mekim long blut, em bilong mekim ofa, olsem long alta, na sapos nogat, orait, mas kapsaitim i go long graun, olsem bekim bek long God. I tambu long lain bilong God long kaikai blut. Em i tok: “Yupela i no ken kaikai mit i gat blut i stap yet long en. Na man i kaikai mit i gat blut, bai mi rausim em long lain manmeri bilong mi.” (Wok Pris 17:​11-14) Na God i putim dispela tambu long ol Kristen tu. (Aposel 15:​28, 29) Olsem na ol Kristen bilong bipo ol i mas abrusim ol kaikai i gat blut i stap long en, olsem abus ol i bin pasim nek bilong en na i dai na i gat blut i stap long en, o sosis ol man i bin wokim wantaim blut.

Ol Kristen i mas mekim wanem na bai ol i ken “lukaut gut, na ol i no ken kaikai abus . . . i gat blut i stap yet long en na ol abus ol man i bin pasim nek bilong en na kilim em i dai”? (Aposel 21:25) Pol i tok: “Olgeta mit samting ol i salim long maket, em yupela i ken kaikai. Yupela i no ken tingting planti na askim nabaut.”​—⁠1 Korin 10:⁠25.

Tasol ating dispela mit i bilong animal ol i bin wokim ofa long en long haus lotu haiden. Taim ol i wokim pinis ol dispela ofa, ol stua i baim wantaim ol narapela mit nabaut, na ol man i baim gen long ol stua, olsem na Pol i tok i orait long kaikai. Ol i bin rausim blut long ol dispela mit. Taim ol man i baim long stua ol i no ting dispela mit i bilong haus lotu o bilong haiden o nogat, na Kristen tu i ken mekim olsem tasol. Tasol sapos em i save stua i gat sampela mit (na sosis i gat blut) bilong animal ol i bin pasim nek bilong en na i dai, em i mas lukim gut wanem kain mit em i baim. Ating em i ken luksave long kala bilong mit, i gat blut o nogat. (Long nau ol man i ken save sosis i gat blut o nogat.) O Kristen i ken askim man i bosim stua, dispela mit i gat blut o nogat. Sapos i no gat as na bai em i ting dispela mit i gat blut, orait, ating em i ken kaikai.

Na Pol i tokim ol Kristen: “Yupela i mas . . . larim ol i lukim dispela gutpela pasin bilong yupela.” (Filipai 4:⁠5) Yumi ken tingim dispela tok bilong Pol taim yumi baim mit, ol i ken lukim pasin bilong yumi i no narapela kain tumas. Lo bilong ol Israel o ol Kristen bilong pastaim em i no tok ol i mas skelim tumas wanem kain mit ol i baim. Lo i no tok, sapos ol i no klia mit i gat blut o nogat, ol i no ken kaikai na ol mas kaikai samting bilong gaden tasol; nogat; i no gat strongpela lo olsem na bai ol i mas pret long kaikai mit, nogut i gat blut long en.

Sapos wanpela Israel i kilim i dai animal bilong kaikai, em bai rausim blut bilong en. (Lukim Lo 12:​15, 16.) Na sapos dispela mit i planti tumas na famili bilong em i no inap pinisim, em i ken baim sampela bilong en i go long ol man. Na sapos wanpela Israel i baim, em i no save givim planti askim long man long em i bin rausim gut blut o nogat. Em i save, taim yumi rausim blut, i gat liklik hap i stap yet long mit. Na lain bilong bosim ol Kristen long bipo ol i no tok ol Kristen i mas skelim gut tru ol mit ol i laik kaikai na bai ol i no ken kaikai liklik hap blut, nogat.

Long nau long planti kantri, lo o pasin bilong ples o lotu i tok, ol i mas rausim blut long ol animal ol i kilim bilong kaikai. (Sampela mit tasol ol i putim blut long en, olsem sampela sosis.) Olsem na ol Kristen i stap long ol dispela hap i no ken tingting tumas long ol man i bin rausim gut blut o nogat long mit em i baim. Em i ken kaikai na bel bilong em i no gat tok. Em i ken tingim tok bilong Pol: “Olgeta mit . . . em yupela i ken kaikai. Yupela i no ken tingting planti na askim nabaut.”

Tasol sampela Kristen i harim tok olsem sampela kampani i mekim wok long blut. Sampela kampani i tok, blut bilong ol animal ol i kilim bilong kaikai em i gutpela bilong putim gris long gaden o bilong tanim wantaim kaikai bilong ol animal. Na sampela man i bin tingting long tanim blut wantaim sampela kain mit. Na sampela kampani i bin wokim long blut sampela samting bilong tanim wantaim sampela kain kaikai o mit. Na sampela man i bin tingting long wokim long blut samting bilong tanim wantaim bret na kek samting o sampela kain dring na bai i gat protin na ain long en.

Ol i bin mekim ol dispela samting inap planti yia pinis, tasol long planti kantri ol i no bin mekim planti wok long ol dispela samting, na sampela ripot hia i tok bilong wanem i olsem:

‘Blut i gat marasin protin long en olsem i stap long sampela kaikai, tasol ol i no bin mekim bikpela wok tumas long blut bilong bulmakau bilong wokim kaikai, long wanem, kala na swit bilong en i no gutpela.’​—⁠Journal of Food Science, Volyum 55, Namba 2, 1990.

‘Protin bilong blut i save tanim gut wantaim wara, na ol i mas inap long mekim olsem bilong wokim kaikai, tasol taim ol i mekim drai blut long Japan ol i no inap senisim na bai em i no ken givim sik long man.’​—⁠Journal of Food Science, Volyum 56, Namba 1, 1991.

Planti gavman i tok, ol kampani i wokim kaikai ol i mas putim stori long kaikai na toksave long ol samting kampani i wokim dispela kaikai long en. Sampela Kristen i save lukim dispela stori taim ol i laik baim dispela kaikai, na ol i ken mekim olsem long olgeta taim sapos ol i ting sampela kaikai ol i laik baim i gat blut i stap long en. Sapos i gat blut, o sampela liklik hap bilong blut olsem plasma, o globin protin, o globin ain, Kristen bai abrusim. Wanpela kampani long Yurop i tok: ‘Sapos ol i putim globin long kaikai, ol i mas toksave gut long stori bilong en na bai ol i no ken giamanim man i baim na em i ken save dispela kaikai i gutpela o nogat.

Tasol yumi no ken ting yumi mas askim tumas long ol man yumi baim abus long ol. I no olsem olgeta Kristen long olgeta hap i mas glasim glasim ol dispela stori o askim strong ol wokman long ples kaikai na bai em i ken save i gat samting bilong blut i stap long kaikai em i laik baim. Nogat. Ating pastaim Kristen i ken kisim save olsem: Long hap o long kantri em i stap long en, i gat blut o samting bilong blut i stap insait long sampela kaikai, o nogat. Ating em bai save, i no gat. Olsem na planti Kristen i ting, maski lusim nating taim long kisim save long blut i stap long kaikai o nogat, na maski long tingting tumas long dispela samting. Sapos bel bilong yumi i gat tok long yumi kaikai sampela kain kaikai, orait, yumi mas bihainim tok bilong bel, tasol sapos narapela man i laik kaikai wanem samting, na bel bilong em i orait long em i mekim olsem, orait, em samting bilong em wantaim God na yumi no ken toktok planti long samting em i laik kaikai.​—⁠Rom 14:​2-4, 12.

Na sapos tru ol inap wokim kaikai i gat samting bilong blut insait long en, ating ol i no ken mekim tumas, long wanem, ating i gat bikpela pe long mekim olsem, o i gat lo i tambuim dispela samting, o samting olsem. Wanpela nius (Food Processing, Septemba 1991) i tok: ‘Sapos sampela kampani i hatwok long tanim liklik hap samting bilong blut i go long kaikai ol i wokim, orait, ol i ken kisim narapela samting, em wanpela kain protin, na kaikai ol i wokim ol i ken kolim Kosa.’

Lo na pasin bilong planti lain, ol i save rausim blut long mit ol i laik kaikai; ol i no laikim swit bilong blut tu, na ol i no tanim wantaim kaikai. Sapos i olsem long hap bilong yu, orait, Kristen i no ken tingim tumas ol tok long kaikai i gat blut i stap long en. Tasol sapos yumi save tru ol i putim blut long kaikai o mekim wok long en bilong oraitim sik, yumi mas strong long bihainim tok bilong God long abrusim blut.