Tupela Rot Bilong Helpim Marit Long Stap Longtaim

1, 2. (a) Marit i bilong i stap hamas yia? (b) Dispela samting inap kamap olsem wanem?

TAIM God i pasim pinis namba wan man na meri long marit, i no gat wanpela samting i makim olsem tupela bai marit inap sotpela taim tasol, nogat. Adam na Iv i mas i stap wantaim inap long olgeta yia tupela i stap laip. (Stat 2:24) Lo bilong God long stretpela marit, em wanpela man na wanpela meri i pas wantaim. Sapos wanpela o tupela i pamuk, long dispela as tasol lo bilong Baibel i orait long katim marit na maritim nupela poroman.​—Matyu 5:32.

² Yu ting wanpela man na wanpela meri inap sindaun wantaim i go inap longtaim tru na i stap amamas? Ol inap, na Baibel i kamapim tupela bikpela samting, olsem ki, i helpim tupela long mekim olsem. Sapos man na meri wantaim i mekim wok long dispela tupela ki, bai ol i opim dua na painim amamas na planti blesing. Wanem ol dispela ki?

 3. I gat wanem 3-pela kain pasin bilong laikim tru narapela em ol marit i mas wok long kisim?

³ Namba wan ki, em narapela i laikim tru narapela. Baibel i kolim kain kain pasin bilong laikim tru narapela. Wanpela pasin olsem i save stap namel long tupela gutpela pren, em narapela i save laikim tru narapela. (Jon 11:3) Na wanpela em dispela pasin i stap insait long famili, olsem narapela i laikim tru narapela. (Rom 12:10) Namba tri, em pasin i stap namel long wanpela man na meri, em narapela i givim bel long narapela. (Sindaun 5:​15-20) Man marit na meri bilong em i mas wok long kisim olgeta dispela pasin bilong laikim tru narapela. Tasol i gat namba 4 kain pasin bilong laikim tru narapela, na em i bikpela samting moa.

 4. Wanem namba 4 kain pasin bilong laikim tru narapela?

⁴ Long tok ples ol i bin raitim Ol Skripsa Grik long pastaim tru, dispela namba 4 pasin bilong laikim tru narapela em a·gaʹpe. Dispela tok i stap long 1 Jon 4:​8, em i tok: “God yet em i as bilong dispela pasin bilong laikim ol arapela.” Tru tumas, “yumi save laikim ol arapela, long wanem, God i bin laikim yumi pastaim.” (1 Jon 4:19) Kristen i save wok long kisim pasin bilong laikim tru God Jehova pastaim, na bihain em i kisim pasin bilong laikim tru ol narapela man. (Mak 12:​29-31) Na dispela tok a·gaʹpe i stap tu long Efesus 5:​2, i tok: “Yupela i mas . . . laikim tru ol arapela, olsem Krais i bin laikim yumi tru na givim laip bilong em yet bilong helpim yumi.” Jisas i tok, dispela kain pasin bilong laikim tru narapela em i mak bilong ol disaipel tru bilong em: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Na dispela tok a·gaʹpe i stap tu long 1 Korin 13:13: “Bilip, na pasin bilong wetim God i mekim gut long yumi, na pasin bilong givim bel bilong yumi long ol arapela [a·gaʹpe], dispela tripela pasin bai i stap oltaim. Tasol namba wan pasin tru, em pasin bilong givim bel bilong yumi long ol arapela [a·gaʹpe].”

5, 6. (a) Bilong wanem pasin bilong laikim tru narapela em i winim pasin bilong bilip na pasin bilong wetim God i mekim gut long yumi? (b) I gat wanem sampela as na pasin bilong laikim tru narapela inap helpim marit bilong yu long i stap longtaim?

⁵ Dispela kain pasin bilong givim bel long ol narapela, olsem a·gaʹpe, olsem wanem em i winim pasin bilong bilip na pasin bilong wetim God i mekim gut long yumi? I gat ol lo i bosim dispela pasin a·gaʹpe​—em ol stretpela lo​—ol i stap long Baibel. (Song 119:105) Em i olsem yumi no tingim yumi yet tasol​—yumi tingim ol narapela na yumi laik mekim pasin long ol i stret na i gutpela long ai bilong God, maski yumi ting ol i no gutpela man inap long yumi ken mekim olsem long ol. Pasin bilong laikim tru narapela i helpim ol marit long bihainim tok bilong Baibel, olsem: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Taim pasin sori i stap namel long tupela marit, ol i save wok long kisim moa yet pasin bilong ‘laikim tru narapela [a·gaʹpe], long wanem, em i save karamapim planti sin.’ (1 Pita 4:8) Em nau, pasin bilong laikim tru narapela i save karamapim ol popaia. Em i no save rausim olgeta popaia, long wanem, i no gat wanpela man bilong graun i no save mekim rong.​—Song 130:​3, 4; Jems 3:2.

⁶ Taim tupela marit i wok long kisim pasin bilong laikim tru God na laikim tru poroman, marit bilong ol bai i stap longtaim na tupela bai stap amamas, long wanem, “pasin bilong givim bel bilong yumi long ol arapela, em i no inap pinis.” (1 Korin 13:8) Pasin bilong laikim tru narapela em i “nambawan pasin bilong mekim ol man i stap wanbel.” (Kolosi 3:​14, NW ) Sapos yu marit pinis, olsem wanem yu na poroman bilong yu inap kisim pasin bilong laikim tru narapela? Kaunim Baibel wantaim, na toktok wantaim long en. Kisim save long pasin bilong Jisas long laikim tru ol narapela, na wok strong long bihainim pasin bilong em, na kisim wankain tingting olsem bilong em, na mekim ol pasin em i bin mekim. Na tu, yutupela i mas i go long ol miting Kristen, em ol i save skulim ol manmeri long Tok Bilong God. Na beten askim God long helpim yupela long kisim dispela gutpela pasin bilong laikim tru narapela, em i wanpela pasin em spirit holi bilong God i save kamapim long man.​—Sindaun 3:​5, 6; Jon 17:3; Galesia 5:22; Hibru 10:​24, 25.

 7. Insait long marit, husat i mas tingim gut narapela?

⁷ Sapos namel long tupela marit i gat pasin bilong laikim tru narapela, orait narapela bai tingim gut narapela​—em namba tu ki bilong helpim tupela marit long i stap amamas. Pasin bilong tingim gut ol narapela i olsem “litimapim nem bilong ol.” Baibel i tokim olgeta Kristen​—ol man na meri marit tu​—olsem: “Yupela i mas strong long litimapim nem bilong ol arapela tasol.” (Rom 12:10) Aposel Pita i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin long ol.” (1 Pita 3:7) Baibel i tok, meri marit i mas “i stap aninit long man bilong en na mekim gutpela pasin long em.” (Efesus 5:33) Sapos yu laik litimapim nem bilong wanpela man, orait bai yu mekim gutpela pasin long em, na tingim gut em, na tingim ol tok em i mekim bilong kamapim tingting bilong em, na redi long mekim ol samting em i askim yu long mekim sapos i stret long mekim olsem.

8-10. I gat wanem sampela rot em pasin bilong tingim gut narapela bai helpim tupela marit long pas gut wantaim na i stap amamas?

⁸ Ol marit i laik i stap amamas ol i mas tingim gut poroman, olsem ol “i no ken lukautim ol samting bilong [ol yet] tasol. Nogat. [Ol] . . . i mas lukautim ol samting bilong [poroman bilong ol] na helpim ol long i stap gut.” (Filipai 2:4) Ol i no save tingim ol samting bilong helpim ol yet tasol​—dispela em i pasin bilong tingim ol yet. Ol i save tingim ol samting i gutpela bilong helpim poroman. Tru tumas, ol i save putim dispela samting i go pas long ol samting bilong helpim ol yet.

⁹ Sapos man o meri marit i tingim gut poroman, em bai save, sampela tingting bilong poroman bai i narapela kain long tingting bilong em. Yumi no ken ting man na meri marit i mas i gat wankain tingting long olgeta samting. Ating wanpela samting bai i bikpela samting long man, tasol em i no bikpela samting long meri bilong em, na samting em meri i save laikim, ating man bilong em i no save laikim. Tasol narapela i mas tingim gut ol tingting na laik bilong narapela, sapos ol i stret wantaim ol lo bilong Jehova. (1 Pita 2:16; skelim wantaim Filemon 14.) Na tu, narapela i mas tingim gut narapela olsem em i gat nem, olsem em i no ken mekim sampela tok o tok pilai i daunim poroman, maski tupela i stap wantaim ol narapela man o tupela tasol i stap.

¹⁰ Em nau, pasin bilong laikim tru God na laikim tru poroman, na narapela i tingim gut narapela, dispela i olsem tupela ki bilong helpim ol marit na bai marit bilong ol i ken wok gut. Olsem wanem ol marit i ken bihainim dispela pasin long sampela bikpela samting bilong i stap bilong ol?

11. Baibel i makim husat i bos insait long marit?

¹¹ Baibel i tok, God i bin wokim man i gat ol pasin bilong helpim em long i stap gutpela het bilong famili. Olsem na Jehova bai i skelim wok bilong man long lukautim meri pikinini long ol samting bilong spirit na bilong skin. Man i mas skelim gut ol samting em bai mekim, em ol i stret wantaim laik bilong Jehova, na em i mas i stap olsem gutpela piksa long bihainim pasin God i laikim. Baibel i tok: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios.” (Efesus 5:​22, 23) Tasol Baibel i tok, man tu i gat wanpela i stap het bilong em, em Man i gat namba long bosim em. Aposel Pol i tok: “Mi laik bai yupela i save . . . het bilong olgeta man em Krais, na het bilong meri em man bilong en, na het bilong Krais em God.” (1 Korin 11:3) Bilong lain long pasin bilong mekim wok olsem het bilong famili, man i gat gutpela tingting em bai bihainim pasin bilong het bilong em yet, em Krais Jisas.

12. Olsem wanem Jisas i stap olsem gutpela piksa bilong daun long God na i stap het bilong lain Kristen?

¹² Jisas tu i gat het bilong em, em Jehova, na Jisas i daun long em. Jisas i tok: “Mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.” (Jon 5:30) Jisas i stap olsem gutpela piksa tru! “God i bin wokim em paslain long olgeta narapela samting.” (Kolosi 1:​15, NW ) Em i bin kamap Mesaia. Em i bilong kamap Het bilong lain Kristen em God i bin makim ol long spirit holi, na God i makim em bilong i stap King long Kingdom bilong God, antap tru long olgeta ensel. (Filipai 2:​9-11; Hibru 1:4) Taim Jisas i stap man long graun, maski em i holim bikpela namba na em i bilong kisim ol dispela bikpela wok, em i no bin bosim strong ol man. Em i no mekim pasin olsem wanpela bos i gat olgeta strong na namba long bosim ol man, na oltaim em i tokim ol disaipel olsem ol i mas bihainim tok bilong em, nogat. Jisas i mekim gutpela pasin na pasin sori long ol man, na em i mekim moa yet long ol man i stap tarangu. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. . . . Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Matyu 11:​28-30) Ol man i amamas tru long i stap wantaim em.

13, 14. Man i save laikim tru meri bilong em, em bai mekim wanem kain pasin olsem het bilong meri, olsem Jisas i bin mekim?

¹³ Ol man marit i laik bai famili i stap amamas, ol i mas tingim pasin bilong Jisas. Gutpela man marit i no save mekim hatpela pasin olsem wanpela bos nogut, na maski em i gat namba olsem het bilong famili, em i no mekim wok nogut long en olsem wanpela bikpela stik bilong daunim meri bilong em, nogat. Em i save laikim tru meri na litimapim nem bilong em. Jisas i bin ‘daunim em yet,’ olsem na i gat as tru na man marit i mas mekim olsem, long wanem, em i no olsem Jisas​—em i save popaia. Na taim em i popaia, em i laik bai meri bilong em i isi long em. Olsem na man marit i gat pasin daun, em i save kamapim ol popaia bilong em, maski em i hatwok long tokaut olsem, “Sori tru, yu bin tok stret.” Sapos man i gat pasin daun, bai meri bilong em i no hatwok long daun long em, tasol sapos man i gat pasin antap na i gat strongpela pasin tumas, bai meri i hatwok long daun long em. Na sapos meri i daun na tingim gut man bilong em, meri tu bai tok sori taim em i mekim wanpela popaia.

¹⁴ God i bin wokim ol meri i gat ol gutpela pasin em ol inap mekim wok long en bilong kamapim amamas insait long marit bilong ol. Man marit i gat gutpela tingting, em i no ken pasim rot bilong meri long kamapim ol dispela gutpela pasin. Planti meri i gat bikpela pasin sori moa, winim ol man, na ol inap pilim tru ol samting​—em ol gutpela pasin ol meri i mas i gat bambai ol i ken lukautim gut famili na kamapim pasin bilong pas gut wantaim. Ol meri i gat save long mekim gut haus bilong ol na bai em i gutpela ples bilong famili i ken sindaun long en. Sindaun sapta 31 i stori long gutpela meri marit na i tok em i gat planti “gutpela pasin” na gutpela save bilong mekim ol wok, na famili bilong em i kisim gutpela samting tru long en. Bilong wanem? Long wanem, man bilong dispela meri i save gut olsem “meri i bihainim gutpela pasin oltaim.”​—Sindaun 31:​10, 11.

15. Olsem wanem man i ken bihainim pasin bilong Krais na laikim tru meri bilong em na tingim gut em?

¹⁵ Long sampela lain, ol i ting man i mas bosim strong meri bilong em. Olsem na sapos meri i givim wanpela askim long man bilong em, man bai ting meri i no daun long em. Sampela man long ol dispela hap ol i save mekim pasin long meri bilong ol olsem ol i wokmeri nating. Dispela wok nogut em man i mekim long namba bilong em olsem het bilong famili, dispela i mekim na em i no pas gut wantaim meri bilong em, na em i no pas gut wantaim God tu. (Skelim wantaim 1 Jon 4:​20, 21.) Tasol sampela man marit ol i no laik i go pas long wok bilong bosim famili. Ol i larim meri i mekim. Man i daun tru long Krais em i no save mekim nogut long meri bilong em o daunim meri olsem em i samting nating. Em i save bihainim pasin bilong Jisas long laikim tru ol narapela na daunim laik bilong em yet bilong helpim ol, na em i save bihainim tok bilong Pol, olsem: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” (Efesus 5:25) Jisas Krais i laikim tumas ol disaipel bilong em na em i dai bilong helpim ol. Orait gutpela man marit bai wok strong long bihainim dispela pasin bilong Krais long daunim laik bilong em yet, na em bai wok long painim rot bilong helpim meri bilong em, na em i no subim meri long mekim bikpela wok tumas. Taim man i daun long Krais na em i bihainim pasin bilong Krais na i laikim tru meri bilong em na tingim gut em, orait dispela bai kirapim meri long daun long em.​—Efesus 5:​28, 29, 33.

16. Meri i mas mekim wanem kain pasin long man bilong em?

¹⁶ Bihain long taim God i bin wokim Adam, God i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.” (Stat 2:18) God i bin wokim Iv olsem “helpim” bilong Adam, i no bilong resis wantaim Adam long i stap het bilong famili. Marit i no ken i stap olsem wanpela sip i gat tupela kepten. Man i mas i stap bos na mekim long pasin sori, na meri i mas laikim tru man bilong em, na litimapim nem bilong em, na amamas long i stap aninit long em.

17, 18. Olsem wanem meri inap i stap olsem gutpela helpim tru bilong man bilong em?

¹⁷ Tasol gutpela meri marit i no daun tasol long man; em i mas i stap olsem gutpela helpim bilong man, na sambai long man long ol samting man i tingting pinis long mekim. Tru, i no hatwok long meri i mekim olsem sapos em i wanbel long ol samting man i tingting pinis long mekim. Tasol maski meri i no wanbel long dispela, sapos em i wok gut wantaim man bilong em long ol samting man i laik mekim, ating gutpela samting bai kamap long dispela wok.

¹⁸ I gat ol narapela rot tu na meri inap helpim man bilong em long i stap gutpela het bilong famili. Meri i ken tok tenkyu long man taim em i go pas olsem het bilong famili, na meri i no ken sutim tok long dispela wok man i mekim, o toktok planti na bai man i ting i no gat wanpela samting em inap mekim na meri i ken amamas long en. Meri i mas save, “pasin bilong i stap belgut na i stap bel isi . . . em i gutpela moa yet long ai bilong God,” na i no long ai bilong man bilong em tasol. (1 Pita 3:​3, 4; Kolosi 3:12) Olsem wanem sapos man i no bilip? Maski em i bilip o nogat, Baibel i tok ol meri i mas “laikim tru ol man bilong ol na ol pikinini bilong ol. Na . . . bosim gut tingting bilong ol yet, na . . . i stap klin tru long ai bilong God. Na ol [i mas] save long pasin bilong lukautim gut haus bilong ol, na long mekim gutpela pasin long ol man na ol pikinini bilong ol, na long aninit long ol man bilong ol. Na sapos ol i mekim ol dispela pasin, orait ol man bai i no inap tok nogut long tok bilong God.” (Taitus 2:​4, 5) Sapos wanpela samting i kamap na bel bilong meri i gat tok long en, ating man bai tingim gut tok bilong meri sapos meri i mekim long pasin isi na pasin daun. Sampela man i no bilip, ol i bin ‘lukim gutpela pasin bilong meri bilong ol. Na maski meri i no mekim wanpela tok long ol, ol i tanim bel, long wanem, ol i lukim meri i save wokabaut stret na aninit tru long ol.’​—1 Pita 3:​1, 2, 15; 1 Korin 7:​13-16.

19. Olsem wanem sapos man i askim meri bilong em long mekim wanpela samting i brukim lo bilong God?

¹⁹ Olsem wanem sapos man i askim meri long mekim wanpela samting God i tambuim? Meri i mas save, God i nambawan Bos bilong em. Em i bihainim pasin ol aposel i bin mekim taim ol bikman bilong Jerusalem i tokim ol long brukim lo bilong God. Aposel 5:29 i tok: “Pita wantaim ol arapela aposel i bekim tok olsem, ‘Mipela i mas bihainim tok bilong God tasol. Mipela i no ken bihainim tok bilong ol man.’ ”

20. Long wanem taim em i bikpela samting long laikim tru poroman na tingim gut em?

²⁰ Pasin bilong laikim tru poroman na tingim gut em, dispela i bikpela samting tu long taim tupela marit i toktok wantaim. Man i laikim tru meri bilong em, em i save toktok wantaim meri long ol wok samting meri i bin mekim, na ol hevi bilong em, na tingting bilong em long sampela samting. Dispela i save helpim gut meri. Taim man i lusim hap taim bilong toktok wantaim meri na em i putim gut yau long ol tok meri i mekim, man i kamapim olsem em i laikim tru meri bilong em na tingim gut em. (Jems 1:19) Sampela meri i tok, man bilong ol i no save toktok wantaim ol. Sori tru long dispela samting. Tru, long nau sampela man marit i save wok planti aua long ples wok, na ol hevi bilong mani i mekim na sampela meri marit tu i mas mekim wok mani. Tasol man na meri marit i mas makim hap taim bilong toktok wantaim. Sapos nogat, ating bihain bai tupela i ting narapela i no gat wok long kisim helpim long narapela. Dispela pasin inap kamapim sampela bikpela hevi sapos bihain ol i pilim olsem ol i mas i go painim wanpela poroman em inap putim yau long ol hevi bilong ol, tasol em i no poroman tru bilong ol.

21. Olsem wanem pasin bilong mekim gutpela tok bai helpim tupela marit long i stap amamas?

²¹ Pasin bilong man na meri marit long toktok wantaim em i bikpela samting. “Gutpela tok . . . i swit moa na i save strongim bodi bilong ol manmeri.” (Sindaun 16:24) Maski poroman i bilip o nogat, tok bilong Baibel i stret yet long bihainim, em i tok: “Oltaim yupela i mas mekim gutpela tok tasol, em olkain tok ol man i save laik long harim.” (Kolosi 4:6) Taim wanpela marit i bin painim sampela hevi o hatwok long wok bilong em, orait sapos poroman i givim sampela gutpela tok long em bilong mekim gut bel bilong em, dispela inap helpim em tru. “Sapos man i autim klia tru wanpela gutpela tingting, orait tok bilong en i olsem gutpela piksa ol i wokim long gol na bilasim long silva.” (Sindaun 25:11) Nogut man i toktok strong na nek bilong em i olsem em i kros, na em i tokim poroman: “Pasim dua!” Tasol sapos em i mekim “gutpela tok” isi olsem, “Plis yu ken pasim dua?” dispela kain tok bai i gutpela moa, a?

22. Tupela marit i mas i gat wanem kain tingting na bai tupela inap holim strong pasin bilong toktok gut wantaim?

²² Tupela marit inap toktok gut wantaim sapos ol i mekim gutpela tok isi, na pes bilong tupela i olsem narapela i sori long narapela, na mekim gutpela pasin long poroman, na pilim tingting bilong em, na mekim pasin isi long em. Sapos man na meri i wok strong long holimpas pasin bilong toktok gut wantaim, tupela bai kamapim bel bilong ol, na narapela bai mekim gut bel bilong narapela na helpim em long taim bilong hevi. Baibel i tok long “strongim bel bilong ol man” i stap bel hevi. (1 Tesalonaika 5:14) Sampela taim man bai stap bel hevi, na sampela taim meri bai stap olsem. Ol inap mekim gutpela tok bilong “strongim bel” bilong poroman na helpim em long kamap strong.​—Rom 15:2.

23, 24. Pasin bilong laikim tru narapela na tingim gut em, olsem wanem dispela bai helpim gut tupela marit taim tupela i no wanbel long wanpela samting? Stori long dispela.

²³ Sapos tupela marit i kamapim pasin bilong laikim tru narapela na tingim gut em, orait taim tupela i no wanbel long wanpela samting, tupela i no mekim olsem dispela em i wanpela bikpela hevi tru. Tupela bai wok strong bambai narapela i no ken kros nogut tru long narapela. (Kolosi 3:19) Tupela wantaim i mas tingim dispela tok: “Sapos man i belhat long yu, orait bekim tok isi long em, na bai belhat bilong en i dai.” (Sindaun 15:1) Taim poroman i kamapim ol hevi i stap long bel bilong em, yu no ken daunim em o tok em i mekim pasin nogut. Tingim ol dispela tok bilong em i olsem rot bilong pilim gut tingting bilong em. Taim yutupela i no wanbel long wanpela samting, yutupela i mas wok strong long stretim dispela hevi na bai yupela i ken kamap wanbel.

²⁴ Taim Sara i bin tokim Abraham long rot bilong stretim wanpela hevi, Abraham i no wanbel long dispela tok. Tasol God i tokim Abraham: “Yu mas bihainim tok bilong Sara.” (Stat 21:​9-12) Abraham i mekim olsem, na God i mekim gut long em. Na i wankain tu sapos meri i tokim man bilong em long wanpela samting na man i gat narapela kain tingting long en. Sapos olsem, orait man i mas putim yau na harim dispela tok pastaim. Na meri tu, em i no ken bosim tok​—em i mas putim yau long ol tok man bilong em i mekim. (Sindaun 25:24) Sapos long olgeta taim man o meri i strong long narapela i mas bihainim laik bilong em, dispela i no pasin bilong laikim tru narapela na tingim gut em.

25. Olsem wanem pasin bilong toktok gut wantaim bai helpim tupela marit long i stap amamas long ol samting bilong maritpasin?

²⁵ Pasin bilong toktok gut wantaim em i bikpela samting tu long ol samting bilong maritpasin. Sapos wanpela i tingim em yet tasol na em i no save bosim gut skin, dispela inap nogutim tru pasin bilong tupela marit long pas gut wantaim. Pasin bilong toktok gut wantaim, na isi long narapela, em i bikpela samting. Taim narapela i tingim gut narapela na i no tingim em yet tasol, orait maritpasin i no save kamapim sampela hevi namel long tupela. Long dispela samting tu, “yumi no ken ting long helpim yumi yet. Nogat. Yumi mas ting long helpim ol arapela.”​—1 Korin 7:​3-5; 10:24.

26. Tru, i gat sampela hevi i save kamap insait long olgeta marit, tasol olsem wanem pasin bilong putim gut yau long Tok Bilong God em bai helpim tupela marit long i stap amamas?

²⁶ Baibel i givim gutpela tok tru long yumi, a? Tru, i gat sampela hevi bai kamap insait long olgeta marit. Tasol taim tupela marit i daun long tingting bilong Jehova i stap long Baibel, na narapela i laikim tru narapela na tingim em, ol i ken bilip tru olsem marit bilong ol bai stap longtaim na ol bai stap amamas. Long dispela rot narapela bai litimapim nem bilong narapela, na tupela bai litimapim tu nem bilong God Jehova, em i As bilong marit.