I Gat Wanem As na Yumi Mekim Kaikai Bilong Bikpela?
“Dispela tok mi bin givim long yupela, em mi kisim long Bikpela tasol.”—1 KORIN 11:23.
1, 2. Jisas i mekim wanem long nait bilong Pasova 33 C.E.?
PIKININI man bilong Jehova i stap. Elevenpela man i ‘bin stap wantaim em long taim ol traim i bin painim em,’ ol tu i stap. (Luk 22:28) Em Fonde long apinun, Mas 31, 33 C.E. Ai bilong mun i bikpela na ating mun i lait gut long skai antap long Jerusalem. Jisas Krais na ol aposel i mekim pinis Pasova. Jisas i bin salim Judas Iskariot i go, em bai kamapim em long ol birua, tasol i no taim yet bilong ol narapela i lusim rum. Bilong wanem? Long wanem, nau Jisas i laik mekim wanpela bikpela samting tru. Em wanem samting?
2 Matyu, man bilong raitim Gutnius, em i bin i stap long dispela taim, olsem na em i ken bekim dispela askim. Em i tok: “Jisas i kisim wanpela bret, na i tenkyu long God na i brukim, na i givim long ol disaipel. Na em i tok, ‘Yupela kisim na kaikai. Dispela em i bodi bilong mi.’ Na em i kisim wanpela kap wain, na i tenkyu long God, na i givim long ol, na i tok, ‘Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong lusim sin bilong planti manmeri.’ ” (Matyu 26:26-28) Olsem wanem? Dispela samting i bin kamap, em samting bilong mekim long dispela wanpela taim tasol? Wanem mining bilong en? Em i gat mining long yumi long nau?
“Yupela i Mas Mekim Olsem”
3. Olsem wanem na samting Jisas i bin mekim long nait bilong Nisan 14, 33 C.E., em i bikpela samting?
3 Dispela samting Jisas Krais i bin mekim long nait bilong Nisan 14, 33 C.E., em i wanpela bikpela samting tru. Aposel Pol i toktok long dispela bung taim em i raitim pas long ol Kristen God i bin makim, em ol i stap long Korin we ol i save mekim yet dispela bung Jisas i bin kamapim 20 yia bipo. Tru, Pol i no bin i stap wantaim Jisas na ol 11-pela aposel long 33 C.E., tasol yumi ken ting olsem sampela aposel i bin tokim em long ol samting i bin kamap long dispela bung. Jisas tu i bin kamapim stori bilong dispela samting long em. Pol i tok: “Dispela tok mi bin givim long yupela, em mi kisim long Bikpela tasol. Dispela tok i olsem. Long nait Judas i bin putim Jisas long han bilong ol birua, long dispela nait Bikpela Jisas i kisim bret, na i tenkyu long God, na i brukim, na i tok, ‘Dispela em i bodi bilong mi, mi givim bilong helpim yupela. Yupela i mas mekim olsem bilong tingim mi.’ Na taim ol i kaikai pinis, em i kisim kap wain na i mekim wankain pasin long en. Em i tok olsem, ‘Dispela kap wain em i nupela kontrak mi mekim long blut bilong mi yet. Olgeta taim yupela i dring long dispela kap, yupela i mas mekim olsem bilong tingim mi.’ ”—1 Korin 11:23-25.
4. I gat wanem as na ol Kristen i mas mekim Kaikai Bilong Bikpela?
4 Luk, man bilong raitim Gutnius, em tu i kamapim dispela tok Jisas i bin givim long ol disaipel: “Yupela i mas mekim olsem bilong tingim mi.” (Luk 22:19) Planti man i kolim dispela bung olsem Memorial bilong tingim i dai bilong Krais. Pol i kolim dispela bung olsem Kaikai Bilong Bikpela. (1 Korin 11:20) Baibel i tokim ol Kristen long mekim dispela Kaikai Bilong Bikpela. Tasol i gat wanem as na Jisas i bin kamapim dispela bung?
I Gat Wanem As na Jisas i Kamapim?
5, 6. (a) Wanem wanpela as na Jisas i kamapim bung bilong Memorial? (b) Kolim narapela as na em i kamapim dispela Kaikai Bilong Bikpela.
5 Wanpela as na Jisas i bin kamapim Memorial, em samting bilong wanpela wok em dai bilong em i mekim. Inap long taim em i dai, em i sambai long wok king bilong Papa bilong em. Olsem na Krais i kamapim klia, Satan i man bilong giaman—Satan i bin sutim tok giaman long ol man olsem ol i save tingim skin bilong ol yet na long dispela as ol i mekim wok bilong God. (Jop 2:1-5) Jisas i stap gut long God inap long taim em i dai, olsem na i dai bilong em i bin kamapim klia olsem dispela tok bilong Satan em i giaman tasol, na i mekim gut bel bilong Jehova.—Sindaun 27:11.
6 Narapela as na Jisas i bin kamapim Kaikai Bilong Bikpela, em bilong kirapim yumi long tingim dispela samting: Long rot bilong i dai bilong Jisas—em i dai olsem man i gutpela olgeta na i no gat sin—em i “givim laip bilong em bilong baim bek planti manmeri.” (Matyu 20:28) Taim namba wan man i mekim rong long God, em i tromoi laip i gutpela olgeta wantaim ol gutpela samting bilong en. Tasol Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Taim yumi mekim Kaikai Bilong Bikpela, dispela i kirapim yumi long tingim gen bikpela pasin sori Jehova na Pikinini bilong em i bin mekim long rot bilong i dai bilong Jisas. Yumi mas tenkyu tru long dispela gutpela pasin sori bilong tupela!
Mas Mekim Long Wanem Taim?
7. Olsem wanem ol Kristen God i bin makim, ol i save kisim bret na wain long “olgeta taim”?
7 Pol i stori long Kaikai Bilong Bikpela, na em i tok: “Olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.” (1 Korin 11:26) Ol Kristen wan wan God i bin makim, ol bai kisim bret na wain bilong Memorial i go inap long taim ol i dai. Olsem na long ai bilong God Jehova na ol man, planti taim ol bai tokaut olsem ol i bilip long ofa bilong Jisas bilong baim bek ol man.
8. Dispela lain God i bin makim, ol bai mekim Kaikai Bilong Bikpela i go inap long wanem taim?
8 Dispela lain Kristen, em ol i bilong dispela lain God i bin makim, ol bai mekim Memorial bilong tingim i dai bilong Krais i go inap long wanem taim? Pol i tok, ol i mas mekim “inap long taim em i kam bek.” Ating Pol i laik tok, wok bilong kisim bret na wain em bai stap inap long taim Jisas i kam bilong kirapim bek ol disaipel bilong em God i bin makim, na em bai kisim ol i go long heven. (1 Tesalonaika 4:14-17) Dispela i stret wantaim tok Jisas i bin givim long ol 11-pela aposel i bin stap gut long em. Em i tok: “Sapos mi go redim ples bilong yupela, bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.”—Jon 14:3.
9. Wanem insait bilong tok bilong Jisas long Mak 14:25?
9 Taim Jisas i kamapim Memorial, em i stori long kap wain na em i tokim ol gutpela aposel: “Mi no ken dring wain moa inap long taim mi dringim nupela wain insait long kingdom bilong God.” (Mak 14:25) Long heven bai em i no dring wain tru, nogat; samting em i bin tingting long en, em samting wain inap makim—olsem gutpela amamas. (Song 104:15; Saveman 10:19) Jisas na ol disaipel ol bai amamas tru long stap wantaim long Kingdom na em samting ol i wetim i kamap.—Rom 8:23; 2 Korin 5:2.
10. Yumi mas mekim bung bilong Memorial hamas taim?
10 Olsem wanem? Yumi mas mekim bung bilong tingim i dai bilong Jisas long olgeta mun o wik o de? Nogat. Jisas i bin kamapim Kaikai Bilong Bikpela na ol i bin kilim em i dai long de bilong Pasova, em ol Juda i save mekim bilong “tingim” dispela taim God i bin kisim bek ol Israel long Isip long 1513 B.C.E. (Kisim Bek 12:14) Ol i bin mekim Pasova wanpela taim tasol long yia, long de 14 bilong mun Nisan bilong ol Juda. (Kisim Bek 12:1-6; Wok Pris 23:5) Olsem na yumi mas mekim bung bilong tingim i dai bilong Jisas long wankain taim olsem Pasova—olsem wanpela taim tasol long olgeta yia—yumi no ken mekim long olgeta mun o wik o de, nogat.
11, 12. Stori ol saveman i bin raitim long ol samting i bin kamap bipo i tok wanem long pasin bilong mekim Memorial?
11 Olsem na i stret yumi mekim bung bilong Memorial wanpela taim long olgeta yia, long Nisan 14. Wanpela buk i tok: “Ol i kolim ol Kristen long Esia Maina olsem Ol Man Bilong De 14, long wanem, ol i save mekim paska [Kaikai Bilong Bikpela] long namba 14 de bilong mun Nisan . . . Dispela de inap kamap long Fraide o long narapela de bilong wik.”—The New Schaff-Herzog Encyclopedia of Religious Knowledge, Volume IV, pes 44.
12 Saveman J. L. von Mosheim i stori long pasin ol man i bin bihainim namel long yia 100 C.E. i go inap 200 C.E. na em i tok, Ol Man Bilong De 14 ol i save mekim Memorial long Nisan 14, long wanem, “ol i ting ol i mas bihainim stret pasin bilong Jisas, wankain olsem ol i mas bihainim wanpela lo.” Narapela saveman i tok: “Ol sios long Esia Maina bilong Ol Man Bilong De 14 ol i bihainim pasin bilong sios long Jerusalem. Long ol yia namel long 100 C.E. na 200 C.E., taim ol i mekim Paska, ol i tingim gen i dai bilong Krais em i baim bek ol.”—Studia Patristica, Volume V, 1962, pes 8.
Samting Bret i Makim
13. Taim Jisas i kamapim Kaikai Bilong Bikpela, em i mekim wok long wanem kain bret?
13 Taim Jisas i kamapim Memorial, em i “kisim wanpela bret, na i tenkyu long God, na i brukim, na i givim long ol [aposel].” (Mak 14:22) Bret ol i kisim, em dispela bret tasol ol i bin mekim wok long en long Pasova. (Kisim Bek 13:6-10) Ol i no save kukim wantaim yis, olsem na em i no solap—em i drai na i strong na ol i mas brukim bambai ol i ken tilim long ol narapela. Taim Jisas i wokim mirakel na sampela bret i kamap planti tru inap long planti tausen manmeri i ken kaikai, yumi ken save dispela bret tu i drai na i strong, long wanem, em i bin brukim bambai ol disaipel inap tilim long ol manmeri. (Matyu 14:19; 15:36) Olsem na pasin bilong brukim bret long bung bilong Memorial, dispela i no makim wanpela bilaspasin bilong lotu, nogat.
14. (a) I gat wanem as na i stret bret bilong Memorial i no gat yis long en? (b) Yumi ken kukim wanem kain bret bilong mekim wok long en long Kaikai Bilong Bikpela?
14 Taim Jisas i kamapim bung bilong Memorial, em i stori long bret olsem: “Dispela em i bodi bilong mi, mi givim bilong helpim yupela.” (1 Korin 11:24; Mak 14:22) I stret dispela bret i no gat yis. Bilong wanem? Long wanem, yis inap makim pasin nogut, o sin. (1 Korin 5:6-8) Bret i makim gutpela bodi bilong Jisas i no gat sin long en, em i bin givim olsem ofa bilong baim bek ol man. (Hibru 7:26; 10:5-10) Ol Witnes Bilong Jehova i save tingim dispela samting na long bung bilong Memorial ol i bihainim pasin bilong Jisas na mekim wok long bret i no gat yis long en. Rot bilong wokim bret i no gat yis, i olsem: Kisim liklik hap plaua (braunpela plaua bilong wit) na tanim wantaim liklik wara. Krungutim bret long wanpela botol samting na bai bret i go braitpela nating. Kisim dis na rapim liklik gris long en na putim bret long en na kukim i go inap long taim bret i drai na i strong.
Samting Wain i Makim
15. Wanem samting i stap insait long kap em Krais i bin mekim wok long en long taim em i kamapim Memorial bilong tingim i dai bilong em?
15 Taim Jisas i tilim pinis bret i no gat yis, em i kisim wanpela kap, “na i tenkyu long God, na i givim long ol [aposel]. Na olgeta ol i dring long en.” Na Jisas i tok: “Dispela em i blut bilong mi bilong mekim kontrak. Mi kapsaitim bilong helpim planti manmeri.” (Mak 14:23, 24) Wanem samting i stap insait long kap? Em wain tru—em i no wara nating bilong grep. Taim Baibel i tok long wain, em i no toktok long wara nating bilong grep, nogat. Jisas i tok, wain tru inap mekim na “olpela skin meme” bai bruk. Na ol birua bilong Krais i bin sutim tok long em olsem em i “man bilong dring planti wain tumas.” Sapos dispela wain em wara nating bilong grep tasol, orait dispela tok ol i sutim long em bai i no gat as bilong en. (Matyu 9:17; 11:19) Taim ol i mekim kaikai bilong Pasova, ol i dring wain, em wain tru, na Krais i mekim wok long wain tru taim em i kamapim bung bilong Memorial bilong i dai bilong em.
16, 17. Wanem kain wain i stret long Memorial? Bilong wanem i olsem?
16 Retpela wain tasol i stret long samting em wain insait long kap i makim. Dispela wain i makim blut bilong Jisas em i bin kapsaitim. Em yet i bin tok: “Dispela em i blut bilong mi bilong mekim kontrak. Mi kapsaitim bilong helpim planti manmeri.” Na aposel Pita i tok: “Yupela [ol Kristen God i bin makim] i save pinis, bipo yupela i save bihainim ol pasin nogut yupela i bin kisim long ol tumbuna bilong yupela. Tasol God i bin baim bek yupela na helpim yupela long lusim ol dispela pasin. Na em i no givim ol samting bilong graun i save bagarap, olsem silva na gol, bilong baim bek yupela. Nogat. Em i baim bek yupela long blut bilong Krais. Dispela blut em i dia tumas. Krais em i olsem wanpela pikinini sipsip i no gat mak o sua samting i bagarapim skin bilong en.”—1 Pita 1:18, 19.
17 Yumi ken ting olsem taim Jisas i kirapim bung bilong Memorial, em i bin mekim wok long retpela wain ol i bin wokim long pikinini bilong rop wain ol i kolim grep. Tasol i gat sampela retpela wain bilong nau, olsem port, sherry, na vermouth, yumi no ken mekim wok long en, long wanem, ol i bin tanim wantaim strongpela dring o brandy samting. Blut bilong Jisas em inap tru long baim bek ol man, i no gat wok long bungim narapela samting wantaim. Insait long kap bilong Memorial i mas i gat retpela wain ol i no bin tanim wantaim narapela samting. Yumi ken mekim wok long retpela wain, olsem red burgundy, claret, shiraz, cabernet sauvignon, o merlot.
18. I gat wanem as na Jisas i no wokim mirakel long bret na wain bilong Memorial?
18 Taim Jisas i kamapim dispela kaikai, em i no wokim wanpela mirakel na tanim bret na wain i kamap bodi tru na blut tru bilong em, nogat. Pasin bilong kaikai mit na blut bilong man i save brukim lo bilong God. (Stat 9:3, 4; Wok Pris 17:10) Taim Jisas i kamapim dispela bung, em i gat bodi olgeta wantaim blut olgeta i stap yet. Em i givim dispela bodi olsem wanpela ofa i gutpela olgeta, na em i kapsaitim blut bilong em long apinun bilong dispela de stret, em Nisan 14. Olsem na bret na wain bilong Memorial em olsem piksa tasol, na i makim bodi na blut bilong Krais.a
Memorial—Kaikai Bilong Bung Wantaim
19. I gat wanem as na ating yumi ken mekim wok long 2-pela o 3-pela plet kap samting long Kaikai Bilong Bikpela?
19 Taim Jisas i kamapim Memorial, em i kisim wanpela kap na i tokim ol gutpela aposel long dring long dispela. Gutnius bilong Matyu i tok: “[Jisas] i kisim wanpela kap wain, na i tenkyu long God, na i givim long ol, na i tok, ‘Yupela olgeta dring long dispela.’ ” (Matyu 26:27) Ol i mekim wok long “wanpela kap” tasol—2-pela o 3-pela kap, nogat—long wanem, long dispela taim i gat 11-pela man tasol i sindaun long wanpela tebol na i no hatwok long narapela i givim kap i go long narapela. Long dispela yia 2003, planti milion manmeri bai bung long 94,000 kongrigesen bilong ol Witnes Bilong Jehova long olgeta hap na mekim Kaikai Bilong Bikpela. Bikpela lain tru bai bung long wankain nait, olsem na wanpela kap tasol i no inap long ol. Olsem na long ol bikpela kongrigesen, ol i save mekim wok long 2-pela o 3-pela kap samting bambai narapela i ken givim kap i go long narapela insait long liklik hap taim tasol. Bret tu ol ken putim long 2-pela o 3-pela plet samting. I no gat wanpela tok long Baibel i makim wanem kain stail bilong kap ol i mas yusim. Tasol kap na plet i mas stret long samting dispela bung i makim. No ken pulapim planti wain tumas long kap; nogut sampela wain i kapsait taim narapela i givim long narapela.
20, 21. Olsem wanem yumi ken tok Memorial em i wanpela kaikai bilong bung wantaim?
20 Long Israel bipo, wanpela man inap mekim wanpela kaikai, em kaikai bilong bung wantaim, long rot bilong bringim wanpela animal i kam long haus lotu we ol i kilim dispela animal i dai. Wanpela hap bilong en ol i kukim long paia long alta, na narapela hap i go long pris, na narapela hap i go long ol pikinini man bilong Aron, em ol i mekim wok pris, na man i wokim dispela kaikai, em wantaim famili bilong em ol tu i insait long dispela kaikai. (Wok Pris 3:1-16; 7:28-36) Memorial tu em i wanpela kaikai bilong bung wantaim.
21 Jehova i insait long dispela kaikai—em i bin stretim rot bilong givim ofa bilong baim bek ol man. Jisas em ofa, na ol Kristen God i bin makim, olgeta i kisim bret na wain. Ol i kaikai long tebol bilong Jehova na dispela i makim olsem ol i stap wanbel wantaim em. Olsem na Pol i tok: “Dispela kap i gat blesing bilong God, na yumi save tok tenkyu long God long en, taim yumi dring long en, em i save bungim yumi wantaim blut bilong Krais. Na dispela bret yumi save brukim, taim yumi kaikai long en, em i save bungim yumi wantaim bodi bilong Krais. I gat wanpela bret tasol, na yumi olgeta i save kaikai long dispela wanpela bret, olsem na yumi planti manmeri yumi stap wanpela bodi tasol.”—1 Korin 10:16, 17.
22. Wanem ol askim bilong Memorial i stap yet bilong yumi ken tingim?
22 Kaikai Bilong Bikpela, em dispela wanpela bung bilong lotu tasol ol Witnes Bilong Jehova i save mekim wanpela taim long olgeta yia. Dispela i stret, long wanem, Jisas i bin tokim ol disaipel: “Yupela i mas mekim olsem bilong tingim mi.” Long bung bilong Memorial, yumi save tingim i dai bilong Jisas—dai bilong em i kamapim klia olsem em i bin stap gut long wok king bilong Jehova. Na olsem yumi stori pinis, long dispela kaikai, bret i makim bodi bilong Jisas em i bin givim olsem ofa, na wain i makim blut bilong em, em i bin kapsaitim. Tasol i no planti i kisim bret na wain. Bilong wanem i olsem? Memorial i gat mining long planti milion manmeri em ol i no save kisim bret na wain? Kaikai Bilong Bikpela i gat wanem mining long yu yet?
[Futnot]
a Lukim Volium 2, pes 271, bilong buk Insight on the Scriptures, em ol Witnes Bilong Jehova i wokim.
Wanem Ol Bekim Bilong Yu?
• I gat wanem as na Jisas i bin kamapim Kaikai Bilong Bikpela?
• Yumi mas mekim Memorial hamas taim?
• Bret bilong Memorial i no gat yis long en i makim wanem samting?
• Wain bilong Memorial i makim wanem samting?
[Piksa long pes 15]
Jisas i kamapim Kaikai Bilong Bikpela