Jehova i Mekim Wok Long “Kranki Tingting” Bilong Helpim Ol Man i Bilip

“Long gutpela tingting na save bilong en, God i save olsem, long save bilong ol yet ol man bilong graun i no inap kisim save long em. Olsem na God i makim narapela rot bilong em i ken kisim bek ol, em dispela ‘kranki toktok’ mipela i save autim. Ol man i harim dispela toktok na ol i bilip long God, orait God i save kisim bek ol.”​—⁠1 KORIN 1⁠:⁠21.

 1. Jehova i save mekim wanem wok long ol samting ol man bilong graun i ting em i “kranki toktok”? Olsem wanem yumi save ol man bilong graun i no save long God, maski ol i tok ol i saveman?

JEHOVA i no save mekim wok long samting i kranki tru, tasol em i mekim wok long samting ol man bilong graun i ting em i kranki. Em i mekim olsem bilong helpim ol man i save long em na i laikim tumas em. Save bilong ol man bilong graun i no inap helpim ol long kisim save long God. Jisas i kamapim klia dispela samting, em i tok: “Stretpela Papa, ol manmeri bilong graun ol i no save long yu.”​—⁠Jon 17⁠:⁠25.

 2. Olsem wanem sampela man i ting pasin na laik bilong Jehova i wankain olsem bilong ol man? Tasol God i gat wanem laik?

² Pasin bilong Jehova na bilong ol man bilong graun i narapela narapela kain. Sampela i ting ol laik bilong God na laik bilong ol man bilong dispela graun i wankain, na ol i ting God i orait long pasin bilong dispela graun. Ol i tingim tok bilong Baibel i tok, God bai kamapim stretpela gavman na bai ol man i ken stap bel isi na amamas na kisim gutpela sindaun. (Aisaia 9:​6, 7; Matyu 6:10) Ol bikman bilong graun tu i tok, ol bai kamapim gutpela nupela taim na gutpela gavman na bai ol man i gat planti samting. Tasol Jehova i gat narapela tingting na laik. Em i laik stretim bikpela tok i bin kamap na bai olgeta man i ken save em i Nambawan Bikpela King bilong olgeta hap. Em bai mekim dispela wok long rot bilong wanpela gavman bilong heven, na dispela gavman bai pinisim olgeta narapela gavman long graun. (Daniel 2:44; KTH 4:11; 12:10) Em nau, God i no insait long wok bilong dispela graun. (Jon 18:36; 1 Jon 2:​15-17) Olsem na Baibel i tok i gat tupela kain save, em “gutpela tingting na save bilong [God],” na “ol gutpela tingting na save bilong ol saveman bilong dispela graun.”​—⁠1 Korin 1:​20, 21.

Rong Bilong Save Bilong Graun

 3. Maski ol man bilong graun i ting ol i gat bikpela save, olsem wanem ol i no inap kamapim gutpela taim?

³ Long ai bilong ol man, save bilong dispela graun i bikpela tru. Ol i gat planti tausen bikpela skul bilong lainim ol man long ol bikpela save bilong ol saveman bilong dispela graun, na i gat ol bikpela haus buk na ol buk i pulap long en na i gat stori bilong ol samting i bin painim ol man long bipo. Tasol maski ol i gat ol dispela samting bilong helpim ol, dispela nupela taim ol i tok long kamapim, em ol man bilong graun tasol bai bosim, em sin i stap long skin bilong ol na ol i save popaia, na ol i save dai tu. Olsem na dispela gavman bilong bosim nupela taim bilong ol em bai sot long planti samting, na i no ken gutpela tumas, na em bai mekim wankain rong na popaia olsem ol narapela gavman ol man bilong graun i bin kamapim long bipo, na em i no inap kamapim amamas na gutpela sindaun tru long graun.​—⁠Rom 3:​10-12; 5:12.

 4. Dispela nupela taim ol gavman i tok long kamapim, wanem samting bai bosim? Olsem na ol man bai stap olsem wanem?

⁴ Na dispela nupela taim ol i tok long kamapim, em bai stap aninit long Satan wantaim ol spirit nogut na ol bai bosim dispela nupela taim. Satan i bin paulim tingting bilong ol man bilong graun na bai “lait bilong gutnius bilong marimari na sori bilong Krais” i no ken go insait long bel bilong ol na bai ol i ken kisim bilip na tok i tru. (2 Korin 4:​3, 4; Efesus 6:12) Olsem na planti hevi i painim ol. Ol i wok long painim gutpela gavman, tasol wok bilong ol i lus lus long olgeta taim, na ol i hatwok nating, long wanem, ol i no larim God i mekim ol dispela wok, na ol i no tingim laik bilong God. (Jeremaia 10:23; Jems 3:​15, 16) Aposel Pol i tok stret taim em i tok, “long save bilong ol yet ol man bilong graun i no inap kisim save long [God].”​—⁠1 Korin 1:21.

 5. Wanem bikpela rong bilong ol man bilong dispela graun, maski ol i tok ol i gat bikpela save?

⁵ Wanem bikpela rong bilong ol man bilong graun, wantaim dispela nupela taim ol i tok long kamapim? Em i olsem: Ol i sakim wok King bilong God Jehova. Ol i no tingim em. Ol i bihainim tingting bilong ol yet long bosim ol samting. (Lukim Daniel 4:​31-34; Jon 18:37.) Baibel i tok: “Sapos yu laik kisim gutpela tingting, orait pastaim yu mas aninit long Bikpela.” (Sindaun 9:10; Song 111:10) Tasol ol bikman i no laik mekim olsem na kisim gutpela tingting. Olsem na dispela wok bilong ol bai lus nating, long wanem, sapos God i no orait long wanpela wok, em i no inap kamap gutpela.​—⁠Song 127:⁠1.

Autim Tok Bilong Kingdom​—⁠Em Gutpela Wok o Nogat?

6, 7. (a) Ol man i bihainim save bilong God ol i autim wanem tok? Ol man bilong graun i ting olsem wanem long dispela tok? (b) Ol misin i givim wanem kain save long ol man? Na dispela i helpim ol man o olsem wanem?

⁶ Tasol ol man i save long God ol i bihainim save bilong em na dispela save i bosim ol. Olsem Jisas i tok profet long en, ol i autim “dispela gutnius bilong kingdom bilong God long olgeta hap bilong graun.” (Matyu 24:14; 28:​19, 20) Yu ting dispela samting inap helpim ol man nau long dispela taim nogut bilong planti pait na hevi na pen? Ol bikpela saveman i ting nogat. Ol i ting gutpela tok bilong Kingdom i olsem “kranki toktok” na i no inap helpim ol man. Ol i ting ol man i autim tok ol i pasim rot bilong gavman long mekim wok politik bilong ol. Na ol misin tu i ting olsem. Ol i kamapim save bilong dispela graun tasol na ol i no tokim ol man long ol samting bilong helpim ol, olsem ol tok bilong nupela taim God bai kamapim, na gavman bilong Kingdom. Dispela em nambawan bikpela tok Jisas i bin autim.​—⁠Matyu 4:17; Mak 1:​14, 15.

⁷ Wanpela man (em H. G. Wells) i kamapim long ples klia rong bilong ol misin long haitim tok bilong Kingdom, na em i tok, ‘Jisas i bin mekim bikpela toktok long Kingdom bilong heven, tasol ol misin i no toktok tumas long dispela samting.’ Sapos ol man bilong nau i laik painim rot bilong i stap laip, pastaim ol i mas harim tok bilong Kingdom bilong God em i kamap pinis, olsem na i mas i gat ol man bilong autim dispela gutpela tok long ol.​—⁠Rom 10:​14, 15.

 8. Olsem wanem wok bilong autim gutpela tok bilong God em i nambawan samting bilong helpim ol man long nau? Tasol wanem samting i no inap helpim ol man?

⁸ Olsem na wok bilong autim gutpela tok bilong God em i namba wan bikpela wok bilong nau. Long wanem, sapos ol man inap harim tok bilong Kingdom ol i ken tingim na wetim gutpela samting bilong bihain, na dispela tingting bai helpim ol long i stap amamas nau long dispela taim nogut bilong “planti hevi nogut tru.” (2 Timoti 3:​1-5; Rom 12:12; Taitus 2:13) Long nau ol man i no stap bel isi, na ol i no stap laip longpela taim tumas. Tasol long nupela taim God bai kamapim, ol man bai stap laip oltaim, na ol i no ken sot long ol samting, na ol bai stap bel isi hia long graun. (Song 37:​3, 4, 11) Jisas i tok: “Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem? Bai man i givim wanem pe bilong baim bek laip bilong en?” Sapos man i no inap kisim laip long nupela taim, ol samting bilong nau i no inap helpim em, long wanem, liklik taim bai ol dispela samting i pinis. Olsem na amamas bilong dispela man i bilong nau tasol, na bihain i no gat.​—⁠Matyu 16:26; Saveman 1:14; Mak 10:​29, 30.

 9. (a) Taim wanpela man i no laik bihainim kwik Jisas, Jisas i tokim em long mekim wanem? (b) Yumi mas ting olsem wanem long dispela tok bilong Jisas?

⁹ Jisas i bin tokim wanpela man long i kam bihainim em, tasol man i tok: “Bikman, larim mi i go planim papa bilong mi pastaim.” Em i laik wet inap long papamama i go lapun na i dai pastaim, na bihain em i ken tingting long mekim wok Jisas i tokim em long mekim. Olsem na Jisas i tokim em: “Maski. Ol man i dai pinis, ol i ken planim ol lain bilong ol yet. Tasol yu go autim tok bilong kingdom bilong God.” (Luk 9:​59, 60) Ol man i gat gutpela tingting bilong God, bai ol i bihainim tok bilong Jisas na autim tok bilong Kingdom. Ol i save ol samting bilong dispela graun na ol bikman bilong en ol bai lus. (1 Korin 2:6; 1 Jon 2:17) Ol man i givim bel long wok king bilong God, ol i save God yet i mas stretim ol samting na bosim ol man na bai ol i gat gutpela sindaun. (Sekaraia 9:10) Ol man bilong graun ol i bihainim save bilong graun na ol i no bilip long Kingdom bilong God, na ol i no laik bai dispela gavman bilong heven i bosim ol, tasol ol man em save bilong God i stiaim ol ol i save mekim ol samting i helpim ol narapela man bambai ol i ken i stap laip oltaim long nupela taim Jehova i tok promis long kamapim.​—⁠Jon 3:16; 2 Pita 3:13.

‘Ol Man Bilong Lus i Ting Tok Bilong Krais i Kranki Toktok’

10. (a) Taim Pol i kamap Kristen em i mekim wanem wok? Em i ting olsem wanem long dispela wok? (b) Ol Grik bilong bipo i gat nem long wanem samting? God i ting olsem wanem long save bilong ol?

¹⁰ Jisas i helpim Sol bilong Tarsus long tanim bel na kamap aposel Pol na mekim wok bilong autim tok, na Jisas i no ting dispela wok em i kranki, na Pol tu i no ting olsem. (Filipai 2:16) Long dispela taim ol man i bin ting ol Grik i gat bikpela save, na ol Grik i hambak long dispela save bilong ol. Pol i save long tok ples Grik, tasol em i no bihainim save bilong ol Grik, long wanem, ol dispela save i bilong graun tasol na i olsem kranki save tasol long ai bilong God.a Pol i bihainim save i kam long God, na dispela save i kirapim em long raun long haus bilong ol man na autim gutpela tok long ol. Krais Jisas i nambawan man bilong autim tok, na em i lainim Pol long mekim wankain wok.​—⁠Luk 4:43; Aposel 20:​20, 21; 26:​15-20; 1 Korin 9:16.

11. Pol i tok wanem long wok bilong em long autim tok na long save bilong ol man bilong graun?

¹¹ Pol i stori long wok bilong em long autim tok na em i tok: “[Krais] i . . . salim mi bilong autim gutnius. Na mi no ken autim long kain smatpela tok ol saveman i save mekim. Nogat. Nogut mi mekim diwai . . . bilong Krais em i kamap olsem samting nating. Tru, ol man i laik lus, ol i save ting tok bilong [ofa Jisas i mekim] em i kranki toktok tasol. Tasol yumi manmeri God i wok long kisim bek yumi, yumi save, tok bilong diwai . . . em i strong bilong God. Buk bilong God i gat tok olsem, ‘Bai mi rausim save bilong ol man i gat gutpela tingting na bai mi pinisim save bilong ol saveman.’ Orait nau bai yumi tok wanem long ol gutpela tingting na save bilong ol saveman bilong dispela graun? . . . God i bin mekim olgeta save bilong ol man bilong dispela graun i kamap olsem kranki toktok tasol. Long gutpela tingting na save bilong en, God i save olsem, long save bilong ol yet ol man bilong graun i no inap kisim save long em. Olsem na God i makim narapela rot bilong em i ken kisim bek ol, em dispela ‘kranki toktok’ mipela i save autim. Ol man i harim dispela toktok na ol i bilip long God, orait God i save kisim bek ol.”​—⁠1 Korin 1:​17-21.

12. Jehova i gat lain bilong autim “kranki toktok,” na dispela wok i mekim wanem? Ol man i laikim dispela tok ol bai mekim wanem?

¹² Em nau, ol dispela man em ol man bilong graun i ting ol i longlong man, Jehova i makim ol bilong mekim wok bilong em long autim tok. Long rot bilong “kranki toktok” ol i autim, God i kisim bek ol man i bilip. Jehova i stretim rot bambai ol man bilong autim dispela “kranki toktok” ol i no inap litimapim nem bilong ol yet, na ol narapela man i no inap litimapim nem bilong ol dispela man i bin autim tok long ol. God i mekim olsem bambai “i no gat wanpela man i ken litimapim nem bilong em yet long ai bilong God.” (1 Korin 1:​28-31; 3:​6, 7) Tru, dispela man bilong autim tok i mekim bikpela wok, tasol dispela tok em i autim, em dispela tok yet i helpim man, long wanem, sapos man i bilip long dispela tok, bai God i kisim bek em. Ol man i laik tru long kisim “gutpela tingting na save i kam long God,” ol i no inap sakim tok bilong man i autim tok long ol, maski dispela man i olsem longlong man na em i olsem man nating tasol, na ol man i mekim nogut long em, na em i save go long ol haus na autim tok. Ol man i gat pasin daun ol bai harim tok bilong man i autim tok bilong Kingdom, long wanem, Jehova yet i givim dispela wok long em, na em i mekim dispela wok long nem bilong God. Ol bai ting, tok dispela man i autim o i stap long ol buk samting em i tilim, dispela tok i bikpela samting.​—⁠Jems 3:⁠17; 1 Tesalonaika 2:⁠13.

13. (a) Ol Juda na Grik i ting olsem wanem long tok bilong Krais i dai long diwai? (b) Wanem kain man i no planti bilong ol i laik kamap lain bilong Krais? Bilong wanem ol i no laik?

¹³ Na Pol i tok: “Ol Juda i save strong tumas long lukim ol mirakel, na ol Grik i wok strong long kisim gutpela tingting na save. Tasol mipela i save autim tok bilong Krais i dai pinis long diwai . . . , na dispela tok i olsem tok nogut long tingting bilong ol Juda. Na ol Grik i ting dispela em i kranki toktok tasol. Tasol yumi ol manmeri i bin harim singaut bilong God, yumi Juda na Grik wantaim, yumi save, Krais em i strong bilong God, na em i save bilong God. Ol man bilong graun i save ting olsem, sampela tingting bilong God i kranki tru. Tasol dispela tingting i winim tru save bilong ol man. Na ol i save ting, sampela pasin bilong God i soim olsem God i no gat strong. Tasol ol dispela pasin bilong en i gat bikpela strong na i winim tru strong bilong ol man. Ol brata, yupela i mas tingim taim . . . yupela i kamap Kristen. Planti bilong yupela i no bin i stap olsem saveman long ai bilong ol man bilong dispela graun. Na planti bilong yupela i no bin i gat strong. Na planti bilong yupela i no bilong ol lain famili i gat biknem. Tasol ol man God i makim, em ol man i gat kranki tingting long ai bilong ol arapela man, na long dispela pasin God i semim tru ol saveman bilong dispela graun. Na ol man ol arapela i save lukim olsem man i no gat strong, em God i bin kisim bilong semim ol man i gat strong.”​—⁠1 Korin 1:​22-27; Aisaia 55:​8, 9.

14. (a) Ol man i ken lukim wanem samting bilong ol Witnes na bai ol i ken bilip? (b) Bilong wanem Pol i no laik amamasim ol Grik na kamapim save bilong dispela graun?

¹⁴ Ol Juda i askim Jisas long wokim mirakel. (Matyu 12:​38, 39; 16:⁠1) Tasol Jisas i no laik. Na ol Witnes Bilong Jehova tu i no gat ol mirakel samting bilong soim long ol man na bai ol i ken bilip. Tasol ol man i ken lukim wok bilong ol Witnes long autim tok, olsem Baibel i tok long Aisaia 61:​1, 2; Mak 13:10; Kamapim Tok Hait 22:17. Ol Grik i bin bihainim save bilong dispela graun. Pol tu i gat dispela save, tasol em i no bihainim na bai ol Grik i ken laikim em, nogat. (Aposel 22:⁠3) Em i raitim na mekim tok long tok Grik bilong ol man nating, na i no bilong ol saveman bilong ol Grik. Em i tokim ol Korin: “Ol brata, taim mi bin i kam long yupela na mi autim tok hait bilong God long yupela, mi no bin mekim ol kain kain bikpela toktok olsem ol saveman i save mekim. . . . Tok mi bin mekim na gutnius mi bin autim, em mi no mekim long pasin bilong ol saveman, bai bikpela save bilong mi i ken senisim tingting bilong yupela. Nogat. Mi bin soim strong bilong Holi Spirit long yupela. . . . Long wanem, mi no laik bai save bilong man i kamapim bilip bilong yupela. Nogat. Mi laik bai strong bilong God tasol i kamapim dispela bilip.”​—⁠1 Korin 2:​1-5.

15. Pita i givim wanem tok long ol man i tok bilas long gutpela tok bilong Kingdom? Olsem wanem taim bilong Noa i wankain olsem bilong nau?

¹⁵ Long nau sampela man i tok bilas long gutpela tok long God i laik kamapim nupela taim na long pasin bilong dispela graun bai pinis. Tasol ol i mas harim tok bilong Pita, em i tok, samting bai painim ol olsem i bin kamap long taim bilong Noa na “bikpela tait i karamapim dispela graun, na graun i bagarap olgeta.” (2 Pita 3:​3-7) Noa i no bin wokim bot tasol, nogat. Em i mekim narapela wok tu. Taim God i salim bikpela tait wara em i lukim Noa, “em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut.” (2 Pita 2:⁠5) Ol narapela i kisim bagarap, maski ol i gat bikpela save bilong graun. Ol i bin ting tok bilong Noa i krankitok. Long nau sampela i mekim wankain pasin long ol trupela Kristen, long wanem, Jisas i tok, taim bilong yumi i wankain olsem taim bilong Noa. Tasol tok bilong Kingdom ol dispela Kristen i autim i no tok nating. Dispela tok bai mekim wankain wok olsem tok Noa i bin autim​—⁠em bai helpim ol man bilong autim dispela tok na em bai helpim ol man i harim na bilip long en, na bai ol i ken abrusim bagarap na i stap laip oltaim!​—⁠Matyu 24:​37-39; 1 Timoti 4:16.

‘Kamap Longlong Man Pastaim na Bai Yu Kamap Saveman’

16. Long Armagedon, olsem wanem long ol save bilong dispela graun? Husat tasol bai winim Armagedon na stap long nupela taim?

¹⁶ Klostu nau, long taim bilong Armagedon, God Jehova bai bagarapim ol dispela save bilong graun. Em bai bagarapim “save bilong ol saveman” ol i tok ol bai kamapim nupela taim long graun. Liklik taim “Bikpela de bilong God I Gat Olgeta Strong” bai bagarapim na pinisim ol bikpela save bilong ol man bilong dispela graun. (1 Korin 1:19; KTH 16:​14-16) Ol i tok, gutpela tok bilong Kingdom i olsem krankitok, tasol ol man i bihainim dispela ‘krankitok’ ol tasol bai winim Armagedon na i stap laip long nupela taim God bai kamapim.

17. Olsem wanem ol Witnes i kamap olsem ol “longlong man”? Tasol ol i strong long mekim wanem?

¹⁷ Spirit bilong Jehova i stiaim ol Witnes bilong em, na ol i no sem long autim tok ol man i kolim “kranki toktok.” Ol i orait long i stap olsem “longlong man” long ai bilong ol man bilong graun. Ol i kamap olsem taim ol i autim gutpela tok bilong Kingdom, na long dispela rot ol i kamap saveman tru, olsem Pol i tok: “Sapos wanpela man namel long yupela em i save long ol samting bilong dispela graun na em i tingting olsem, ‘Mi gat gutpela save tru,’ orait mobeta em i kamap longlong man pastaim, na bai em i ken kamap saveman tru.” (1 Korin 3:​18-20) Lain bilong Jehova i autim tok na ol i save dispela wok inap helpim ol man long kisim laip, na ol bai mekim dispela wok i go inap long taim ol save bilong dispela graun bai i pinis long Armagedon. Klostu nau God Jehova bai stretim bikpela tok i bin kamap long wok king bilong em na bai ol man i ken save em i King bilong heven na graun, na em bai givim laip oltaim long ol man i harim “dispela ‘kranki toktok’ ” na “ol i bilip long” en.

[Ol Futnot]

Bai Yu Bekim Olsem Wanem?

◻ I gat wanem tupela kain save?

◻ Wanem rong bilong save bilong ol man bilong graun?

◻ Bilong wanem wok bilong autim gutpela tok bilong kingdom i gutpela wok bilong mekim long nau?

◻ Wanem samting liklik taim bai painim ol save bilong graun?

◻ Bilong wanem ol Witnes Bilong Jehova i no sem long autim tok ol man i ting em i “kranki toktok”?

[Piksa long pes 23]

Ol Grik i laikim save bilong ol man bilong graun tasol, na ol i ting tok bilong Pol i krankitok