Mekim Wok Na i No Bel Hevi

1-3. (a) Sampela i save pilim olsem wanem long ol samting ol i mekim na ol samting ol i no bin mekim? Ol rong yumi bin mekim long bipo inap mekim wanem long yumi? (b) Yumi inap kisim wanem skul long pasin bilong Pol?

WANPELA saveman, J. G. Whittier i tok, taim man i bel hevi tru em i save mekim kain tok olsem, “mobeta sapos mi bin.” Ol man i save mekim dispela kain tok taim ol i tingim samting inap kamap long laip bilong ol sapos ol i bin mekim narapela disisen. Yumi olgeta inap tingim ol samting yumi mekim pinis, tasol yumi pilim olsem i gutpela moa sapos yumi bin mekim narapela samting. Tasol oltaim sampela i save bel hevi long ol samting ol i bin mekim o ol i no bin mekim. Olsem wanem? Yu bel hevi long sampela samting yu bin mekim?

² Sampela man i bin mekim ol bikpela rong o mekim ol samting i nogut tru. Sampela narapela i tingting planti olsem ol disisen ol i mekim i gutpela o nogat. Sampela inap lusim pasin bilong tingting planti long ol samting ol i bin mekim bipo. Na sampela i save pilim nogut long ol disisen ol i bin mekim na ol i save tok, ‘Wai na mi bin mekim olsem?’ (Sng. 51:3) Yu pilim olsem wanem? Yu laik mekim gut wok bilong God na no ken tingting planti long ol rong yu bin mekim? Yu ting Baibel i gat stori bilong wanpela em kain samting olsem i bin painim em? Yes i gat wanpela, em aposel Pol.

³ Pol i bin mekim ol bikpela rong, na tu, em i bin mekim ol gutpela disisen. Em i bel hevi tru long ol rong em i bin mekim, tasol em i lain tu long putim tingting olgeta i go long mekim wok bilong God. Yumi ken skelim ol samting yumi inap lainim long pasin bilong em.

 4. Aposel Pol i bin mekim wanem na bihain em i bel hevi long dispela?

⁴ Taim Pol i stap olsem wanpela yangpela Farisi na ol i kolim nem bilong em olsem Sol, em i mekim ol samting em bihain em i bel hevi long en. Olsem: Em i bin mekim nogut tru long ol disaipel bilong Krais. Baibel i tok bihain stret long ol i bin kilim i dai Stiven, “Sol i kirap long mekim nogut tru long ol manmeri bilong kongrigesen. Em i go long ol haus, na pulim ol man na meri i kam ausait, na putim ol long kalabus.” (Apo. 8:3) Albert Barnes, em wanpela tisa bilong Baibel, em i tok pasin bilong “mekim nogut tru” long narapela i makim olsem Sol i birua tru long kongrigesen “olsem wanpela wel animal.” Sol i givim bel tru long lotu Juda, na em i bilip strong olsem God i laik bai em i bagarapim kongrigesen Kristen. Olsem na em i mekim nogut tru long ol Kristen na tok long kilim i dai “ol man na meri.”—Apo. 9:1, 2; 22:4.a

 5. Wanem samting i kamap na Sol i no mekim nogut moa long ol disaipel bilong Jisas na em i kirap long autim tok bilong Krais?

⁵ Bihain, Sol i laik go long Damaskus na kisim ol Kristen long ol haus bilong ol na pulim ol i go long Jerusalem na bai nambawan kot bilong ol Juda i givim strafe long ol. Tasol Jisas, em Het bilong kongrigesen Kristen, em i pasim dispela samting long kamap. (Efe. 5:23) Taim Sol i stap yet long rot i go long Damaskus, Jisas i kamap long em na bikpela lait long heven i pasim ai bilong em na em i no inap lukluk. Jisas i salim em i go long Damaskus na wet long kisim sampela tok moa. Yumi save long samting i kamap bihain long dispela.—Apo. 9:3-22.

6, 7. Wanem ol samting i kamapim klia olsem Pol i luksave olsem em i bin mekim ol bikpela rong?

⁶ Taim Pol i luksave olsem samting em i mekim i no stret, em i lusim pasin bilong mekim nogut long ol disaipel bilong Krais na em i kirap long autim tok bilong Krais. Maski i olsem, Pol i no lusim tingting long ol samting em i bin mekim. Bihain em i tok long em yet olsem: “Yupela i harim pinis tok long pasin mi bin bihainim bipo long lotu Juda, olsem mi bin wok long mekim nogut tru long kongrigesen bilong God na mi traim long bagarapim olgeta.” (Gal. 1:13) Em i kolim gen ol samting em i bin mekim taim em i rait i go long ol Kristen long Korin, Filipai, na long Timoti. (Ritim 1 Korin 15:9; Fili. 3:6; 1 Tim. 1:13) Pol i sem tru long ol samting em i bin mekim, tasol em i no giaman olsem ol dispela samting i no bin kamap. Em i luksave olsem em i bin mekim ol bikpela rong.—Apo. 26:9-11.

⁷ Wanpela saveman bilong Baibel, em Frederic W. Farrar, em i tok taim yumi tingim olsem wanem Pol i bin mekim nogut tru long ol Kristen, yumi inap pilim bikpela bel hevi bilong Pol, na tu, yumi inap tingim olsem wanem ol narapela i sutim tok long em. Taim Pol i go visitim ol kongrigesen na long namba 1 taim ol brata i bungim em, ating ol i tok: ‘Yu Pol, a? Yu tasol i bin mekim nogut long mipela!’—Apo. 9:21.

 8. Pol i bin pilim olsem wanem long pasin marimari na pasin laikim bilong Jehova na Jisas? Stori bilong Pol i skulim yumi long wanem samting?

⁸ Pol i luksave olsem em inap mekim wok aposel, long wanem, God i soim bikpela pasin helpim long em. Em i bin raitim 14-pela pas, na insait long ol dispela pas em i kolim bikpela pasin helpim bilong God inap olsem 90 taim—em i kolim dispela pasin planti taim moa winim ol narapela man bilong raitim Baibel. (Ritim 1 Korin 15:10.) Pol i tenkyu tru olsem God i marimari long em, na em i laik soim tenkyu bilong em. Olsem na taim em i mekim wok bilong God, em i mekim bikpela wok moa winim ol arapela aposel. Yumi kisim wanem skul long pasin bilong Pol? Sapos yumi bilip long ofa bilong Jisas, autim ol rong bilong yumi, na lusim ol pasin nogut, Jehova bai redi long lusim ol rong bilong yumi, maski em ol bikpela rong tru. Olsem na sapos yu ting olsem ol rong bilong yu i bikpela tru na ofa bilong Krais long baim bek man i no inap helpim yu, orait tingim stori bilong Pol. (Ritim 1 Timoti 1:15, 16.) Maski Pol i bin mekim nogut long Jisas, em i tok olsem Jisas i laikim em na i dai bilong helpim em. (Gal. 2:20; Apo. 9:5) Pol i luksave olsem em i mas givim bel tru long mekim wok bilong God bambai em i no ken bel hevi long wanpela samting. Olsem wanem? Dispela i givim sampela skul long yu?

9, 10. (a) Wanem ol samting inap mekim yumi bel hevi? (b) Bilong wanem i no gutpela long wari oltaim long ol rong yumi bin mekim long bipo?

⁹ Olsem wanem? Yu bin mekim sampela samting na nau yu bel hevi long dispela? Yu tingting olsem i gutpela sapos yu bin lusim taim bilong yu long mekim ol samting we i bikpela samting moa? Yu bin mekim ol samting we i bagarapim ol narapela? O ating yu bin mekim wanpela samting na nau yu tingting olsem i gutpela sapos yu bin mekim narapela samting. Yu inap mekim wanem sapos yu pilim olsem?

¹⁰ Sampela man i save bel hevi oltaim! Ol i save mekim ol yet i bel hevi taim ol i tingim tingim ol rong ol i bin mekim. Yu ting yu bai stretim wanpela hevi sapos yu bel hevi oltaim? Nogat tru! Pasin bilong wari oltaim bai pinisim taim na strong bilong yu. No ken wari i stap, mekim ol samting bilong helpim yu long stretim hevi. Yu ken tok sori long man em yu bin rongim, na traim long kamapim pasin wanbel namel long yutupela. Tingim samting i kirapim yu long mekim dispela rong, na dispela bai helpim yu long abrusim dispela pasin. Sampela taim yu mas karim hevi bilong rong yu bin mekim. Tasol sapos yu wari oltaim long ol rong yu bin mekim bipo, dispela i no inap helpim yu. Dispela bai mekim na yu no inap givim bel olgeta long mekim wok bilong God.

11. (a) Yumi mas mekim wanem sapos yumi laik bai God i soim pasin marimari na pasin laikim long yumi? (b) Olsem Baibel i kamapim, yumi mas mekim wanem bambai yumi no ken bel hevi long ol rong yumi bin mekim bipo?

¹¹ Sampela i pilim olsem ol i bin mekim ol narapela kain rong, olsem na ol i no gutpela inap long God i ken marimari long ol. Ol inap pilim olsem ol i bin mekim ol bikpela rong tru, o ol i bin mekim planti rong. Tasol maski ol i bin mekim wanem ol rong long bipo, ol i ken tokaut long ol dispela rong, senisim pasin bilong ol, na askim God long fogivim ol. (Apo. 3:19) Jehova inap soim pasin marimari na pasin laikim long ol, wankain olsem em i bin mekim long planti arapela. Jehova bai lusim rong bilong ol man husat i gat pasin daun, pasin bilong tok tru, na ol i sori tru long ol rong ol i bin mekim. Olsem: God i bin lusim rong bilong Jop taim Jop i tanim bel long ol rong em i bin mekim. (Jop 42:6) Baibel i tokim yumi long ol samting yumi mas mekim bambai yumi no ken bel hevi long ol rong yumi bin mekim bipo, na yumi ken stap bel isi. Baibel i tok: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” (Snd. 28:13; Jems 5:14-16) Yumi mas tokim God long ol rong yumi bin mekim, beten askim em long lusim rong bilong yumi, na mekim olgeta samting yumi inap mekim bilong soim olsem yumi sori tru long ol rong yumi bin mekim. (2 Kor. 7:10, 11) Taim yumi mekim olsem, Jehova em man bilong “lusim sin,” em bai marimari long yumi.—Ais. 55:7.

12. (a) Olsem wanem yumi ken bihainim pasin bilong Devit taim maus bilong bel i kotim yumi? (b) Bilong wanem Baibel i tok Jehova i “bel hevi”? Olsem wanem bekim bilong dispela askim i strongim yumi? (Lukim blok.)

¹² Beten em nambawan rot we God inap helpim yumi. Long wanpela gutpela song em Devit i mekim, em i tok em i bilip olsem Jehova i bin bekim beten bilong em. (Ritim Song 32:1-5.) Paslain long Devit i tokim God long rong em i bin mekim, bel bilong em i kotim em na em i bel hevi tru. Em i tingting planti, sik, na bel hevi i daunim em. Tasol bihain long Devit i tokim God long rong bilong em, long dispela taim God i lusim rong bilong Devit na em i no bel hevi moa. Jehova i bekim ol beten bilong Devit. Em i givim bel isi long Devit na Devit i wok yet long bihainim stretpela pasin. Olsem tasol, sapos yu wari long ol rong yu bin mekim, orait yu mas beten askim Jehova long lusim ol rong bilong yu, na wok strong long senisim pasin bilong yu. Na yu mas bilip olsem Jehova i harim beten bilong yu na em i lusim pinis rong bilong yu.—Sng. 86:5.

13, 14. (a) Long nau yumi mas putim tingting bilong yumi long wanem ol samting? (b) Wanem ol askim bai helpim yumi long tingim ol samting yumi wok long mekim long nau?

¹³ Em tru olsem ol samting i kamap bipo inap givim skul long yumi, tasol yumi no ken wari oltaim long en. Yumi mas putim tingting bilong yumi long ol samting i wok long kamap long nau na bai kamap long bihain. Askim yu yet olsem: ‘Sampela yia bihain, mi bai bel hevi long ol disisen mi mekim long nau? Mi bai tingting olsem i gutpela sapos mi bin mekim narapela samting? Mi mekim gut wok bilong God bambai mi no ken bel hevi long bihain?’

¹⁴ Taim bilong traipela hevi tru i kam klostu pinis. I gutpela long askim yu yet olsem: ‘Mi inap long mekim planti samting moa long wok bilong God? Mi inap mekim wok painia? Wanem samting i pasim mi long winim ol mak bilong kamap kongrigesen sevan? Mi wok long mekim olgeta samting mi inap mekim bilong kisim ol nupela pasin? Mi bihainim ol pasin we bai mekim na Jehova i orait long mi inap stap long nupela taim?’ No ken wari long ol samting yu no bin mekim, mobeta yu tingim ol samting yu mekim long nau, na givim bel olgeta long mekim wok bilong Jehova. Long nau, yu mas mekim ol disisen em yu no inap bel hevi long en long bihain.—2 Tim. 2:15.

15, 16. (a) Planti i bin lusim wanem ol samting bambai ol i ken givim bel olgeta long mekim wok bilong Jehova? (b) Bilong wanem yumi no ken bel hevi long ol samting yumi bin lusim bambai yumi inap mekim wok bilong God?

¹⁵ Yu bin lusim sampela samting bambai yu ken mekim wok bilong Jehova fultaim? Ating yu bin lusim wanpela gutpela wok o wok bisnis bambai yu inap mekim bikpela wok moa long wok bilong Jehova. O ating yu no laik marit, o yu marit na yu no laik kamapim pikinini bambai yu inap mekim wok long Betel, mekim wok konstraksen long narapela kantri, mekim wok sekit, o wok misineri. Yu ting yu mas bel hevi long ol dispela disisen, long wanem, yu kamap lapun nau? Yu ting i no stret long yu bin mekim disisen long lusim sampela samting bilong yu yet, o yu bin mekim ol dispela disisen long taim i no stret? Nogat tru!

¹⁶ Yu bin mekim ol dispela disisen, long wanem, yu laikim tru Jehova na yu laik helpim ol narapela tu long mekim wok bilong em. No ken ting olsem laip bilong yu inap kamap gutpela moa sapos yu no mekim ol samting olsem nau yu mekim. Yu ken amamas tru long ol disisen yu bin mekim! Yu bin makim nambawan gutpela rot long mekim wok bilong Jehova. Jehova i no inap lusim tingting long ol samting yu bin lusim bambai yu inap mekim wok bilong em. Taim yu kisim “laip tru,” em laip oltaim i gutpela olgeta, em bai givim yu ol blesing i gutpela tru winim ol samting yu inap tingim!—Sng. 145:16; 1 Tim. 6:19.

17, 18. (a) Pol i bin mekim wanem na bai em i no bel hevi moa? (b) Olsem wanem yu inap bihainim pasin bilong Pol?

¹⁷ Pol i mekim wanem bambai em i no ken bel hevi moa long ol samting em i bin mekim? Pol i tok em i no tingting planti moa long ol samting em i bin mekim bipo, na em i wok strong long kisim gutpela samting long bihain. (Ritim Filipai 3:13, 14.) Pol i no tingting moa long ol rong em i mekim taim em i bin stap long lotu Juda. Em i wok strong long stap gut long God bambai em inap kisim prais bilong laip oltaim.

¹⁸ Yumi inap kisim wanem skul long tok Pol i mekim? Yumi no ken wari long ol samting i kamap bipo em yumi no inap long senisim. Yumi mas putim tingting i go long ol samting yumi inap mekim long nau na bai yumi ken kisim blesing long bihain. Tru, yumi no inap long lusim tingting olgeta long ol rong yumi bin mekim, tasol yumi no ken bel hevi yet long ol dispela rong. Yumi ken lusim tingting long ol samting i kamap bipo, givim bel olgeta long mekim wok bilong God long nau, na tingim ol gutpela samting yumi bai kisim long bihain!