Sapta 41

Taim Bilong God Long Skelim Ol Man​—⁠Gutpela Samting Bai Kamap!

Driman 15​​—⁠Kamapim Tok Hait 20⁠:​11–21:8

Stori: Ol man i kirap bek; De Bilong Kot; ol gutpela samting em nupela heven na nupela graun bai kamapim

Taim bilong truim: Taim bilong 1,000 yia

 1. (a) Taim Adam tupela Iv i mekim rong, ol i putim wanem samting i go long ol man? (b) Wanem laik bilong God i no bin senis? Olsem wanem yumi save long dispela samting?

GOD i bin wokim yumi ol man na bai yumi ken i stap oltaim. Sapos Adam tupela Iv i no bin bikhet, tupela i no ken dai. (Stat 1⁠:28; 2⁠:​8, 16, 17; Saveman 3⁠:​10, 11) Tasol taim ol i mekim rong ol i no gutpela moa, na ol i no inap i stap laip oltaim moa, na ol i putim dai i go long ol pikinini na ol tumbuna pikinini bilong ol tu, na nau dai i wok long daunim olgeta man olsem bikpela birua bilong ol. (Rom 5⁠:​12, 14; 1 Korin 15⁠:26) Tasol God i gat laik long ol man i gutpela olgeta ol i mas i stap oltaim long Paradais long graun, na dispela laik bilong God i no senis. God i gat bikpela sori long ol man, olsem na em i salim Pikinini bilong em Jisas i kam long graun bambai em i ken givim nambawan gutpela skin na laip bilong em olsem pe bilong baim bek “planti” tumbuna pikinini bilong Adam. (Matyu 20⁠:28; Jon 3⁠:16) Nau Jisas i holim dispela strong bilong ofa bilong em bilong helpim ol bilipman long kisim bek nambawan gutpela laip long Paradais long graun. (1 Pita 3⁠:18; 1 Jon 2⁠:⁠2) Olsem na i gat as tru na ol man bilong graun i ken “amamas moa yet” long dispela gutpela samting!​—⁠Aisaia 25⁠:​8, 9.

 2. Long Kamapim Tok Hait 20⁠:11 Jon i tok wanem? “Bikpela waitpela sia king” i makim wanem samting?

² Taim Satan i kalabus pinis long hul i no gat as Jisas bai kirap mekim wok king inap 1,000 yia, em dispela “de bilong [God] bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot.” (Aposel 17⁠:31; 2 Pita 3⁠:⁠8) Jon i tok: “Orait mi lukim bikpela waitpela sia king i stap, na mi lukim dispela man i save sindaun long dispela sia. Na graun wantaim skai i ranawe long em, na ol i no i stap moa.” (KTH 20⁠:11) Wanem dispela “bikpela waitpela sia king”? Em i makim sia king bilong “dispela jas, em God bilong olgeta manmeri.” (Hibru 12⁠:23) Nau God bai skelim pasin bilong olgeta man na bai em i ken save, ofa bilong Jisas bilong baim bek ol man, dispela bai helpim husat ol man.​—⁠Mak 10⁠:⁠45.

 3. (a) Sia king bilong God i “bikpela,” na dispela i makim wanem samting? Na sia king i “waitpela,” na dispela i makim wanem samting? (b) Husat bai skelim pasin bilong ol man long dispela De Bilong Kot? Tasol ol i mas bihainim wanem samting taim ol i mekim dispela wok?

³ Sia king bilong Jehova i “bikpela,” na dispela i makim olsem Jehova i gat bikpela namba na bikpela strong, na em Bikpela King. Na sia king bilong em i “waitpela,” na dispela i makim pasin bilong Jehova i stret olgeta. Em i nambawan Jas bilong ol man. (Song 19⁠:​7-​11; Aisaia 33⁠:22; 51⁠:​5, 8) Tasol em i givim wok long Krais Jisas long skelim pasin bilong ol man. “Papa i no save skelim wanpela man long kot. Olgeta wok bilong harim kot, em i givim pinis long Pikinini.” (Jon 5⁠:22) Lain 144,000 i wok jas wantaim Jisas, em “God i givim wok long ol bilong skelim pasin bilong ol manmeri . . . inap long 1,000 yia.” (KTH 20⁠:⁠4) Tasol ol bai bihainim lo Jehova yet i makim bilong skelim pasin bilong ol man long dispela De Bilong Kot.

 4. Dispela tok, “graun wantaim skai i ranawe long em,” em i makim wanem samting?

⁴ Olsem wanem “graun wantaim skai i ranawe long em”? Dispela “skai” i wankain olsem ‘skai ol i bin raunim olsem mat na i go pinis’ long taim Jisas i rausim namba 6 gris kandel i pasim buk. Dispela “skai” i makim ol gavman bilong graun, em ol “i wetim de bilong bikpela kot i kamap, na ol man i bin givim baksait long God, ol bai i bagarap olgeta.” (KTH 6⁠:14; 2 Pita 3⁠:⁠7) Na “graun” i makim ol pasin na wok ol man i kamapim na ol i stap aninit long dispela “skai.” (KTH 8⁠:⁠7) Wel animal, na ol king bilong graun, na ami bilong ol, na ol man i gat mak bilong wel animal, na ol man i lotuim piksa bilong en, taim ol dispela i kisim bagarap, i olsem ol “i ranawe.” (KTH 19⁠:​19-​21) Taim Bikpela Jas i bagarapim “graun” na “skai” bilong Satan, em bai kirapim narapela De Bilong Kot, bilong skelim pasin bilong ol man.

De Bilong Kot Bilong 1,000 Yia

 5. Taim olpela graun na olpela skai i pinis, husat i stap yet na Jehova i mas skelim pasin bilong ol?

⁵ Taim olpela graun wantaim skai i pinis, husat moa i stap na Jehova i mas skelim pasin bilong ol? I no dispela liklik hap lain bilong 144,000, long wanem, Jehova i skelim ol pinis na putim mak long ol. Sapos sampela bilong ol i stap yet long graun bihain long Armagedon, bihain liklik ol bai dai na kirap bek na go long heven, em presen bilong ol. (1 Pita 4:​17; KTH 7:​2-4) Tasol i gat planti milion manmeri moa ol i bin abrusim bagarap long taim bilong bikpela hevi, na nau “ol i sanap i stap long pes bilong sia king.” Ol i bilip long blut Jisas i bin kapsaitim bilong helpim ol, olsem na long ai bilong Jehova ol i kamap stretpela manmeri pinis. Tasol inap 1,000 yia moa Jehova bai skelim pasin bilong ol, na long dispela taim Jisas bai wok long “bringim ol i go long ol hul i gat wara i kamap, em wara bilong givim laip” long ol. Taim ol i kamap gutpela olgeta, na ol i winim pinis traim, orait, nau Jehova bai makim ol i stretpela olgeta. (KTH 7⁠:​9, 10, 14, 17) Ol pikinini i winim Armagedon, na ol pikinini em dispela ‘bikpela lain’ bai kamapim insait long taim bilong 1,000 yia, Jehova bai traim pasin bilong ol tu long taim bilong 1,000 yia.​—⁠Lukim Stat 1⁠:28; 9⁠:7; 1 Korin 7⁠:⁠14.

 6. (a) Husat dispela bikpela lain tru Jon i bin lukim? Dispela tok, “ol manmeri i gat nem na ol manmeri nating” i makim husat? (b) God i tingim planti milion manmeri i dai pinis, na taim Jisas i laik kirapim bek ol em bai mekim long wanem pasin?

⁶ Tasol Jon i lukim bikpela lain tru, winim dispela bikpela lain i bin abrusim bagarap long Armagedon. Jon i lukim planti tausen milion manmeri! Em i tok: “Na mi lukim ol manmeri i dai pinis, em ol manmeri i gat nem na ol manmeri nating, ol i sanap i stap long pes bilong sia king. Na ol ensel i opim ol buk i gat tok long pasin ol dispela manmeri i bin mekim.” (KTH 20⁠:12a) “Ol manmeri i gat nem na ol manmeri nating” i makim ol man i bin stap bipo na ol i dai insait long 6,000 yia i go pinis. Long hap bilong Baibel long “Gutnius Jon i Raitim,” Jisas i bin tok long Papa bilong em olsem: “Em [Jisas] i Pikinini Bilong Man, olsem na Papa i givim namba long em bilong kotim ol manmeri na skelim pasin bilong ol. Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5⁠:​27-​29) Em bikpela wok tru bilong Jisas​—⁠em bai tekewe dai na matmat bilong ol man ol i bin dai long dispela 6,000 yia i go pinis! God i tingim yet ol dispela planti milion manmeri, na isi isi Jisas bai kirapim bek ol na bai ol manmeri i winim Armagedon ol i ken stretim sampela hevi inap kamap, long wanem, ating pastaim ol dispela lain i kirap bek ol bai bihainim olpela pasin na tingting bilong ol, em pasin bilong skin.

Husat Bai Kirap Bek na Kamap Long Kot?

7, 8. (a) Ol bai opim wanem buk? Taim ol i opim dispela buk, wanem samting bai kamap? (b) Husat i no inap kirap bek?

⁷ Jon i tok: “Na ol i opim narapela buk tu, em buk bilong laip. Na man i sindaun long sia king i lukim tok i stap long ol dispela buk, na em i skelim pasin bilong ol manmeri i dai pinis. Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go. Na man i sindaun long sia king em i lukim pasin olgeta wan wan man i bin mekim, na em i skelim ol long kot bilong en.” (KTH 20⁠:12b, 13) Em bikpela samting tru! Jon i tok, solwara, na dai, na ples matmat bai lusim ol man i bin dai na i stap long en, na ol bai kirap. Tasol sampela nogat.a Taim Jona i bin stap long bel bilong pis insait long solwara, em i tok em i bin stap long matmat. (Jona 2⁠:⁠2) Sapos man i dai na em i kisim dispela dai long Adam, orait, yumi ken tok em i stap long matmat. Dispela tok profet i helpim yumi long bilip tru olsem Jehova i no inap lusim tingting long sampela man i bin dai.

⁸ Tasol i gat sampela i no inap kirap bek. Yumi no save hamas ol i insait long dispela lain; sampela em ol dispela saveman bilong lo na ol Farisi i bin sakim Jisas wantaim ol aposel na ol i no tanim bel, na lain bilong “man bilong sakim lo,” na ol Kristen em God i bin makim ol long spirit na ol “i pundaun na i givim baksait long God.” (2 Tesalonaika 2⁠:3; Hibru 6⁠:​4-6; Matyu 23⁠:​29-​33) Na Jisas i tok, long Armagedon ol man i gat pasin olsem bilong meme ol bai go long “paia i no save dai, em dispela paia ol i redim pinis bilong Satan wantaim ol ensel bilong en.” Dispela i makim olsem ol bai bagarap na lus olgeta, inap oltaim oltaim. (Matyu 25⁠:​41, 46) Ol dispela lain i no ken tru kirap bek!

 9. Aposel Pol i tok wanem na yumi ken ting, i gat sampela manmeri bai kirap bek em Jehova i tingim ol moa yet? Sampela bilong dispela lain ol i husat?

⁹ Tasol i gat sampela man bai kirap bek, em God i tingim ol moa yet. Aposel Pol i makim olsem taim em i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24⁠:15) Pol i toktok long ol man bai kirap bek na i stap long graun, na dispela “ol stretpela man,” em ol manmeri long bipo ol i bihainim stretpela pasin, olsem Abraham, na Rahap, na planti moa, em God i kolim ol stretpela manmeri, olsem pren bilong em. (Jems 2⁠:​21, 23, 25) Na sampela moa bilong dispela lain em ol stretpela man bilong lain arapela sipsip na ol i stap gut long Jehova na ol i dai long taim bilong yumi. Ating ol bai kirap bek kwiktaim bihain long taim dispela 1,000 yia i kirap na Jisas i stap King. (Jop 14⁠:​13-​15; 27⁠:5; Daniel 12⁠:13; Hibru 11⁠:​35, 39, 40) Taim ol dispela stretpela man i kirap bek pinis, yumi ken ting Jisas bai makim planti bilong ol long bosim sampela wok bilong kamapim gen Paradais, em wanpela bikpela wok tru.​—⁠Song 45⁠:16; lukim Aisaia 32⁠:​1, 16-​18; 61⁠:5; 65⁠:​21-​23.

10. Husat dispela “ol man nogut” bai kirap bek?

¹⁰ Tasol husat dispela “ol man nogut” em Aposel 24⁠:15 i kolim? Em ol planti planti man ol i bin stap bipo na ol i dai; planti bilong ol i bin i stap long taim “ol man i no gat save.” (Aposel 17⁠:30) Long taim ol i bin stap na long hap ol i bin stap long en i no gat rot bilong ol i ken kisim save bambai ol inap lain long bihainim laik bilong Jehova. Na ating sampela i bin harim tok i tru liklik, tasol long dispela taim ol i no bin givim bel olgeta, o ol i dai taim ol i no bin kamap strong yet inap long ol i ken dediket na baptais. Taim ol kain man olsem i kirap bek ol i mas wok yet long stretim tingting na pasin bilong ol na bai ol inap lain na mekim ol samting bambai ol i ken i stap laip oltaim.

Buk Bilong Laip

11. (a) “Buk bilong laip” em i wanem samting? Nem bilong husat i stap long en? (b) Bilong wanem Jehova bai opim dispela “buk bilong laip” long taim bilong 1,000 yia?

¹¹ Jon i toktok long “buk bilong laip.” Dispela i olsem lista i gat nem bilong ol man, sapos ol i bihainim yet laik bilong Jehova em bai givim laip oltaim long ol. Ol brata bilong Jisas em Jehova i bin makim ol long spirit, em nem bilong ol i stap long dispela buk, na ‘bikpela lain’ i winim Armagedon, na ol man bilong bipo em ol i bin i stap gut long Jehova, olsem Moses samting, nem bilong ol tu i stap long dispela buk. (Kisim Bek 32⁠:​32, 33; Daniel 12⁠:1; KTH 3⁠:⁠5) Tasol nem bilong ol dispela “man nogut” i no stap yet long dispela “buk bilong laip,” olsem na long taim bilong 1,000 yia Jehova bai opim dispela buk na bai em i ken raitim nem bilong ol dispela man long en sapos ol i bihainim tok bilong em. Ol man Jehova i no raitim nem bilong ol long dispela buk, em bai “tromoi ol tu i go daun long bikpela hul i gat paia.”​—⁠KTH 20⁠:15; lukim tu Hibru 3⁠:⁠19.

12. Ol man i mas mekim wanem na bai God i ken raitim nem bilong ol long “buk bilong laip”? Dispela Jas em Jehova i bin makim, em i mekim wanem na em i stap olsem gutpela piksa?

¹² Long dispela taim bihain, ol man i mas mekim wanem na bai God i ken raitim nem bilong ol long “buk bilong laip”? Olsem bipo Adam tupela Iv i mas bihainim tok bilong Jehova, orait ol tu i mas bihainim tok bilong Jehova. Aposel Jon i tokim ol wanlain Kristen “olgeta pasin bilong dispela graun, em ol pasin bilong bel i kirap na aigris,” ol bai i pinis, tasol “man i bihainim tok bilong God, em bai i stap oltaim.” (1 Jon 2⁠:​4-7, 17) Jisas, em dispela man Jehova i bin makim bilong mekim wok Jas, em i gutpela piksa bilong pasin bilong bihainim tok: “Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God. Dispela i mekim em i kamap nambawan man bilong bihainim tok. . . . Na em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.”​—⁠Hibru 5⁠:​8-​10.

Sampela Buk Moa Bai Op

13. Ol man i kirap bek long matmat ol i mas mekim wanem bilong kamapim long ples klia olsem ol i man bilong bihainim tok? Wanem sampela ol narapela lo tu ol i mas bihainim?

¹³ Ol man i kirap bek long matmat ol i mas mekim wanem na bai God i ken save ol i man bilong bihainim tok? Jisas i bin kolim tupela bikpela lo i winim ol narapela, em i tok: “Namba wan lo em i dispela, ‘Yupela Israel, harim gut. Bikpela em wanpela tasol em i God bilong yumi. Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.’ Na namba 2 lo em i dispela, ‘Yu mas laikim ol wantok olsem yu laikim yu yet.’ ” (Mak 12⁠:​29-​31) Na i gat ol narapela lo tu bilong Jehova ol i mas bihainim, olsem no ken stil, o tok giaman, o kilim man i dai, o pamuk.​—⁠1 Timoti 1⁠:​8-​11; KTH 21⁠:⁠8.

14. Ol bai opim wanem ol narapela buk? Wanem samting i stap long ol dispela buk?

¹⁴ Tasol Jon i tok i gat sampela buk moa bai op long taim bilong 1,000 yia. (KTH 20⁠:12) Em wanem ol buk? Sampela taim Jehova i bin kolim sampela samting ol man i mas mekim. Long taim bilong Moses Jehova i bin givim ol lo long lain Israel, na sapos ol i bihainim, ol bai stap gut. (Lo 4⁠:40; 32⁠:​45-​47) Na long taim bilong ol aposel, ol Kristen i kisim ol nupela tok bilong helpim ol bilipman long bihainim lo bilong Jehova insait long lotu Kristen. (Matyu 28⁠:​19, 20; Jon 13⁠:34; 15⁠:​9, 10) Tasol Jon i tok, taim ol man i kirap bek long matmat, Jisas bai “lukim tok i stap long ol dispela buk na skelim pasin bilong ol manmeri” long dispela ol tok. Yumi ken ting olsem ol dispela buk bai kolim ol lo na tok bilong Jehova ol man i mas bihainim long taim bilong 1,000 yia. Sapos ol i givim bel long bihainim ol lo i stap long ol dispela buk, ol inap i stap longtaim, na bihain Jehova bai orait long ol i ken i stap oltaim oltaim.

15. Taim ol man i kirap bek, wanem bikpela wok bai kamap? Yumi ken ting kirap bek bilong ol man bai wok long kamap olsem wanem?

¹⁵ Olsem na bai i gat bikpela wok tru i kamap bilong skulim ol man long ol tok na lo bilong Jehova! Long 2005 ol Witnes Bilong Jehova long olgeta hap bilong graun ol i lainim planti manmeri long tok bilong Baibel, olsem 6,061,534. Tasol taim ol man i lusim matmat na kirap bek, bikpela wok tru bai kirap bilong lainim ol planti milion milion man long ol tok bilong Baibel na ol tok i stap long ol dispela nupela buk! Olgeta bilong lain bilong God ol i mas kamap tisa na givim bel long skulim ol man. Ol man i kirap bek, taim ol i kisim save pinis, ol tu i mas kirap skulim sampela moa. Ol man i stap laip, ating ol bai amamas long bungim famili bilong ol i kirap bek na ol pren bilong ol, na ol bai skulim ol, na taim ol dispela manmeri i kisim save pinis, ol tu i ken mekim gut long sampela moa taim ol i kirap bek, na ol i ken skulim ol. (Lukim 1 Korin 15⁠:​19-​28, 58.) Long nau, winim 6 milion Witnes Bilong Jehova ol i autim tok i tru long ol man; ol i lain gut long mekim dispela wok, olsem na long taim ol man i kirap bek ol dispela Witnes bai inap tru long skulim ol.​—⁠Aisaia 50⁠:4; 54⁠:⁠13.

16. (a) Nem bilong husat i no ken i stap long buk bilong laip? (b) Husat bai kirap bek bilong “i stap laip”?

¹⁶ Jisas i bin stori long ol man bai kirap bek na i stap long graun, na em i tok, “ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot.” Dispela tupela tok “laip” na “kot” i narapela narapela, na i makim olsem ol lain i kirap bek, sapos sampela i “mekim pasin nogut” taim ol i kisim save pinis long tok bilong Baibel na tok bilong ol dispela buk, orait, ol i no inap i stap laip, na nem bilong ol i no inap i stap long buk bilong laip. (Jon 5⁠:29) Na i olsem tu long ol man, pastaim ol i bin i stap gut long Jehova, tasol long taim bilong 1,000 yia ol i lusim Jehova na ol i no stap gut moa long em. Jehova inap rausim nem bilong man long buk. (Kisim Bek 32⁠:​32, 33) Tasol sapos man i bihainim ol tok i stap long ol dispela buk, nem bilong em bai stap yet long buk bilong laip, na em i ken i stap laip. Olsem na taim em i kirap bek, em “i kirap bek” bilong “i stap laip.”

Dai na Matmat i Pinis

17. (a) Jon i stori long wanem gutpela samting? (b) “Ples bilong ol man i dai pinis,” olsem matmat, wanem taim em bai pinis? (c) Dai em Adam i putim long ol man, wanem taim Jisas bai ‘tromoi i go long bikpela hul i gat paia’?

¹⁷ Nau Jon i stori long wanpela gutpela samting! Em i tok: “Na bihain em i tromoi Dai wantaim Ples bilong ol man i dai pinis i go daun long dispela bikpela hul i gat paia. Dispela bikpela hul i gat paia em i namba 2 dai. Na olgeta manmeri, nem bilong ol i no i stap long buk bilong laip, ol i tromoi ol tu i go daun long bikpela hul i gat paia.” (KTH 20⁠:​14, 15) Taim dispela De Bilong Kot bilong 1,000 yia i pinis, “Dai wantaim Ples bilong ol man i dai pinis” i no stap moa​—⁠em pinis olgeta. Bilong wanem i mas i gat 1,000 yia bilong mekim olsem? Ol man em God i tingim ol, taim olgeta i kirap bek pinis, nau i no gat sampela moa bilong ol i stap yet long matmat. Tasol ol man i stap laip long dispela taim, sapos ol i mekim yet sampela rong ol i kisim long Adam, orait, dai i stap yet long skin bilong ol. Ol man i kirap bek long matmat na ol i bilong i stap long graun, na ol man i abrusim bagarap long Armagedon, ol i mas bihainim tok bilong ol dispela buk i go inap long strong bilong ofa bilong Jisas i tekewe ol sik na pasin bilong i go lapun na ol narapela samting Adam i bin putim long ol. Orait, nau dai em Adam i putim long ol man, na matmat tu, Jisas bai ‘tromoi i go long bikpela hul i gat paia.’ Dispela tupela samting bai pinis olgeta!

18. (a) Aposel Pol i tok wanem long gutpela wok Jisas bai mekim long taim em i stap King? (b) Taim ol man i kamap gutpela olgeta, Jisas bai mekim wanem long ol? (c) Wanem sampela samting moa bai kamap taim 1,000 yia i pinis?

¹⁸ Em nau, ol samting aposel Pol i bin stori long en long ol Korin, em i pinis. Pol i tok: “Krais i mas i stap king i go inap em i daunim olgeta birua . . . Em i pinisim pinis olgeta arapela birua, orait em bai i pinisim dai [Adam i as bilong en] tu.” Pinisim pinis, na nau wanem samting moa bai kamap? Pol i tok: “Taim olgeta samting i stap aninit long Krais pinis, orait Pikinini Bilong God bai i putim em yet aninit long God. Pastaim God i bin putim olgeta samting aninit long Pikinini bilong en,” tasol nau Jisas bai “i putim kingdom long han bilong God Papa.” (1 Korin 15⁠:​24-​28) Ofa Jisas i bin mekim bilong baim rong bilong ol man, em bai mekim wok long dispela bilong daunim dai em Adam i bin putim long ol, na taim em i mekim pinis, em bai givim gutpela lain man tru i go long Papa bilong em, Jehova. Nau 1,000 yia i pinis, na Satan i lusim kalabus, na laspela traim bai kamap na bai Jehova i ken save, nem bilong husat inap long stap oltaim long buk bilong laip. Orait, yu mas “taitim bun tru” na bai nem bilong yu i ken i stap long dispela buk!​—⁠Luk 13⁠:24; KTH 20⁠:⁠5.

[Futnot]

[Piksa long pes 298]

“Ol man nogut” i kirap bek long matmat, sapos ol i bihainim ol tok i stap long ol buk long taim bilong 1,000 yia, yumi ken ting olsem nem bilong ol tu bai stap long buk bilong laip