Ol Yangpela i Laik Save . . .

Olsem Wanem Mi Inap Abrusim Pasin Bilong Bung Wantaim Ol Poroman Nogut?

“Mi kirap bung wantaim wanpela meri long skul. . . . Em i no save kisim drak, go long ol pati nogut, o pamuk. Em i no save tok nogut, na em i save kisim ol gutpela mak long ol sabjek bilong skul. Tasol mi ken tok em i no wanpela gutpela poroman.”​​—⁠Beverly.a

BILONG wanem Beverly i mekim kain tok olsem? Em i luksave olsem dispela meri i kirapim em long insait long sampela pasin i no stret. Beverly i tok: “Taim mi wok long bung wantaim em, mi kirap ritim ol buk i stori long wok bilong spirit nogut, na tu mi raitim stori bilong ol dispela samting.”

Wanpela yangpela, nem bilong em Melanie, em tu i kirap bihainim pasin i no stret​—⁠tasol poroman i kirapim em long mekim olsem, em wanpela wanbilip Kristen! Olsem wanem yu inap save dispela man o meri inap kamap gutpela poroman? Yu ting long olgeta taim hevi bai kamap sapos yu bung wantaim wanpela em i no wanbilip? Yu ting hevi i no inap painim yu sapos yu poromanim ol wanbilip Kristen?

Olsem wanem long pasin bilong man i prenim meri o meri i prenim man? Sapos yu wok long painim wanpela poroman marit, olsem wanem yu ken save olsem pasin pren namel long yutupela inap helpim yupela long ol samting bilong spirit? Orait nau yumi ken skelim olsem wanem ol stiatok bilong Baibel inap bekim ol dispela askim.

Wanem Kain Ol Pren i Gutpela?

Beverly i save olsem wanskul bilong em i no lotuim God tru, olsem na i gutpela sapos dispela i bin pasim em long kamap pren bilong em. Tru, sapos wanpela man o meri em i no wanbilip, dispela i no mekim na trupela Kristen i tingim em olsem man o meri i no save bihainim stretpela pasin. Tasol taim ol i laik kamap pren bilong wanpela, i gat as na ol i mas was gut. Aposel Pol i tok lukaut long ol brata i stap long kongrigesen Korin long taim bilong ol aposel olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Wanem mining bilong dispela tok?

I luk olsem sampela Kristen long Korin i wok long bung wantaim lain Epikurian, em lain i bihainim Epikurus, saveman bilong Grik. Tasol Epikurus i skulim lain bilong em long bihainim savepasin, na strongim bel, bosim gut skin, na mekim stretpela pasin. Em i skulim ol tu long ol i no ken mekim ol rong long pasin hait. Olsem na bilong wanem Pol i tok lain Epikurian na ol brata insait long kongrigesen em ol i holim tingting olsem bilong lain Epikurian, ol i “man nogut”?

Lain Epikurian i no save lotuim God tru. Ol i no bilip olsem ol man i dai pinis bai kirap bek, olsem na nambawan tingting bilong ol em long painim amamas taim ol i stap laip yet. (Aposel 17:​18, 19, 32) Olsem na yumi no kirap nogut olsem sampela Kristen long Korin i kirap lusim bilip bilong kirap bek, long wanem, ol i wok long bung wantaim ol kain man olsem. Olsem na long 1 Korin sapta 15, i gat planti tok bilong kirapim gen ol Kristen long bilip long kirap bek, na tu, i gat ol tok lukaut long pasin bilong bung wantaim ol man nogut.

Dispela i skulim yumi long wanem samting? Ol man ausait tu i save kamapim ol gutpela pasin. Tasol sapos yu makim ol olsem ol gutpela pren bilong yu, tingting, bilip, na pasin bilong yu inap senis. Olsem na long namba tu pas bilong Pol i go long ol Korin, em i tok: “Ol haiden ol i narakain, olsem na yupela i no ken pas wantaim ol na wok bung wantaim ol.”​—⁠2 Korin 6:​14-18.

Fred, em i gat 16 krismas, i kisim save olsem em i savepasin long bihainim tok bilong Pol. Pastaim em i tok orait long insait long wanpela skul projek we ol sumatin i mas go long wanpela kantri i no gat planti wok bisnis samting long en bilong skulim ol pikinini. Tasol taim em wantaim ol wanskul i wok long redim ol samting bilong i go, Fred i senisim tingting. Em i tok: “Mi skelim olsem sapos mi lusim bikpela haptaim long bung wantaim ol, i stap bilong mi long ol samting bilong spirit bai bagarap.” Long dispela as Fred i lusim dispela skul projek na em i helpim ol man long narapela rot.

Ol Pren Namel Long Ol Wanbilip

Olsem wanem long pasin bilong poromanim ol narapela insait long kongrigesen Kristen? Taim Pol i raitim pas long Timoti, em i tok lukaut olsem: “Long wanpela bikpela haus i gat sampela dis samting ol i bin wokim long gol na silva na sampela ol i bin wokim long diwai na sampela ol i bin wokim long graun. Sampela i bilong mekim gutpela wok, na sampela i bilong mekim ol kain kain wok nabaut. Olsem na sapos wanpela man i rausim ol pasin nogut long laip bilong en na em i kamap klin long ai bilong God, orait em bai i stap olsem dis bilong mekim gutpela wok tru. Em bai i stap man bilong God tru, na em bai inap long helpim Bikpela bilong en. Em bai i redi long mekim olgeta kain gutpela wok.” (2 Timoti 2:​20, 21) Pol i tokaut stret olsem namel long ol Kristen tu, ating sampela i bihainim pasin nogut. Na em i kirapim Timoti long stap longwe long ol kain man olsem.

Yu ting dispela i makim olsem yu mas tingting kranki long ol wanbilip bilong yu? Nogat. Yu mas save olsem ol pren bilong yu ol i save popaia. (Saveman 7:​16-18) Sapos wanpela yangpela i save go long ol miting Kristen o papamama bilong em ol i strongpela Kristen long kongrigesen, dispela tasol i no ken mekim na yu ting olsem em bai kamap gutpela poroman.

Sindaun 20:11 i tok: “Yumi lukim pasin bilong wanpela man [o meri] na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.” Olsem na em i savepasin long skelim: Pasin bilong pas gut wantaim Jehova i stap nambawan samting long laip bilong em? I gat sampela samting i soim olsem em i kamapim tingting na pasin bilong dispela graun? (1 Korin 2:12; Efesus 2:⁠2) Olsem wanem? Pasin bilong bung wantaim em i strongim laik bilong yu long lotuim Jehova?

Sapos yu makim ol poroman em ol i laikim tru Jehova na ol samting bilong spirit, bai yu abrusim ol hevi, na tu, bai yu strong moa long mekim wok bilong God. Pol i tokim Timoti: “Yu mas wok long kisim stretpela pasin na pasin bilong bilip tru long God na pasin bilong laikim tru ol arapela na pasin bilong bel isi. Na yupela olgeta i mas mekim ol dispela pasin, yu wantaim ol man i stap klin tru long ai bilong God na i save lotu na prea long nem bilong Bikpela.”​—⁠2 Timoti 2:⁠22.

Prenim Man o Meri

Sapos yu winim krismas bilong marit na yu laik marit, yu bin tingting gut long olsem wanem ol dispela wankain stiatok i ken stiaim yu long makim poroman yu laik maritim? Planti samting i ken mekim na yu laikim dispela man o meri yu tingting long maritim, tasol bikpela samting moa em, dispela man i mas stap strong long ol samting bilong spirit.

Planti taim Baibel i tok lukaut long pasin bilong maritim man o meri i no “bilip long Bikpela.” (1 Korin 7:39; Lo 7:​3, 4; Nehemia 13:25) Tru ol man em ol i no wanbilip, ating ol i save mekim gut wok, bihainim stretpela pasin, na mekim gut long ol arapela. Tasol ol i no gat strongpela laik olsem yu long wok strong long kisim ol dispela pasin na long mekim marit bilong yu i stap strong oltaim.

Tasol man i dediket long Jehova na stap gut long em, dispela man i save wok strong long kamapim ol pasin Kristen na bihainim yet ol dispela pasin maski wanem wanem samting i painim em. Em i save olsem Baibel i tok, man o meri i pas gut wantaim Jehova em i save laikim poroman marit. (Efesus 5:​28, 33; 1 Pita 3:⁠7) Taim tupela marit i laikim tru Jehova, bai tupela wantaim i gat strongpela laik long stap gut long narapela narapela.

Yu ting dispela i makim olsem taim tupela wanbilip i marit, marit bilong ol bai stap strong? Nogat. Olsem: Sapos yu maritim wanpela husat i no strong tumas long ol samting bilong spirit, wanem samting inap kamap? Man i no stap strong long ol samting bilong spirit em i no inap sakim strong bilong dispela graun na isi isi em inap lusim kongrigesen Kristen. (Filipai 3:18; 1 Jon 2:19) Tingim ol hevi inap kamap insait long marit sapos poroman marit bilong yu i insait long pasin doti bilong dispela graun.​—⁠2 Pita 2:⁠20.

Paslain long yu poromanim man o meri bilong maritim em, tingim ol dispela samting: Ol pasin bilong dispela man o meri i soim olsem em i save tingim ol samting bilong spirit? Em i stap gutpela piksa olsem wanpela Kristen? Dispela man o meri i holim strong tok i tru bilong Baibel, o bikpela haptaim i mas lus bilong em i mas kamap strong long ol samting bilong spirit? Yu save tru olsem pasin bilong laikim Jehova em nambawan samting long laip bilong em? Sapos yu save olsem dispela man o meri i gat kain gutpela nem olsem, dispela bai helpim yu long makim gutpela poroman. Tasol bikpela samting bilong tingim, em yu mas save gut olsem dispela man o meri yu laikim, em i givim bel tru long Jehova na em bai stap olsem wanpela gutpela poroman marit bilong yu, o nogat.

Tingim tu olsem samting i pulim sampela long bung wantaim ol poroman nogut em ol samting ol i bin laikim pastaim, olsem ol amamas i no stret na ol samting i no stret long mekim. Ol yangpela em ol i stap olsem gutpela piksa insait long kongrigesen Kristen, ol i no inap insait wantaim yu long ol dispela samting. Olsem na skelim gut bel bilong yu.

Sapos yu pilim olsem yu gat wok long skulim gut bel bilong yu, yu no ken tingting planti. Yu inap lain. (Sindaun 23:12) Bikpela samting bilong tingim: Yu laikim tru wanem samting? Yu laik go klostu long ol man i mekim gutpela pasin? Jehova bai helpim yu long mekim olsem. (Song 97:10) Na taim yu skulim bel bilong yu long skelim wanem pasin i gutpela na wanem pasin i nogut, em bai isi long makim ol gutpela poroman.​—⁠Hibru 5:⁠14.

[Futnot]

[Piksa long pes 18]

Ol gutpela pren i save helpim yu long tingim ol samting bilong spirit