‘Hatwok Yupela i Save Mekim Bai No Lus Nating’
1 Em i wanpela tok i save strongim tru yumi! Hatwok yu mekim long wok bilong Jehova i no lus nating. (1 Ko 15:58) Tasol tingim ol manmeri i save wok strong tru bilong kisim nem na namba samting o bilong kisim planti samting bilong skin. Ating ol i kisim bikpela skul inap planti yia o givim bel tru long kisim planti mani kago samting. Tasol “taim nogut” i save painim ol, olsem na ating ol i no kisim nem na namba ol i gat laik long kisim, o ol i no inap kisim planti mani kago samting ol i bin tingting long kisim. Ol i olsem “wanpela man i ran i go bilong holimpas win” na hatwok bilong ol i lus nating. (Sav 1:14; 9:11) Olsem na em i bikpela samting long yumi mas wok strong long mekim dispela wanpela wok i no inap lus nating, long wanem, em bai helpim yumi inap long olgeta taim bihain!
2 Wanpela Wok i Gat As Tru: Wok bilong autim gutnius bilong Kingdom bilong God em i nambawan bikpela wok bilong mekim long graun. Yumi mas mekim dispela wok maski ol man i laik harim o nogat. Gutpela sapos yumi inap mekim wankain tok olsem Pol i bin mekim: “Sapos wanpela namel long yupela em i lus, dispela em i no asua bilong mi, long wanem, mi no bin surik long autim olgeta tingting bilong God long yupela.”—Aposel 20:26, 27.
3 Taim ol manmeri i putim yau na bihainim tok bilong Kingdom, bikpela amamas i save kamap! Anti bilong wanpela yangpela meri em i dai. Dispela meri i laik save anti bilong em i go we—long heven o long hel? Em i beten askim God long helpim em, na em i mekim wok long nem Jehova, olsem susa bilong em i bin lainim em. I no longtaim na em i kirap stadi long Baibel na wok long kam long ol miting Kristen. Em i senisim tingting bilong em long i stap bilong em, na em i lusim ol lain raskol. Dispela yangpela meri i lusim smok, ol drak, na pasin bilong stil. Em i tokaut olsem: “Mi laikim tru Jehova na dispela samting tasol i mekim na mi lusim ol dispela pasin nogut. Jehova wanpela tasol long bikpela marimari bilong em, em inap givim mi gutpela samting bilong wetim i kamap long bihain, em laip i stap gut oltaim.” Em i no save bihainim moa ol dispela pasin i no gat as bilong en.
4 Maski ol manmeri i no laik putim yau long tok yu autim, yu mekim yet wanpela gutpela wok. Ol i save ol Witnes Bilong Jehova i bin kam lukim ol. Yu kamapim long ples klia olsem yu holimpas bilip bilong yu, na stap gut long God, na laikim em tru. Olsem wanem? Hatwok yu save mekim long wok bilong Bikpela i save lus nating? Nogat tru!