Lait Bilong God i Save Rausim Tudak!
“Bikpela, yu yet yu lait bilong mi, na yu save rausim tudak long mi.”—2 SAMUEL 22:29.
1. Olsem wanem lait na laip i save poroman wantaim?
“GOD i tok olsem, ‘Lait i mas kamap.’ Orait lait i kamap.” (Stat 1:3) Em nau, long rot bilong dispela bikpela tok, stori bilong Buk Stat long taim Jehova i wokim olgeta samting em i kamapim klia olsem Jehova i as bilong lait. Sapos i no gat dispela lait, i no gat wanpela samting inap i stap laip long graun. Na Jehova i as bilong lait bilong spirit tu, em i bikpela samting tru bilong soim yumi long rot yumi mas wokabaut long en. (Song 43:3) King Devit i kamapim klia olsem lait bilong spirit na laip i save poroman wantaim. Em i tok: “Yu as tru bilong laip bilong olgeta samting. Na yu as bilong lait. Mipela i save kisim lait long yu tasol, na mipela i stap gut.”—Song 36:9.
2. Olsem Pol i soim yumi, lait i save poroman wantaim wanem samting?
2 Inap olsem wan tausen yia bihain long taim bilong Devit, aposel Pol i kamapim stori bilong taim God i bin wokim olgeta samting. Em i tokim kongrigesen Kristen long Korin: “Bipo tru God i bin tok, ‘Insait long tudak lait i ken kamap.’ ” Orait nau Pol i soim olsem lait bilong spirit i poroman wantaim save yumi kisim long Jehova. Em i tok: “Lait bilong God yet i bin i kam i stap long mipela, na i mekim bel bilong mipela i lait moa yet. Mipela i lukim pes bilong Jisas Krais na mipela i lukim lait tru na mipela i save long bikpela lait na strong bilong God.” (2 Korin 4:6) Dispela lait i save kamap long yumi olsem wanem?
Baibel—Rot Bilong Kisim Lait
3. Long rot bilong Baibel, Jehova i givim wanem lait long yumi?
3 Baibel em nambawan rot bilong Jehova long salim lait bilong spirit i kam. Olsem na taim yumi stadi long Baibel na kisim save long God, yumi larim lait bilong em i kam long yumi. Long rot bilong Baibel Jehova i save kamapim long ples klia ol samting em i gat laik long mekim, na em i tokim yumi long olsem wanem yumi ken mekim laik bilong em. Dispela i mekim na i stap bilong yumi i gat as bilong en, na yumi inap kisim ol samting bilong spirit yumi sot long en. (Saveman 12:1; Matyu 5:3) Jisas i tok strong long yumi mas kisim ol samting bilong spirit taim em i kamapim wanpela tok long Lo Bilong Moses, em i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ”—Matyu 4:4; Lo 8:3.
4. Olsem wanem Jisas em i “lait bilong graun”?
4 Jisas na lait bilong spirit i save pas wantaim. Em i toktok long em yet olsem em i “lait bilong graun,” na em i tok: “Man i bihainim mi, em bai i no inap wokabaut long tudak. Nogat. Em bai i gat lait bilong laip.” (Jon 8:12) Dispela tok i helpim yumi long save long bikpela wok bilong Jisas long givim tok i tru bilong Jehova long ol man. Bilong abrusim tudak na wokabaut long lait bilong God, yumi mas harim gut olgeta tok bilong Jisas na bihainim gut pasin na tok bilong em olsem yumi lukim long Baibel.
5. Bihain long taim Jisas i dai, ol disaipel bilong em ol i gat wanem wok?
5 Sampela de paslain long taim Jisas i dai, em i kamapim gen olsem em i lait, na em i tokim ol disaipel: “Liklik taim tasol bai lait i stap yet wantaim yupela. Nau yupela i gat lait yet, olsem na yupela i mas wokabaut long lait, nogut tudak i karamapim yupela. Man i wokabaut long tudak, em i no save, em i go we. Nau lait i stap yet wantaim yupela, olsem na yupela i mas bilip long lait, na bai yupela i kamap pikinini bilong lait.” (Jon 12:35, 36) Ol man i kamap pikinini bilong lait ol i bin kisim save long ‘ol gutpela tok’ i stap long Baibel. (2 Timoti 1:13, 14) Orait nau ol i mekim wok long ol dispela gutpela tok bilong helpim ol man i gat stretpela bel na bai ol i ken lusim tudak na kam insait long lait bilong God.
6. Long 1 Jon 1:5, yumi lukim wanem tok i tru em i tok long lait na tudak?
6 Aposel Jon i tok: “God em i lait, na i no gat liklik hap tudak i stap long em.” (1 Jon 1:5) Em nau, lait i narapela kain long tudak. Jehova i as bilong lait bilong spirit, na tudak bilong spirit i no inap i stap long em. Olsem na yumi laik save, husat i as bilong tudak?
Tudak Bilong Spirit—As Bilong En
7. Husat i mekim na tudak bilong spirit i karamapim dispela graun? Em i gat strong long mekim wanem?
7 Aposel Pol i toktok long “god bilong dispela graun,” na dispela tok i makim Satan. Pol i tok moa olsem Satan “i bin pasim tingting bilong ol dispela man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol. Olsem na ol i no save lukim Krais, em i piksa tru bilong God.” (2 Korin 4:4) Planti man i save tok ol i bilip long God, tasol planti ol i no save bilip olsem Satan i stap. Bilong wanem? Long wanem, ol i no laik bilip olsem wanpela man nogut i stap na em i gat bikpela strong winim ol man bilong graun, na em inap stiaim tingting bilong ol. Tasol Pol i soim yumi olsem Satan i stap tru na em i save stiaim tingting bilong ol man, olsem na ol i no inap lukim lait bilong tok i tru. Satan i gat strong long stiaim tingting bilong ol man na dispela i kamap klia long wanpela tok profet i tok em i “man bilong giamanim olgeta manmeri bilong graun.” (KTH 12:9) Dispela wok bilong Satan i mekim na tok profet bilong Aisaia long ol samting bai kamap bihain, nau em i makim olgeta manmeri bilong graun—tasol ol man i mekim wok bilong Jehova, nogat. Aisaia i tok: “Lukim. Ol blakpela klaut na bikpela tudak i karamapim olgeta arapela lain manmeri bilong graun.”—Aisaia 60:2.
8. Ol man i stap long tudak bilong spirit, olsem wanem ol i soim olsem tingting bilong ol i paul?
8 Taim man i stap long bikpela tudak, em i no inap lukim wanpela samting. Ating em bai lus long wanpela hap o tingting bilong em bai paul. Na olsem tasol, ol man i stap long tudak bilong spirit, tingting bilong ol i no klia, na i no longtaim na tingting bilong ol long ol samting bilong spirit em bai paul. Bai ol i no inap save wanem tok i tru na wanem tok i giaman, na wanem samting i gutpela na wanem samting i nogut. Profet Aisaia i stori long ol man i stap long dispela kain tudak na em i tok: “Bai yupela i bagarap, yupela ol man i save tok, pasin nogut em i gutpela na gutpela pasin em i nogut. Na yupela i save tok, tudak em i lait, na lait em i tudak. Na yupela i save tok, samting i pait long maus, em i swit, na samting i swit, em i pait long maus.” (Aisaia 5:20) God bilong tudak, em Satan, i save stiaim tingting bilong ol man i stap long tudak long ol samting bilong spirit, olsem na ol i stap longwe long as bilong lait na laip.—Efesus 4:17-19.
Lusim Tudak na Kam Long Lait—Hatwok Bilong En
9. Stori long olsem wanem ol man bilong mekim rong i save laikim tudak tru tru na tudak bilong spirit.
9 Gutpela man Jop i kamapim klia olsem ol man bilong mekim rong ol i save laikim tudak tru tru. Em i tok: “Ol man bilong mekim trabel long ol maritmeri, ol i save wetim san i go daun pastaim, na . . . ol i save karamapim pes bilong ol, na ol i tok olsem, ‘No gat man bai i luksave long mi.’ ” (Jop 24:15) Ol man bilong mekim rong ol i stap tu long tudak bilong spirit, na dispela kain tudak inap daunim ol tru. Aposel Pol i tok, pasin pamuk, stil, mangal, dring spak, tok nogut long man, pulim nating mani samting, ol i save kamap planti taim namel long ol man i stap kalabus insait long dispela tudak. Tasol ol man i save kam long lait bilong Tok Bilong God ol inap senisim pasin bilong ol. Pol i kamapim klia dispela samting long pas em i raitim long ol Korin. Planti Kristen bilong Korin, pastaim ol i bin mekim ol pasin bilong tudak, tasol Pol i tokim ol: “God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.”—1 Korin 6:9-11.
10, 11. (a) Olsem wanem Jisas i soim olsem em i tingim wanpela man aipas em i oraitim? (b) Bilong wanem planti man i no laik i kam long lait?
10 Taim man i lusim tudak na i kam long lait, pastaim ai bilong em i mas lain long lukluk long lait. Long Betsaida, Jisas i oraitim wanpela man aipas, tasol Jisas i tingim em na i no mekim wantu tasol. “Jisas i holim han bilong dispela man aipas, na em i bringim em i go ausait long ples. Na em i spet long ai bilong em, na i putim han antap long em, na i askim em olsem, ‘Yu lukim wanpela samting, o nogat?’ Na dispela man i lukluk, na i tok olsem, ‘Mi lukim sampela man. Tasol mi lukim ol i olsem ol diwai i wokabaut i go.’ Na Jisas i putim han gen long ai bilong em. Na dispela man i lukluk strong, na ai bilong en i kamap gutpela, na em i lukim olgeta samting i kamap klia.” (Mak 8:23-25) Ating isi isi Jisas i oraitim ai bilong man na bai em inap lain long lukim strongpela lait bilong san. Yumi ken tingim bikpela amamas bilong dispela man taim em inap lukluk.
11 Tasol amamas bilong dispela man i no bikpela olsem amamas bilong ol man i kisim helpim long lusim isi isi tudak bilong spirit na kam insait long lait bilong tok i tru. Taim yumi lukim amamas bilong ol, ating yumi save tingting, olsem wanem na planti manmeri moa i no laik kam long lait? Jisas i kamapim as bilong en, em i tok: “As bilong kot bilong ol em i olsem. Lait i kamap pinis long graun, tasol ol man i laikim tumas tudak. Ol i no laikim lait, long wanem, ol i man bilong mekim pasin nogut. Olgeta man i save mekim pasin nogut, ol i birua bilong lait. Ol i no laik bai pasin bilong ol i kamap ples klia. Olsem na ol i no save kam long lait.” (Jon 3:19, 20) Tru tumas, planti man i save laik tumas long mekim “pasin nogut,” olsem pamuk, daunim ol man, giaman, kisim nating mani bilong ol man, na stil—na tudak bilong spirit em Satan i bosim em gutpela ples tru bilong ol i ken mekim laik bilong ol.
Wok Long Kamap Strong Insait Long Lait
12. Taim yumi kam insait long lait, dispela i bin helpim yumi olsem wanem?
12 Kirap long taim yumi bin kisim save long lait na i kam inap nau, yumi bin senisim wanem ol pasin bilong yumi? Sampela taim i gutpela sapos yumi lukluk i go bek na skelim yumi yet, olsem yumi bin mekim wanem bilong kamap strong long ol samting bilong spirit. Yumi bin lusim wanem ol pasin i no stret? Yumi bin stretim wanem ol hevi long i stap bilong yumi? Ol samting yumi bin tingting long mekim bihain, dispela i senis olsem wanem? Long strong bilong Jehova na long helpim yumi kisim long spirit holi bilong em, yumi inap wok yet long senisim sampela pasin na tingting bilong yumi na dispela bai makim olsem yumi larim lait i stiaim yumi. (Efesus 4:23, 24) Pol i tok: “Bipo yupela i stap long tudak, tasol nau Bikpela i putim yupela i stap long lait. Olsem na yupela i mas wokabaut olsem ol manmeri bilong lait. Lait em i save kamapim olgeta kain gutpela pasin na stretpela pasin na pasin bilong tok tru.” (Efesus 5:8, 9) Taim yumi larim lait bilong Jehova i soim rot long yumi, yumi inap bilip na wetim gutpela samting i kamap bihain, na i stap bilong yumi i gat as bilong en, na dispela i save helpim ol man i stap klostu long yumi. Na taim yumi senisim pasin na tingting bilong yumi olsem, bel bilong Jehova i amamas tru!—Sindaun 27:11.
13. Olsem wanem yumi ken soim olsem yumi tenkyu long lait bilong Jehova? Bilong mekim olsem, yumi mas i gat wanem pasin?
13 Bilong soim olsem yumi tenkyu long i stap bilong yumi i kamap gutpela, yumi save kamapim lait bilong Jehova—ol tok bilong Baibel yumi bin lainim, yumi givim long famili bilong yumi na ol pren na ol lain i stap long hap bilong yumi. (Matyu 5:12-16; 24:14) Na husat man i no laik harim, orait wok yumi mekim long autim tok na gutpela pasin Kristen yumi bihainim, dispela i kamap olsem tok bilong stretim ol. Olsem Pol i tok: “Yupela i mas trai long kisim save long ol pasin Bikpela i save laikim. Yupela i no ken poroman wantaim ol man i save mekim pasin bilong tudak. Kain pasin olsem em i no save karim gutpela kaikai. Nogat. Mobeta yupela i mas soim ol man olsem, dispela kain pasin em i nogut.” (Efesus 5:10, 11) Bilong helpim ol man long lusim tudak na kam long lait, yumi mas i gat strongpela bel. Na bikpela samting moa, em yumi mas sori long ol man na tingim ol, na yumi mas i gat laik tru long givim lait bilong tok i tru long ol, em inap helpim ol i go inap oltaim oltaim.—Matyu 28:19, 20.
Lukaut Long Ol Giaman Lait!
14. Long ol samting bilong lait, wanem tok lukaut yumi mas harim gut?
14 Ol man i stap long biksolwara long taim bilong tudak, ol bai amamas long lukim wanpela lait, maski em i wanem kain lait. Long bipo, ol i save wokim paia long ol maunten ston long nambis bilong Inglan bilong makim ples ol sip i ken kam na stap gut long taim bilong bikpela win na ren. Ol boskru bilong sip i amamas long ol dispela lait i stiaim ol i kam insait long pasis. Tasol sampela lait i bilong giamanim ol sip. Planti sip ol i bihainim dispela lait na ol i bagarap long ol bikpela ston olsem rip i stap long nambis, na ol lain olsem raskol i kam stilim kago bilong sip. Na pasin bilong dispela graun tu i save giamanim ol man, olsem na yumi mas was gut, nogut yumi bihainim ol giaman lait em ol inap pulim yumi i go na yumi bagarap long ol samting bilong spirit, olsem sip i bagarap long rip. Baibel i tok: “Satan yet i save senisim pasin bilong en na kamap olsem ensel bilong lait.” Na olsem tasol, ol wokman bilong em—sampela em ol man i bin tromoi lotu i tru—ol i “giaman wokman” na ol tu “i senisim pasin bilong ol na i mekim olsem ol wokman bilong stretpela pasin.” Sapos yumi tingim tingim ol tok giaman bilong ol, bai yumi no bilip strong moa long Baibel, em tok i tru bilong Jehova, na ating bilip bilong yumi bai i dai.—2 Korin 11:13-15; 1 Timoti 1:19.
15. Wanem samting bai helpim yumi long i stap gut long rot i go long ples bilong kisim laip?
15 Man bilong raitim song i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Yes, gutpela God bilong yumi, Jehova, em i sutim lait long liklik ‘rot i go long ples bilong kisim laip,’ na yumi inap lukluk gut. Laik bilong Jehova, “em i laik kisim bek olgeta [kain] manmeri, bai ol i ken save long as bilong tok tru.” (Matyu 7:14; 1 Timoti 2:4) Sapos yumi bihainim ol stiatok bilong Baibel, dispela bai lukautim yumi na yumi no lusim dispela liklik rot na bihainim ol rot bilong tudak. Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” (2 Timoti 3:16) Taim yumi wok long kamap strong long ol samting bilong spirit, Baibel i save skulim yumi. Long rot bilong Baibel yumi inap stretim yumi yet, o ol gutpela wasman insait long kongrigesen ol inap stretim yumi sapos i gat wok long mekim olsem. Na olsem tasol yumi inap stretim wokabaut bilong yumi, na long pasin daun yumi kisim ol tok bilong skulim yumi long stretpela pasin na bai yumi ken wokabaut yet long rot i go long laip.
Tenkyu Long Lait Yumi Wokabaut Long En
16. Olsem wanem yumi ken soim olsem yumi tenkyu long gutpela lait Jehova i givim long yumi?
16 Olsem wanem yumi ken soim olsem yumi tenkyu long gutpela lait Jehova i givim long yumi? Jon sapta 9 i tok, taim Jisas i oraitim wanpela man aipas, bel bilong man i kirapim em long tenkyu long Jisas. Em i mekim olsem wanem? Em i bilip long Jisas olsem em i Pikinini bilong God, na em i tokaut ples klia olsem Jisas em i “wanpela profet.” Na tu, em i mekim strongpela tok long ol man i laik daunim mirakel bilong Jisas. (Jon 9:17, 30-34) Lain Kristen God i bin makim, Pita i kolim ol olsem “lain manmeri God i bin makim bilong em yet.” Bilong wanem em i kolim ol olsem? Long wanem, ol i gat pasin bilong tenkyu long God, wankain olsem dispela man i stap aipas na Jisas i oraitim em. Bilong soim olsem ol i tenkyu long Jehova, em Man bilong helpim ol, ol i “tokaut long olgeta gutpela pasin em i bin mekim” na ol i ‘tokaut long em i bin singautim ol long lusim tudak na bringim ol i kam insait long lait bilong em, em lait i gutpela moa yet.’ (1 Pita 2:9; Kolosi 1:13) Ol manmeri i wet long kisim laip oltaim long graun, ol tu i kamapim olsem ol i tenkyu long God, na ol i wok wantaim ol brata bilong ol em God i bin makim long autim tok bilong “olgeta gutpela pasin” Jehova i bin mekim. Man! Em wanpela gutpela wok tru Jehova i givim long ol man bilong graun ol i sinman tasol!
17, 18. (a) Yumi olgeta wan wan i gat wok long mekim wanem? (b) Bilong bihainim pasin bilong Timoti, olgeta Kristen i mas was gut, nogut ol i mekim wanem?
17 Em i bikpela samting long yumi mas tenkyu tru long lait bilong tok i tru yumi kisim. Taim mama i karim yumi, yumi no gat save long tok i tru. Sampela i lain long en taim ol i bikpela pinis, na kwiktaim ol i lukim olsem lait i winim tru tudak. Na sampela, em papamama i bin stap aninit long God na mekim bikpela long ol. Sampela manmeri olsem, ating ol i no tenkyu tumas long dispela lait. Wanpela Witnes em papamama i bin mekim wok bilong Jehova taim em i no kamap yet em i tokaut olsem em i mas taitim bun tru na lusim bikpela hap taim bambai em i ken kisim gut as bilong ol tok i tru papamama i bin lainim em long en na pilim tru olsem em i bikpela samting. (2 Timoti 3:15) Maski yumi yangpela o lapun, yumi olgeta wan wan i mas kisim pasin bilong tenkyu tru long ol tok i tru Jehova i bin kamapim long ples klia.
18 Yangpela man Timoti i bin lain long “ol buk i gat tok bilong God” kirap long taim em i liklik yet, tasol em i mas taitim bun tru long mekim wok autim tok i go i go, na long dispela rot em i kamap strongpela Kristen. (2 Timoti 3:15) Orait nau Timoti inap helpim aposel Pol, na Pol i bin tokim em olsem: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.” Olsem Timoti, yumi olgeta i mas was gut, nogut yumi mekim wanpela samting em yumi sem long en—o Jehova i sem long yumi!—2 Timoti 2:15.
19. (a) I gat as na yumi olgeta i mas tok wanem, olsem Devit i bin tok? (b) Long stori i kamap bihain long dispela, bai yumi toktok long wanem samting?
19 I gat as tru na yumi mas litimapim nem bilong Jehova, em i bin givim lait bilong tok i tru long yumi. Olsem King Devit, yumi save tok: “Bikpela, yu yet yu lait bilong mi, na yu save rausim tudak long mi.” (2 Samuel 22:29) Tasol nogut bihain yumi no tingim tumas dispela lait na isi isi yumi go bek insait long tudak em God i bin helpim yumi long lusim. Olsem na stori i kamap bihain long dispela bai helpim yumi long skelim olsem tok i tru bilong God i bikpela samting long i stap bilong yumi o nogat.
Yu Lainim Wanem Samting?
• Olsem wanem Jehova i save givim lait bilong spirit long yumi?
• Yumi stap namel long tudak bilong spirit na dispela i givim wanem hatwok long yumi?
• Yumi mas was gut long wanem ol samting?
• Olsem wanem yumi ken kamapim olsem yumi tenkyu long lait bilong tok i tru yumi kisim?
[Piksa long pes 8]
Jehova i as bilong lait tru tru na lait bilong spirit
[Piksa long pes 10]
Isi isi Jisas i oraitim wanpela man aipas, olsem tasol em i helpim yumi long lusim tudak long ol samting bilong spirit
[Piksa long pes 11]
Sapos yumi larim ol giaman lait bilong Satan i giamanim yumi, bai yumi bagarap long ol samting bilong spirit olsem sip i bagarap long rip