Nau Em De Bilong Jehova Long Kisim Bek Ol Man!
“Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.”—2 KORIN 6:2.
1. Yumi mas mekim wanem bambai God na Krais i ken orait long yumi?
JEHOVA i makim pinis wanpela de bilong skelim ol manmeri long kot. (Aposel 17:31) Bilong God i ken kisim bek yumi long dispela de, yumi mas i stap gut long ai bilong em na Jas em i bin makim, Krais Jisas, na bai ol i ken orait long yumi. (Jon 5:22) Bilong yumi ken stap olsem, yumi mas mekim pasin i stret wantaim Tok Bilong God, na yumi mas i gat bilip i kirapim yumi long helpim ol narapela long kamap disaipel tru bilong Jisas.
2. Bilong wanem ol manmeri bilong graun i stap longwe long God?
2 Sin i mekim na olgeta manmeri bilong graun i stap longwe long God. (Rom 5:12; Efesus 4:17, 18) Olsem na ol man yumi autim tok long ol, ol i gat wanpela rot tasol na God i ken kisim bek ol—ol i mas kamap wanbel wantaim em. Aposel Pol i kamapim dispela samting taim em i raitim pas i go long ol Kristen long Korin. Orait nau yumi ken skelim ol tok bilong 2 Korin 5:10 i go inap long 6:10 bambai yumi ken save Pol i tok wanem long kot, na pasin bilong kamap wanbel wantaim God, na long God i kisim bek ol man.
“Kirapim Tingting Bilong Ol Man”
3. Olsem wanem Pol ‘i bin wok long kirapim tingting bilong ol man’? Bilong wanem yumi mas mekim olsem long nau?
3 Pol i bungim tok bilong kot wantaim wok bilong autim tok taim em i tok: “Yumi olgeta i mas kamap long kot bilong Krais. Na sapos yumi bin mekim gutpela pasin long taim yumi stap long bodi o sapos yumi bin mekim pasin nogut, yumi olgeta wan wan bai i kisim pe inap long pasin yumi bin mekim. Orait mipela i save pret long Bikpela na i stap aninit long em, olsem na mipela i save wok long kirapim tingting bilong ol man bai ol i bilip long em.” (2 Korin 5:10, 11) Long rot bilong autim tok bilong Kingdom, aposel Pol ‘i bin wok long kirapim tingting bilong ol man.’ Olsem wanem long yumi? Yumi stap klostu long pinis bilong dispela pasin nogut bilong nau, olsem na yumi mas wok strong tru bilong kirapim tingting bilong ol man long mekim ol samting bambai Jisas i no ken bagarapim ol long kot, na Man bilong kisim bek ol man, em God Jehova, i ken orait long ol.
4 Tasol sapos God i bin mekim gut long wok bilong yumi, yumi no ken hambak na litimapim nem bilong yumi yet. Long Korin sampela man i tingim ol yet i bikpela man o ol i tingim sampela narapela man i bikpela man, na dispela i kamapim pasin bilong brukim lain insait long kongrigesen. (1 Korin 1:10-13; 3:3, 4) Pol i tingim dispela samting na em i tok: “Long dispela tok mipela i no stat gen long grisim yupela bai yupela i ting mipela i stretpela man. Nogat. Mipela i raitim dispela tok bilong yupela i ken amamas long pasin bilong mipela. Mipela i laik bai yupela inap bekim tok bilong ol man i save amamas nating long nem bilong ol man, na ol i no amamas long ol pasin i kamap long bel bilong ol man. Tasol sapos i tru pasin na tok bilong mipela i olsem bilong ol longlong man, maski, mipela i mekim wok bilong God. Na sapos mipela i tingting stret, orait mipela i mekim olsem bilong helpim yupela.” (2 Korin 5:12, 13) Ol man i gat pasin antap ol i no ting em i bikpela samting long kongrigesen i stap wanbel na stap gut long ol samting bilong spirit. Ol i laik hambak long ol samting ol man inap lukim long ai na ol i no laik helpim ol wanbilip long kisim gutpela bel long ai bilong God. Olsem na Pol i stretim dispela kongrigesen na bihain em i tok: “Man i laik amamas [olsem hambak], em i mas amamas long Bikpela.”—2 Korin 10:17.
5 Tasol Pol tu i bin hambak, a? Ating sampela i ting olsem, long wanem, ol i tingim tok Pol i mekim long em yet olsem aposel. Tasol em i mas hambak “long Bikpela.” Em i hambak long namba bilong em olsem aposel bambai ol Korin i no ken lusim Jehova. Pol i bin mekim olsem bilong helpim ol long kam bek long God, long wanem, ol aposel giaman i bin pulim ol i go long rot i no stret. (2 Korin 11:16-21; 12:11, 12, 19-21; 13:10) Tasol Pol i no hambak oltaim long ai bilong ol man long gutpela wok bilong em bambai ol i ken litimapim nem bilong em.—Sindaun 21:4.
Olsem Wanem? Sori Bilong Krais i Kirapim Yu?
6. Sori bilong Krais i mas mekim wanem long yumi?
6 Olsem wanpela aposel tru, Pol i bin skulim ol narapela long ofa bilong Jisas bilong baim bek ol man. Dispela i mekim bikpela samting long i stap bilong Pol, long wanem, em i tok: “Krais i bin givim bel bilong en long mipela, na dispela i save kirapim mipela long wok, long wanem, mipela i save pinis olsem, wanpela man i bin kisim ples bilong yumi olgeta na i dai, na long dispela rot yumi olgeta i dai pinis. Dispela man i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu. Yumi ken tingting long em na wokabaut.” (2 Korin 5:14, 15) Jisas i kamapim bikpela pasin sori tru taim em i givim laip bilong em bilong baim bek yumi, a? Dispela i mas kirapim tru yumi. Yumi tenkyu long Jisas, long wanem, em i bin givim laip bilong em bilong helpim yumi, na dispela i mas kirapim yumi long wok strong long autim gutnius olsem Jehova bai kisim bek ol man long rot bilong gutpela Pikinini bilong em. (Jon 3:16; skelim wantaim Song 96:2.) Olsem wanem? “Krais i bin givim bel bilong en long mipela” na dispela i save kirapim yu long wok strong long autim tok bilong Kingdom na kamapim disaipel?—Matyu 28:19, 20.
7. Wanem insait bilong dispela tok “yumi no save bihainim tingting bilong olpela bel na skelim pasin bilong ol manmeri”?
7 Ol man God i bin makim, ol i mekim olgeta samting long i stap bilong ol bilong kamapim olsem ol i pilim tru samting Krais i mekim bilong helpim ol, olsem na ol i no ‘tingting moa long ol yet na wokabaut. Nogat. Ol i tingting long em na wokabaut.’ Pol i tok: “Olsem na nau yumi no save bihainim tingting bilong olpela bel na skelim pasin bilong ol manmeri. Tru, bipo yumi bin tingting long pasin bilong olpela bel na skelim pasin bilong Krais. Tasol nau yumi no save skelim em moa long dispela pasin.” (2 Korin 5:16) Ol Kristen i no ken tingim ol man long samting bilong skin, olsem ol i laikim ol Juda tasol, winim ol man bilong ol narapela lain, o ol i laikim maniman tasol, winim man i rabis. Ol Kristen God i bin makim ol i “no save bihainim tingting bilong olpela bel na skelim pasin bilong ol manmeri,” nogat; pasin bilong ol long pas gut wantaim ol wanbilip long ol samting bilong spirit, dispela em i bikpela samting. Ol man i bin lukim Jisas taim em i stap long graun, i no ol dispela man tasol ‘bipo ol i bin tingting long pasin bilong olpela bel na skelim pasin bilong Krais.’ Sampela man bipo ol i bilip long Mesaia, sapos ol i bin tingim Krais long pasin bilong olpela bel, ol i no ken mekim moa olsem. Em i givim skin bilong em olsem ofa bilong baim bek ol man na em i kirap bek long matmat olsem wanpela spirit bilong givim laip. Sampela man i kirap bek bilong kisim laip long heven ol i mas lusim skin bilong graun, maski ol i no lukim Krais Jisas long skin.—1 Korin 15:45, 50; 2 Korin 5:1-5.
8 Pol i toktok yet long ol man God i bin makim, na em i tok: “Sapos wanpela man i pas wantaim Krais, orait God i mekim em i kamap nupela man tru. Harim gut. Nau olpela pasin i pinis olgeta, na nupela pasin i kamap pinis.” (2 Korin 5:17) Insait bilong dispela tok “pas wantaim Krais” i olsem man i stap wanbel wantaim em. (Jon 17:21) Dispela man i pas wantaim Krais taim Jehova i pulim em i kam long Pikinini bilong em na Jehova i mekim em i kamap pikinini bilong em long rot bilong spirit holi. Orait taim dispela man i kamap pikinini bilong God long spirit, nau em i kamap “nupela man” na em bai wok wantaim Krais long Kingdom bilong heven. (Jon 3:3-8; 6:44; Galesia 4:6, 7) Ol dispela Kristen God i bin makim ol i kisim wanpela gutpela wok tru.
“Kamap Wanbel Wantaim God”
9. God i bin mekim wanem bambai ol man i ken kamap wanbel wantaim em?
9 Jehova i laikim tru dispela “nupela man”! Pol i tok: “God yet i mekim dispela olgeta samting i kamap long yumi. Bipo yumi stap birua bilong em, tasol long Krais em i mekim yumi i kamap wanbel wantaim em. Na em i givim mipela dispela wok bilong helpim em long mekim ol birua bilong en i kamap wanbel wantaim em. Tok bilong mipela i olsem. God i bin i stap long Krais na i wok long mekim olgeta man i lusim pasin birua na i kamap wanbel wantaim em. Em i no tingting moa long olgeta rong ol i bin mekim. Na em i givim mipela wok bilong autim dispela tok, bilong em i ken mekim ol birua i kamap wanbel wantaim em.” (2 Korin 5:18, 19) Kirap long taim Adam i mekim sin na i kam inap long nau ol manmeri bilong dispela graun i stap longwe long God. Tasol long pasin sori Jehova yet i go pas na opim rot long yumi bambai long rot bilong ofa bilong Jisas yumi ken kamap wanbel wantaim em.—Rom 5:6-12.
10 Dispela wok bilong helpim ol man long kamap wanbel wantaim em, Jehova i bin givim long ol manmeri em i bin makim, olsem na Pol i tok: “Mipela i kisim maus bilong Krais na autim tok bilong en. I olsem God yet i singaut long olgeta man long maus bilong mipela. Mipela i save autim tok bilong Krais yet long olgeta man, na mipela i tokim ol olsem, ‘Mobeta yupela lusim pasin birua na kamap wanbel wantaim God.’ ” (2 Korin 5:20) Long bipo, long taim wanpela pait i laik kamap ol i bin salim ol man i olsem mausman bilong stretim dispela hevi na bai pait i no ken kamap. (Luk 14:31, 32) Ol manmeri bilong dispela graun ol i stap longwe long God, olsem na God i bin salim ol man em i bin makim olsem mausman bilong tokim ol manmeri long ol lo bilong kamap wanbel wantaim em. Olsem man bilong autim tok bilong Krais, ol man God i bin makim ol i tok: “Kamap wanbel wantaim God.” Long pasin marimari dispela tok i laik kirapim ol long stap bel isi wantaim God na bilip long pasin bilong God long kisim bek ol long rot bilong Krais.
11 Olgeta man i bilip long ofa bilong Krais long kisim bek ol man ol inap kamap wanbel wantaim God. (Jon 3:36) Pol i tok: “Krais i no save mekim sin, tasol God i laik helpim yumi, olsem na em i bin bungim olgeta sin bilong yumi antap long em, na Krais i kamap olsem man bilong mekim sin tru. God i mekim olsem bai yumi ken i stap long Krais, na long strong bilong em yumi ken kamap stretpela manmeri bilong God.” (2 Korin 5:21) Jisas, em man i nambawan olgeta, em i olsem wanpela ofa bilong tekewe sin bilong olgeta pikinini bilong Adam em i bin kisim bek ol long sin. Ol i kamap “stretpela manmeri bilong God” long rot bilong Jisas. Pastaim ol 144,000 wanlain bilong Krais ol bai kamap stretpela man long ai bilong God. Long Taim Bilong Wan Tausen Yia Bilong Krais i Stap King, ol pikinini bilong Papa Bilong Oltaim, em Krais Jisas, ol bai kamap stretpela man long ai bilong God, olsem ol manmeri bilong graun i gutpela olgeta. Em bai mekim ol i kamap gutpela olgeta na kamap olsem stretpela man long ai bilong God bambai ol i ken stap gut long God na kisim dispela presen bilong laip oltaim.—Aisaia 9:6; KTH 14:1; 20:4-6, 11-15.
“Nau Tasol Em i Taim Bilong God i Kisim Bek Yumi”
12 Bilong God i ken kisim bek yumi, yumi mas bihainim tok bilong Pol, em i tok: “Mipela i save wok wantaim God na mipela i tok strong long yupela olsem, ‘Yupela i kisim pinis marimari bilong God, na nogut yupela i lusim nating marimari bilong em.’ God i tok olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu.’ Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.” (2 Korin 6:1, 2) Ol man God i makim long spirit holi na ol i olsem mausman bilong em, na ol poroman bilong ol, em “ol arapela sipsip,” ol i no kisim marimari bilong Papa bilong ol long heven na lusim nating dispela samting. (Jon 10:16) Nau long dispela “taim bilong God i mekim gut long yumi” ol i save bihainim stretpela pasin na givim bel long autim tok, na long dispela rot ol i laik bai God i orait long ol na ol i tokim ol manmeri bilong graun olsem dispela em i “taim bilong God i kisim bek yumi.”
13 Pol i kamapim tok bilong Aisaia 49:8, i tok: “Bikpela i tokim wokman bilong en olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu. Na mi bin lukautim yu gut, na long yu tasol bai mi mekim kontrak wantaim olgeta manmeri bilong graun. Na bai mi mekim kantri Israel i kamap gutpela gen, na ol lain bilong Israel bai i sindaun gen long dispela graun bilong ol nau em i stap nating.’ ” Namba wan truim bilong dispela tok i kamap taim God i lusim lain Israel long kalabus bilong Babilon na ol i go bek long kantri bilong ol i stap olsem ples nating.—Aisaia 49:3, 9.
14 Long narapela truim bilong dispela tok profet bilong Aisaia, Jehova i bin givim “wokman” bilong em Jisas olsem “lait bilong olgeta kantri, na bai [God i] helpim ol manmeri long olgeta hap bilong graun na bai [em i] kisim bek ol.” (Aisaia 49:6, 8; skelim wantaim Aisaia 42:1-4, 6, 7; Matyu 12:18-21.) Yumi save, dispela “taim bilong God i mekim gut” long ol manmeri, i kamap long taim Jisas i stap long graun. Em i beten, na God i “harim” em. Dispela i kamap olsem “taim bilong God i kisim bek” Jisas, long wanem, em i stap gut olgeta long God na long dispela rot em i “kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.”—Hibru 5:7, 9; Jon 12:27, 28.
15 Pol i mekim wok long tok bilong Aisaia 49:8 bilong makim ol Kristen God i bin makim long spirit holi, na em i tokim ol nogut ol i no wok strong bambai God i ken belgut long ol long dispela ‘taim bilong mekim gut’ long ol na “taim bilong kisim bek” ol; sapos ol i mekim olsem, bai ‘ol i lusim nating marimari bilong God.’ Pol i tok moa: “Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.” (2 Korin 6:2) Kirap long Pentikos bilong 33 C.E. na i kam inap nau, ol Israel bilong spirit i wok strong long mekim ol samting bilong kamapim klia olsem i stret God i kamapim pasin marimari long ol bambai dispela ‘taim bilong mekim gut’ long ol i kamap olsem “taim bilong kisim bek” ol.
“Stap Wokman Bilong God”
16. Wanem ol hevi i painim Pol na em i soim olsem em i wokman bilong God?
16 Sampela man insait long kongrigesen bilong Korin ol i no bin mekim ol samting bambai God inap marimari long ol. Ol i bin krungutim gutnem bilong Pol bambai ol i ken bagarapim namba bilong em olsem aposel, maski em i no bin “mekim wanpela samting i save sutim lek bilong ol dispela man na ol i pundaun.” Tru tumas, em i bin soim ol man olsem em i wokman bilong God taim em i ‘sanap strong tru long ol kain kain hevi, na long ol samting i save mekim nogut long em, na bagarapim em. Ol i save paitim em na kalabusim em. Ol birua i save banisim em na singaut nogut long em. Em i save hatwok tru. Em i no save slip gut, na em i save stap hangre.’ (2 Korin 6:3-5) Bihain, Pol i tok sapos ol birua bilong em ol i wokman bilong God, em i “winim ol long mekim wok,” long wanem, planti taim moa ol man i bin putim em long kalabus, na paitim em, na planti taim klostu bagarap i painim em, na em i sot long ol samting.—2 Korin 11:23-27.
17 Olsem Pol na ol poroman bilong em, yumi inap soim ol man olsem yumi wokman bilong God? Olsem wanem yumi inap mekim olsem? Taim yumi mekim “klinpela pasin,” o stretpela pasin, na taim yumi bihainim stretpela save bilong Baibel. Yumi ken soim olsem yumi wokman bilong God taim yumi “no save kros kwiktaim,” olsem yumi stap isi na karim hevi, na “mekim gut” long ol manmeri taim yumi mekim ol samting bilong helpim ol narapela. Na yumi ken soim olsem yumi wokman bilong God taim yumi larim spirit bilong em i soim rot long yumi, na yumi “save mekim tru pasin bilong laikim tru ol arapela. [Yumi] no save tok long maus tasol,” yumi save mekim tok tru oltaim, na wetim God i givim strong long yumi bilong mekim wok bilong autim tok. Na tu, Pol i kamapim namba bilong em long rot bilong ‘stretpela pasin em i holim olsem samting bilong pait i stap long han sut na long han kais.’ Long ol pait bilong bipo, planti taim ol soldia i holim bainat long han sut na hap plang long han kais. Taim Pol i mekim pait bilong spirit wantaim ol tisa giaman, em i no mekim wok long ol pasin nogut bilong olpela bel—em i no bin grisim ol, o trikim ol, o giamanim ol. (2 Korin 6:6, 7; 11:12-14; Sindaun 3:32) Em i bin mekim wok long stretpela pasin olsem “samting bilong pait” em i holim bilong helpim lotu i tru. Yumi mas mekim wankain pasin.
18 Sapos yumi wokman bilong God, bai yumi mas mekim wankain pasin olsem Pol na ol wanwok bilong em. Bai yumi mekim pasin olsem Kristen, maski ol man bai litimapim o daunim nem bilong yumi. Ol ripot nogut ol man i kamapim long yumi bai no inap pasim wok bilong yumi long autim tok, na yumi no hambak sapos ol i kamapim ol gutpela ripot long yumi. Bai yumi autim tok tru na ating ol man bai litimapim gutpela wok bilong God yumi mekim. Taim ol birua i laik bagarapim yumi, bai yumi bilip tru long Jehova na wetim em i helpim yumi. Na bai yumi amamas sapos ol man i givim tok long yumi bilong stretim yumi.—2 Korin 6:8, 9.
19 Bilong pinisim tok bilong em long wok bilong helpim ol man long kamap wanbel wantaim God, Pol i tok long em yet na ol wanwok bilong em olsem ol i ‘stap bel hevi tru, tasol maski, oltaim ol i save amamas. Ol i stap olsem ol rabisman, tasol maski, ol i save helpim ol manmeri long kisim planti samting. I olsem ol i no gat wanpela samting, tasol ol i gat olgeta samting.’ (2 Korin 6:10) Tru i gat as na ol dispela wokman ol i bel hevi long ol pen na hevi bilong ol, tasol bel bilong ol i stap amamas. Ol i stap rabis long ol samting bilong skin, tasol ol i “helpim ol manmeri long kisim planti samting” bilong spirit. Tru tumas, ol i “gat olgeta samting,” long wanem, bilip bilong ol i mekim na ol i gat planti samting bilong spirit—na tu, ol inap kamap pikinini bilong God long heven. Na ol i belgut na amamas long i stap bilong ol olsem wokman Kristen bilong God. (Aposel 20:35) Olsem ol dispela man, yumi ken “helpim ol manmeri long kisim planti samting” taim yumi wok bilong helpim ol long kamap wanbel wantaim God long nau—long dispela taim bilong God i kisim bek ol man!
Bilip Long Jehova Bai Kisim Bek Ol Man
20. (a) Pol i gat strongpela laik long wanem samting? Bilong wanem ol i no ken lusim nating taim? (b) Wanem samting i makim olsem nau em i taim bilong Jehova long kisim bek ol man?
20 Taim Pol i raitim namba tu pas i go long ol Korin long yia 55 C.E. samting, i gat 15 yia tasol i stap na ol pasin na lo bilong Juda bai pinis. Aposel Pol i gat strongpela laik long ol Juda na ol manmeri bilong ol narapela lain ol i mas kamap wanbel wantaim God long rot bilong Krais. Dispela em i taim bilong God i kisim bek ol man, na ol i no ken lusim nating taim. Kirap long yia 1914 i kam inap nau, yumi stap long taim bilong pinis bilong pasin nogut bilong nau. Dispela bikpela wok bilong autim tok bilong Kingdom long olgeta hap em i stap nau i makim olsem nau em de bilong Jehova long kisim bek ol man.
21. (a) Ol i makim wanem yia-teks long 1999? (b) Yumi mas mekim wanem long dispela de bilong Jehova long kisim bek ol man?
21 Ol manmeri bilong olgeta lain ol i mas harim tok bilong ol samting God i mekim bilong kisim bek ol man long rot bilong Krais Jisas. Yumi no ken lusim nating taim. Pol i tok: ‘Harim! Nau em taim bilong God i kisim bek yumi.’ Dispela tok bilong 2 Korin 6:2 bai stap olsem yia-teks bilong ol Witnes Bilong Jehova long 1999. Dispela tok i stret tru, long wanem, wanpela samting bai kamap i nogut moa, winim bagarap i bin kamap long Jerusalem na tempel bilong en! Klostu nau, pinis bilong pasin nogut bilong dispela graun bai kamap, na em bai painim olgeta man i stap long graun. Nau—i no long tumora—yumi mas mekim ol samting bilong abrusim bagarap. Sapos yumi bilip olsem Jehova bai kisim bek ol man, na yumi laikim em tumas, na yumi laik kisim laip oltaim, yumi no ken lusim nating marimari bilong God. Sapos bel bilong yumi i gat laik tru long litimapim nem bilong Jehova, long tok na pasin bilong yumi bai yumi kamapim long ples klia olsem yumi bilip tru long tok yumi autim, olsem: ‘Harim! Nau em taim bilong God i kisim bek yumi.’
Bai Yu Bekim Olsem Wanem?
◻ Bilong wanem em i bikpela samting long ol man i mas kamap wanbel wantaim God?
◻ Husat ol dispela mausman na ol poroman bilong ol, em ol i insait long wok bilong helpim ol man long kamap wanbel wantaim God?
◻ Olsem wanem yumi inap soim olsem yumi wokman bilong God?
◻ Yia-teks bilong ol Witnes Bilong Jehova long 1999 i mekim wanem long yu?
4, 5. (a) Bilong wanem yumi no ken hambak na litimapim nem bilong yumi yet long ol wok bilong Jehova yumi save mekim? (b) Olsem wanem Pol i hambak “long Bikpela”?
8. Wanem samting i mekim na man i “pas wantaim Krais”?
10. Jehova i bin givim wok long husat bilong helpim ol man long kamap wanbel wantaim em? Ol i bin mekim wanem bilong mekim dispela wok?
11. Bihain husat ol bai kamap olsem stretpela man long ai bilong God, long wanem, ol i bilip long ofa bilong Jisas?
12. Ol mausman bilong Jehova na ol poroman bilong ol, ol i mekim wanem bikpela wok?
13. Wanem bikpela tok bilong Aisaia 49:8? Namba wan truim bilong en i kamap olsem wanem?
14. Olsem wanem tok bilong Aisaia 49:8 i kamap tru long Jisas?
15. Kirap long wanem taim ol Israel bilong spirit i wok strong long mekim ol samting bilong kamapim long ples klia olsem i stret God i kamapim pasin marimari long ol? Bilong wanem ol i mas mekim olsem?
17. (a) Yumi mas kamapim wanem ol pasin bilong soim olsem yumi wokman bilong God? (b) Olsem wanem yumi save ‘holim stretpela pasin olsem samting bilong pait’?
18. Sapos yumi wokman bilong God, bai yumi mekim wanem pasin?
19. Olsem wanem yumi ken “helpim ol manmeri long kisim planti samting” bilong spirit?
[Ol Piksa long pes 17]
Olsem Pol, yu save wok strong long autim tok na helpim ol man long kamap wanbel wantaim God?
Yunaitet Stets
Frans
Kot Diwa
[Piksa long pes 18]
Olsem wanem? Long dispela de bilong Jehova long kisim bek ol man, yu stap namel long ol manmeri i wok long kamap wanbel wantaim God Jehova?