Ol i Lusim Lotu Giaman
“[Jehova] i tok moa olsem, ‘Yupela i mas lusim ol, . . . Na yupela i mas lukaut gut, nogut yupela i pas long ol samting i no klin long ai bilong God. Na bai mi yet mi kisim yupela.’ ”—2 KORIN 6:17.
1. Satan i laik givim wanem samting long Jisas? Satan i mekim olsem, na dispela i lainim yumi long wanem tupela samting?
SATAN i tokim Jisas: “Sapos yu brukim skru na lotu long mi, orait bai mi givim yu dispela olgeta samting.” Em i mekim dispela tok planti tausen yia bihain long taim lotu giaman i kamap nupela, tasol dispela tok i helpim yumi long save husat i bin kamapim lotu giaman, na i gat wanem wok bilong en. Satan i mekim dispela tok klostu long pinis bilong yia 29, na em i tok long givim olgeta kingdom bilong dispela graun long Jisas sapos Jisas i brukim skru na lotu long em. Dispela samting i bin kamap i helpim yumi long save long tupela samting, olsem: Olgeta kingdom bilong dispela graun i bilong Satan, olsem na em inap tok long givim long narapela man; na tu, wok bilong olgeta lotu giaman i bilong kirapim ol man long lotuim Satan.—Matyu 4:8, 9.
2. Tok bilong Jisas long Matyu 4:10 i givim wanem save long yumi?
2 Bekim bilong Jisas i kamapim klia olsem Jisas i sakim lotu giaman, na i kamapim klia ol samting man i bihainim lotu i tru i mas mekim. Jisas i bekim tok olsem: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” (Matyu 4:10) Olsem na wok bilong lotu i tru i olsem: Bilong kirapim ol man long lotuim na mekim wok bilong God Jehova, em wanpela tasol i God tru. Ol man i bihainim lotu i tru, ol i mas bilip na bihainim tok bilong Jehova, na mekim laik bilong em.
Lotu Giaman i Kamap Olsem Wanem?
3. (a) Wanem taim lotu giaman i bin kamap nupela long graun? Em i kamap olsem wanem? (b) Baibel i stori long wanem namba wan taim wanpela man i birua long lotu em narapela man i mekim? Pasin bilong birua long lotu bilong man na mekim nogut long em o nogat, olsem wanem yumi save dispela pasin i stap yet?
3 Lotu giaman i bin kamap nupela long graun taim namba wan man na meri i sakim tok bilong God na bihainim tok bilong Snek, em i tok tupela yet i ken skelim “wanem samting i gutpela, na wanem samting i nogut.” (Stat 3:5) Taim ol i kirap bihainim tok bilong Snek, ol i sakim stretpela wok king bilong Jehova na ol i lusim lotu i klin long ai bilong God, em lotu i tru. Tupela i namba wan man bilong “lusim tok tru bilong God na senisim na kisim tok giaman. Na ol i bin givim baksait long God i bin mekim kamap olgeta samting, na ol i lotu long ol samting God i bin wokim.” (Rom 1:25) Tupela i kirap long lotuim Satan, “em dispela snek bilong bipo yet,” maski tupela i no save ol i mekim olsem. (Kamapim Tok Hait 12:9) Namba wan pikinini bilong tupela, em Kein, em i no laik bihainim gutpela tok Jehova i givim long em, olsem na em tu i bikhet long wok king bilong Jehova. Maski Kein i save o nogat, em i kamap wanpela “pikinini bilong man nogut” Satan, na em i lotuim Satan. Em i kilim i dai brata bilong em Abel i save bihainim lotu i tru. (1 Jon 3:12, Revised English Bible; Stat 4:3-8; Hibru 11:4) Dispela em i namba wan taim wanpela man i birua long lotu bilong narapela man na kilim em i dai. Tasol sori tumas, inap long nau lotu giaman i wok yet long kilim i dai ol man i no gat asua.—Lukim Matyu 23:29-35; 24:3, 9.
4. Baibel i tok wanem long pasin bilong Noa na yumi ken save klia long lotu i tru?
4 Paslain long Tait, wok bilong Satan i kamap gutpela—em i pulim ol man na klostu olgeta i lusim lotu i tru. Tasol God Jehova “i amamas” long wanpela man, em Noa. Bilong wanem em i amamas long Noa? Long wanem, “Noa em i gutpela man, na wokabaut bilong en i stret long ai bilong God.” Noa i bihainim lotu i tru. Lotu i tru i no olsem sampela pasin bilong lotu yumi mekim. Nogat. Lotu i tru i mas bosim olgeta samting yumi mekim, olsem wokabaut bilong yumi na sindaun bilong yumi. Yumi mas bilip long Jehova na bihainim tok bilong em na mekim wok bilong em. Yumi mas kamap ‘pren bilong God.’ Noa i bin mekim olsem.—Stat 6:8, 9, 22; 7:1; Hibru 11:6, 7.
5. (a) Bihain long Tait, Satan i laik kamapim wanem samting? Em i laik mekim olsem wanem? (b) Tasol Jehova i mekim wanem na em i pasim rot bilong Satan? Na wanem samting i bin kamap?
5 Tait i pinis na liklik taim bihain, i olsem Satan i mekim wok long Nimrot bilong bungim olgeta man insait long wanpela lotu i bikhet gen long Jehova. (Stat 10:8, 9; 11:2-4) Bai olgeta i gat wanpela lotu tasol, em lotu giaman. Long rot bilong wanpela bikpela taun na wanpela longpela taua ol i wokim, bai ol i bung wantaim na lotuim Satan. Tasol Jehova i mekim wanpela samting i pasim rot bilong ol na ol i no inap mekim. Long dispela taim olgeta man i gat “wanpela tok ples tasol,” tasol Jehova i kirap na paulim tok ples bilong ol. (Stat 11:5-9) Olsem na ol i kirap kolim dispela taun olsem Babel, na bihain ol i kolim olsem Babilon; insait bilong dispela tupela nem i wankain, olsem “Paulim.” Ol man i kirap mekim narapela narapela tok ples, olsem na ol i bruk i go nabaut long olgeta hap bilong graun.
6. (a) Taim lain bilong Satan i no lusim yet Babilon, em i bin skulim ol long wanem ol bilip giaman na i pas strong long tingting bilong ol? (b) Olsem wanem na wankain bilip i stap long ol lotu long olgeta hap bilong graun? (c) Babilon i mekim wanem wok bilong Satan? Na dispela taun bilong bipo i kamap olsem piksa na i makim wanem samting?
6 Tasol sapos yumi skelim ol stori bilong ol tumbuna na bilong lotu yumi ken save, taim Jehova i no brukim yet lain bilong ol man na ol i go nabaut, Satan i bin skulim lain bilong em long sampela bilip bilong lotu giaman na dispela i pas strong long tingting bilong ol. Ol i bilip olsem ol man i gat tewel i no save dai, na ol i save pret long ol man i dai pinis, na ol i ting i gat wanpela ples em tewel bilong ol daiman i stap long en; na tu ol i save lotuim planti planti god na god meri, em sampela ol i bungim wantaim olsem ol god triwan. Taim lain bilong ol i bruk long narapela narapela tok ples, ol i kisim ol dispela bilip bilong ol i go long olgeta hap bilong graun. Bihain ol dispela bilip i senis liklik, tasol i go kamap long olgeta hap na i stap insait long ol lotu giaman. Satan i laik bai i gat wanpela lotu giaman tasol, na bai biktaun Babilon i stap olsem as ples bilong en, na bai dispela lotu i go kamap long olgeta hap bilong graun. Tasol nogat. Olsem na em i kamapim kain kain lotu giaman, em lotu bilong Babilon i as bilong en na i bilong paulim tingting bilong ol man bambai ol i lotuim em yet na ol i no ken lotuim Jehova. Inap planti handet yia Babilon i stap olsem as ples bilong pasin bilong lotuim ol god giaman, na bilong ol glasman, na marila posin samting, na pasin bilong ting olsem ol sta samting long antap i bosim pasin na wok bilong ol man. Olgeta dispela samting i bikpela samting bilong lotu giaman. Olsem na hap bilong Baibel ol i kolim Kamapim Tok Hait i tok piksa long olgeta lotu giaman na i tok, ol i olsem wanpela pamukmeri nogut, nem bilong em Bikpela Babilon.—Kamapim Tok Hait 17:1-5.
Lotu i Tru
7. (a) Taim Jehova i paulim tok ples bilong ol man, olsem wanem na dispela i no mekim sampela samting long lotu i tru? (b) Baibel i kolim husat olsem “namba wan tumbuna bilong . . . ol man i bilip long God”? Bilong wanem Baibel i kolim em olsem?
7 Yumi save, taim Jehova i paulim tok ples bilong ol man long Babel, lotu i tru i no bagarap. Ol gutpela man na meri i stap paslain long Tait, olsem Abel na Enok na Noa na meri bilong Noa na ol pikinini bilong Noa wantaim meri bilong ol, ol i bin mekim lotu i tru. Bihain long Tait, lotu i tru i stap yet long lain bilong Siem, em wanpela pikinini man bilong Noa. Bihain Abraham i kamap long lain bilong Siem na em i mekim lotu i tru, na Baibel i kolim em olsem “namba wan tumbuna bilong olgeta man . . . i bilip long God.” (Rom 4:11) Na Abraham i mekim ol samting i kamapim bilip bilong em. (Jems 2:21-23) Lotu bilong em i bosim wokabaut bilong em.
8. (a) Klostu long yia 1500 paslain long Krais, olsem wanem lotu giaman i birua long lotu i tru? Wanem samting i bin kamap? (b) Jehova i kirapim wanem nupela pasin ol i mas bihainim bilong lotu tru long em?
8 Ol lain bilong Abraham i holimpas lotu i tru, em Aisak, na Jekop (o Israel), na ol 12-pela pikinini man bilong Jekop ol i kamap olsem ol 12-pela lain bilong Israel. Klostu long yia 1500 paslain long Krais, ol tumbuna pikinini bilong Abraham, em ol i bin kamap long lain bilong Aisak, ol i wok kalabus long Isip, em lotu giaman i pulap long dispela ples. Ol dispela man i lotuim Jehova ol i stap namel long ol haiden i birua long lotu i tru, olsem na ol i mas lukautim gut dispela lotu bambai lotu giaman i no ken paulim o bagarapim. Jehova i kisim bek ol long Isip long han bilong gutpela wokboi bilong em Moses, em bilong lain Livai. Long rot bilong Moses, Jehova i wokim kontrak wantaim Israel na kisim ol i stap lain bilong em stret. Long dispela taim, Jehova i raitim ol lo bilong makim ol samting ol i mas mekim bilong lotu tru long em. Inap sampela handet yia, i gat ol ofa ol i mas mekim long rot bilong ol pris, na ol i mas lotuim em long wanpela haus lotu, pastaim em haus lotu sel ol inap karim wokabaut, na bihain em haus lotu ol i sanapim long Jerusalem.
9. (a) Taim kontrak bilong Lo i no kamap yet, ol i bin mekim wanem bilong lotu tru long God? (b) Olsem wanem Jisas i makim olsem sampela samting bilong Lo i no bilong i stap oltaim?
9 Tasol ol dispela samting bilong graun i no bilong i stap hap bilong lotu i tru long olgeta taim. Lo ol i kisim long rot bilong Moses em i olsem “piksa nating bilong ol samting i laik kamap bihain.” (Kolosi 2:17; Hibru 9:8-10; 10:1) Taim Lo i no kamap yet, olsem long taim bilong ol tumbuna bilong lain Israel, ol papa i save go pas long mekim ol ofa bilong famili, na ol i save mekim ofa long ol alta ol yet i wokim. (Stat 12:8; 26:25; 35:2, 3; Jop 1:5) Tasol ol i no gat wanpela lain pris, na ol i no gat sampela lo long ol ofa ol i mas mekim, o sampela pasin bilong lotu ol i mas bihainim. Nogat. Na Jisas i kamapim klia olsem, maski lotu bilong Jerusalem i gat ol lo bilong en, dispela lotu em bilong i stap liklik taim tasol. Jisas i tokim wanpela meri Samaria: “Wanpela taim i laik kamap na bai yupela i no lotu long Papa long dispela maunten [Gerisim, bipo haus lotu bilong ol Samaria i stap long en], na bai yupela i no lotu long em long Jerusalem tu. . . . olgeta man i laik lotu tru bai ol i lotu long Papa long strong bilong Holi Spirit na long pasin i tru.” (Jon 4:21-23) Jisas i tok, ol man i laik lotu tru long God, ol i no ken mekim wok long ol samting bilong graun bilong lotuim em—ol i mas lotuim God long spirit na long tok i tru.
Ol i Kalabus Long Babilon
10. (a) Bilong wanem Jehova i larim ol birua i kisim lain bilong em i go kalabus long Babilon? (b) Long yia 537 paslain long Krais, Jehova i kisim bek liklik hap lain long wanem tupela kain kalabus? Ol i go bek long Juda bilong mekim wanem wok tru?
10 Kirap long taim pasin bikhet i bin kamap long Gaden Iden, long olgeta taim pasin birua i bin i stap namel long lotu i tru na lotu giaman. Sampela taim i olsem lotu giaman i bin kalabusim ol man i lotu tru long God. Kirap long taim bilong Nimrot, Babilon i olsem piksa o mak bilong ol lotu giaman. Taim Jehova i no larim yet ol Babilon i kisim lain bilong em i go kalabus long yia 617 na 607 paslain long Krais, ol i lusim pinis lotu i tru na kirap bihainim lotu giaman olsem bilong Babilon. (Jeremaia 2:13-23; 15:2; 20:6; Esekiel 12:10, 11) Long yia 537 paslain long Krais, liklik hap lain i stap gut long Jehova ol i go bek long Juda. (Aisaia 10:21) Ol i bihainim singaut i olsem wanpela tok profet, olsem: “Yupela i mas lusim kantri Babilon.” (Aisaia 48:20) Taim ol i mekim olsem, ol i lusim kalabus bilong skin, na ol i lusim tu kalabus bilong lotu giaman—ol i klia long ol man i save bihainim lotu giaman i no klin long ai bilong God, em ol i save lotuim ol god giaman. Olsem na God i tokim dispela liklik hap lain i stap gut long Em, olsem: “Yupela olgeta i mas lusim Babilon na i kam. Na lukaut gut, nogut yupela i pas long ol samting i no klin long ai bilong God. Na yupela ol lain bai i karim ol dis na plet samting bilong haus bilong Bikpela, yupela i mas bihainim pasin bilong mekim yupela yet i kamap klin long ai bilong God. Yupela olgeta i mas i stap klin na i kam.” (Aisaia 52:11) Namba wan wok tru na ol i go bek long Juda em olsem: Ol i go bek bilong kirapim gen lotu i klin long ai bilong God, em lotu i tru.
11. Ol i kirapim gen lotu i tru long Juda na wanem ol nupela lotu i wok long kamap long dispela taim?
11 Long dispela taim, olsem long yia 550 samting paslain long Krais, sampela lotu moa bilong Bikpela Babilon i wok long kamap, olsem lotu Buda, na lotu bilong Konfusas, na bilong Soroaste, na lotu Jain, na tingting bilong ol Grik i wok long kamap strong, em bihain dispela tingting i tanim tru tingting bilong ol misin i gat nem Kristen. Olsem na taim lotu i tru i kamap strong gen long Juda, nambawan birua bilong God i wok long kamapim planti lotu giaman moa bilong ol man i ken bihainim.
12. Long taim bilong ol aposel, husat ol i lusim kalabus olsem long Babilon? Pol i mekim wanem tok lukaut?
12 Taim Jisas i kamap long Israel, lotu Juda i kisim pinis sampela bilip bilong Babilon na i bruk long kain kain bilip na planti Juda i bihainim ol dispela kain bilip. Lotu Juda i pas pinis long Bikpela Babilon. Krais i tokaut olsem dispela i nogut, na em i kisim bek ol disaipel bilong em ol i stap kalabus olsem long Babilon. (Matyu, sapta 23; Luk 4:18) Lotu giaman na tingting bilong ol Grik i pulap long ol hap em aposel Pol i autim tok long en. Olsem na Pol i kamapim tok profet bilong Aisaia bilong makim ol Kristen na bilong helpim ol long save, ol i mas klia long ol lotu giaman bilong Bikpela Babilon, nogut dispela i paulim ol na ol i no i stap klin moa long ai bilong God. Pol i tok: “Olsem wanem, bai yumi bungim haus bilong God wantaim haus lotu bilong ol giaman god [bilong lotu bilong Babilon]? Yupela i save, yumi yet yumi stap haus bilong God bilong i stap oltaim, olsem bipo God i bin tok, ‘Bai mi stap wantaim ol na wokabaut namel long ol. Na bai mi stap God bilong ol, na ol bai i stap ol lain manmeri bilong mi.’ Olsem na Bikpela i tok moa olsem, ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God. Na bai mi yet mi kisim yupela.’ ”—2 Korin 6:16, 17.
Ol i Lusim Lotu Giaman Long Taim Bilong Pinis
13. Ol tok Krais i salim long ol 7-pela kongrigesen long Esia Maina i kamapim klia wanem samting? Olsem na wanem samting i kamap?
13 Krais i kamapim tok hait long aposel Jon na long dispela rot Krais i salim tok i go long ol 7-pela kongrigesen long Esia Maina. Ol dispela tok Krais i salim long ol i kamapim klia olsem long yia 96 samting, ol pasin na tingting kain olsem bilong lotu bilong Babilon i wok long kam insait long lain Kristen. (Kamapim Tok Hait, sapta 2 na 3) Dispela pasin bilong lusim bilip tru i wok long kamap strong moa namel long yia 100 na yia 400 samting bihain long Krais, olsem na lotu giaman i gat nem Kristen i kamap. Dispela lotu giaman i kisim ol bilip kain olsem bilong Babilon na ol i bilip olsem ol man i gat tewel, na i gat bikpaia i stap, na ol i bilip long God Triwan. Lotu Katolik, na Otodoks, na bihain ol lotu Talatala, olgeta i kisim ol dispela bilip giaman, olsem na ol i insait long Bikpela Babilon, em olgeta lotu giaman Satan i bin kamapim long graun.
14, 15. (a) Tok piksa bilong Jisas long wit na gras nogut i makim wanem samting? (b) Wanem samting i bin kamap long yia 1870 samting? I kam inap long yia 1914 na wanem ol tok bilong bilip i kamap klia pinis long ol Kristen tru?
14 Tasol lotu i tru i no pinis olgeta. Kirap long dispela taim bipo na i kam planti handet yia inap long nau, i gat sampela man i stap long graun, em ol i laikim tumas tok i tru. Ol i bin stap gut long God Jehova na long Tok bilong em, em Baibel, olsem na ol birua i bin kilim sampela i dai. Jisas i mekim tok piksa long wit, em ol manmeri God i makim bilong Kingdom, na gras nogut, em ol manmeri bilong Satan, na em i tok, ol i mas kamap wantaim i go inap long “las de bilong dispela graun,” na bai God i rausim ol gras nogut. (Matyu 13:24-30, 36-43) Taim las de—em taim bilong rausim ol gras nogut—i wok long i kam klostu, olsem long yia 1870 samting, ol man i gat gutpela bel na ol i lainim tok bilong Baibel ol i kirap lusim kalabus bilong lotu giaman.
15 I kam inap long yia 1914 na ol dispela Kristen, nau ol i holim nem olsem ol Witnes Bilong Jehova, ol i kisim strongpela bilip long ofa bilong Krais i baim bek yumi. Ol i save Krais i stap king pinis long heven. Ol i save, ‘taim bilong pinis’ i kirap long yia 1914. (Luk 21:24) Na ol i save klia olsem yumi no gat tewel, na ol man i dai pinis bai ol i kirap bek. Na ol i save klia tu long bikpela rong bilong ol misin, em ol i save lainim ol man long ol tok giaman olsem i gat bikpaia, na God em i God Triwan. Ol i kisim save long nem bilong God na ol i kirap long kolim. Na ol i save, tok bilong evolusen i no stret, em ol man i tok yumi bin kamap long rot bilong ol animal. Na ol i save, ol kain kain wok marila na posin samting i no stret.
16. Ol Kristen em God i bin makim ol, ol i bihainim wanem singaut long yia 1919?
16 Em nau, ol i kirap pinis long lusim ol samting bilong lotu giaman i olsem i kalabusim ol. Na long yia 1919, Bikpela Babilon i no gat strong moa long kalabusim lain bilong God. Long dispela taim dispela liklik hap lain bilong ol Kristen em God i bin makim, ol i lusim kalabus long Bikpela Babilon, olsem liklik hap lain Juda i bin mekim, em ol i bin lusim kalabus long Babilon long yia 537 paslain long Krais. Ol dispela Kristen i bihainim singaut olsem: “Yupela olgeta i mas lusim [Bikpela] Babilon na i kam.”—Aisaia 52:11.
17. (a) Kirap long yia 1922, ol i mekim wanem? Long dispela taim bipo, lain bilong God i pilim tru wanem samting? (b) Ol i strong tru long mekim wanem? I gat wanem as na ol i strong olsem?
17 Kirap long yia 1922 ol i bin wokim ol buk na nius i kamapim ol strongpela tok i tru bilong Baibel, na ol yet i bin autim ol dispela tok i kamapim klia rong bilong ol lotu giaman i kain olsem bilong Babilon, em ol misin i gat nem Kristen ol i insait long ol dispela lain na ol i gat bikpela rong moa. Ol Kristen God i makim i save ol i mas helpim ol narapela long lain bilong God long pilim tru bikpela wok bilong ol long lusim olgeta kain lotu giaman, na ol i mas lusim olgeta. Olsem na inap planti yia liklik ol i no laik tok olsem ol i wanpela lotu, long wanem, ol i ting dispela tok “lotu” i makim ol lotu giaman tasol. Long ol hap plang ol i raitim kain tok olsem: “Ol Lotu i Olsem Trap Bilong Giamanim Yu,” na ol i holim na wokabaut long rot long ol biktaun. Dispela tingting bilong ol i kamap klia long sampela buk ol i wokim (olsem buk Government, bilong 1928, na buk “The Truth Shall Make You Free,” bilong 1943). Ol i strong tru long bihainim dispela tingting, long wanem, long dispela taim bipo ol i wok strong long klia olgeta long ol lotu giaman bilong Bikpela Babilon i stap long olgeta hap.
Lotu i Tru na Lotu Giaman
18. Long 1951 ol i kisim wanem nupela save long dispela tok “lotu”? Na yiabuk bilong 1975 i stori olsem wanem long dispela?
18 Tasol long yia 1951, taim stret i kamap bilong Jehova i givim save long lain bilong em bambai ol i ken save klia tru olsem i gat lotu i tru na dispela lotu i narapela kain long ol lotu giaman. Yiabuk bilong ol Witnes long 1975 i tok: “Long 1951, ol man i givim bel long lotuim God long pasin em i laikim, ol i kisim nupela save i helpim ol long stretim tingting bilong ol long dispela tok ‘lotu.’ Sampela ol inap tingim taim bipo, olsem yia 1938, em sampela taim long dispela yia ol i bin karim ol hap plang i gat tok bilong kirapim tingting bilong ol man, olsem: ‘Ol Lotu i Olsem Trap Bilong Giamanim Yu.’ Olsem na long dispela taim bipo ol i ting olsem olgeta lotu i bilong Satan na i no Kristen. Tasol The Watchtower bilong Mas 15, 1951, i orait long tok olsem i gat lotu ‘i tru’ na lotu ‘i giaman.’ Na gutpela buk What Has Religion Done for Mankind? (ol i wokim long 1951 na ol brata inap kisim long Kibung ‘Klinpela Lotu’ long Wembli Stediam, long Landon, long Inglan), dispela buk i tok: ‘. . . Dispela tok “lotu” i makim wanpela lotu o wanpela pasin bilong mekim lotu, maski em lotu i tru o lotu giaman. Dispela i stret wantaim as bilong hap tok Hibru ’a·boh·dáh yumi tanim olsem “lotu.” As tru bilong dispela tok i olsem “pasin bilong mekim wok bilong wanpela man,” maski dispela man i husat.’ Olsem na bihain ol Witnes Bilong Jehova i kirap kolim tok olsem ‘lotu giaman’ na ‘lotu i tru.’ ”—Pes 225.
19, 20. (a) Ol man i lotu tru long God, olsem wanem ol i no ken bel hevi long kolim dispela tok “lotu” long lotu bilong ol? (b) Dispela nupela save i helpim lain bilong Jehova long mekim wanem?
19 Long 1951, wanpela man i save kaunim Wastaua (tok Inglis) em i raitim pas na kamapim wanpela askim na Wastaua bilong Ogas 15, 1951 i bekim tok olsem: “Yumi no ken bel hevi long kolim dispela tok ‘lotu’ long lotu bilong yumi, long wanem taim yumi kolim, yumi no makim olsem yumi bilong ol lotu giaman i kalabus long ol bilip bilong ol tumbuna. I olsem tu taim yumi kolim lain bilong yumi olsem ‘Kristen.’ Dispela i no makim olsem yumi hap lain bilong ol Kristen giaman bilong ol misin i holim nating nem Kristen, a?”
20 I no olsem lain bilong Jehova i laik mekim na bai ol narapela lotu i amamas long ol. Nogat. Dispela nupela save ol i kisim long dispela tok “lotu” i helpim ol long klia long ol lotu giaman na i stap longwe moa long ol. Stori i kamap bihain long dispela bai kamapim klia dispela samting.
Yu Inap Bekim Stret Ol Dispela Askim?
◻ Wanem taim lotu giaman i bin kamap long graun? Em i kamap olsem wanem?
◻ Bihain long Tait, Satan i laik mekim wanem? Wanem samting i pasim rot bilong em?
◻ Babilon i bin kamap olsem piksa o mak bilong wanem samting?
◻ God i bin kisim bek ol man long wanem kalabus long yia 537 paslain long Krais? long taim bilong ol aposel? long yia 1919?
◻ Long 1951 ol i bin kisim wanem nupela save long dispela tok “lotu”? Olsem wanem na ol i kisim dispela save long dispela taim?
[Blok/Piksa long pes 11]
Babilon i as bilong ol bilip giaman i stap long olgeta hap:
◻ Ol god triwan
◻ Man i gat tewel na taim man i dai, tewel i stap yet
◻ Pasin bilong toktok wantaim “ol daiman”
◻ Mekim wok long ol piksa bilong lotu
◻ Mekim sampela samting bilong sakim ol spirit nogut
◻ Ol bikpela man bilong lotu i gat strong long bosim ol man