Jehova Bai Mekim Gut Bel Bilong Yu
“Yumi save kisim strong long God wanpela tasol na em wanpela i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol. Olsem na bai yupela i stap wanbel.”—ROM 15:5.
LONG olgeta wan wan de i gat bikpela wok moa bilong mekim gut bel bilong ol man. Inap 1,900 yia samting bipo, wanpela man bilong raitim Baibel em i mekim wanpela tok long samting em i bin lukim, olsem: “Olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” (Rom 8:22) Long taim bilong yumi, dispela “krai” na “pen” i go bikpela moa yet. Kirap long Namba Wan Pait na i kam inap nau, ol bikpela hevi na bagarap i painim ol man long ol bikpela pait, na pasin raskol, na sampela bikpela bagarap olsem tait wara samting em planti taim ol man yet i gat hap asua long en, long wanem, ol i no bin lukautim gut graun.—KTH 11:18.
2 Bilong wanem i gat planti pen na hevi moa long taim bilong yumi? Baibel i kamapim bekim bilong dispela askim taim em i stori long ol i bin rausim Satan long heven taim Kingdom i kamap pinis long 1914. Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Truim bilong dispela tok profet i kamap ples klia tru, na dispela i makim olsem taim bilong Satan long bosim graun na mekim nogut long ol man, em i laik pinis nau. Olsem na klostu nau bel isi tru bai kamap gen long dispela graun olsem i bin stap taim Satan i no pulim yet tupela tumbuna bilong pastaim long bikhet long God!
3 Long pastaim tru, Man bilong wokim ol man em i givim wanpela naispela ples tru long namba wan man na meri bilong ol i ken sindaun long en. Dispela ples i olsem naispela pak na em i stap long wanpela hap ol i kolim Iden; insait bilong dispela nem Iden i olsem “Amamas.” (Stat 2:8) Na tu, skin bilong Adam tupela Iv i gutpela olgeta na i no gat sik long en, na tupela inap i stap oltaim oltaim na i no ken i dai. Tingim ol gutpela wok ol inap kisim save long mekim, olsem wokim gaden, malenim piksa, wokim ol haus, pilaim musik. Na tingim ol samting God i bin wokim na ol inap kisim save long en taim ol i mekim wok God i bin givim long ol long bosim graun na mekim i kamap olsem wanpela paradais. (Stat 1:28) Tru tumas, bai i no gat pen na krai i painim Adam na Iv—tupela bai i stap amamas tasol. I no gat wok long mekim gut bel bilong ol.
4 Tasol samting Adam na Iv i gat wok long mekim i olsem: Tupela i mas wok long kisim pasin bilong laikim tumas gutpela Papa bilong ol long heven na tenkyu tru long em. Sapos tupela i bin kisim dispela pasin bilong laikim tru God, dispela bai kirapim ol long bihainim tok bilong em long olgeta samting. (Skelim wantaim Jon 14:31.) Tasol sori tru, tupela tumbuna bilong yumi bilong pastaim ol i no bihainim tok bilong King tru bilong ol, em Jehova. Tupela i larim ensel nogut, em Satan, i pulim ol na ol i stap aninit long wok bos nogut bilong em. Satan i bin traim Iv na i kirapim em long mekim sin na kisim kaikai bilong diwai i tambu. Bihain Adam tu i mekim sin taim em i kaikai pikinini bilong dispela diwai em God i bin tokim em klia long en. God i tok: “Sapos yu kaikai, wantu [olsem long dispela de stret] bai yu dai.”—Stat 2:17.
5 Em nau, tupela sinman i kirap long i dai. Taim God i kolim strafe bilong tupela olsem tupela i mas i dai, em i tokim Adam tu olsem: “Nau bai mi bagarapim graun, na ol kaikai bai i no inap kamap gut long en. Oltaim bai yu wok hat tru bilong mekim kaikai i kamap long graun. Ol rop i gat nil na ol gras nogut bai i kamap na karamapim gaden bilong yu.” (Stat 3:17, 18) Olsem na Adam tupela Iv i no inap tingting moa long mekim graun i kamap olsem wanpela paradais. God i rausim tupela long Iden, na tupela i mas putim olgeta strong bilong tupela i go long kamapim kaikai long graun God i bagarapim pinis. Ol pikinini na tumbuna pikinini bilong tupela i kisim sin na dai long tupela, na i mas i gat man bilong mekim gut bel bilong ol.—Rom 5:12.
Wanpela Tok Promis i Kamap Tru
6 Taim Jehova i kolim strafe bilong dispela ensel i bin kirapim tupela long mekim pasin bikhet, Em i kamap tru olsem ‘God bilong mekim gut bel bilong ol man.’ (Rom 15:5, NW) Em i mekim olsem taim em i tok promis long salim wanpela “pikinini” i kam, bihain em bai kisim bek ol tumbuna pikinini bilong Adam long ol bikpela hevi tru em pasin bikhet bilong Adam i bin kamapim. (Stat 3:15, NW) Bihain God i kamapim sampela tok profet moa bilong dispela wok bilong kisim bek ol man. Olsem: Em i bin givim tingting long Lamek, em wanpela tumbuna pikinini bilong Adam long rot bilong pikinini bilong Adam, em Set, na Lamek i mekim tok profet long wok em pikinini bilong em bai mekim, olsem: “Bipo Bikpela i bin mekim strongpela tok bilong bagarapim graun na mipela i mas hatwok tru long mekim kaikai i kamap gut. Tasol dispela pikinini bai i mekim . . . na bai yumi malolo liklik long hatwok bilong yumi.” (Stat 5:29) Stret wantaim dispela tok promis, Lamek i kolim nem bilong pikinini, Noa; insait bilong dispela nem i olsem “Malolo” o “Mekim Gut Bel Bilong Man.”
7 Orait, Satan i wok long pulim sampela ensel bilong heven long bihainim em. Ol dispela ensel i tanim i kamap man na ol i kisim ol meri i gat gutpela skin, em ol tumbuna pikinini bilong Adam. Dispela kain marit i no stret, na i bagarapim tru pasin bilong ol manmeri bilong graun na i kamapim wanpela lain i givim baksait long God, ol i kolim Nefilim, olsem “ol traipela man.” Ol i mekim na pasin bilong pait na bikhet i pulap tru long graun. (Stat 6:1, 2, 4, 11; Jut 6) “Bikpela i lukim pasin bilong ol manmeri long olgeta hap i nogut tru . . . na Bikpela i ting i gutpela sapos em i no bin wokim ol manmeri. Na em i bel hevi tru.”—Stat 6:5, 6.
8 Jehova i tingting long mekim bikpela tait wara i kamap long olgeta hap bilong graun na pinisim ol man nogut, tasol pastaim em i tokim Noa long wokim wanpela sip bambai sampela man i ken stap laip. Long dispela rot, i gat ol man na ol kain kain animal i abrusim bagarap na i stap yet long graun. Ating Noa wantaim lain bilong em ol i amamas tru taim Bikpela Tait i pinis na ol i lusim sip na i kam ausait long klinpela graun! Na taim ol i lukim olsem God i tekewe pinis samting nogut em i bin mekim long graun na nau bai ol i no hatwok moa long planim kaikai long gaden, ating dispela i mekim gut tru bel bilong ol! Em nau, tok profet bilong Lamek i kamap tru, na Noa i bin mekim tru ol samting olsem insait bilong nem bilong em i makim. (Stat 8:21) Noa em i gutpela wokman bilong God na long wok em i bin mekim em i mekim gut bel bilong ol man. Tasol wok nogut bilong Satan na ol ensel nogut bilong em i no pinis long taim bilong Tait, olsem na ol manmeri bilong graun i wok yet long krai na karim hevi bilong sin na sik na dai i stap long skin bilong ol.
Wanpela Man i Winim Noa
9 Bihain bihain, long pinis bilong 4,000 yia samting, dispela Pikinini em God i tok promis long en, em i kamap. God Jehova i laikim tumas ol manmeri bilong graun, na dispela i kirapim em long salim Pikinini bilong em i kam long graun bilong i dai na baim bek ol sinman bilong graun. (Jon 3:16) Krais Jisas i save strongim tru bel bilong ol sinman em ol i tanim bel na bilip long ofa bilong em. Olgeta manmeri i dediketim laip bilong ol long Jehova na kisim baptais na kamap disaipel bilong Pikinini bilong em, em i save givim malolo long ol na mekim gut bel bilong ol. (Matyu 11:28-30; 16:24) Maski skin bilong ol i no gutpela tumas, ol i kisim bikpela amamas long mekim wok bilong Jehova na bel bilong ol i no gat tok long ol. Ol i save, sapos ol i holimpas bilip bilong ol long Jisas, bai ol i kisim prais olsem laip i stap oltaim oltaim, na dispela tingting i strongim bel bilong ol long nau. (Jon 3:36; Hibru 5:9) Sapos ol i pundaun na mekim wanpela bikpela rong, ol i gat wanpela helpim, olsem man bilong mekim gut bel bilong ol, em Bikpela bilong yumi Krais Jisas, em i kirap bek pinis long matmat. (1 Jon 2:1, 2) Sapos ol i kamapim dispela rong bilong ol na ol i mekim ol samting olsem Baibel i makim bambai ol i no ken kamap man bilong mekim rong, bel bilong ol bai stap isi gen, long wanem, ol i save ‘God bai i mekim stretpela pasin na lusim sin bilong ol.’—1 Jon 1:9; 3:6; Sindaun 28:13.
10 Taim Jisas i stap long graun, em i mekim narapela samting tu bilong givim malolo long ol man—em i rausim ol spirit nogut long ol, na em i oraitim olgeta kain sik bilong ol, na kirapim bek ol wanblut bilong ol i dai pinis. Tru, ol dispela mirakel i helpim ol inap liklik taim tasol, long wanem, ol man em i bin oraitim ol, bihain ol i go lapun na ol i dai. Tasol long dispela rot Jisas i kamapim klia ol gutpela samting bihain em bai mekim bilong helpim olgeta man, na ol dispela blesing bai stap oltaim oltaim. Nau Krais Jisas em i strongpela King long heven, na liklik taim bai em i mekim wanpela bikpela samting tru—em i no ken mekim wok tasol bilong rausim ol spirit nogut long skin bilong ol man, nogat. Em bai kalabusim ol wantaim hetman bilong ol, Satan, long bikpela hul i no gat as, na ol i no inap mekim wanpela samting. Orait nau wanpela gutpela taim tru bai kirap, em dispela Taim Bilong Wan Tausen Yia Bilong Krais i Stap King.—Luk 8:30, 31; KTH 20:1, 2, 6.
11 Jisas i bin tok, em i “bosim de Sabat,” na planti taim em i bin oraitim ol man long de Sabat. (Matyu 12:8-13; Luk 13:14-17; Jon 5:15, 16; 9:14) Bilong wanem em i mekim olsem? Long wanem, de Sabat em i hap bilong Lo God i bin givim long ol Israel na em i stap olsem ‘piksa bilong ol gutpela samting i laik kamap bihain.’ (Hibru 10:1) Sikspela de bilong wok insait long wik i helpim yumi long tingim ol man bilong graun i stap olsem lain kalabus inap 6,000 yia pinis aninit long wok bos nogut bilong Satan. De Sabat long pinis bilong wik i helpim yumi long tingim gutpela malolo bilong strongim bel em ol man bilong graun bai kisim long Taim Bilong Wan Tausen Yia Bilong Krais i Stap King, em dispela man Noa i piksa bilong en.—Skelim wantaim 2 Pita 3:8.
12 Long dispela taim bihain, ol manmeri i stap aninit long wok king bilong Krais, bel bilong ol bai gutpela tru taim ol i stap fri na Satan i no inap mekim nogut moa long ol! Na taim ol sik bilong skin na sik bilong bel hevi na sik bilong tingting i pinis long skin bilong ol, dispela bai mekim gut bel bilong ol. (Aisaia 65:17) Na yumi ken tingim bikpela amamas bilong ol taim ol famili bilong ol i dai pinis ol i kirap bek! Long ol dispela rot, God “bai i mekim drai wara i stap long ai bilong olgeta” man. (KTH 21:4) Ofa bilong Jisas bai wok long helpim ol manmeri i stap aninit long Kingdom bilong God, na ol manmeri i bihainim tok ol bai wok long kamap gutpela olgeta, na olgeta samting nogut em sin bilong Adam i bin kamapim, ol dispela samting bai pinis olgeta long skin bilong ol. (KTH 22:1-5) Orait bihain long dispela, Satan bai lusim kalabus inap long “sotpela taim tasol.” (KTH 20:3, 7) Olgeta man i stap gut long Jehova olsem King tru, ol bai kisim laip i stap oltaim oltaim olsem prais. Man! Tingim bikpela amamas tru bai ol i kisim taim “God i . . . pinisim dispela kalabus bilong bagarap nau olgeta samting i stap long en”! Olsem na ol man bilong bihainim tok ol bai “i stap gutpela tru wantaim yumi ol pikinini bilong God.”—Rom 8:21.
13 Tasol nau yumi save krai na kisim pen yet, wankain olsem olgeta man i stap nau long dispela taim nogut em Satan i bosim. Long nau planti sik moa bilong skin na sik bilong bel hevi i wok long painim olgeta kain man, na ol gutpela Kristen tu. (Filipai 2:25-27; 1 Tesalonaika 5:14) Na tu, planti taim yumi ol Kristen i save kisim hevi long ol man i tok bilas long yumi na mekim nogut long yumi, em Satan i kirapim ol long mekim, long wanem, yumi “bihainim tok bilong God,” na tok bilong ol man i nambatu tasol. (Aposel 5:29) Olsem na bilong mekim wok bilong God i go inap long pinis bilong dispela taim nogut bilong Satan, yumi mas kisim bel isi na helpim na strong em God i save givim long ol man.
Bilong Mekim Gut Bel Bilong Yumi
14 Long nait paslain long taim Jisas i dai, em i kamapim klia long ol gutpela aposel bilong em olsem liklik taim em bai lusim ol na go bek long Papa bilong em. Ol i tingting planti na bel hevi long dispela. (Jon 13:33, 36; 14:27-31) Jisas i luksave olsem i gat wok long mekim gut bel bilong ol long olgeta taim, olsem na em i tok promis olsem: “Bai mi askim Papa, na em bai i givim yupela narapela Helpim bilong strongim yupela. Na em bai i stap wantaim yupela oltaim oltaim.” (Jon 14:16) Jisas i toktok long spirit holi bilong God, em i bin kapsaitim long ol disaipel bilong em 50 de bihain long taim em i kirap bek.a Spirit bilong God i bin strongim bel bilong ol long taim ol hevi i painim ol, na em i strongim ol long mekim yet laik bilong God. (Aposel 4:31) Tasol yumi no ken ting yumi inap kisim nating dispela helpim, nogat. Bilong kisim bikpela helpim long en, olgeta wan wan Kristen i mas beten oltaim na askim God long givim dispela helpim long yumi bilong strongim bel bilong yumi, em i save givim long rot bilong spirit holi bilong em.—Luk 11:13.
15 Narapela rot bilong God long mekim gut bel bilong yumi, em long Baibel. Pol i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Dispela i soim yumi olsem oltaim yumi mas stadi na tingim tingim long bel ol tok i stap long Baibel na ol buk samting i kamapim ol tok bilong Baibel. Na yumi mas go oltaim long ol miting Kristen, em ol i save kamapim ol tok bilong God i mekim gut bel bilong man. Wanpela bikpela wok bilong ol dispela miting, em bilong yumi wan wan i ken strongim bel bilong ol narapela.—Hibru 10:25.
16 Pas Pol i bin raitim long ol Rom i kamapim klia ol gutpela samting yumi kisim taim yumi mekim wok long ol samting Jehova i givim long yumi bilong mekim gut bel bilong yumi. Em i tok: “Yumi save kisim strong long God wanpela tasol na em wanpela i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol. Olsem na bai yupela i stap wanbel, na bai yupela olgeta wantaim i litimapim nem bilong God, em i God na Papa bilong Bikpela bilong yumi Jisas Krais.” (Rom 15:5, 6) Em nau, taim yumi mekim wok long olgeta samting God i save givim long yumi bilong mekim gut bel bilong yumi, bai yumi wok long kisim wankain pasin olsem bilong Gopas bilong yumi Krais Jisas, em i gat strongpela bel na i no save pret. Dispela bai kirapim yumi long mekim wok oltaim long maus bilong yumi bilong litimapim nem bilong God long taim yumi autim tok, na long ol miting bilong yumi, na long taim yumi toktok wantaim ol wanbilip, na long ol beten bilong yumi.
Long Taim Bilong Bikpela Traim
17 Long nait paslain long taim Jisas i kisim bikpela pen tru na em i dai, “em i pilim nogut tru” na “bel bilong [em] i hevi tumas.” (Matyu 26:37, 38) Olsem na em i lusim ol disaipel na i go liklik, na em i beten askim Papa bilong em long helpim em. “Em i save daunim laik bilong em yet na i aninit long God, olsem na God i harim beten bilong em.” (Hibru 5:7) Baibel i tok “wanpela ensel bilong heven i kam long [Jisas] na i strongim em.” (Luk 22:43) Taim Jisas i sanap long ai bilong ol birua bilong em, em i mekim pasin olsem man tru na em i no pret liklik, na dispela i soim olsem pasin bilong God long mekim gut bel bilong Pikinini i bin strongim em tru.—Jon 18:3-8, 33-38.
18 Sampela bikpela traim i bin painim aposel Pol tu. Taim em i autim tok long Efesus, “planti taim ol Juda i pasim tok long daunim [em], na dispela i givim [em] planti bel hevi na traim na [em i] krai planti taim.” (Aposel 20:17-20) Ol man bilong lotuim god meri Artemis ol i belhat tru long Pol i autim tok, na bikpela kros na singaut moa i kamap long taun. Olsem na Pol i lusim Efesus. (Aposel 19:23-29; 20:1) Taim em i wokabaut i go long hap not bilong go long taun Troas, i gat narapela samting tu em i tingting planti long en. Taim dispela bikpela kros na singaut i no kamap yet long Efesus, em i bin kisim wanpela tok na em i tingting planti long en. Pasin bilong brukim lain i kamap insait long nupela kongrigesen Korin, na pasin pamuk i kamap na kongrigesen i larim tasol na i no stretim. Olsem na taim Pol i stap yet long Efesus, em i raitim wanpela pas na givim strongpela tok long ol bambai ol i ken stretim dispela samting. I hatwok long Pol i mekim olsem. Em i kamapim dispela samting long namba tu pas em i raitim long ol. Em i tok: “Taim mi raitim pas long yupela, mi wari moa yet na bel bilong mi i gat bikpela hevi tru na mi krai planti.” (2 Korin 2:4) Ol elda i gat pasin sori ol i kain olsem Pol—i hatwok long ol i givim strongpela tok long man bilong stretim em, na wanpela as bilong dispela i olsem, ol i save tru olsem ol tu inap popaia. (Galesia 6:1) Olsem na yumi mas mekim gut bel bilong ol dispela brata i go pas long yumi, na taim ol i givim tok bilong Baibel long yumi long pasin sori bilong stretim yumi, kwiktaim yumi mas bihainim dispela tok.—Hibru 13:17.
19 Taim Pol i stap long Efesus, em i raitim pas long ol brata long Korin, na tu, em i salim Taitus i go bilong helpim ol, na em i tokim Taitus long salim tok i kam bek long em na kamapim tingting bilong ol Korin long dispela pas Pol i bin salim long ol. Pol i tingting long bungim Taitus long Troas. Long dispela taun God i mekim gut long Pol na em i gat sampela gutpela rot long kamapim ol disaipel. Tasol dispela i no pinisim bel hevi bilong em, long wanem, Taitus i no kamap yet long Troas. (2 Korin 2:12, 13) Olsem na em i wokabaut i go moa na kamap long Masedonia—em i tingting long bungim Taitus long dispela hap. Ol man bilong dispela hap ol i birua nogut tru long wok bilong Pol long autim tok, na dispela i mekim na em i tingting planti moa. Em i tok: “Taim mipela i go i stap long Masedonia, mipela i no inap malolo liklik. Nogat. Long dispela hap tu ol kain kain hevi i bin kamap long mipela oltaim. Ol man i bin tok pait wantaim mipela, na mipela i kirap nogut na bel bilong mipela i pret. Tasol God i save mekim isi bel bilong ol manmeri i stap bel hevi. Na em i salim Taitus i kam long mipela, na long dispela pasin em i mekim isi bel bilong mipela.” (2 Korin 7:5, 6) Bihain Taitus i kamap na em i tokim Pol long ol Korin i bin pilim tru ol tok bilong em long pas na ol i bihainim. Dispela i mekim gut tru bel bilong Pol!
20 Ol dispela samting i bin painim Pol i strongim bel bilong ol wokman bilong God long nau, em ol hevi i save painim ol tu na ol i “stap bel hevi.” Tru tumas, God bilong mekim gut bel bilong ol man em i save long ol hevi bilong yumi wan wan, na em inap mekim wok long rot bilong yumi long mekim gut bel bilong narapela narapela, olsem Taitus i bin mekim gut bel bilong Pol taim em i tokim Pol olsem ol Korin i pilim tru pasin ol i bin mekim na ol i tanim bel. (2 Korin 7:11-13) Long stadi i kamap bihain long dispela, bai yumi stori long gutpela tok Pol i bin givim long ol Korin na olsem wanem dispela inap helpim yumi long mekim gut bel bilong ol man long nau olsem God i save mekim long yumi.
[Futnot]
a Wanpela bikpela wok em spirit holi bilong God i bin mekim long ol Kristen long taim bilong ol aposel, em i bin makim ol olsem pikinini bilong God long spirit na brata bilong Jisas. (2 Korin 1:21, 22) Dispela em i bilong ol 144,000 disaipel bilong Krais tasol. (KTH 14:1, 3) Long nau klostu olgeta Kristen ol inap tingting long kisim laip i stap oltaim long Paradais long graun. Tru God i no bin makim ol long spirit holi, tasol dispela spirit holi bilong God i helpim na mekim gut bel bilong ol tu.
Yu Inap Bekim?
◻ Wanem samting i bin kamap na i gat wok long mekim gut bel bilong ol man?
◻ Olsem wanem Jisas i kamapim klia olsem em i winim Noa?
◻ Bilong wanem Jisas i bin tok, em i “bosim de Sabat”?
◻ Long nau God i save mekim gut bel bilong yumi olsem wanem?
[Askim Bilong Stadi]
1. Bilong wanem long olgeta wan wan de i gat bikpela wok moa bilong mekim gut bel bilong man?
2. (a) Husat i gat bikpela asua tru long ol dispela planti hevi i painim ol man long nau? (b) Yumi save long wanem samting na dispela i mekim gut bel bilong yumi?
3. Long wanem taim bipo i no gat wok long mekim gut bel bilong ol man?
4, 5. (a) Wanem samting i mekim na Adam tupela Iv i no bin bihainim tok bilong God? (b) Wanem samting i kamap na i gat wok bilong mekim gut bel bilong ol man?
6. (a) Taim namba wan man na meri i pundaun na mekim sin, bihain God i mekim wanem tok promis i mekim gut bel bilong ol man? (b) Lamek i mekim wanem tok profet long wanpela man bilong mekim gut bel bilong ol man?
7, 8. (a) Wanem pasin i kamap na God i bel hevi long em i bin wokim ol man? Olsem na em i laik mekim wanem? (b) Noa i bin mekim wanem na em i truim insait bilong nem bilong em?
9. Krais Jisas i bin mekim wanem na em i kamapim klia olsem em i helpim na man bilong mekim gut bel bilong ol sinman i tanim bel?
10. Ol mirakel Jisas i bin wokim taim em i stap long graun i skulim yumi long wanem samting?
11. Bilong wanem Jisas i bin tok, em i “bosim de Sabat”?
12. Yumi inap wetim wanem ol gutpela samting i kamap bilong mekim gut bel bilong yumi?
13. Bilong wanem olgeta Kristen tru i mas kisim bel isi em God i save givim long man?
14. (a) Long nait paslain long taim Jisas i dai, em i mekim wanem tok promis? (b) Yumi mas mekim wanem na bai spirit holi bilong God inap mekim gut bel bilong yumi?
15. Wanem sampela rot bilong Jehova long mekim gut bel bilong yumi?
16. Ol samting God i bin givim long yumi bilong mekim gut bel bilong yumi, dispela i mas kirapim yumi long mekim wanem?
17. Olsem wanem Jehova i bin mekim gut bel bilong Pikinini bilong em? Wanem samting i kamap long dispela?
18. (a) Wanem taim Pol i bin karim bikpela hevi tru? (b) Olsem wanem yumi ken mekim gut bel bilong ol elda i gat pasin sori na ol i save wok strong?
19. Bilong wanem Pol i lusim Troas na em i go long Masedonia? Bihain wanem samting i mekim isi bel bilong em?
20. (a) Olsem samting i bin painim Pol, i gat wanem narapela bikpela rot Jehova i save mekim gut bel bilong yumi? (b) Long stadi i kamap bihain long dispela, bai yumi stori long wanem samting?
[Mep/Piksa long pes 10]
Taim Taitus i tokim Pol olsem ol Korin i tanim bel, dispela i mekim gut tru bel bilong Pol
MASEDONIA
Filipai
GRIK
Korin
ESIA
Troas
Efesus