Ol Kristen i Save Kisim Amamas Long Mekim Wok
“Amamas bilong man i givim samting long ol arapela man, dispela i winim amamas bilong man i kisim samting bilong em yet.”—APOSEL 20:35.
1. Planti man long nau i gat wanem tingting kranki? Olsem wanem na dispela kain tingting i nogutim ol?
INSAIT long 20 yia samting i go pinis, planti taim yumi harim dispela tok, “mi pastaim.” Dispela tok i makim pasin bilong man long tingim em yet tasol, na mangal, na i no tingim ol narapela. Long yia 2000, dispela pasin i stap yet. Planti taim yumi harim man i mekim askim olsem, “Bai mi kisim wanem gutpela samting long dispela?” Dispela pasin bilong man long tingim em yet tasol, em i no save helpim em long i stap amamas. Dispela pasin i narapela kain long dispela tok bilong Jisas: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”—Aposel 20:35.
2. Olsem wanem yumi save olsem pasin bilong givim samting i save kamapim amamas?
2 Tru amamas bilong man i givim samting i winim amamas bilong man i kisim samting? Yumi ken tok yes. Tingim God Jehova. Em i “as tru bilong laip bilong olgeta samting.” (Song 36:9) Em i save kamapim olgeta samting yumi mas kisim na bai yumi ken stap amamas na mekim gutpela wok. Tru tumas, em i As bilong “olgeta gutpela samting yumi save kisim na olgeta presen i gutpela tru.” (Jems 1:17) Jehova, em God bilong “amamas,” na long olgeta taim em i wok long givim samting. (1 Timoti 1:11) Em i save laikim tumas ol man em i bin wokim ol, na em i save givim planti samting long ol. (Jon 3:16) Tingim tu wanpela famili. Sapos yu wanpela papa o mama, yu save pinis olsem bilong mekim bikpela long pikinini, yu mas givim planti samting long em na daunim planti laik bilong yu yet. Inap planti yia dispela pikinini i no save long ol dispela samting yu mekim. Em i no tingim, em i kisim tasol. Tasol taim yu lukim pikinini bilong yu i kamap gutpela, long wanem, yu bin givim planti samting long em, dispela i givim bikpela amamas long yu. Bilong wanem? Long wanem, yu save laikim em tumas.
3. I gat wanem as na yumi amamas long mekim wok bilong Jehova na ol wanbilip bilong yumi?
3 Na i wankain long lotu i tru. Pasin bilong givim samting long narapela, long wanem, yumi laikim em, dispela em i mak bilong lotu i tru. Yumi laikim tumas Jehova na yumi laikim tumas ol wanbilip bilong yumi, olsem na yumi amamas long givim hap taim na strong bilong yumi long mekim wok bilong ol. (Matyu 22:37-39) Man i tingting long helpim em yet tasol na dispela i as na em i lotu long God, amamas bilong em i liklik tru. Tasol sapos man i mekim wok bilong God em i no tingim laik bilong em yet tasol—em i tingim ol samting em i ken givim, winim samting em inap kisim—orait em bai kisim bikpela amamas. Yumi inap save long dispela tok i tru taim yumi skelim sampela tok long Baibel i makim ol samting yumi mas mekim bilong lotu long God. Long dispela stori na long stori i kam bihain long dispela, bai yumi toktok long 3-pela bilong ol dispela tok.
Jisas i Mekim Wok Bilong Helpim Ol Man
4. Long Kristendom, dispela tok “wok bilong helpim ol man” inap makim wanem samting?
4 Long tok Grik ol i raitim Baibel long en, wanpela bikpela tok i makim ol samting bilong lotu em lei·tour·giʹa. Long Baibel New World Translation ol i tanim olsem “wok bilong helpim ol man.” Long Kristendom, dispela tok lei·tour·giʹa i bin kamapim wanpela tok Inglis (liturgy) i makim ol bilaspasin bilong mekim lotu.a Tasol ol dispela pasin bilong mekim lotu i no wanpela wok bilong helpim tru ol man.
5, 6. (a) I gat wanem wok ol i bin mekim long Israel bilong helpim ol man? Dispela i bin helpim ol olsem wanem? (b) Wanem wok i gutpela moa yet bilong helpim ol man em i kisim ples bilong dispela wok ol i mekim long Israel? Bilong wanem i gat dispela senis?
5 Taim aposel Pol i toktok long ol pris bilong Israel, em i kamapim wanpela tok Grik i wankain liklik long dispela tok lei·tour·giʹa. Em i tok: “Olgeta pris ol i save sanap na mekim wok [olsem lei·tour·giʹa] bilong ol long olgeta de. Na ol i save mekim ol dispela wankain ofa planti taim moa.” (Hibru 10:11) Ol pris Livai ol i save mekim wanpela gutpela wok tru long Israel bilong helpim ol man. Ol i lainim ol man long Lo bilong God na ol i mekim ol ofa i tekewe sin bilong ol. (2 Stori 15:3; Malakai 2:7) Taim ol pris na ol narapela i bihainim Lo bilong Jehova, i gat as na dispela lain ol i amamas tru.—Lo 16:15.
6 Em i wanpela gutpela samting tru long ol pris bilong Israel inap mekim wok bilong helpim ol man olsem Lo i makim, tasol taim ol Israel i no stap gut moa long God na em i sakim ol, dispela wok bilong ol i no inap helpim moa ol man. (Matyu 21:43) Jehova i stretim rot bilong kamapim wanpela gutpela samting i winim tru wok bilong ol—em dispela wok Jisas, em bikpela Hetpris, i mekim bilong helpim ol man. Baibel i tok: “Jisas i stap oltaim oltaim. Em i holim wok pris oltaim, na i no gat senis bilong en. Olsem na oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.”—Hibru 7:24, 25.
7. I gat wanem as na wok bilong Jisas long helpim ol man em inap helpim tru ol?
7 Jisas i holim wok pris oltaim oltaim, na i no gat senis bilong em. Olsem na Jisas tasol inap tru long kisim bek ol manmeri. Tasol dispela wok bilong helpim ol man, em i no mekim long wanpela tempel ol man i bin wokim, nogat; em i mekim long tempel Jehova yet i bin putim bilong lotuim Em. Dispela tempel i bin kamap long yia 29 C.E. Nau Jisas i mekim wok insait long Rum Holi Tru bilong dispela tempel, long heven. Em i wanpela “pris [“wokman bilong helpim ol man,” NW, olsem lei·tour·gosʹ] long haus bilong God long heven, em haus tru bilong God. Dispela haus ol man i no bin sanapim. Nogat. Bikpela yet i bin sanapim.” (Hibru 8:2; 9:11, 12) Maski Jisas i holim bikpela wok, em i stap “wokman” yet bilong “helpim ol man.” Em i mekim wok long bikpela namba bilong em bilong givim samting long ol man—em i no mekim bilong kisim samting long ol, nogat. Dispela pasin bilong givim samting em i givim bikpela amamas long em. Dispela amamas i insait long “amamas” Jisas i bin tingting long kisim bihain na i bin strongim em long karim hevi na sanap strong taim em i stap long graun.—Hibru 12:2.
8. Jisas i mekim wanem wok bilong helpim ol man na dispela i kisim ples bilong kontrak bilong Lo?
8 I gat narapela samting dispela wok bilong Jisas i helpim ol man long en. Pol i tok: “Nau Jisas i kisim wok pris [“wok bilong helpim ol man,” NW ], na dispela wok i winim tru wok bilong ol arapela pris. Long wanem, em i stap namelman bilong strongim nupela kontrak, na dispela kontrak i winim tru kontrak bilong bipo. Na ol samting dispela nupela kontrak i promis long givim yumi, ol i winim tru ol samting olpela kontrak i bin promis long givim.” (Hibru 8:6) Moses i namelman bilong olpela kontrak, na long rot bilong en ol Israel i bin kamap lain bilong Jehova. (Kisim Bek 19:4, 5) Jisas i namelman bilong nupela kontrak, na long rot bilong en wanpela nupela lain i bin kamap, em “lain Israel tru bilong God.” Ol man bilong dispela lain ol i Kristen God i bin makim ol long spirit holi, na ol i bilong planti kantri. (Galesia 6:16; Hibru 8:8, 13; KTH 5:9, 10) Man! Dispela em i wanpela gutpela wok tru bilong helpim ol man! Yumi amamas tru yumi save long Jisas, em i wanpela wokman bilong helpim ol man na long rot bilong em yumi inap lotuim Jehova long pasin em i laikim!—Jon 14:6.
Ol Kristen Tu i Save Mekim Wok Bilong Helpim Ol Man
9, 10. Wanem sampela kain wok ol Kristen i save mekim bilong helpim ol man?
9 I no gat wanpela wok ol man bilong graun i mekim bilong helpim ol narapela na i winim dispela wok bilong Jisas, nogat. Tasol taim ol Kristen God i makim ol i kisim gutpela pe bilong ol long heven, ol i stap king na pris wantaim Jisas na mekim wok wantaim em bilong helpim ol man. (KTH 20:6; 22:1-5) Tasol ol Kristen long graun ol tu i mekim wok bilong helpim ol man, na ol i kisim bikpela amamas long mekim dispela wok. Olsem: Taim i no gat kaikai long Palestain, ol brata long Yurop ol i givim mani bilong helpim ol Kristen Juda long Judia na aposel Pol i bringim dispela mani i go long ol. Dispela em i wanpela wok bilong helpim ol man. (Rom 15:27; 2 Korin 9:12) Long nau tu ol Kristen i amamas long mekim wankain wok olsem. Taim ol brata bilong ol i kisim taim nogut, olsem bikpela win ren o guria samting, kwiktaim ol i helpim ol.—Sindaun 14:21.
10 Pol i toktok long narapela wok bilong helpim ol man taim em i tok: “Bilip bilong yupela em i olsem ofa yupela i givim long God. Na maski sapos mi save olsem ol bai i kapsaitim blut bilong mi olsem ofa bilong wain wantaim dispela ofa bilong yupela, mi bai amamas yet. Mi bai amamas wantaim yupela.” (Filipai 2:17) Pol i mekim bikpela wok tru bilong helpim ol Filipai, na em i mekim long gutpela pasin sori na givim bel tru long mekim. Long nau tu i gat wanpela wok olsem bilong helpim ol man. Ol Kristen God i makim, em lain “wokboi i gat gutpela tingting,” ol i wok long givim kaikai bilong spirit long ol man long taim stret bilong en. (Matyu 24:45-47) Na tu, dispela lain ol i wanpela “lain pris” i bin kisim wok bilong mekim ol ‘ofa God i laikim tru,’ na ol i ‘tokaut long olgeta gutpela pasin’ bilong dispela Man ‘i bin singautim ol long lusim tudak na bringim ol i kam insait long lait bilong em.’ (1 Pita 2:5, 9) Wankain olsem Pol, ol tu i amamas long ol dispela gutpela wok ol i kisim na ol i givim bel long mekim. Na ol “arapela sipsip,” olsem poroman bilong ol, ol i wok wantaim ol na helpim ol long mekim wok bilong tokim ol man long Jehova na ol laik bilong em. (Jon 10:16; Matyu 24:14) Olaman! Dispela em wanpela gutpela wok tru bilong helpim ol man em yumi ken amamas long en!—Song 107:21, 22.
Mekim Wok Bilong God
11. Olsem wanem profet meri Ana em i gutpela piksa bilong olgeta Kristen i ken bihainim?
11 Narapela tok Grik i makim samting bilong lotu bilong yumi em la·treiʹa, na long Baibel New World Translation ol i tanim olsem “wok bilong God.” Dispela tok “wok bilong God” em i makim pasin bilong mekim lotu. Baibel i stori long Ana, wanpela profet meri i gat 84 krismas, em man bilong em i dai pinis, olsem: “Ana i no save lusim tempel. Em i save tambu long kaikai na i beten i stap, na em i holim wok bilong God [wanpela tok Grik kain olsem la·treiʹa] long san na long nait.” (Luk 2:36, 37) Ana i lotuim Jehova long olgeta taim. Em i gutpela piksa bilong yumi olgeta i ken bihainim—ol yangpela na lapun, ol man na meri. Ana i save beten strong long Jehova na oltaim em i go long tempel na lotu long em, olsem na bilong mekim wok bilong God, yumi tu i mas beten na go long ol miting.—Rom 12:12; Hibru 10:24, 25.
12. Wanem wanpela bikpela samting bilong wok bilong God yumi mekim? Olsem wanem dispela em i wanpela wok bilong helpim ol man?
12 Aposel Pol i kolim wanpela bikpela samting bilong wok bilong God yumi mekim, taim em i tok: “Mi save strong long mekim wok bilong God, em long autim gutnius bilong Pikinini bilong em. Na God yet i save, oltaim mi save tingim yupela long taim mi mekim prea.” (Rom 1:9, 10) Tru tumas, wok bilong autim gutnius em i save helpim ol man i harim, tasol i no dispela samting tasol. Em i wanpela wok bilong lotuim God Jehova. Maski man i harim o nogat, wok bilong autim tok em i wanpela wok bilong Jehova yumi mekim. Taim yumi tokim ol narapela long ol gutpela pasin bilong gutpela Papa bilong yumi long heven na long ol gutpela samting em i laik mekim, dispela i save givim yumi bikpela amamas.—Song 71:23.
Yumi Mekim Wok Bilong God Long We?
13. Ol man i mekim wok bilong God long ples bung i stap insait long banis bilong tempel spirit bilong Jehova, ol i wetim wanem samting? Husat ol i amamas wantaim ol?
13 Pol i raitim tok long ol Kristen God i makim, olsem: “Dispela kingdom yumi bin kisim, em i no inap guria. Olsem na yumi mas tenkyu long God long em i bin givim dispela kingdom long yumi. Na yumi mas lotu long em long pasin em yet i laikim. Na yumi mas litimapim nem bilong em na pret long em.” (Hibru 12:28) Ol dispela Kristen i lotuim God Antap Tru ol i gat strongpela bilip olsem ol bai kisim dispela Kingdom. Dispela lain tasol inap mekim wok bilong God insait long Rum Holi na long ples bung i stap insait long banis bilong tempel spirit, na ol i amamas long wetim taim na ol inap mekim wok wantaim Jisas insait long Rum Holi Tru, em heven. Ol arapela sipsip, em ol poroman bilong ol, ol i amamas wantaim ol long dispela gutpela samting ol i wetim.—Hibru 6:19, 20; 10:19-22.
14. Dispela wok Jisas i mekim bilong helpim ol man em i helpim bikpela lain olsem wanem?
14 Lain arapela sipsip ol i mekim wok bilong God long we? Olsem aposel Jon i lukim, wanpela bikpela lain sipsip i bin kamap long dispela taim bilong las de, na “ol i bin wasim ol klos bilong ol long blut bilong Pikinini Sipsip, na ol klos i kamap waitpela.” (KTH 7:14) Wankain olsem ol wanlotu bilong ol em God i makim, ol tu i bilip long dispela wok Jisas i mekim bilong helpim ol man—em i bin givim laip bilong em i gutpela olgeta olsem wanpela ofa bilong helpim ol manmeri. Dispela wok bilong Jisas em i helpim ol arapela sipsip tu, long wanem, ol i “bihainim olgeta tok bilong kontrak” bilong Jehova. (Aisaia 56:6) Ol i no insait long nupela kontrak, tasol ol i bihainim ol lo bilong en na ol i wok gut wantaim ol pasin Jehova i putim long rot bilong dispela nupela kontrak. Ol i bung wantaim lain Israel bilong God—ol i kisim wankain kaikai bilong spirit na mekim wok wantaim ol, na litimapim nem bilong God long ai bilong ol man na mekim ol ofa bilong spirit God i laikim.—Hibru 13:15.
15. Bikpela lain i save lotuim God long wanem hap? Dispela gutpela blesing i mekim wanem long ol?
15 Olsem na Jon i lukim dispela bikpela lain i “sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos.” Na tu, ol i “sanap long pes bilong sia king bilong God. Na long san na long nait ol i save stap long haus bilong en na mekim wok bilong en. Na God i save sindaun long dispela sia king, em yet bai i stap wantaim ol na lukautim ol.” (KTH 7:9, 15) Long Israel, ol manmeri bilong ol narapela lain i bihainim lotu Juda ol i save lotuim God insait long bikpela ples bung bilong tempel bilong Solomon. Na i wankain tu long dispela bikpela lain—ol i save lotuim Jehova insait long bikpela ples bung bilong tempel spirit bilong em. Ol i mekim wok bilong God long dispela hap na dispela i mekim ol i amamas. (Song 122:1) Maski bihain laspela bilong ol wanwok Kristen bilong ol i kisim laip long heven, dispela bikpela lain bai mekim yet wok bilong Jehova olsem lain manmeri bilong em.—KTH 21:3.
Wok God i No Orait Long En
16. I gat wanem tok lukaut long ol samting bilong wok bilong God yumi mekim?
16 Long taim bilong lain Israel long bipo, wok bilong God ol i mekim i mas stret wantaim ol lo bilong Jehova. (Kisim Bek 30:9; Wok Pris 10:1, 2) Long nau tu, i gat sampela samting yumi mas mekim bambai Jehova i ken orait long wok bilong em yumi mekim. Long dispela as Pol i tokim ol Kolosi: “Oltaim mitupela i save prea na askim God long helpim yupela, bai yupela i ken save gut tru long laik bilong em. Na bai Holi Spirit i ken givim yupela olkain gutpela save na tingting, na dispela i ken pulap tru long yupela. Olsem bai yupela inap wokabaut long pasin bilong ol manmeri tru bilong Bikpela, na bai em i laikim olgeta pasin bilong yupela. Na bai yupela i mekim planti kain gutpela wok. Na bai yupela i save long God, na oltaim dispela save bai i kamap bikpela moa.” (Kolosi 1:9, 10) Em i no wok bilong yumi long makim wanem pasin i stret long lotuim God. Yumi mas kisim stretpela save bilong Baibel, na kisim gut tru as bilong en, na bihainim gutpela save na tingting i kam long God. Sapos yumi no mekim olsem, dispela inap kamapim samting nogut.
17. (a) Olsem wanem wok bilong God ol man i mekim long taim bilong Moses em i go nogut tru? (b) Man i mekim wok bilong God long nau em i mekim wanem na em i kirap lotuim samting i no stret long lotuim?
17 Tingim ol Israel long taim bilong Moses. Baibel i tok: “God i givim baksait long ol, bai ol i ken lotu long san na mun na sta samting.” (Aposel 7:42) Ol dispela Israel i bin lukim ol strongpela wok Jehova i bin mekim bilong helpim ol. Tasol ol i kirap lotuim ol narapela god taim ol i ting dispela inap helpim ol. Ol i no stap gut long God. Yumi mas stap gut long God bambai em i ken amamas long wok bilong em yumi mekim. (Song 18:25) Tru, i no planti man long nau i laik lusim Jehova na kirap lotuim ol sta o ol bulmakau gol, tasol i gat ol narapela pasin i kain olsem pasin bilong lotuim god giaman. Jisas i mekim tok lukaut long pasin bilong tingting tumas long “mani,” olsem kamap wokboi bilong Mani, na Pol i tok pasin bilong mangal em i wankain olsem pasin bilong lotu long god giaman. (Matyu 6:24; Kolosi 3:5) Satan i kirapim ol man long lotuim em olsem wanpela god. (2 Korin 4:4) Ol dispela kain pasin bilong lotuim god giaman em i bikpela tru long nau na inap pundaunim yumi. Olsem: Tingim wanpela man i tok em i bihainim Jisas, tasol em i gat tingting long kamap wanpela maniman o em i bilip long em yet na long ol tingting bilong em yet. Orait dispela man i mekim wok bilong husat? Em i mekim wankain pasin olsem ol Juda long taim bilong Aisaia, ol i mekim tok tru antap long nem bilong Jehova, tasol ol strongpela wok bilong Em ol i tok ol god giaman i bin mekim.—Aisaia 48:1, 5.
18. Ol man long bipo na long nau ol i bin mekim wanem pasin i no stret, tasol ol i ting ol i mekim wok bilong God?
18 Jisas tu i toksave olsem: “Bihain bai taim i kamap, na ol man i kilim yupela i dai, ol bai i ting ol i mekim gutpela wok bilong God.” (Jon 16:2) Sol, bihain em i kamap aposel Pol, em i ting em i mekim wok bilong God taim em i orait long ol i “kilim Stiven” i dai na em i ‘tok strong long bagarapim ol disaipel bilong Bikpela na kilim ol i dai.’ (Aposel 8:1; 9:1) Long nau, sampela man insait long wok bilong bagarapim na pinisim wanpela lain olgeta ol i tok ol i lotu long God. Planti man i tok ol i lotu long God, tasol ol i lotu long ol narapela samting, olsem pasin bilong litimapim nem bilong kantri o lain, na mani, na ol yet.
19. (a) Wanem tingting bilong yumi long wok bilong God yumi mekim? (b) Wanem kain pasin bilong mekim wok bilong God bai givim amamas long yumi?
19 Jisas i tok: “Yu mas aninit long God, Bikpela bilong yu. Na yu mas lotu long em wanpela tasol.” (Matyu 4:10) Em i givim dispela tok long Satan, tasol em i bikpela samting long yumi olgeta i mas bihainim dispela tok bilong em! Pasin bilong mekim wok bilong Bikpela King bilong heven na graun em i wanpela gutpela wok tru yumi inap mekim. Orait yumi ken tok wanem long wok bilong helpim ol man, em yumi mekim olsem wanpela wok lotu? Dispela wok yumi mekim bilong helpim ol man em i wanpela wok i save givim bikpela amamas long yumi. (Song 41:1, 2; 59:16) Tasol bilong kisim amamas tru, yumi mas givim bel tru long mekim dispela wok na mekim long pasin i stret. Husat ol i lotuim God long pasin i stret? Jehova i orait long wok bilong husat long lotuim em? Bai yumi inap bekim ol dispela askim sapos yumi skelim namba 3 tok long Baibel em i makim ol samting yumi mas mekim bilong lotu long God. Bai yumi mekim olsem long stori i kamap bihain long dispela.
[Futnot]
a Wanpela pasin bilong lotu em Misin Katolik i mekim, em Komyunio o Misa samting.
Bai Yu Bekim Olsem Wanem?
• Jisas i mekim wanem bikpela wok bilong helpim ol man?
• Ol Kristen i save mekim wanem wok bilong helpim ol man?
• Wok bilong God ol Kristen i mekim em i wanem samting? Ol i mekim long we?
• Bilong God i ken amamas long wok bilong em yumi mekim, yumi mas kisim wanem samting?
[Piksa long pes 10]
Ol papamama i save kisim bikpela amamas long pasin bilong givim samting
[Ol Piksa long pes 12, 13]
Taim ol Kristen i helpim ol narapela na ol i autim gutnius, ol i mekim wok bilong helpim ol man
[Piksa long pes 14]
Bilong yumi ken save olsem God i orait long wok bilong em yumi mekim, yumi mas i gat stretpela save na pasin bilong skelim gut as bilong ol samting