Sori Long Man i Sot Long Samting na Bai Yu Amamas

“Man i save rabisim arapela man, orait em i man bilong sin stret. Tasol man i save marimari long man i sot long samting, orait em i ken amamas.”—PROVEP 14:21.

 1, 2. Wanem hevi i painim 3-pela famili Filapin? Olsem na yumi mas tingim wanem ol askim?

TRIPELA famili Filapin bilong Provins Pangasinan ol i go long wanpela miting Kristen. Taim ol i stap long miting, haus bilong ol i paia na i pinis olgeta. Taim ol i kam bek long haus, ol i no gat kaikai, na ol i no gat ples bilong slip. Ol brata Kristen bilong ol i harim tok long dispela hevi i painim ol na kwiktaim ol i kisim kaikai i kam na stretim rot bilong givim ples slip long ol long haus bilong sampela brata long kongrigesen. Long tumora, long moningtaim, sampela brata Kristen i kisim mambu i kam na ol narapela samting bilong wokim haus. Ol man i stap klostu ol i pilim gutpela pasin sori i stap namel long ol dispela brata Kristen. Na dispela gutpela pasin i helpim dispela tripela famili tu. Paia i bagarapim haus bilong ol, tasol em i no bagarapim bilip bilong ol na ol gutpela pasin Kristen. Dispela i stap yet na i kamap strong, long wanem ol brata i mekim gutpela pasin sori long ol.—Matyu 6:33; skelim 1 Korin 3:12-14.

² Taim yumi harim kain stori olsem, bel bilong yumi i save amamas, a? Na yumi bilip strong moa long gutpela pasin bilong ol man na long strong bilong lotu Kristen tru. (Aposel 28:2) Tru tumas, yumi mas ‘mekim gutpela pasin long olgeta man, na strong moa long mekim long ol brata i bilip long Bikpela.’ (Galesia 6:10) Tasol yumi save long ol tok bilong Baibel i mas kirapim yumi long mekim olsem? Na olsem wanem long yumi yet? Yumi inap mekim moa yet dispela pasin bilong sori?

Gutpela Piksa Tru Bilong Yumi

 3. Yumi save Jehova i sori long yumi na em i helpim yumi long wanem samting?

³ Disaipel Jems i tokim yumi: “Olgeta pasin bilong givim nating gutpela samting, na olgeta presen i gutpela tru, em olgeta i save kam long heven.” (Jems 1:17) Dispela tok i stret, long wanem Jehova i save givim planti samting long yumi bilong helpim yumi long spirit na long skin! Tasol em i laik helpim yumi long wanem samting pastaim? Long ol samting bilong spirit. Em i givim Baibel long yumi bilong soim rot long yumi na bilong helpim yumi bambai yumi ken bilip na wetim gutpela samting i kamap. Yumi ken wetim gutpela samting i kamap, long wanem God i bin givim Pikinini bilong em olsem ofa, na long rot bilong dispela ofa sin bilong yumi i ken tekewe na yumi inap long kisim laip i stap oltaim.—Jon 3:16; Matyu 20:28.

 4. Olsem wanem yumi save, God i laik helpim yumi long ol samting bilong skin tu?

⁴ Tasol Jehova i laik helpim yumi long i stap gutpela long ol samting bilong skin tu. Bipo aposel Pol i toktok wantaim sampela man long Listra long dispela samting. Ol i no lotu long God tru, tasol ol i save Man bilong wokim olgeta samting ‘em i save mekim gutpela pasin long yumi. Em i salim ren i kam na mekim planti gutpela kaikai i kamap. Em inapim kaikai long yumi na i mekim bel bilong yumi i amamas.’ (Aposel 14:15-17) Jehova i sori long yumi, olsem na em i save givim ol samting long yumi bilong helpim yumi long spirit na long skin. Ating dispela samting i mekim na God em i “as bilong amamas,”a?—1 Timoti 1:11.

 5. Ol samting God i bin mekim long lain Isrel long bipo i lainim yumi long wanem samting?

⁵ Ol samting God i mekim long lain Isrel bipo i kamapim long ples klia stretpela tingting bilong em—em i laik helpim ol long ol samting bilong spirit na bilong skin. Namba wan samting em i mekim em i givim Lo bilong em long ol. Ol king bilong em ol yet i mas raitim ol tok bilong dispela Lo long wanpela buk, na sampela taim lain bilong God ol i mas bung wantaim na harim ol man i kaunim Lo bilong God long ol. (Diuteronomi 17:18; 31:9-13) Lo i tok ol i mas i gat wanpela haus lotu, na ol pris bilong kisim ol ofa na givim long God bambai God i ken orait long ol. Ol Isrel i save mekim sampela bung long olgeta yia bilong strongim ol long spirit. (Diuteronomi 16:1-17) Olgeta Isrel wan wan i kisim planti samting bilong spirit na ol inap i stap gutpela long ai bilong God.

 6, 7. Jehova i givim Lo long ol Isrel na olsem wanem dispela Lo i kamapim long ples klia olsem Jehova i laik helpim ol long samting bilong skin?

⁶ Tasol Lo i kamapim long ples klia olsem God i laik lukautim lain bilong em long ol samting bilong skin tu. Ating yu tingim ol lo God i givim long ol Isrel long klinpela pasin ol i mas bihainim, na ol samting ol i mas mekim bambai sik i no ken kalap i go long narapela narapela. (Diuteronomi 14:11-21; 23:10-14) Tasol yumi no ken lusim tingting long ol lo God i putim bilong helpim ol manmeri i sot long samting na ol i stap nogut. Sapos sik i painim wanpela Isrel, o wanpela bagarap, olsem paia o tait wara, i painim em, ating bai em i sot long samting na i kamap rabis. Long Lo Jehova i tokaut olsem em i save, olgeta i no ken i stap wankain; sampela bai i stap rabis. (Diuteronomi 15:11) Tasol em i no tok tasol olsem em i sori long ol man i stap rabis. Nogat. Em i stretim rot bilong helpim ol.

⁷ Ol dispela man i mas i gat kaikai. Olsem na God i tok ol rabisman long Isrel ol i ken i go long ol gaden na bungim bali o wit o kaikai bilong rop wain o diwai oliv, em ol man bilong kisim i lusim i stap. (Diuteronomi 24:19-22; Levitikas 19:9, 10; 23:22) Dispela pasin God i kamapim em i gutpela. Olsem bai ol man i no ken kamap lesman na wet tasol long ol narapela man i givim kaikai long ol. Nogat. Sapos ol inap wok, orait ol i mas wok na kisim kaikai. Tru, ol i mas wok strong inap planti aua long bikpela san bambai ol inap bungim kaikai inap long wanpela de. Tasol em i rot bilong God bilong helpim ol man i sot long samting. Em i mekim gutpela pasin sori.—Skelim Rut 2:2-7; Sam 69:33; 102:17.

 8. (a) God i kirapim ol Isrel wan wan long mekim wanem long ol brata bilong ol? (Skelim tok bilong Jeremaia 5:26, 28 tu.) (b) Olsem wanem long pasin God i kirapim ol Isrel long bihainim na pasin bilong planti man long nau?

⁸ Jehova i mekim sampela tok, olsem i stap long Aisaia 58:6, 7 (NW ), na dispela tu i kamapim long ples klia sori bilong em, em i laik helpim ol man i stap nogut. Sampela Isrel ol i no sot long samting ol i giaman na tambuim kaikai, na long maus bilong profet Aisaia God i tok: “Pasin bilong tambuim kaikai mi laikim, em olsem: ‘Yupela mas . . . brukim kalabus bilong ol man i bagarap tru long wok kalabus, na yupela i mas brukim olgeta samting i kalabusim ol man. Yupela i mas givim hap kaikai bilong yupela long ol man i hangre, na ol man i karim hevi na ol i no gat haus, em yupela i mas kisim ol i go long haus bilong yupela. Sapos yupela i lukim wanpela man i stap skin nating, yupela i mas givim laplap long em. Bilong wanem yupela i sakim ol wanblut bilong yupela?’ ” Sampela man long nau ol i laik helpim man i sot, tasol ol i no laik mekim sapos dispela bai givim hatwok liklik long ol o ol i mas lusim sampela samting bilong ol yet bambai ol inap helpim em. Ol i no bihainim pasin God i makim long maus bilong Aisaia!—Lukim tu Esikiel 18:5-9.

 9. Lo i tok wanem long givim dinau? God i kirapim ol Isrel long bihainim wanem kain tingting na pasin?

⁹ Sapos wanpela Isrel i sori long brata bilong em i sot long samting, ating bai em i givim dinau long em. Sapos wanpela Isrel i givim dinau long wanpela man i laik mekim wok long dispela mani bilong mekim wok bisnis o bilong skruim wok bisnis bilong em i go bikpela, orait dispela Isrel i ken kisim winmani taim man i bekim dinau. Tasol Jehova i tok, sapos wanpela brata bilong ol i sot tru na dispela inap pulim em long mekim pasin i no stret, orait taim ol i givim dinau long em ol i no ken kisim winmani taim em i bekim dinau. (Eksodas 22:25; Diuteronomi 15:7, 8, 11; 23:19, 20; Provep 6:30, 31) Tingting bilong God long ol man i stap tarangu, dispela i makim gutpela tingting na pasin lain bilong em i mas bihainim. God i tok promis long yumi olsem: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain bai Bikpela i bekim dispela dinau.” (Provep 19:17 Olaman!—i olsem yu larim Jehova i dinau long yu, na em i tok promis long bekim tru dispela dinau long yu!

10. Taim yu tingim pasin bilong God, yu ken givim wanem ol askim long skin bilong yu yet?

¹⁰ Olsem na yumi olgeta i mas askim yumi yet olsem: Mi ting olsem wanem long pasin God i mekim long ol man i stap nogut? Mi lain long bihainim gutpela pasin em i mekim? Mi inap bihainim moa yet pasin God i mekim?—Jenesis 1:26.

Pikinini i Bihainim Pasin Bilong Papa

11. Jisas i mekim pasin sori wankain olsem Papa bilong em o olsem wanem? (2 Korin 8:9)

¹¹ Krais Jisas “em i wankain tru olsem God.” (Hibru 1:3) Olsem na yumi save em i mas bihainim pasin bilong Papa bilong em na sori long ol man i laikim lotu i tru. Na em i mekim olsem. Jisas i kamapim long ples klia olsem bikpela samting ol man i sot long en na yumi mas helpim ol long en, em ol samting bilong spirit. Jisas i tok: “Ol man i pilim olsem ol i sot long ol samting bilong spirit na ol i laik kisim, ol i ken amamas, long wanem kingdom bilong heven em i bilong ol. (Matyu 5:3, NW; skelim tu tok bilong Luk 6:20.) Na Krais i tok: “Mama bilong mi i karim mi na mi kam long graun bilong dispela tasol: Mi gat wok long autim tok tru.” (Jon 18:37) Olsem na em i no kisim nem olsem man bilong wokim ol mirakel o man bilong oraitim sik bilong ol man. Nogat. Em i kisim nem tru olsem Tisa. (Mak 10:17-21; 12:28-33) Lukim tok bilong Mak 6:30-34. Jisas i laik painim ples bilong malolo liklik, tasol “em i lukim planti tumas ol manmeri. . . . Ol i olsem sipsip i no gat wasman.” Na em i mekim wanem? “Em i stat na i givim planti tok long ol.” Tru tumas, Jisas i redi long givim em yet bilong helpim ol man long dispela samting ol i sot tru long en: Em tok i tru bilong givim laip oltaim long ol.—Jon 4:14; 6:51.

12. Taim yumi kaunim Mak 6:30-34 na Mak 6:35-44, yumi kisim wanem save long tingting bilong Krais?

¹² Jisas i helpim ol Juda i no gat planti samting. Em i tingting long helpim ol long ol samting bilong spirit pastaim, tasol em i save em i mas helpim ol long ol samting bilong skin tu. Stori bilong Mak i kamapim long ples klia olsem Jisas i tingim ol man i sot long kaikai bilong skin. Mak i stori olsem: Pastaim ol aposel i tok, gutpela sapos Jisas i salim ol manmeri i go na ol i ken i go long ol hap nabaut na “baim kaikai bilong ol.” Tasol Jisas i no orait long dispela. Olsem na ol aposel i tok, ating ol i ken kisim sampela mani ol i holim bilong helpim ol long mekim wok bilong ol na ol i ken baim kaikai bilong dispela bikpela lain manmeri. Tasol Jisas i wokim wanpela mirakel na givim kaikai long ol dispela manmeri. Ol man i kaikai dispela bret na pis ol inap 5,000, na ol meri pikinini tu i kaikai. Ating sampela long nau bai tok, ‘I no hatwok long Jisas i wokim mirakel na helpim ol dispela manmeri long kaikai.’ Tasol yumi no ken lusim tingting olsem em i sori long ol dispela manmeri na dispela i kirapim em long helpim ol olsem.—Mak 6:35-44; Matyu 14:21.a

13. Jisas i mekim wanem samting moa na yumi save em i sori long ol man na em i laik helpim ol long i stap gutpela?

¹³ Ating yu bin kaunim Gutnius em Matyu na Mak na Luk na Jon i raitim na yu save, Jisas i no sori long ol rabisman tasol. Nogat. Em i helpim tu ol man i gat sik na ol man i karim hevi. (Luk 6:17-19; 17:12-19; Jon 5:2-9; 9:1-7) Na em i no helpim tasol ol man i stap klostu long em. Nogat. Sampela taim em i wokabaut i go long man i gat sik bambai em inap helpim em.—Luk 8:41-55.

14, 15. (a) Olsem wanem yumi inap save, Jisas i laik bai ol disaipel bilong em i sori long ol man olsem em i bin mekim? (b) Gutpela sapos yumi givim wanem askim long skin bilong yumi yet?

¹⁴ Tasol olsem wanem? Ol man ol inap wokim mirakel ol tasol i helpim ol disaipel (o ol man i laik save long tok i tru), em ol i gat sik o hevi? Nogat. Olgeta disaipel bilong Jisas i mas sori long ol dispela manmeri na helpim ol. Olsem: Em i tokim wanpela maniman i laik kisim laip i stap oltaim: “Yu mas givim olgeta samting bilong yu long man i baim, na yu mas tilim ol dispela mani i go long ol rabisman. Yu mekim olsem, na bai yu gat gutpela samting tru long heven.” (Luk 18:18-22) Na Jisas i tok tu: “Sapos yu mekim bikpela kaikai, orait yu mas singautim ol rabisman, na ol man bodi bilong ol i bagarap, na ol lek nogut, na ol man aipas. Ol dispela kain man ol i no inap bekim kaikai long yu. Olsem na bai yu ken amamas. Long wanem bihain bai God i bekim dispela kaikai long yu, taim ol stretpela man ol i kirap bek long matmat.”—Luk 14:13, 14.

¹⁵ Ol Kristen ol i man bilong bihainim Krais, olsem na yumi olgeta wan wan i ken askim skin bilong yumi yet, olsem: Mi bihainim tru tingting bilong Jisas na pasin em i mekim long ol man i stap rabis o ol i gat sik o ol i karim hevi o ol i stap nogut? Mi inap tok tru olsem aposel Pol: “Yupela i mas makim mi na wokabaut, olsem mi tu mi save makim Krais na wokabaut”?—1 Korin 11:1.

Pol—Em i Gutpela Piksa

16. Aposel Pol i gat bikpela tingting long mekim wanem?

¹⁶ I stret nau yumi ken stori long Pol, long wanem em i stap gutpela piksa bilong yumi ken bihainim pasin bilong em. Nambawan tingting bilong em i olsem: Em i tingting long helpim ol man long ol samting bilong spirit. Em i wanpela ‘maus’ bilong Krais na em i save autim tok strong long ol narapela man na tokim ol: ‘Yupela mas kamap wanbel wantaim God.’ (2 Korin 5:20) Bikpela wok Pol i kisim em bilong autim tok long ol man bilong ol narapela lain, em ol i no bilong lain Juda, na kamapim ol kongrigesen. Em i tok: “God i salim mi bilong telimautim gutnius long ol man bilong ol arapela lain.”—Galesia 2:7.

17. Olsem wanem yumi save Pol i tingting long helpim ol man long samting bilong skin tu?

¹⁷ Tasol Pol i tok, em i bihainim pasin bilong Krais, olsem na ating em i tingim ol brata i gat sik o hevi (olsem Jehova na Jisas i mekim)? Orait, Pol yet i ken bekim dispela askim. Long Galesia 2:9, em i tok moa, olsem: “Jems na Pita na Jon . . . ol i sekan long mi wantaim Banabas, olsem brata tru. Mipela i wanbel long tok olsem: Mitupela i ken wok namel long ol arapela lain.” Na long ves 10 Pol i tok: “‘Yupela i mas tingting gut long ol rabisman.’ Dispela samting mi laikim tumas, na mi wok strong long mekim.” (Galesia 2:10) Olsem na Pol i save, maski em i wanpela misineri na wanpela aposel na em i gat bikpela wok long planti kongrigesen, tasol em i mas tingting tu long helpim ol brata sista long i stap gutpela long skin.

18. Long Galesia 2:10 ating Pol i tok long wanem “ol rabisman”? Bilong wanem ol Kristen i mas tingting gut long ol?

¹⁸ Ol dispela “rabisman” Pol i toktok long ol long Galesia 2:10, ating ol i Kristen bilong lain Juda, em ol i stap long Jerusalem na Judia. Long wanem bipo “ol disaipel [bilong lain Juda] i save tok Grik ol i gat wanpela kros long ol disaipel [bilong lain Juda] i save tok Hibru. Ol i tok, ‘Long olgeta de yupela i save helpim ol manmeri i sot long kaikai samting, tasol yupela i no save helpim ol meri bilong mipela, man bilong ol i dai pinis.’” (Aposel 6:1) Olsem na tru Pol i tok em i gat wok long autim tok long ol man bilong ol arapela lain, tasol i no olsem em i no tingim ol narapela brata long lain Kristen. Nogat. Em i save tingting long helpim olgeta brata sista Kristen. (Rom 11:13) Em i save, wok bilong helpim ol long samting bilong skin, dispela tu i insait long dispela tok, olsem: “Bodi i no ken bruk hap hap, nogat, olgeta hap wan wan ol i ken lukautim ol arapela hap wankain tasol. Olsem na sapos wanpela hap bodi i pilim pen, olgeta hap i save pilim pen wantaim.”—1 Korin 12:25, 26.

19. I gat wanem samting na yumi save, Pol na ol narapela i sori long ol rabisman na dispela i kirapim ol long mekim sampela samting bilong helpim ol?

¹⁹ Taim ol Kristen long Jerusalem i karim hevi, long wanem ol i sot long samting, o bikpela hangre i kamap long hap bilong ol, o ol man i mekim nogut long ol, orait sampela kongrigesen i stap longwe ol i helpim ol. Ol brata long ol dispela kongrigesen ol i save beten askim God long helpim na strongim bel bilong ol brata i sot long samting. Tasol ol i no beten tasol. Pol i tok, “Masedonia wantaim Grik ol i pasim tok pinis na i hapim samting bilong ol na i bungim bilong salim i go long Jerusalem, long ol manmeri bilong God ol i sot long samting.” (Rom 15:26, 27) Ol dispela Kristen i salim mani samting bilong helpim ol brata bilong ol na Pol i tokim ol: “Bai yupela i gat planti samting, na yupela inap long givim planti samting long ol brata. Na long wok bilong mipela dispela presen bilong yupela bai em i mekim ol brata i tenkyu long God.” (2 Korin 9:1-13) Dispela bai mekim ol i amamas tru, a?

20. Ol brata i givim samting bilong helpim ‘ol man i sot long samting,’ bilong wanem ol i ken amamas?

²⁰ Ol brata i salim mani bilong helpim “ol manmeri bilong God [long Jerusalem] ol i sot long samting,” i gat narapela samting tu ol i ken amamas long en, em olsem: Bai God i belgut long ol, long wanem ol i helpim ol dispela man i gat hevi. Sapos yumi tingim insait bilong tok Grik ol i tanim olsem “presen” long 2 Korin 9:13, dispela bai helpim yumi long save bilong wanem God bai belgut long ol. Insait bilong dispela tok i olsem: ‘Samting i makim ol brata i pren gut wantaim na i stap wanbel.’ Dispela tok Grik i stap long Hibru 13:16 tu na ol i tanim olsem: “Yupela i no ken lusim tingting long mekim gutpela pasin long ol manmeri. Na samting i stap long yupela, em yupela i mas skelim hap long man i sot, bilong helpim em. God i laikim tumas dispela kain ofa.”

Bai Yumi Kisim Dispela Amamas?

21. Olsem na wanem samting i olsem wanpela as bilong kisim amamas?

²¹ Em nau, yumi stori pinis long ol tok bilong Baibel i makim olsem God Jehova, na Krais Jisas, na aposel Pol, ol i sori long ol man i karim hevi. Olgeta i save ol i mas helpim ol dispela man long samting bilong spirit pastaim. Tasol olgeta i bin mekim sampela samting bilong helpim ol rabisman na ol sikman na ol man i gat hevi long samting bilong skin tu. Ol i kisim bikpela amamas long helpim ol olsem. Na i wankain long yumi, a? Aposel Pol i tok, yumi mas “tingim dispela tok Bikpela Jisas yet i mekim. Em i tok, ‘Amamas bilong man i givim samting long arapela man, dispela i winim amamas bilong man i kisim samting bilong em yet.’”—Aposel 20:35.

22. I gat wanem samting moa bilong dispela samting, em yu mas tingim?

²² Tasol ating yu bai tok: Mi yet mi ken mekim wanem? Olsem wanem mi inap save husat tru i sot long samting na mi mas helpim em? Wanem gutpela pasin bilong helpim narapela man na bai em i no les long mekim wok bilong helpim em yet na mi helpim em gut na pilim gut tingting bilong em na mi mekim pasin i stret wantaim wok Kristen bilong mi long autim dispela gutpela tok? Orait, tok i kamap bihain long dispela bai stori long ol dispela samting, na dispela bai helpim yu long kisim bikpela amamas moa.

[Ol Futnot]

Yu Tingim?

◻ God i mekim wanem na yumi save, em i laik helpim yumi long ol samting bilong spirit na ol samting bilong skin tu?

◻ Jisas i lainim ol man long tok i tru, tasol wanem samting i makim olsem em i no tingting long helpim ol long dispela rot tasol?

◻ Pol i mekim wanem long ol rabisman na em i makim gutpela pasin yumi ken bihainim?

◻ Yumi stori pinis long pasin bilong Jehova na Jisas na Pol, olsem na nau yu ting yu mas mekim wanem?

[Piksa long pes 13]

Ol elda Kristen na ol narapela tu o ol i mas bihainim tok bilong Jisas long Luk 14:13, 14