Givim Bel Long Mekim Wok Bilong God
APOSEL Pol i tok: “Mi bai amamas tasol long givim olgeta samting bilong mi, na long givim laip bilong mi tu, bilong helpim yupela.” (2 Korin 12:15) Dispela tok i givim wanem tingting long yu long tingting na pasin ol wokboi bilong Jehova i mas wok long kamapim? Wanpela saveman bilong Baibel i tok, taim Pol i mekim dispela tok long ol Kristen long Korin i olsem em i laik tok: “Mi gat laik long givim strong, na taim, na laip, na olgeta samting bilong mi bilong helpim yupela, olsem wanpela papa i amamas long helpim ol pikinini bilong em.” Pol i redi long “givim olgeta samting” bilong em, olsem “wok i go inap long strong bilong em i pinis,” bilong mekim wok Kristen bilong em.
Na tu, Pol i “amamas” long mekim olsem. Narapela Baibel (The Jerusalem Bible) i tok em i ‘amamas tru’ long mekim olsem. Olsem wanem long yu? Yu amamas long mekim wok long taim, strong, save, na mani kago samting bilong yu long mekim wok bilong Jehova na helpim ol narapela man, maski sampela taim yu mas ‘wok inap strong bilong yu i pinis’? Na bai yu ‘amamas tru’ long mekim olsem?
Ol i No Laik Mekim Wok
Planti man ol i no surik tasol long mekim wok bilong God, nogat, ol i no laik mekim wok bilong God liklik. Ol i no gat pasin bilong tok tenkyu na ol i tingim ol yet tasol na bikhet. Satan i bin kirapim Adam na Iv long bihainim dispela kain tingting. Em i giaman na tok olsem tupela bai ‘kisim save long wanem samting i gutpela, na wanem samting i nogut, na bai tupela i kamap wankain olsem God,’ na ol yet inap skelim wanem samting i stret na wanem samting i no stret. (Stat 3:1-5) Ol man bilong nau ol i gat wankain tingting, ol i ting ol i mas stap fri long mekim wanem samting ol i laik mekim, na ol i no gat wok long bihainim tok bilong God, o God i no ken mekim wanpela samting bilong pasim ol. (Song 81:11, 12) Ol i laik mekim wok long olgeta samting bilong ol long mekim laik bilong ol yet tasol.—Sindaun 18:1.
Ating yu no wanbel wantaim dispela kain tingting. Ating long nau yu amamas tru long laip yu kisim olsem presen na long gutpela samting yu wetim long bihain, olsem laip oltaim oltaim long Paradais long graun. (Song 37:10, 11; KTH 21:1-4) Ating yu pilim tru gutpela pasin Jehova i save mekim long yu. Tasol yumi olgeta i mas was gut, long wanem, Satan inap paulim tingting bilong yumi na bai Jehova i no inap orait long wok yumi mekim. (2 Korin 11:3) Olsem wanem dispela samting inap kamap?
Yumi Mas i Gat Laik Long Mekim Wok
Jehova i laik bai yumi amamas na givim bel olgeta long mekim wok bilong em. Em i no save subim yumi long mekim laik bilong em. Tasol Satan em i save wok strong long subim o pulim ol man long bihainim laik bilong em. Taim Baibel i stori long mekim wok bilong God em i save stori long ol lo na ol samting God i laik bai yumi mas mekim. (Saveman 12:13; Luk 1:6) Tasol namba wan as na yumi mekim laik bilong God, em yumi laikim em tumas.—Kisim Bek 35:21; Lo 11:1.
Pol i save, maski em i givim olgeta strong bilong em long mekim wok bilong God, sapos em i ‘no givim bel bilong em long ol manmeri,’ ol samting em i mekim i olsem samting nating tasol. (1 Korin 13:1-3) Taim ol man bilong raitim Baibel i kolim ol Kristen olsem ol wokboi bilong God, ol i no stori long ol wokboi nating, em ol man i bin subim ol long i stap olsem. (1 Pita 2:16; Kolosi 3:24) Insait bilong dispela tok wokboi bilong God i olsem ol i laik daun long God, long wanem, ol i laikim tru God na Pikinini bilong em, Jisas Krais.—Matyu 22:37; 2 Korin 5:14; 1 Jon 4:10, 11.
Wok bilong God yumi save mekim i mas kamapim olsem yumi laikim tru ol manmeri. Pol i tokim kongrigesen Tesalonaika olsem: “Taim mipela i stap wantaim yupela . . . mipela i bin stap olsem meri i givim susu long ol pikinini bilong en.” (1 Tesalonaika 2:7) Long planti kantri long nau, lo i tok ol mama i mas lukautim ol pikinini bilong ol. Tasol ol mama i no save lukautim ol pikinini bambai ol i ken bihainim lo tasol, a? Nogat. Ol i mekim, long wanem, ol i laikim tru pikinini. Wanpela mama i save givim susu long pikinini, em i amamas long mekim planti samting bilong lukautim pikinini bilong em! Pol i ‘laikim tumas’ ol manmeri em i bin autim tok long ol, na em i “laik” givim laip bilong em yet bilong helpim ol. (1 Tesalonaika 2:8) Pasin sori i save kirapim yumi long bihainim pasin bilong Pol.—Matyu 22:39.
Olsem Wanem Long Mekim Wok Maski Yumi No Laik?
Yumi no ken larim pasin bilong laikim yumi yet i winim pasin bilong laikim God na ol man. Sapos yumi mekim olsem, ating bai yumi givim hap bel tasol long mekim wok bilong God. Na yumi inap bel nogut na bel hevi, long wanem, yumi no inap mekim laik bilong yumi yet. Dispela i bin kamap long sampela bilong lain Israel, em ol i no laikim tru God, tasol ol i mekim sampela wok bilong em, long wanem, ol i ting ol i mas mekim. Wanem samting i kamap long dispela pasin bilong ol? Ol i “les pinis” long mekim wok bilong God.—Malakai 1:13.
Taim yu laik givim samting olsem ofa long God, samting yu givim i mas gutpela, na i no gat bagarap long en. (Wok Pris 22:17-20; Kisim Bek 23:19) Ol manmeri long taim bilong Malakai ol i no givim ol gutpela animal long Jehova, nogat, ol i givim ol animal ol yet i no laikim. Jehova i gat wanem tingting long pasin ol i mekim? Em i tokim ol pris olsem: “Taim yupela i bringim wanpela abus ai bilong en i pas na yupela i ofaim long mi, yupela i ting em i stret, a? Taim yupela i save bringim ol abus i gat sik, o lek bilong ol i bruk, yupela i ting em i stret, a? Sapos yupela i givim kain abus olsem long namba wan gavman bilong yupela, yupela i ting em bai i amamas long yupela, a? . . . Yupela i save ofaim ol abus ol wel animal i bin kilim. Na yupela i save bringim ol abus i gat sik o i gat lek nogut. Yupela i ting mi Bikpela, mi bai laikim dispela kain ofa, a? Nogat tru.”—Malakai 1:8, 13.
Olsem wanem dispela kain samting inap kamap long yumi? Yumi inap pilim olsem yumi “les pinis” long ol wok yumi mekim olsem ofa sapos yumi no amamas na givim bel long mekim dispela wok. (Kisim Bek 35:5, 21, 22; Wok Pris 1:3; Song 54:6; Hibru 13:15, 16) Olsem wanem? Yumi mekim olgeta narapela samting pastaim na long liklik hap taim i stap yet yumi mekim wok bilong Jehova?
Sapos wanpela wanblut i gat gutpela tingting o wanpela Livai i save givim bel long mekim wok bilong em i bin subim wanpela man Juda long givim nambawan gutpela animal bilong em olsem ofa taim em i no gat laik long mekim olsem, yu ting God i ken orait long dispela ofa? (Aisaia 29:13; Matyu 15:7, 8) Jehova i no orait long kain ofa olsem, na bihain em i no orait long ol man i mekim ol dispela ofa.—Hosea 4:6; Matyu 21:43.
Laikim Tumas Long Mekim Laik Bilong God
Bilong mekim wok God bai orait long en, yumi mas bihainim pasin bilong Jisas Krais. Em i tok: “Mi no save bihainim laik bilong mi yet. Nogat. Mi bihainim laik bilong Papa.” (Jon 5:30) Jisas i kisim bikpela amamas long mekim wok bilong God. Jisas em i truim tok profet bilong Devit olsem: “God bilong mi, mi laikim tumas long bihainim laik bilong yu.”—Song 40:8.
Tru, Jisas i laikim tumas long mekim laik bilong Jehova, tasol sampela taim em i hatwok long mekim olsem. Tingim ol samting i bin kamap paslain liklik long taim ol i holimpasim em, na kotim em, na kilim em i dai. Taim Jisas i stap long gaden Getsemani, ‘bel bilong em i hevi tumas’ na em i “pilim hevi nogut tru.” Em i pilim tru dispela samting long bel bilong em, na taim em i beten “tuhat bilong en i kamap olsem blut na i pundaun long graun.”—Matyu 26:38; Luk 22:44.
Bilong wanem Jisas i bin pilim kain hevi nogut tru olsem? I no olsem em i tingim em yet o em i no gat laik long mekim laik bilong God. Nogat. Em i redi long i dai, na em i mekim strongpela tok long Pita taim Pita i tok: “Bikpela, nogat tru. Dispela samting i no inap kamap long yu.” (Matyu 16:21-23) Bikpela samting long tingting bilong Jisas em i olsem: Taim em i dai olsem wanpela man nogut, dispela bai mekim wanem long Jehova na nem holi bilong em. Jisas i save olsem Papa bilong em bai pilim bikpela bel hevi long lukim ol man i mekim nogut long em.
Na tu, Jisas i save, samting em i laik mekim em i wanpela bikpela samting tru long wok bilong Jehova long kamapim laik bilong em. Sapos em i stap gut long bihainim ol lo bilong God, dispela bai kamapim long ples klia olsem, Adam tu em inap mekim olsem. Taim Jisas i stap gut long God, dispela bai kamapim long ples klia olsem Satan i giaman taim em i bin tok olsem ol man i no inap givim bel na stap gut long mekim wok bilong God. Long rot bilong Jisas, Jehova bai bagarapim Satan na pinisim olgeta samting pasin bikhet bilong em i bin kamapim.—Stat 3:15.
Em i wanpela bikpela wok tru Jisas i mas mekim! Bilong mekim gut nem bilong Papa bilong em, na kamapim bel isi long heven na graun, na i gat rot bilong kisim bek olgeta manmeri, Jisas i mas stap gut long God. Jisas i tingim dispela na em i beten: “Papa bilong mi, sapos inap, orait mi laik bai yu rausim dispela kap long mi. Tasol yu no ken bihainim laik bilong mi. Nogat. Yu mas bihainim laik bilong yu tasol.” ( Matyu 26:39) Maski em i karim bikpela hevi tru, Jisas i no lusim pasin bilong givim bel long mekim laik bilong Papa bilong em.
‘Bel i Gat Laik, Tasol Bodi i No Gat Strong’
Jisas i bin karim bikpela hevi tru taim em i mekim wok bilong Jehova, olsem na yumi save Satan bai putim bikpela hevi long yumi ol wokboi bilong God. (Jon 15:20; 1 Pita 5:8) Na tu, yumi no gutpela olgeta. Olsem na maski yumi gat laik long mekim wok bilong God, bai yumi hatwok long mekim olsem. Jisas i luksave olsem i hatwok long ol aposel bilong em long mekim olgeta wok em i bin askim ol long mekim. Dispela i as na em i tok: “Bel em i gat laik bilong mekim samting, tasol bodi em i no gat strong.” (Matyu 26:41) Skin bilong Jisas em i gutpela olgeta, em i no gat wanpela sin. Tasol em i tingim skin bilong ol disaipel bilong em, ol i no gutpela olgeta na ol i bin kisim sin long rot bilong Adam. Jisas i save ol i kisim sin long Adam na dispela i putim hevi long ol, olsem na ol bai hatwok long mekim ol wok bilong Jehova ol i gat laik long mekim.
Olsem na ating yumi pilim wankain olsem aposel Pol, em i bel hevi tru, long wanem, sin i mekim na em i no inap mekim wok bilong God inap tru long skel em i laik mekim. Em i tok: “Tru, mi laik mekim gutpela pasin, tasol mi no inap mekim.” (Rom 7:18) Yumi tu i no inap mekim olgeta gutpela samting yumi gat laik long mekim. (Rom 7:19) Tasol i no olsem yumi no gat laik long mekim. Nogat. As bilong dispela samting em i olsem: Bodi bilong yumi i no strong na dispela i save pasim yumi long mekim ol gutpela samting yumi gat laik long mekim.
Yumi no ken bel hevi. Sapos long bel yumi laikim tumas long mekim olgeta samting yumi inap long mekim, God bai orait long wok bilong yumi. (2 Korin 8:12) Yumi mas “wok strong” long bihainim pasin bilong Jisas, em pasin bilong daun olgeta long mekim laik bilong God. (2 Timoti 2:15; Filipai 2:5-7; 1 Pita 4:1, 2) Jehova bai praisim na strongim ol man i save mekim kain pasin olsem. Taim yumi no gat strong, Em bai givim “bikpela strong” long yumi. (2 Korin 4:7-10) Jehova i helpim yumi, na olsem Pol i tok, bai yumi “amamas tasol long givim olgeta samting bilong [yumi], na long givim laip bilong [yumi] tu” long mekim gutpela wok bilong Em.
[Piksa long pes 21]
Pol i givim bel long mekim wok bilong God inap tru long skel bilong em
[Piksa long pes 23]
Maski Jisas i karim bikpela hevi tru, em i mekim laik bilong Papa bilong em