Bilong Wanem Yumi Mas Daunim Laik Bilong Yumi Yet?
Bill i gat 50 samting krismas na em i gat famili bilong em yet. Em i wanpela tisa i save lainim ol man long wokim ol haus. Inap planti wik long olgeta yia em i save tromoi mani bilong em yet bilong helpim ol long redim ol samting na sanapim ol Haus Kingdom bilong ol kongrigesen bilong ol Witnes Bilong Jehova. Emma em wanpela meri singel i gat 22 krismas, na em i bin kisim gutpela skul na em inap mekim gutpela wok. Tasol em i no wok long winim sampela mak bilong helpim em yet o wok long kisim amamas, nogat; em i mekim wok autim tok inap 70 aua long olgeta mun bilong helpim ol manmeri long kisim save long tok bilong Baibel. Maurice na Betty ol i pinis long wok. Tasol ol i no tingting long malolo i stap, nogat; ol i go sindaun long narapela kantri bilong skulim ol manmeri long laik bilong God long dispela graun.
OL DISPELA manmeri i no ting ol i gutpela tru o ol i narapela kain, nogat. Ol i wankain olsem ol narapela man na ol i wok long mekim ol samting ol i pilim em i stret long mekim. Bilong wanem ol i mekim wok long taim, strong, save na mani bilong ol long helpim ol narapela? Ol i laikim tru God na ol narapela man. Dispela pasin bilong laikim tru ol narapela i bin kirapim ol long daunim laik bilong ol yet.
Wanem insait bilong dispela tok, daunim laik bilong ol yet? Bilong bihainim pasin bilong daunim laik bilong yumi, i no makim olsem yumi no inap mekim wanpela samting bilong kisim amamas. I no olsem yumi mas lusim olgeta samting i save mekim yumi amamas. Wanpela buk (The Shorter Oxford English Dictionary) i tok, insait bilong dispela tok daunim laik bilong yumi i olsem “lusim samting bilong yu yet, o samting yu save kisim amamas long en, o samting yu gat laik long en bilong helpim narapela.”
Jisas Krais—Nambawan Gutpela Piksa
Dispela wanpela Pikinini God yet i bin kamapim, em Jisas Krais, em i nambawan gutpela piksa bilong man i mekim pasin bilong daunim laik bilong em yet. Taim em i no kam daun yet long graun, ating em i amamas tru na tingting bilong em i mas kirap tru long ol samting bilong i stap bilong em long heven. Em i stap klostu tru long Papa bilong em na ol narapela ensel. Na tu, Pikinini Bilong God i bin mekim wok i traim save bilong em na kirapim tru bel bilong em taim em i stap olsem “saveman i bosim wok.” (Sindaun 8:30, 31) I stap bilong em long heven i winim tru i stap bilong nambawan maniman hia long graun. Em i stap klostu long God Jehova, na em i gat biknem na bikpela namba long heven.
Tasol Pikinini bilong God “i lusim dispela pasin, na em i kamap olsem wokboi nating. Em i kamap olsem man.” (Filipai 2:7) Long laik bilong em yet em i lusim olgeta gutpela samting bilong em long heven na i kamap olsem wanpela man, na em i givim laip bilong em olsem ofa bilong baim bek yumi bilong pinisim ol pasin nogut na hevi Satan i bin kamapim. (Stat 3:1-7; Mak 10:45) Em i mas stap wantaim ol sinman bilong dispela graun i stap aninit long strong bilong Satan. (1 Jon 5:19) Na tu, em i gat ol liklik hevi em i mas karim. Tasol maski em i mas lusim planti samting, Jisas Krais em i strong long mekim laik bilong Papa bilong em. (Matyu 26:39; Jon 5:30; 6:38) Ol dispela samting i bin traim tru pasin sori na pasin bilong em long i stap gut long God. Em i orait long lusim ol samting bilong em yet i go inap long wanem mak? Aposel Pol i tok: “Em i daunim em yet na i bihainim tok bilong God, i go inap long em i dai, yes, inap long em i dai long diwai.”—Filipai 2:8.
“Holim Wankain Tingting”
Pol i laik kirapim yumi long bihainim pasin bilong Jisas. Em i tok: “Yupela i mas holim wankain tingting olsem Krais Jisas i bin holim.” (Filipai 2:5) Orait, yumi ken mekim olsem wanem? Wanpela rot i olsem, ‘yumi no ken lukautim ol samting bilong yumi tasol. Nogat. Yumi wan wan i mas lukautim ol samting bilong ol arapela manmeri bilong yumi na helpim ol long i stap gut.’ (Filipai 2:4) Man i laikim tru ol narapela em “i no save tingting tumas long em yet.”—1 Korin 13:5.
Ol manmeri i save tingim ol narapela, ol i no tingim ol samting bilong ol yet taim ol i givim ol yet long mekim wok bilong helpim ol narapela. Tasol long nau, planti manmeri i save tingim ol yet tasol. Ol man bilong dispela graun i save tingim ol yet i namba wan. Yumi mas was gut long pasin bilong dispela graun, long wanem, sapos yumi larim dispela pasin i stiaim tingting bilong yumi, laik bilong bel bilong yumi inap kamap namba wan samting long sindaun bilong yumi. Orait nau olgeta samting yumi mekim—samting yumi mekim long taim, na strong, na mani bilong yumi—bai yumi tingim yumi yet tasol na yumi mekim. Olsem na yumi mas wok strong long abrusim dispela pasin.
Sampela man ol i laik helpim yumi na ol i givim sampela tok long yumi, tasol sampela taim ol dispela tok inap mekim na yumi les long bihainim pasin bilong daunim laik bilong yu yet. Aposel Pita i luksave olsem pasin bilong Jisas long daunim laik bilong em yet bai bringim em long i dai, olsem na em i tok: “Bikpela, nogat tru. Dispela samting i no inap kamap long yu.” (Matyu 16:22) Pita i hatwok long orait long tingting bilong Jisas long redi long i dai bilong helpim nambawan wok bos bilong Papa bilong em na bilong kisim bek olgeta manmeri. Olsem na Pita i laik kirapim Jisas long em i no ken mekim olsem.
‘Daunim Laik Bilong Yu Yet’
Jisas i mekim wanem? Baibel i tok: “Jisas i tanim na i lukluk long ol disaipel bilong en, na em i krosim Pita olsem, ‘Satan, yu go baksait long mi. Yu no bihainim tingting bilong God. Nogat. Yu bihainim tingting bilong ol man tasol.’ ” Na Jisas i singautim ol manmeri i kam long em, wantaim ol disaipel bilong en. Na em i tokim ol olsem: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.”—Mak 8:33, 34.
Inap 30 yia bihain long taim Pita i bin mekim dispela tok long Jisas, em i kamapim klia olsem nau em i kisim gut insait bilong dispela pasin bilong daunim laik bilong yumi yet. Em i no tokim ol wanbilip long malolo o slek na no ken daunim laik bilong ol yet. Nogat. Pita i tokim ol olsem oltaim tingting bilong ol i mas i stap redi long mekim wok na ol i no ken bihainim moa ol pasin bilong graun bipo ol i bin bihainim. Na maski ol traim i painim ol, pasin bilong mekim laik bilong God i mas i stap olsem namba wan samting long i stap bilong ol.—1 Pita 1:6, 13, 14; 4:1, 2.
Nambawan rot tru yumi ken bihainim na yumi kisim amamas long en, em taim yumi givim yumi yet long Jehova na stap gut long bihainim Jisas Krais na larim God i stiaim wok yumi mekim. Long dispela pasin Pol em i stap gutpela piksa. Em i pilim olsem taim i sot pinis, na tu, em i amamas tru long ol samting Jehova i bin mekim long em, na dispela i kirapim em long lusim ol tingting bilong kisim biknem o namba samting em inap pulim em long lusim wok bilong mekim laik bilong God. Em i tok: “Mi bai amamas tasol long givim olgeta samting bilong mi, na long givim laip bilong mi tu, bilong helpim yupela.” (2 Korin 12:15) Pol i bin mekim wok long save bilong em bilong kamapim laik bilong God, i no laik bilong em yet.—Aposel 20:24; Filipai 3:8.
Olsem wanem yumi inap skelim yumi yet bilong painimaut olsem yumi gat wankain tingting olsem bilong aposel Pol o nogat? Yumi inap givim ol kain askim olsem long yumi yet: Mi save mekim wanem long taim, na strong, na save, na mani bilong mi? Mi save mekim wok long ol dispela samting na ol narapela presen i gutpela tru bilong helpim mi yet, o bilong helpim ol narapela? Mi bin tingting long mekim bikpela wok moa long autim gutnius, olsem mekim wok painia oltaim? Mi inap mekim sampela wok moa bilong sanapim o lukautim ol Haus Kingdom? Mi save helpim ol brata sista i sot long sampela samting? Mi save givim ol nambawan samting bilong mi long Jehova?—Sindaun 3:9.
Amamas Long Givim Samting i Win
Tasol olsem wanem? Em i gutpela tingting long mekim pasin bilong daunim laik bilong yu yet? Tru tumas! Ol samting i bin painim Pol i givim save long em olsem taim em i bihainim dispela pasin, em i kisim ol gutpela samting. Em i kisim bikpela amamas na em i pilim olsem em i mekim gut tru ol wok bilong em. Em i stori wantaim ol elda bilong Efesus long dispela samting taim em i bungim ol long Miletus. Pol i tok: “Long olgeta wok mi mekim, mi bin soim yupela olsem, yumi mas bihainim dispela pasin bilong wok strong. Olsem bai yumi inap long helpim ol man i no inap helpim ol yet. Na yumi mas tingim dispela tok Bikpela Jisas yet i mekim. Em i bin tok olsem, ‘Amamas bilong man i givim samting long ol arapela man, dispela i winim amamas bilong man i kisim samting bilong em yet.’ ” (Aposel 20:35) Planti milion manmeri ol i kisim bikpela amamas long nau taim ol i bihainim pasin bilong daunim laik bilong ol yet. Na bai yumi kisim amamas long bihain tu taim Jehova i praisim ol manmeri ol i putim laik bilong Em na ol narapela i go pas long laik bilong ol yet.—1 Timoti 4:8-10.
Taim ol i askim Bill bilong wanem em i save wok strong long helpim ol narapela long sanapim ol Haus Kingdom, em i tok: “Mi save kisim bikpela amamas long helpim ol liklik kongrigesen. Mi amamas long mekim wok long save bilong mi bilong helpim ol narapela.” Bilong wanem Emma i save givim strong na save bilong em long helpim ol narapela long kisim save long tok i tru bilong Baibel? Em i tok: “Mi no gat tingting long mekim narapela samting. Taim mi stap yangpela yet na mi inap long mekim wok, mi laik mekim bikpela wok bilong amamasim Jehova na helpim ol narapela. Ol samting bilong skin mi lusim bilong mekim dispela wok, mi tingim i olsem liklik samting tasol. Jehova i bin mekim planti samting bilong helpim mi, olsem na samting mi mekim em i wok bilong mi na mi mekim tasol.”
Inap planti yia Maurice na Betty i bin mekim bikpela wok long mekim bikpela long ol pikinini na lukautim ol long ol samting ol i mas kisim, na taim dispela wok i pinis ol i no kirap bihainim pasin bilong malolo na painim amamas. Nau ol i pinis long wok mani na ol i laik wok yet long mekim sampela samting i gutpela na i gat as bilong en. Ol i tok: “Mitupela i no laik malolo i stap. Nogat. Mitupela inap helpim ol manmeri bilong narapela kantri long kisim save long Jehova, na long dispela rot mitupela inap wok yet long mekim ol wok i gat as bilong en.”
Olsem wanem? Yu gat strongpela tingting long bihainim pasin bilong daunim laik bilong yu yet? Em bai hatwok. Long olgeta taim i gat pait namel long laik nogut bilong bel bilong yumi ol sinman na laik bilong mekim gutpela pasin bilong amamasim God. (Rom 7:21-23) Tasol em i wanpela pait yumi inap winim sapos yumi larim Jehova i stiaim yumi. (Galesia 5:16, 17) Em i no inap lusim tingting long pasin bilong yumi long daunim laik bilong yumi yet bilong mekim wok bilong em, na em bai mekim gut tru long yumi. Tru tumas, God Jehova bai “givim planti gutpela samting long [yumi] na [yumi] i no ken sot.”—Malakai 3:10; Hibru 6:10.
[Piksa long pes 23]
Jisas i bin daunim laik bilong em yet. Olsem wanem long yu?
[Ol Piksa long pes 24]
Pol i bin wok strong long mekim wok bilong autim tok bilong Kingdom