Yu “Save Long God”—Nau Yu Bai Mekim Wanem?

 1. Bilong wanem pailot i save yusim wanpela lista taim em i sekim balus?

OLGETA taim pailot i save sekim gut balus paslain long em i flaim. Em i save yusim wanpela lista bilong helpim em long luksave olsem em i bin sekim olgeta samting. Sapos em i no sekim balus, ating em bai i no inap luksave long wanpela hevi we inap mekim na balus i bagarap. Maski pailot i bin flaim balus inap planti yia pinis, em i mas sekim olgeta samting i stap long lista.

 2. Yumi mas sekim wanem samting?

² Wankain olsem lista em pailot i yusim, i gat lista bilong ol samting em yu ken sekim bilong save sapos bilip bilong yu bai stap strong long taim bilong hevi, o nogat. Maski yumi kisim baptais nau tasol o yumi stap long tok i tru inap planti yia pinis, yumi mas wok yet long sekim sapos bilip bilong yumi i stap strong o nogat. Sapos yumi ting olsem bilip bilong yumi i strong, bikpela hevi inap mekim na yumi lusim pasin bilong pas gut wantaim Jehova. Baibel i tok lukaut olsem: “Man i ting em i sanap strong i stap, em i mas lukaut, nogut em i pundaun.”—1 Kor. 10:12.

 3. Ol Kristen long Galesia i mas mekim wanem?

³ Pe bilong Jisas long baim bek man i opim rot na ol Kristen i gat nupela rot bilong kisim save long God. Rot i op long God inap makim ol man bilong graun long kamap pikinini bilong em! Tasol ol Kristen long Galesia i mas wok yet long sekim bilip bilong ol. (Gal. 4:9) Sampela insait long kongrigesen i tok ol Kristen inap kamap stretpela man sapos ol i bihainim yet Lo Bilong Moses. Tasol God i no yusim moa dispela Lo, na ol man bilong ol narapela lain husat i stap insait long kongrigesen ol i no bin stap aninit long dispela Lo! Insait long kongrigesen, ol manmeri bilong lain Juda na ol manmeri bilong ol narapela lain ol i mas mekim ol samting bilong kamap strong long tok i tru. Ol i mas kisim stretpela save olsem ol manmeri i no stap aninit moa long Lo Bilong Moses.

4, 5. Pol i givim wanem tok kaunsel long ol Galesia? Bilong wanem pas bilong em i bikpela samting long yumi?

⁴ Pas em Jehova i kirapim aposel Pol long raitim long ol Galesia i helpim ol Kristen long tingim olsem ol i no ken lusim ol tok i tru bilong Baibel em ol i kisim save pinis long en. Yumi no ken go bek long ol samting em yumi bin lusim pinis. Dispela pas i go long ol Galesia inap helpim yumi olgeta long holimpas bilip.

⁵ Yumi olgeta i mas tingim dispela taim yumi bin mekim disisen long lotuim Jehova. Tingim dispela 2-pela askim: Yu tingim yet ol samting yu bin mekim bilong helpim yu long redi long kisim baptais? Yu inap tingim ol samting yu bin mekim bilong kisim save long God, na yu bin pilim olsem wanem taim God i save long yu?

 6. Yumi bai kisim save long wanem lista?

⁶ Yumi bin mekim 9-pela samting taim yumi kisim tok i tru. (Lukim blok, “Ol Samting Yumi Mekim Bilong Save Long God na i Helpim Yumi Long Kamap Strong.”) Yumi ken tingim ol dispela samting olsem lista bilong ol samting yumi mas mekim bilong helpim bilip bilong yumi long i stap strong, na pasim yumi long go bek long ol samting bilong dispela graun. Wankain olsem pailot i save sekim lista bilong em paslain long em i flaim balus, yumi mas wok yet long sekim lista bilong yumi.

 7. Wanem dispela “astingting” em yumi mas bihainim? Bilong wanem yumi mas sekim bilong save sapos yumi bihainim gut dispela “astingting” o nogat?

⁷ Olgeta taim pailot i save sekim lista bilong em paslain long em i flaim balus, na olsem tasol, oltaim yumi tu i mas sekim ol samting yumi mekim bilong kamap strong long tok i tru. Pol i raitim pas i go long Timoti na tok: “Bihainim yet astingting bilong ol gutpela tok yu bin harim long mi na mekim wantaim bilip na pasin laikim em yu kisim long rot bilong pas wantaim Krais Jisas.” (2 Tim. 1:13) Dispela “ol gutpela tok” em Pol i toktok long en i stap long Baibel. (1 Tim. 6:3) Wanpela hap piksa inap givim tingting long yumi long wanpela samting i luk olsem wanem. Olsem tasol, “astingting bilong ol gutpela tok” i helpim yumi long kliagut long ol samting Jehova i laik yumi mas mekim. Orait nau yumi bai stori long ol samting yumi bin mekim paslain long yumi kisim baptais, na yumi bai skelim sapos yumi bihainim gut astingting bilong tok i tru, o nogat.

8, 9. (a) Bilong wanem yumi mas wok yet long kisim sampela save moa na mekim bilip bilong yumi i kamap strong moa? (b) Bilong wanem em i bikpela samting long yumi mas mekim ol samting bilong kamap strongpela Kristen? Bilong wanem dispela i wankain long pasin bilong diwai long gro?

⁸ Namba 1 samting yumi mas mekim em long kisim save, na dispela i kirapim yumi long bilip. Tasol yumi mas wok yet long kisim sampela save moa na mekim bilip bilong yumi i kamap strong moa. (2 Tes. 1:3) Bihain long yumi kisim baptais, yumi mas mekim ol samting bilong helpim yumi long pas gut moa wantaim God.

⁹ Dispela i wankain long pasin bilong diwai long gro. Yumi save amamas long lukim diwai i gro na kamap longpela, na moa yet long taim ol rop bilong en i strong. Olsem, sampela naispela diwai sida bilong Lebanon inap kamap longpela tru olsem 12-stori haus. Ol inap kamap traipela tru, na sapos ol i yusim rop long raunim namel bilong en, rop i mas longpela inap 12 mita. (Sol. 5:15) Long namba 1 taim man i planim diwai, em inap luksave olsem diwai i wok long kamap bikpela hariap hariap. Taim ol rop bilong en i go daun moa na i go longwe long diwai, diwai i save gro longpela moa na namel bilong en i save kamap traipela moa. Bihain, man i no inap luksave kwik olsem diwai i wok long gro. Na dispela i wankain long ol samting yumi mekim bilong kamap strongpela Kristen. Long namba 1 taim, yumi inap mekim planti senis taim yumi kirap long stadi long Baibel. Na bihain yumi kisim baptais. Ol narapela long kongrigesen i luksave olsem yumi wok long kamap strong long tok i tru. Yumi inap kirap mekim wok painia o mekim ol narapela wok insait long kongrigesen. Bihain long sampela haptaim, ol narapela i no inap luksave kwik olsem yumi wok long kamap strong long tok i tru. Tasol yumi olgeta i mas wok yet long kisim sampela save moa na mekim bilip i kamap strong moa inap long yumi kamap olsem “man i bikpela pinis,” dispela i makim olsem yumi kamap strongpela Kristen. (Efe. 4:13) Olsem na taim yumi mekim ol samting bilong kamap strongpela Kristen, yumi olsem liklik sid i gro bikpela na kamap strongpela diwai.

10. Bilong wanem ol strongpela Kristen i mas wok yet long mekim ol samting bilong kamap strong long tok i tru?

¹⁰ Maski yumi kamap strongpela Kristen pinis, yumi mas mekim sampela samting moa. Save yumi kisim long Tok Bilong God na bilip bilong yumi i olsem ol rop bilong diwai i mekim yumi i stap strong na i no surik. Ol dispela rop i mas wok yet long kamap strong. (Snd. 12:3) Planti brata na sista i wok yet long mekim ol samting bilong kamap strongpela Kristen. Wanpela brata husat i mekim wok elda winim 30 yia pinis, em i tok em i wok yet long mekim ol samting bilong kamap strong. Em i tok long nau em i pilim tru ol tok bilong Baibel winim long bipo. Em i wok yet long kisim ol nupela save long olsem wanem Baibel inap helpim man long wokim disisen, na em i amamas moa long wok autim tok.

11. Olsem wanem yumi inap wok yet long strongim pasin bilong yumi long pas gut wantaim Jehova?

¹¹ Sapos yumi laik wok yet long mekim ol samting bilong kamap strongpela Kristen, orait yumi mas i go klostu moa yet long Jehova. Em i laik bai yumi pilim olsem yumi stap gut na i no gat hevi inap painim yumi, wankain olsem pikinini i save pilim taim em i stap wantaim gutpela papa o mama, o wankain olsem yumi save pilim taim yumi stap wantaim wanpela gutpela pren. Em tru olsem, yumi mas lusim sampela haptaim na strong bilong yumi long i go klostu moa long Jehova bambai yumi inap pilim olsem em i laikim yumi, na yumi stap gut na hevi i no inap painim yumi. Olsem na yu mas lusim sampela haptaim long olgeta de long ritim Baibel. Yu mas ritim tu olgeta nupela magasin, buk, na buklet em Jehova i givim long yumi. Dispela bai helpim yu long tingim Jehova olsem wanpela Man i stap tru, na tu, dispela bai strongim pasin bilong yu long pas gut wantaim em.

12. Yumi mas mekim wanem sapos yumi laik strongim pasin bilong yumi long pas gut wantaim God?

¹² Ol beten na ol gutpela pren inap helpim yumi long strongim pasin bilong yumi long pas gut wantaim God. (Ritim Malakai 3:16.) Taim ol pren bilong God i “beten strong,” em i save putim yau long beten bilong ol. (1 Pita 3:12) Jehova i save putim yau taim yumi singaut long em long beten, olsem na yumi mas wok yet long beten. (Rom 12:12) Yumi no inap stap yet olsem pren bilong God sapos yumi no kisim helpim long em. Sapos yumi lusim pasin bilong beten, yumi no inap kisim strong em yumi mas i gat. Ol traim o pasin nogut bilong dispela taim nogut bilong nau inap mekim yumi bel hevi. Tasol God i redi long helpim yumi sapos yumi yet i askim em. Olsem wanem? Yu save beten long Jehova long wankain pasin olsem yu save toktok wantaim wanpela pren yu trastim? Yu ting i gat sampela rot bilong mekim ol beten bilong yu i kamap gutpela moa?—Jer. 16:19.

13. Bilong wanem yumi mas i go long olgeta miting sapos yumi laik strongim pasin bilong yumi long pas gut wantaim God?

¹³ Yumi mas pas gut wantaim kongrigesen bambai yumi inap stap wantaim ol narapela em ol i pren bilong Jehova. Em i laikim ol tru, long wanem, ol i wok yet long tingim em olsem “ples hait bilong ol.” (Nah. 1:7) Pasin bilong dispela graun i nogut tru, olsem na yumi mas lusim sampela haptaim bilong stap wantaim ol bratasista bilong yumi. Yumi inap helpim narapela narapela long stap strong na dispela bai kirapim yumi long soim pasin laikim long ol narapela na mekim “ol gutpela wok.” (Hib. 10:24, 25) Yumi inap bihainim dispela tok kaunsel bilong Pol sapos yumi lusim sampela haptaim bilong pas gut wantaim kongrigesen. Olsem na yu mas stretim rot bilong go long olgeta miting. Na yu mas sapotim ol miting long rot bilong givim ol bekim.

14. Bilong wanem oltaim yumi mas redi long tanim bel na senisim sampela pasin bilong yumi?

¹⁴ Long namba 1 taim yumi kamap Kristen, yumi bin tanim bel na lusim ol pasin nogut bilong yumi. Tasol oltaim yumi mas redi long tanim bel na senisim sampela pasin bilong yumi. Yumi ol sinman na yumi gat sampela pasin kranki, olsem na em isi tru long yumi pundaun long mekim rong. Sin i olsem wanpela snek, na oltaim em i save redi long kaikaim yumi. (Rom 3:9, 10; 6:12-14) Olsem na yumi no inap giaman olsem yumi no gat ol pasin kranki. Jehova i save mekim pasin isi long yumi taim yumi wok strong long daunim ol pasin kranki bilong yumi. (Fili. 2:12; 2 Pita 3:9) Yusim taim na strong bilong yu long mekim wok bilong Jehova, na i no long inapim ol laik bilong yu yet. Wanpela sista husat i kamap bikpela long tok i tru, em i ting olsem em i mas pret nogut tru long Jehova na em i pilim olsem em i no inap long mekim wanpela samting bilong amamasim Jehova. Em i pilim olsem em i no pas gut wantaim Jehova, na em i mekim ol popaia long laip bilong em. Em i tok: “Mi mekim olsem, long wanem, mi no save gut long Jehova, na i no olsem mi no laikim em.” Olsem na em i beten askim God long helpim em na em i kirap long mekim sampela senis. Em i tok: “Mi luksave olsem mi stap olsem pikinini na Jehova i soim pasin isi na stiaim mi na helpim mi long winim olgeta wan wan hevi, na soim mi long samting mi mas mekim.”

15. Jisas na Jehova i lukim wanem samting na ol i amamas long en?

¹⁵ Ensel bilong God i tokim Pita na ol narapela aposel long ol i mas “wok yet long tokim ol manmeri” long gutnius. (Apo. 5:19-21) Wok bilong yumi long autim tok long olgeta wik em wanpela samting yumi mas sekim bambai yumi inap mekim bilip bilong yumi i stap strong. Jisas na Jehova i luksave long bilip bilong yumi na ol i amamas long wok yumi mekim long autim tok. (Rev. 2:19) Wok autim tok i mas stap olsem nambawan bikpela samting long laip bilong yumi.

16. Bilong wanem oltaim yumi mas tingim de yumi bin dediket long Jehova?

¹⁶ Oltaim yu mas tingim de yu bin dediket long Jehova. Pasin bilong yumi long pas gut wantaim Jehova em i nambawan bikpela samting long yumi. Em i save long olgeta manmeri husat i stap long lain bilong em. (Ritim Aisaia 44:5.) Sekim pasin bilong yu long pas gut wantaim Jehova, na beten askim em long helpim yu long strongim dispela pasin. Yu mas tingim tu dispela de yu bin kisim baptais, na no ken lusim tingting long dispela bikpela de. Baptais bilong yu i bin soim klia long ol narapela olsem yu bin dediket long Jehova. Dispela em i wanpela bikpela disisen tru i winim olgeta narapela disisen yu bin mekim.

17. Bilong wanem yumi mas sanap strong sapos yumi laik stap klostu long Jehova?

¹⁷ Pol i tokim ol Kristen long Galesia olsem ol i no ken les kwik. (Gal. 6:9) Yumi tu i mas sanap strong, long wanem, ol hevi bai painim yumi. Tasol Jehova bai helpim yumi. Yu mas wok yet long beten askim God long givim holi spirit long yu, na em bai helpim yu long kisim amamas na bel isi maski sapos ol hevi i no pinis. (Mat. 7:7-11) Tingim: Jehova i save lukautim gut ol pisin, tasol em i laikim yu moa yet winim ol pisin. Em i laik lukautim yu, long wanem, yu laikim em tru na yu bin dediket long em. (Mat. 10:29-31) Maski sapos yu gat sampela bikpela hevi, yu no ken les kwik. Yu no ken lusim tok i tru na go bek long ol samting yu bin lusim. Yumi gat planti blesing, long wanem, Jehova i save long yumi.

18. Olgeta man husat i save long God, ol i mas mekim wanem long nau?

¹⁸ Maski yu kisim baptais nau tasol o yu kisim baptais inap planti yia i go pinis, yu mas mekim wanem long nau? Yu mas wok yet long save gut long Jehova, na wok yet long mekim ol samting bilong kamap strong long tok i tru. Yu mas was gut, nogut yu ting olsem yu save gut long God na i no gat wok long mekim ol samting bilong pas gut moa wantaim em. Oltaim yu mas lusim sampela haptaim long skelim ol samting em dispela atikol i stori long en bambai yu inap stap klostu tru long Jehova, em gutpela Papa, Pren, na God bilong yumi.—Ritim 2 Korin 13:5, 6.