ASKIM

Wastaua bilong Septemba 15, 1950, i tok: “Sedo i makim samting bai kamap bihain. Piksa tru em samting i kamap bihain.”

Inap planti yia i go pinis, ol litresa bilong yumi i tok, sampela manmeri i stap gut long God, olsem Debora, Elihu, Jepta, Jop, Rahap, Rebeka, na planti moa, ol i stap olsem ol sedo bilong ol Kristen God i bin makim o ol “bikpela lain manmeri.” (Rev. 7:9) Ol litresa bilong yumi i tok, Jepta, Jop, na Rebeka i olsem sedo bilong ol Kristen God i bin makim long holi spirit, na Debora na Rahap i olsem sedo bilong bikpela lain manmeri. Tasol long nau, ol litresa bilong yumi i no kamapim kain tok olsem. Bilong wanem?

Baibel i kamapim olsem sampela man em stori bilong ol i stap long Baibel, ol i olsem sedo bilong ol bikpela samting moa bai kamap bihain. Long Galesia 4:21-31, aposel Pol i stori long “tok piksa” bilong tupela meri. Hagar em wokmeri bilong Abraham na em i olsem sedo bilong lain Israel. Lo Bilong Moses i helpim lain Israel long i stap daun long Jehova. Tasol Sara em “frimeri,” na em i olsem sedo bilong lain husat i stap olsem meri bilong God, em hap bilong oganaisesen bilong God long heven. Melkisedek i bin mekim wok olsem king na pris. Long pas Pol i raitim long ol Hibru, em i tok Melkisedek i wankain olsem Jisas, na Pol i kolim ol samting i wankain long ol. (Hib. 6:20; 7:1-3) Na tu, Pol i tok Aisaia na ol pikinini man bilong em i olsem sedo bilong Jisas wantaim ol disaipel em God i bin makim long holi spirit. (Hib. 2:13, 14) Spirit bilong God i stiaim Pol na em i raitim ol dispela tok, olsem na yumi bilip tru long tok bilong em long ol samting i stap olsem sedo.

Taim Baibel i tok olsem wanpela man i stap olsem sedo bilong narapela man, yumi no ken ting olsem olgeta liklik samting i kamap long laip bilong man i olsem sedo bilong bikpela samting moa bai kamap. Pol i tok, Melkisedek i olsem sedo bilong Jisas, tasol Pol i no stori liklik long Melkisedek i givim bret na wain long Abraham bihain long Abraham i winim pait na daunim 4-pela king. Olsem na i no gat wanpela tok long Baibel i soim olsem dispela stori i stap olsem sedo bilong narapela samting.—Stt. 14:1-9, 18.

Insait long sampela handret yia bihain long dai bilong Krais, sampela man bilong raitim buk i kolim olgeta samting olsem sedo bilong ol samting bai kamap bihain. The International Standard Bible Encyclopaedia i stori long tok bilong Origen, Ambrose, na Jerome na i tok: “Ol i laik save long ol samting i stap olsem sedo, na ol i skelim ol stori bilong Baibel na kolim planti samting olsem sedo maski em ol liklik samting. Maski wanpela samting i kamap planti taim long laip bilong ol man na em liklik samting tasol, ol i ting mining tru bilong en i stap hait . . . , olsem namba bilong ol pis ol disaipel i kisim long nait em Seivia i kamap long ol bihain long em i kirap bek—sampela bilong ol i trai hat tru long painimaut mining bilong dispela namba, 153!”

Ogastin Bilong Hipo i mekim planti tok long stori bilong Jisas i yusim 5-pela bret bali na 2-pela pis long givim kaikai long 5,000 man. Bali i no gutpela olsem wit, olsem na Ogastin i tok ol dispela 5-pela bret i olsem sedo bilong 5-pela buk bilong Moses (“bali” i no gutpela, olsem na em i sedo bilong “Olpela Testamen,” em Ogastin i ting i no gutpela tumas). Olsem wanem long 2-pela pis? Em i tok, ol i olsem sedo bilong wanpela king na wanpela pris. Narapela saveman i tok, taim Jekop i givim retpela sup long Iso long baim namba bilong em olsem fesbon, dispela i olsem sedo bilong retpela blut bilong Jisas long baim bek ol man bambai ol i ken kisim laip long heven!

Ating yu hatwok long bilipim ol dispela kain tok. Ol man i no inap save long ol stori i stap olsem sedo bilong samting tru bai kamap bihain. Tingim dispela: Sapos Baibel yet i tok olsem wanpela man o wanpela samting i olsem sedo bilong samting tru bai kamap bihain, orait yumi ken bilipim dispela tok. Tasol sapos Baibel yet i no tok olsem, orait yumi no ken holim dispela tingting.

Orait, olsem wanem ol samting i kamap bipo na stori bilong ol man long Baibel inap helpim yumi? Long Rom 15:4, aposel Pol i tok: “Olgeta tok ol i bin raitim long bipo, ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” Taim Pol i mekim dispela tok, em i tingim ol bratasista long taim bilong em, em ol Kristen God i bin makim long holi spirit. Tok bilong em i makim olsem ol stori i stap long Baibel inap helpim ol long kisim skul long ol bikpela samting. Tasol lain bilong God kirap long bipo na i kam inap long nau—maski ol i bilong lain God i bin makim o ol i bilong “ol arapela sipsip,” na ol i stap long “taim bilong las de” o nogat—ol i kisim helpim long “olgeta tok ol i bin raitim long bipo.”—Jon 10:16; 2 Tim. 3:1.

Yumi no ken ting planti bilong ol dispela stori i stret long wanpela lain tasol, olsem lain Kristen God i bin makim o bikpela lain manmeri, na tu, yumi no ken ting olsem dispela stori i stret long lain bilong wanpela haptaim tasol, nogat. Maski ol manmeri bilong God i bilong wanem lain na ol i stap long wanem haptaim, olgeta wantaim inap kisim skul long ol stori i kamap bipo. Olsem na yumi no ken ting stori i stap long Buk Jop i olsem piksa na i makim tasol ol hevi i painim ol Kristen God i bin makim, em ol i stap long taim bilong Wol Woa 1. Planti wokman na wokmeri bilong God, ol i bilong lain Kristen God i bin makim na bikpela lain manmeri, olgeta i karim ol wankain hevi olsem Jop i karim, na ol i lukim “ol samting Jehova i bin mekim” na ol i save olsem “Jehova i gat pasin bilong sori tru na marimari.”—Jems 5:11.

Long ol kongrigesen long nau, i gat ol lapun meri i stap gut long God wankain olsem Debora, na ol yangpela elda i gat savetingting olsem Elihu, na ol painia i gat strongpela bel na ol i wok strong olsem Jepta, na ol bilipman na ol bilipmeri husat i bihainim pasin bilong Jop long i no les kwik. Yumi tenkyu tru olsem Jehova i lukautim “olgeta tok ol i bin raitim long bipo.” Ol “dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting” bai kamap bihain!

Olsem na inap sampela yia nau, ol buk na nius bilong yumi i kamapim klia ol skul yumi inap kisim long ol stori bilong Baibel, na ol i no stori olsem sampela samting i olsem sedo na sampela samting i olsem piksa tru.