Kisim Gutpela Pasin Insait Long Marit
“Tingting bilong yupela i mas kamap nupela. Yupela i mas kamap ol nupela manmeri, em . . . pasin bilong ol i stretpela.”—EFESUS 4:23, 24.
TAIM man i marit, em i go insait long wanpela bikpela wok, na em i mas save, marit em i bikpela samting tru, long wanem, tok promis em i mekim wantaim poroman bilong em i bilong i stap olgeta taim inap long tupela i stap laip yet, na tupela i mas i stap poroman long ol dispela taim. Tupela i mas i gat gutpela tingting olsem bilong man na meri i bikpela pinis na bai ol inap skelim gut ol samting. Na i mas i gat samting bilong stiaim tingting bilong ol na mekim “tingting bilong” ol i “kamap nupela.”—Efesus 4:23, 24; lukim Stat 24:10-58; Matyu 19:5, 6.
2 No ken larim laik bilong skin i kirapim yu long marit hariap. Taim yu kamap bikpela man o meri pinis, yu inap tingting gut na skelim gut ol samting. Yangpela i no inap mekim olsem. Man o meri i bikpela pinis em i gat save long planti samting na em inap long tingting gut na painim wanpela poroman i gat wankain laik na tingting olsem bilong em yet. Dispela i as bilong gutpela marit. Ol Spen i save tok olsem: “Man i stap wanpis em i winim man i maritim poroman nogut.”—Sindaun 21:9; Saveman 5:2.
3 Man i painim gutpela poroman, dispela i nambawan samting na bai marit bilong tupela i kamap gutpela. Na bilong painim poroman olsem, man i mas larim ol lo bilong Baibel i stiaim tingting bilong em, na no ken larim laik bilong skin o gutpela skin bilong meri i stiaim o pulim em. Marit i no olsem man tupela meri i slip wantaim, na em tasol. Nogat. Marit i olsem man i bin tingting gut na em i kisim wanpela meri i bin tingting gut, na tupela i bin skelim gut ol samting ol i laik mekim, na narapela i save gut long tingting na pasin na laik bilong narapela, maski ol i bilong narapela narapela lain o skin o tok ples. Pol i tok, sapos man i tingting long marit, “em i mas maritim [meri] i bilip long Bikpela,” olsem maritim wanpela wanbilip.—1 Korin 7:39; Stat 24:1-4; Sindaun 12:18; 16:24.
Karim Ol Hevi Bilong Marit
4 Maski tupela marit i stap wanbel na tupela i gat wankain laik na tingting, hevi inap kamap namel long tupela. Hevi inap kamap namel long olgeta man, maski ol i marit o nogat. Samting bilong mani, o sik, o tingting i no wok gut, o kain samting olsem inap kamapim hevi. Na sampela taim yumi no tingting gut na maus bilong yumi i autim tok kranki. “Maus . . . i save hambak . . . Liklik paia tasol em inap kirapim bikpela paia moa long bus na kukim olgeta diwai.”—Jems 3:2, 5.
5 Sapos hevi i kamap namel long tupela marit, nogut dispela i stap na bihain kros i kamap, na dispela i go bikpela na i bagarapim marit bilong tupela. Orait, tupela i ken mekim wanem? “Tingting bilong [ol] i mas kamap nupela.” Tingting inap kirapim yumi long mekim gutpela samting bilong spirit i save strongim bel bilong narapela, o em inap kirapim yumi long mekim samting nogut, olsem bihainim laik bilong skin. Sapos yumi bihainim gutpela tingting, bai yumi mekim ol samting bilong mekim dai kros na bai hevi i pinis na marit i kamap gutpela gen na i stap strong. No ken larim kros i bagarapim marit na nau marit i bruk. Bihainim tok bilong Baibel long stretim hevi, na bai narapela i tingim gut narapela.—Rom 14:19; Efesus 4:23, 26, 27.
6 Olsem na Pol i tok: “God i makim yupela pinis, na yupela i stap ol lain manmeri bilong en, na em i save laikim yupela tru. Olsem na yupela i mas kisim olkain pasin olsem: Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel . . . long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong.”—Kolosi 3:12-14.
7 Tru, i no hatwok long kaunim dispela tok bilong Baibel, tasol i hatwok long bihainim nau long dispela taim. Nogut man o meri marit i bihainim pasin i stret long taim em i stap long ai bilong ol narapela long miting, tasol taim em na poroman tasol i stap wantaim long haus, em i no mekim moa pasin sori long poroman. Long haus ating man i mekim long meri olsem em i meri nating, o meri i mekim long man olsem em i man nating. Em i no bihainim moa pasin Kristen. Brata o sista Kristen i lusim tingting long dispela gutpela pasin ol marit i mas bihainim na bai marit bilong ol i ken i stap gutpela.—Jems 1:22-25.
8 Sapos tupela i stap olsem, wanem samting inap kamap? Bihain man i no mekim moa olsem Baibel i tok: “Yupela ol maritman, yupela i mas . . . sindaun gut wantaim ol meri bilong yupela. . . . Bodi bilong ol meri i no strong tumas, olsem na yupela i mas mekim gutpela pasin long ol. Yupela i mas save olsem, ol meri tu bai i kisim laip.” Na meri i no mekim moa olsem Baibel i tok: “Yupela . . . i stap belgut na i stap bel isi.” Nau tupela i tingim ol samting bilong skin tasol, olsem “tingting bilong olpela bel.” Ol i mas wok long kamap strong moa long ol samting bilong spirit na bai marit bilong ol i ken kamap gutpela gen.—1 Pita 3:1-4, 7; Kolosi 2:18.
Strongim Gutpela Tingting
9 Tingting bilong yumi em i strongpela samting bilong stiaim yumi. Planti taim yumi mas tingim wanem samting bai yumi mekim, na tupela rot i op long yumi, bai yumi mekim pasin i stret o pasin i no stret; bai yumi bihainim laik bilong yumi tasol na maski long laik bilong narapela, o bai yumi tingim narapela na yumi mekim ol pasin i stret tasol. Orait, wanem samting bai stiaim gut tingting bilong yumi? Sapos yumi tingim laik bilong Jehova, dispela tingting bai helpim yumi long mekim ol samting i stret. Wanpela man bilong raitim Song i bin beten long Jehova olsem: “Bikpela, yu mas lainim mi gut long lo bilong yu, na bai mi bihainim long olgeta de.”—Song 119:33; Esekiel 18:31; Rom 12:2.
10 Sapos yumi pas gut long Jehova na yumi tingting oltaim long mekim ol samting Jehova i orait long en, dispela bai helpim yumi long abrusim ol pasin i save mekim nogut marit bilong yumi. Ol Israel i mas “mekim ol samting i gutpela na stretpela long ai bilong God.” Na Jehova i tok, em “i laikim tru ol manmeri i no save laikim pasin nogut.” Na namba 7 lo i tok: “No ken mekim pasin pamuk.” Jehova i tambuim tru pasin pamuk.—Lo 12:28; Song 97:10; Kisim Bek 20:14; Wok Pris 20:10.
11 Olsem wanem yumi ken strongim moa yet gutpela tingting? Yumi mas save ol samting bilong spirit i bikpela samting, na yumi mas lain long laikim tru. Olsem na yumi mas wok long lainim gut ol tok bilong Jehova long Baibel na putim long bel bilong yumi, na yumi mas kisim tingting bilong Jehova na laik tru long toktok wantaim long en, olsem man bilong raitim Song i bin tok: “Mi gat wanpela tingting tasol. Mi laik mekim wok bilong yu. Yu helpim mi na mi no ken lusim ol lo bilong yu. Mi putim tok bilong yu i stap long bel na tingting bilong mi. Olsem na bai mi no ken mekim sin long yu. . . . Lainim mi gut long lo bilong yu, na bai mi bihainim long olgeta de. Mekim klia . . . lo bilong yu na bai mi bihainim.”—Song 119:10, 11, 33, 34.
12 Bilong kisim save long ol stretpela lo bilong Jehova na laikim tru ol dispela lo, yumi mas stadi gut long ol tok bilong Baibel. Tasol i gat tupela samting moa yumi mas mekim. Yumi mas i go oltaim long ol miting Kristen, na yumi mas autim tok wantaim ol narapela brata. Dispela tupela samting bai strongim yumi na bai yumi mekim ol samting i kamapim klia olsem yumi bihainim “tingting bilong Krais.”—Rom 15:5; 1 Korin 2:16.
13 Na Pol i tok: “Yupela i mas strong long mekim ol kain kain beten na askim God long helpim yupela.” (Efesus 6:18) Man tupela meri bilong em i mas bung wantaim na beten. Beten em i gutpela rot bilong kamapim ol tingting i stap long bel. Tupela i ken toktok gut wantaim long wanem hevi i stap namel long tupela, na narapela i ken lusim tingting long ol popaia bilong narapela na mekim pasin sori long em. Taim wanpela hevi o traim i painim yumi, yumi mas beten askim God long strongim yumi long mekim ol samting i stret wantaim tingting bilong Krais. Planti taim Krais yet i bin beten askim Papa bilong em long strongim em, na em i bin beten strong. Na olsem tasol yumi mas beten strong long taim wanpela samting i laik traim yumi long mekim rong na bai Jehova i ken helpim yumi long sakim laik bilong skin, nogut yumi bagarapim marit bilong yumi na brukim tok promis yumi bin mekim.—Song 119:101, 102.
Tupela Kain Pasin
14 Yumi ken tingim pasin bilong Josep na pasin bilong Devit. Taim meri bilong Potifar i traim Josep, ating Josep em i singel yet. Meri i strong long grisim Josep, tasol Josep i sakim dispela meri na em i tok, em “pasin nogut tru.” Na em i tokim meri: “Sapos mi mekim olsem bai mi mekim sin long ai bilong God.” Na nau Josep “i no go klostu long em.”—Stat 39:6-9.
15 I no hatwok long Josep i larim meri i pulim em, tasol Josep i no mekim olsem. Em i tingim Jehova, na em i laik i stap gut long Jehova, na dispela tingting i strongim em long sakim dispela meri. Na em i no laik rongim man bilong dispela meri tu. Tasol bikpela samting, em i nolaik tru long mekim wanpela rong long God.—Stat 39:12.
16 Tasol Devit i no mekim olsem. Em i gat planti meri, tasol em i bin lukim Batseba i waswas, na em i larim tingting nogut i kirapim bel bilong em. Batseba em i meri bilong Uria. I gat tupela rot Devit i ken bihainim: Sapos em i lukluk yet, dispela bai kirapim bel bilong em, tasol sapos em i no lukluk moa, em inap sakim dispela tingting nogut. Tasol nogat. Em i lukluk i stap, na nau em i kisim dispela meri i go long haus bilong em na em i mekim pasin pamuk wantaim em. Na em i mekim narapela rong tu—em i wokim rot na bai man bilong Batseba i mas kisim bagarap.—2 Samuel 11:2-4, 12-27.
17 Bihain Devit i tanim bel na i beten olsem: “God, yu wokim nupela klinpela bel insait long mi. Putim nupela spirit insait long mi na bai mi bihainim yu tasol.” Em nau, yumi inap save long as bilong dispela rong Devit i bin mekim. Taim dispela traim i painim em, em i no gat gutpela “spirit” o tingting. Em i sot long dispela samting. Ating em i no bin stadi na kaunim ol lo bilong Jehova, olsem na em i no strong moa long ol samting bilong spirit. O ating em i hambak long bikpela namba em i holim, olsem king, na em i larim laik nogut bilong skin i bosim tingting bilong em. Tasol taim em i mekim pinis rong, bihain em i pilim tru dispela samting nogut em i bin mekim na em i tanim bel na askim God long givim nupela tingting long em.—Song 51:10; Lo 17:18-20.
18 Sampela marit Kristen i no bin stap strong long spirit, na taim traim i painim ol, em nau, ol i mekim rong na bagarapim marit bilong ol. Ol i mekim olsem Devit i bin mekim. Em i bin lukluk long meri bilong narapela man, na bihain em i kirap mekim pasin pamuk. Dispela i mas givim save long ol man o meri marit, nogut ol tu i mekim olsem. Jisas i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” Em i tingim laik bilong em yet tasol, olsem laik bilong skin, na tingting bilong em i strong long inapim dispela laik. Dispela kain tingting em samting bilong graun; em i no samting bilong spirit. Kristen i mas mekim wanem bilong strongim na lukautim gut marit bilong em na bai marit i no ken bagarap?—Matyu 5:27, 28.
Strongim Marit Bilong Yu
19 King Solomon i tok: “Sapos birua i pait long wanpela man, ating birua inap winim em. Tasol sapos birua i pait long tupela man, ating em i no inap. Sapos ol i tanim tripela [rop] na wokim baklain, orait dispela baklain i no inap bruk kwiktaim.” Sapos tupela marit i stap wanbel na hevi i painim ol, narapela i ken strongim narapela, tasol sapos man i stap wanpis na hevi i painim em, em i no gat poroman bilong strongim em. Na sapos God i insait long marit bilong tupela, olsem wanpela baklain i gat tripela rop long en, dispela marit bai strong moa. Orait, olsem wanem God i ken insait long marit bilong tupela? Ol i mas bihainim ol lo na tok bilong God long ol samting bilong marit.—Saveman 4:12.
20 Sapos man marit i bihainim ol dispela tok bilong Baibel hia, dispela inap strongim tru marit bilong em:
“Yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin long ol. . . . Ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol [beten] bilong yupela.”—1 Pita 3:7.
“Mas laikim tumas ol meri bilong yupela, olsem Krais i laikim tumas [kongrigesen] na i givim laip bilong em yet bilong helpim [kongrigesen] . . . Mas laikim tru ol meri bilong yupela, olsem yupela i save laikim bodi bilong yupela yet.”—Efesus 5:25, 28.
“Man bilong [meri] i litimapim nem bilong [meri] moa yet na i tok, ‘. . . I gat planti meri i save mekim gutpela pasin tru, tasol yu winim ol moa yet.’ ”—Sindaun 31:28, 29.
“Sapos yu slip wantaim meri bilong narapela man, ol bai i mekim save long yu na yu no inap abrusim. . . . Sapos man i slip wantaim meri bilong narapela man, em i kranki olgeta na i longlong tru. . . . Em i bagarapim em yet.”—Sindaun 6:28, 29, 32.
21 Sapos meri marit i bihainim ol dispela tok bilong Baibel hia, meri bai helpim marit bilong em long i stap strong inap olgeta taim:
“Yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na . . . bai ol inap tanim bel, long wanem, ol i lukim yupela meri i save wokabaut stret na aninit tru long ol. . . . Pasin bilong i stap belgut na i stap bel isi . . . i gutpela moa yet long ai bilong God.”—1 Pita 3:1-4.
“Bodi bilong man i bilong meri bilong en, na man i no ken pasim. Olsem tasol, bodi bilong meri i bilong man bilong en, na meri tu i no ken pasim. . . . Sapos yutupela i wanbel na i laik tambuim bodi long sotpela taim, . . . em i orait.”—1 Korin 7:3-5.
22 Na Baibel i tok, i gat sampela ol narapela samting tu bilong mekim gut marit, olsem pasin sori, na pasin marimari, na no ken les kwik, na tingim laik bilong narapela, na givim gutpela tok long em, na litimapim nem bilong em. Ol dispela samting i gutpela samting tru insait long marit. Sapos marit i sot long en, i olsem wanpela purpur i no gat san o wara, na em i no inap karim plaua. Olsem na yumi mas larim gutpela tingting i helpim na strongim marit bilong yumi. Jehova i “no laikim tru pasin bilong brukim marit.” Sapos ol marit i bihainim pasin Kristen long givim bel long narapela, ol i no inap mekim pasin pamuk na bagarapim marit bilong ol, long wanem, narapela bai givim bel long narapela, na dispela gutpela pasin “em i no inap pinis.”—Malakai 2:16; 1 Korin 13:4-8; Efesus 5:3-5.
Yu Gat Save Long Dispela?
◻ Wanem nambawan samting bilong helpim tupela marit long i stap amamas?
◻ Olsem wanem tingting em inap helpim marit o nogutim marit?
◻ Yumi ken mekim wanem bilong kisim stretpela tingting?
◻ Taim traim i painim Josep na Devit, ol i mekim wanem?
◻ Wanem sampela tok bilong Baibel i ken helpim man na meri marit long strongim marit bilong ol?
[Askim Bilong Stadi]
1. Bilong wanem yumi no ken ting marit em i samting nating?
2, 3. (a) Man o meri i mas mekim wanem na bai em inap painim poroman marit i stret long em? (b) Marit em i wanem samting?
4. Wanem as bilong sampela hevi bilong ol marit?
5, 6. (a) Sapos hevi i kamap, ol i ken mekim wanem? (b) Sapos narapela i gat kros long narapela, ol i ken mekim wanem?
7. Wanem wanpela kain hevi i save painim sampela marit?
8. Sapos tupela i no tingting strong moa long ol samting bilong spirit, tupela bai stap olsem wanem?
9. Wanem tupela rot i op long yumi?
10. Olsem wanem yumi ken strongim tingting bilong yumi na bai yumi bihainim pasin i stret?
11. Wanem sampela samting moa yumi mas mekim?
12. Wanem ol samting i ken helpim yumi long kisim “tingting bilong Krais”?
13. (a) Olsem wanem beten em i bikpela samting bilong strongim tingting na bai yumi bihainim pasin i stret? (b) Olsem wanem Jisas i bin makim gutpela rot long beten?
14, 15. (a) Josep i mekim wanem long taim wanpela traim i painim em? (b) Wanem samting i strongim Josep long sakim dispela traim?
16. Taim traim i painim Devit, em i mekim wanem?
17. Taim Devit i mekim rong em i sot long wanem samting?
18. Jisas i tok wanem long pasin pamuk?
19. Wanem samting inap strongim marit?
20. Wanem tok bilong Baibel em inap helpim man marit?
21. Wanem tok bilong Baibel em inap helpim meri marit?
22. (a) Wanem sampela samting moa inap helpim marit? (b) Jehova i ting olsem wanem long brukim marit?
[Ol Piksa long pes 18]
Olsem wanem? Yumi save bihainim gutpela pasin taim yumi stap long kongrigesen, na yumi save kros na bikmaus taim yumi stap long haus?