Yu ‘Sanap Strong Olsem Diwai i Sanap Strong’?
YU BIN lukim strongpela win i sakim wanpela diwai? Win i sakim strong diwai, tasol diwai i no pundaun. Bilong wanem? Long wanem, ol rop bilong en i holim strong graun. Yumi tu i ken stap olsem dispela diwai. Taim ol bikpela hevi i painim yumi, yumi tu i ken “sanap strong.” (Ef. 3:14-17) Orait yumi sanap strong antap long wanem samting?
Tok Bilong God i tok “Krais Jisas em i namba wan pos tru” bilong kongrigesen Kristen. (Ef. 2:20; 1 Ko. 3:11) Baibel i kirapim yumi ol Kristen long ‘wokabaut wantaim [Krais] na sanap strong long em, olsem diwai i sanap strong long graun, na olsem haus i sanap strong antap long strongpela pos.’ Sapos yumi mekim olsem, bai yumi inap sanap strong na karim olgeta kain hevi i kamap bilong bagarapim bilip bilong yumi—wanpela bilong ol dispela kain hevi em ol ‘tok gris bilong giamanim yumi’ em ol “toktok nating” ol man i mekim.—Kl. 2:4-8.
‘Bikpela, Longpela, Antap, na Daunbilo Bilong En’
Orait, olsem wanem yumi inap “sanap strong” na “bilip strong”? Olsem wanpela diwai i putim ol rop bilong en i go daun insait tru long graun, yumi mas stadi gut tru long Tok Bilong God. Jehova i laik bai yumi save gut tru long tok i tru, olsem ‘bikpela na longpela bilong en, na antap na daunbilo bilong en.’ (Ef. 3:18-19) Olsem na yumi ol Kristen i no ken ting liklik save tasol, olsem yumi kisim save long “ol namba wan hap tru bilong tok bilong God,” dispela tasol em inap, nogat. (Hi. 5:12; 6:1) Yumi mas go daun insait tru long tok bilong Baibel na kisim save gut long ol tok i tru bilong en.—Snd. 2:1-5.
Tasol dispela i no makim olsem sapos yumi gat planti save long tok bilong Baibel, dispela bai mekim na yumi “sanap strong” long tok i tru, nogat. Satan tu i save long ol tok bilong Baibel. I gat narapela samting moa yumi mas mekim. Yumi mas “save gut long pasin bilong Krais long laikim tru ol arapela,” em samting “i winim olgeta save.” (Ef. 3:18-19) Yumi stadi long Tok Bilong God, long wanem, yumi laikim tru Jehova na tok i tru, na taim yumi mekim olsem, stretpela save bilong yumi bai i go bikpela moa na dispela bai strongim bilip bilong yumi.—Kl. 2:2.
Traim Save Bilong Yu
Orait yu ken traim save bilong yu long sampela bikpela tok bilong Baibel. Taim yu mekim olsem, dispela bai kirapim yu long stadi gut moa long tok bilong Baibel taim yu mekim stadi bilong yu yet. Olsem: Ritim ol ves i stap long kirap bilong pas Pol i raitim i go long ol Efesus. (Lukim blok “Pas Pol i Raitim Long Ol Efesus.”) Taim yu ritim pinis ol dispela ves, askim yu yet, ‘Mi kisimgut mining bilong ol dispela tok bilong Baibel i stap long blok long ol rait i slip liklik?’ Orait yu ken skelim wan wan bilong ol.
“Taim God i No Mekim Graun i Kamap Yet” Em i Makim Pinis Ol
Pol i raitim pas i go long ol wanbilip na em i tok: “Bipo yet . . . [God] i makim yumi bilong kamap pikinini bilong em yet long wok Jisas Krais bai i mekim bilong kisim bek yumi.” Tru tumas, Jehova i tingting pinis long em bai adoptim sampela man long insait long gutpela famili bilong em long heven. Ol dispela man God i adoptim olsem ol pikinini bilong em, ol bai mekim wok king na pris wantaim Krais. (Ro. 8:19-23; KTH 5:9, 10) Taim Satan i bin sutim tok namba wan taim long wok bos bilong Jehova, i olsem em i tok ol man i no inap holimpas stretpela pasin. Olsem na i stret Jehova i makim sampela man bilong graun long insait long wok bilong pinisim olgeta pasin nogut, na Satan tu, em i as bilong olgeta pasin nogut! Tasol long bipo yet Jehova i no bin makim stret husat ol man em bai adoptim olsem ol pikinini bilong em, nogat. God i bin makim olsem bai i gat wanpela grup, o lain, bai wok king wantaim Krais long heven.—KTH 14:3, 4.
Taim Pol i tokim ol wanbilip Kristen ol i olsem wanpela lain em God i bin makim ol long “taim God i no mekim graun i kamap yet,” Pol i tok long wanem “graun”? Em i no tok long dispela taim paslain long God i bin wokim graun tru tru o ol manmeri, nogat. Dispela bai i no stret wantaim stretpela pasin bilong em. Sapos paslain long God i bin wokim Adam tupela Iv em i makim pinis olsem tupela bai sakim tok bilong em, orait bai i no stret long tok tupela i gat asua long sakim tok bilong em, a? Orait, long wanem taim stret God i bin makim wanpela rot bilong stretim hevi em Adam na Iv i bin kamapim taim tupela i joinim Satan long bikhet long wok bos bilong God? Jehova i makim dispela rot bihain long Adam na Iv i bikhet; tasol paslain long tupela i kamapim ol pikinini, em ol manmeri God inap baim bek ol.
“Marimari Bilong God Em i Pulap Tru”
Long kirap bilong ol ves long pas bilong Efesus, bilong wanem Pol i tok olsem ol samting God i bin kamapim, ol i kamap long rot bilong bikpela “marimari bilong God”? Em i laik kamapim klia olsem, i no olsem Jehova i mas baim bek yumi, nogat, em i mekim olsem long wanem em i marimari long yumi.
Yumi olgeta i no inap givim wanpela samting bilong baim bek yumi yet. Tasol Jehova i laikim tru yumi ol manmeri bilong graun, olsem na em i stretim rot bilong kisim bek yumi. Yumi no gutpela olgeta na yumi gat sin, tasol olsem Pol i tok, wok bilong baim bek yumi i kamap, long wanem, God i marimari long yumi.
Tingting Hait Bilong God Long Samting Em i Laik Mekim
Long pastaim, God i no bin tokaut long rot em bai bihainim bilong stretim bek dispela bagarap em Satan i bin kamapim. Dispela samting i stap olsem wanpela “tok hait.” (Ef. 3:4, 5) Bihain, taim kongrigesen Kristen i kamap, Jehova i kamapim klia olsem wanem em bai kamapim laik bilong em long pastaim long ol manmeri na dispela graun. Pol i tok: “Long dispela taim [God] i makim pinis,” em i kamapim wanpela pasin bilong “stiaim olgeta samting” bilong bungim wantaim ol lain bilong heven na bilong graun.
Namba wan hap bilong wok em bai mekim bilong bungim ol samting, em i kirap long Pentikos 33 C.E. taim Jehova i stat long bungim ol lain em ol bai mekim wok king wantaim Krais long heven. (Ap. 1:13-15; 2:1-4) Namba tu hap bilong dispela wok em long bungim ol lain em ol bai stap long Paradais long graun aninit long Kingdom Bilong Mesaia. (KTH 7:14-17; 21:1-5) Rot bilong “stiaim olgeta samting” i no makim Kingdom Bilong Mesaia, long wanem, Kingdom i bin kamap long 1914, na i no paslain long en. Dispela rot bilong stiaim olgeta samting i makim wok God bai mekim bilong kamapim laik bilong em long bungim wantaim ol samting bilong heven na graun.
Holim “Tingting Bilong Ol Bikpela Man”
Sapos yumi bihainim gut pasin bilong mekim gut stadi bilong yumi yet, dispela bai helpim yumi long kisimgut insait bilong tok i tru, olsem ‘bikpela na longpela bilong en, na antap na daunbilo bilong en.’ Tasol long nau i gat planti samting i mekim na ol man i bisi tru, na dispela i mekim isi long Satan long daunim o bagarapim dispela gutpela pasin bilong stadi. No ken larim em i mekim olsem long yu. Yusim gut “tingting” em God i bin givim yupela na bai “tingting bilong yupela i [ken] i stap olsem tingting bilong ol bikpela man.” (1 Jo. 5:20; 1 Ko. 14:20) Yu mas save gut long as bilong samting yu bilip long en na bai yu inap redi oltaim long bekim tok bilong ol man i askim yu long ‘as bilong dispela gutpela samting yu wetim i stap.’—1 Pi. 3:15.
Tingim olsem yu stap long Efesus taim ol i ritim pas bilong Pol long namba wan taim. Ating tok bilong Pol i kirapim tru laik bilong yu long kisim “save tru long Pikinini Bilong God,” a? (Ef. 4:13, 14) Tru tumas, tok bilong em bai mekim olsem. Sapos olsem, orait yu mas larim tok bilong Pol i kirapim yu long nau tu. Sapos yu laikim tru Jehova na yu gat stretpela save bilong Baibel, dispela bai i helpim yumi long “sanap strong” long Krais, olsem diwai i sanap strong. Long dispela rot, bai yu inap sanap strong na karim kain kain hevi em Satan i putim long yu, paslain long pasin nogut bilong nau i pinis.—Sng. 1:1-3; Jer. 17:7, 8.
[Blok/Piksa long pes 27]
“Pas Pol i Raitim Long Ol Efesus”
“Yumi litimapim nem bilong God, em i God na Papa bilong Bikpela bilong yumi Jisas Krais. Long Krais em i bin givim yumi olgeta gutpela samting bilong heven, bilong helpim spirit bilong yumi. Taim God i no mekim graun i kamap yet, na em i makim yumi pinis long pas wantaim Krais, bai yumi ken i stap holi. Bai yumi ken i stap stretpela manmeri na i no gat asua long ai bilong en. Bipo yet em i laikim yumi tumas, na em i makim yumi bilong kamap pikinini bilong em yet long wok Jisas Krais bai i mekim bilong kisim bek yumi. Long laik bilong em yet God i mekim olsem. Long nem bilong dispela Pikinini em i laikim tumas, God i bin marimari moa yet long yumi. Olsem na yumi mas ting long dispela bikpela marimari bilong em na yumi mas litimapim nem bilong God. Marimari bilong God em i pulap tru. Krais i dai pinis bilong baim bek yumi, na long blut bilong en, God i lusim olgeta sin bilong yumi. God i kapsaitim marimari bilong en moa yet long yumi, na em i givim olgeta kain save wantaim gutpela tingting long yumi. Bipo God i tingting pinis long dispela samting em i laik mekim long wok bilong Krais. Tasol dispela tingting bilong en i bin i stap hait, na nau em i soim yumi pinis dispela tingting bilong en. Dispela samting em i laik mekim em i olsem. Em i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais, ol samting bilong heven na bilong graun tu. Na Krais i ken i stap het bilong olgeta samting.”—Ef. 1:3-10.