Painim Ol Gutpela Samting ‘I Stap Hait Long Krais’

“Olgeta kain save na tingting . . . i pulap long Krais, olsem mani i pulap long beng.”​​—KL. 2:3.

1, 2. (a) Long 1922, ol i painim wanem samting? Nau ol dispela samting i stap we? b) Long Baibel, God i singautim olgeta manmeri long mekim wanem?

TAIM ol man i painim pinis ol gutpela samting i stap hait, planti taim ol niuspepa i stori long dispela samting. Olsem: Inap planti yia, wanpela saveman bilong Briten, Howard Carter, i wok strong tru long painim matmat bilong King Tutankamen bilong Isip. Long 1922 em i painim na insait long en i gat 5,000 gutpela gutpela samting i stap.

² Planti bilong ol dispela samting Carter i painim ol i stap nau long ol haus tumbuna. Tru, ol i gutpela samting bilong lukim long ai na ol inap helpim yumi long save long ol samting i bin kamap bipo, tasol ol i no helpim i stap bilong yumi long olgeta wan wan de. Tasol long Baibel, God i singautim yumi long painim ol gutpela samting em ol inap helpim tru yumi. Dispela singaut i go long olgeta manmeri, na prais ol man inap kisim i winim tru olgeta gutpela samting bilong skin ol man i bin painim.​​—Ritim Sindaun 2:​1-6.

 3. Ol gutpela samting Jehova i tokim yumi long painim, olsem wanem ol inap helpim yumi?

³ Tingim olsem wanem ol gutpela samting Jehova i tokim yumi long painim ol inap helpim yumi. Wanpela bilong ol em “pasin bilong stap aninit long Bikpela.” Dispela pasin inap lukautim yumi long dispela taim nogut yumi stap long en. (Sng. 19:​9) Narapela em pasin bilong “save gut long God,” na dispela inap helpim yumi long kisim nambawan gutpela samting em yumi ol man inap kisim​—pasin bilong pas gut wantaim God Antap Tru. Na savetingting na save i kam long God, dispela inap helpim yumi long karim ol hevi na ol wari bilong olgeta wan wan de. (Snd. 9:​10, 11) Olsem wanem yumi inap painim ol dispela gutpela samting?

Ol Gutpela Samting God i Tokim Yumi Long Painim

 4. Yumi mas lukluk i go long husat bilong painim ol gutpela samting bilong spirit?

⁴ Ol saveman bilong painim ol samting bilong bipo, ol i mas raun long planti narapela narapela hap bilong painim ol samting ol i laik painim, tasol yumi no olsem​—yumi save long ples stret we yumi mas lukluk long en. Kain olsem wanpela mep, Tok Bilong God i makim ples stret we yumi inap painim ol gutpela samting bilong spirit em God i bin tok promis long en. Aposel Pol i tok long Krais olsem: “Olgeta kain save na tingting . . . i pulap [“hait,” NW] long Krais, olsem mani i pulap long beng.” (Kl. 2:3) Taim yumi ritim dispela tok, ating yumi laik save: ‘Bilong wanem yumi mas wok long painim ol dispela samting? Olsem wanem ol i stap “hait” long Krais? Na yumi mas mekim wanem bilong painim ol?’ Bilong helpim yumi long kisim bekim bilong ol dispela askim, nau bai yumi skelim gut dispela tok bilong Pol.

 5. Wanem samting i kirapim Pol long stori long ol gutpela samting bilong spirit?

⁵ Pol i raitim dispela tok i go long ol wanbilip Kristen long Kolosi. Em i tok em i wok strong tru bilong ‘strongim bel bilong ol na bilong kirapim ol long laikim tru ol arapela na stap wanbel tru.’ (Ritim Kolosi 2:​1, 2.) Bilong wanem Pol i wari long ol? Pol i save olsem namel long ol i gat sampela man ol i autim ol tingting bilong ol Grik na ol i laik bihainim gen Lo Bilong Moses na dispela inap pulim ol brata long Kolosi. Olsem na em i tokim ol: “Lukaut gut, nogut wanpela man i autim olkain giaman save na toktok nating long yupela na em i mekim yupela i bihainim tingting bilong en. Ol dispela kain man i save kisim tingting bilong ol tumbuna na bilong ol spirit i save bosim ol samting bilong skai na graun. Ol i no save bihainim tingting bilong Krais.”​​—Kl. 2:8.

 6. Bilong wanem yumi mas i gat laik long save gut long skultok Pol i givim long ol Kolosi?

⁶ Long nau, Satan na ol lain nogut bilong em long graun ol i laik pulim yumi tu. Ol tingting bilong dispela graun, na dispela tingting tu olsem i no gat god i stap na yumi ol man i bin kamap long rot bilong evolusen, ol dispela tingting i save stiaim tingting, pasin, sindaun, na ol wok ol man i mekim. Lotu giaman i mekim bikpela wok insait long planti bung bilong holide. Planti muvi, vidio, na musik samting ol i bilong inapim ol laik nogut bilong bel, na planti samting long Intenet inap pundaunim ol yangpela na lapun wantaim. Sapos olgeta taim yumi lukim kain samting olsem, dispela inap pulim tingting bilong yumi i go longwe long ol samting God i laik bai yumi mas mekim, na yumi no holim strong moa dispela laip em i laip tru. (Ritim 1 Timoti 6:​17-​19.) Olsem na yumi mas kisimgut na tingim tru mining bilong dispela skultok Pol i givim long ol Kolosi na bai yumi no pundaun long ol trap bilong Satan.

 7. Wanem tupela samting em Pol i tok bai helpim ol Kolosi?

⁷ Orait nau yumi ken tingim gen dispela tok Pol i givim long ol Kolosi. Taim em i kolim pinis samting em i wari long en, em i kolim 2-pela samting inap strongim bel bilong ol na helpim ol long laikim tru ol arapela na stap wanbel. Namba wan samting, em i “laik bai [ol] i kisim gutpela tingting, na bai dispela i strongim bilip bilong [ol].” Ol i mas bilip tru olsem save ol i bin kisim long Baibel, dispela i stret tru, na bai bilip bilong ol i gat strongpela as bilong en. (Hi. 11:1) Namba 2 samting, em i “laik bai [ol] i save gut long as bilong tok hait bilong God.” Ol i mas save gut long ol strongpela tok bilong God na i no long ol hap save tasol bilong tok i tru. (Hi. 5:​13, 14) Dispela em i gutpela tok bilong helpim ol Kolosi na yumi long nau! Tasol olsem wanem yumi inap kisim strongpela bilip na stretpela save? Pol i bekim dispela askim long dispela tok em i mekim long Jisas Krais: “Olgeta kain save na tingting . . . i pulap [“hait,” NW] long Krais, olsem mani i pulap long beng.”

Ol Samting i Stap “Hait” Long Krais

 8. Wanem mining bilong dispela tok stap “hait” long Krais?

⁸ Taim Baibel i tok olgeta kain gutpela save na tingting i stap “hait” long Krais, dispela i no makim olsem rot i pas na yumi no inap kisim, nogat. Em i makim olsem bilong kisim ol dispela gutpela samting, yumi mas wok strong long kisim na lukluk i go long Jisas Krais. Dispela i stret wantaim tok Jisas i mekim long em yet, em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jo. 14:6) Yes, bilong kisim save i kam long God, yumi mas larim Jisas i helpim na soim rot long yumi.

 9. Wanem sampela wok em Jisas i holim?

⁹ Jisas i tok em i “rot,” na tu, em i “as bilong tok tru” na “as bilong laip.” Olsem na em i no rot bilong man i go long Papa na em tasol, nogat. Jisas i holim ol narapela wok tu em ol i bikpela samting bilong helpim yumi long kliagut long ol tok i tru bilong Baibel na bilong kisim laip oltaim. Tru tumas, i gat kain kain samting i stap hait long Jisas, em ol man i stadi gut long Baibel inap kisim save long en. Orait nau yumi ken skelim sampela bilong ol dispela gutpela samting em ol inap helpim yumi long kisim laip oltaim na pas gut wantaim God.

10. Yumi inap kisim wanem save long Jisas long Kolosi 1:​19 and 2:9?

¹⁰ “Krais em i kamap man olsem yumi, na olgeta laip [“pasin,” NW] bilong God i pulap tru long em.” (Kl. 1:​19; 2:9) Jisas i bin stap wantaim Papa bilong em long heven inap planti milion milion yia, olsem na em i winim ol narapela man long save gut long pasin na laik bilong God. Taim Jisas i mekim wok bilong em hia long graun, em i lainim ol man long ol samting Papa bilong em i bin skulim em long en na em i kamapim ol pasin em Papa i bin skulim em long bihainim. Olsem na Jisas inap tok: “Man i lukim mi, em i lukim Papa.” (Jo. 14:9) Olgeta savetingting na save bilong God i pulap long Krais, olsem na nambawan rot bilong kisim save long Jehova, em long rot bilong save gut long Jisas.

11. Bilong kisimgut mining bilong ol tok profet bilong Baibel, bilong wanem yumi mas kisim save long Jisas?

¹¹ “Tok Jisas i autim, em tasol i save kirapim ol man long autim tok profet.” (KTH 19:10) Dispela tok i makim olsem Jisas i insait long truim bilong ol planti tok profet long Baibel. Yumi mas save long wok bilong Jisas insait long Kingdom Bilong Mesaia na bai yumi inap kisimgut mining bilong ol tok profet bilong Baibel, kirap long namba wan tok profet Jehova i mekim long Stat 3:​15, i go inap long ol gutpela visen long Buk Kamapim Tok Hait. Dispela i helpim yumi long save long as na ol man i no bilip olsem Jisas em i Mesaia, ol i paul long mining bilong planti tok profet long Ol Skripsa Hibru. Na long ol man husat i ting Ol Skripsa Hibru i no bikpela samting​—em ol skripsa i gat planti tok profet bilong Mesaia long en​—ol i ting Jisas em i wanpela gutpela man na em tasol. Save ol manmeri bilong God i kisim long Jisas em i helpim ol long kisimgut mining bilong ol tok profet bilong Baibel em truim bilong ol i no kamap yet.​​—2 Ko. 1:​20.

12, 13. (a) Olsem wanem na Jisas em i “lait bilong graun”? (b) Ol disaipel bilong Krais ol i lusim pinis tudak bilong lotu giaman, olsem na nau ol i gat wok long mekim wanem?

¹² “Mi yet mi lait bilong graun.” (Ritim Jon 8:​12; 9:5.) Planti handet yia paslain long Jisas i bon long graun, Aisaia i tok profet olsem: “Ol manmeri i bin i stap long bikpela tudak, tasol nau ol i lukim bikpela lait. Ol i bin sindaun long ples tudak, tasol nau lait i kamap long ol.” (Ais. 9:2) Aposel Matyu i tok Jisas i truim dispela tok profet taim Em i stat long autim tok long ol manmeri na i tok: “Yupela i mas tanim bel, long wanem, kingdom bilong heven em i kam klostu pinis.” (Mt. 4:​16, 17) Wok autim tok bilong Jisas i helpim ol manmeri long kisim lait, olsem save, na lusim kalabus long ol tok bilong lotu giaman. Jisas i tok: “Mi kam long dispela graun olsem lait, bilong olgeta man i bilip long mi ol i no ken i stap long tudak.”​​—Jo. 1:​3-5; 12:46.

¹³ Planti yia bihain, aposel Pol i tokim ol brata Kristen: “Bipo yupela i stap long tudak, tasol nau Bikpela i putim yupela i stap long lait. Olsem na yupela i mas wokabaut olsem ol manmeri bilong lait.” (Ef. 5:8) Ol Kristen i lusim pinis tudak bilong lotu giaman, olsem na nau ol i gat wok long wokabaut olsem ol manmeri bilong lait. Dispela i stret wantaim tok Jisas i givim long ol disaipel long Bikpela Tok Long Maunten: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Mt. 5:​16) Olsem wanem? Yu amamas tru long ol gutpela save yu bin painim long Jisas na nau yu laik kamapim long ol narapela long rot bilong ol tok na gutpela pasin Kristen yu mekim?

14, 15. (a) Olsem wanem ol sipsip na ol narapela animal i insait long wok bilong lotu i tru long taim bilong ol man i bin raitim Baibel? (b) Olsem wanem wok bilong Jisas olsem “Pikinini Sipsip Bilong God” i winim tru olgeta gutpela samting bilong skin ol man i bin painim?

¹⁴ Jisas em i “Pikinini Sipsip Bilong God.” (Jo. 1:​29, 36) Long Baibel, ol sipsip i bin mekim bikpela wok, ol i bin insait long wok bilong tekewe sin na helpim ol man long go klostu long God. Olsem: Taim Abraham i kamapim klia olsem em i orait long kilim pikinini bilong em Aisak olsem ofa, wanpela ensel i pasim em na God i givim wanpela sipsip man olsem senis bilong Aisak. (Stt. 22:​12, 13) Taim God i kisim bek ol Israel long Isip, ol sipsip i mekim bikpela wok gen, ol i insait long pasova bilong Jehova. (Kis. 12:​1-​13) Na aninit long Lo Bilong Moses i gat wok long mekim ofa long kain kain animal, olsem ol sipsip na ol meme.​​—Kis. 29:​38-​42; Wkp. 5:​6, 7.

¹⁵ Tasol i no gat wanpela bilong ol dispela ofa​​—o ol arapela ofa ol man i mekim​​—inap pinisim tru sin na dai. (Hi. 10:​1-4) Tasol Jisas em i “Pikinini Sipsip Bilong God. Em i kam bilong rausim sin bilong olgeta manmeri bilong graun.” Wok em i mekim olsem Pikinini Sipsip Bilong God i winim tru olgeta gutpela samting bilong skin ol man i bin painim. Olsem na yumi mas makim taim bilong stadi long ol tok i stori long pe bilong baim bek ol man na yumi mas bilip long en. Sapos yumi mekim olsem, bai yumi kisim gutpela blesing na prais​​—“liklik lain sipsip” bai kisim glori na ona wantaim Krais long heven, na “ol arapela sipsip” bai kisim laip oltaim long Paradais long graun.​​—Lu. 12:32; Jo. 6:​40, 47; 10:16.

16, 17. Bilong wanem i bikpela samting yumi kliagut olsem Jisas em i ‘as bilong bilip bilong yumi, na em bai inapim tru bilip bilong yumi’?

¹⁶ Jisas em i “as bilong bilip bilong yumi, na . . . em bai inapim tru bilip bilong yumi.” (Ritim Hibru 12:​ 2a) Long Hibru sapta 11, Pol i stori long pasin bilong bilip​—em i stori long mining bilong en na em i kolim lista bilong ol man na meri bilong bilip, olsem Noa, Abraham, Sara, na Rahap. Na em i kirapim ol brata Kristen long “lukluk i go long Jisas, em i as bilong bilip bilong yumi, na . . . em bai inapim tru bilip bilong yumi.” Bilong wanem Pol i laik kirapim ol long mekim olsem?

¹⁷ Tru, ol manmeri long lista bilong Hibru sapta 11 ol i bilip strong long promis bilong God, tasol ol i no save long olgeta liklik liklik samting God bai mekim bilong truim dispela promis long rot bilong Mesaia na Kingdom. Olsem na long dispela samting, bilip bilong ol i sot. Ol man Jehova i bin mekim wok long ol bilong raitim planti tok profet bilong Mesaia, ol tu i no kliagut long ol samting ol i raitim. (1 Pi. 1:​10-​12) Long rot bilong Jisas tasol, pasin bilong bilip inap kamap gutpela olgeta na i no sot. Olsem na i bikpela samting yumi kliagut na luksave olsem Jisas em i “as bilong bilip bilong yumi, na . . . em bai inapim tru bilip bilong yumi”!

Wok Yet Long Painim

18, 19. (a) Kolim sampela gutpela save moa i stap long Krais. (b) Bilong wanem yumi mas wok yet long lukluk i go long Jisas bilong kisim ol gutpela samting bilong spirit?

¹⁸ Yumi bin stori long sampela tasol bilong ol gutpela wok em Jisas i bin mekim insait long wok bilong God long kisim bek ol man. I gat sampela gutpela save moa i stap hait long Krais. Taim yumi kisim save long ol dispela samting, dispela bai givim amamas long yumi na helpim yumi. Olsem: Aposel Pita i kolim Jisas “namba wan man bilong bringim yumi long rot bilong laip” na “sta bilong moningtaim.” (Ap. 3:​15; 5:​31; 2 Pi. 1:​19) Na Baibel i kolim Jisas olsem “i Tru,” o Amen. (KTH 3:​14) Olsem wanem? Yu save gut long ol dispela wok em i holim? Na ol i bikpela samting olsem wanem? Jisas i tok, “wok long painim samting na bai yupela i lukim.”​​—Mt. 7:7.

¹⁹ I no gat narapela man em ol wok em i mekim i bikpela samting tru na i bilong helpim yumi long stap laip oltaim oltaim olsem Jisas i bin mekim, nogat. Ol gutpela samting bilong spirit i pulap long Jisas na i no hatwok long painim sapos yu givim bel tru long painim. Em bai gutpela tru long yu painim ol dispela gutpela samting i stap “hait” long em.

Yu Inap Tingim?

• Ol Kristen i mas wok long painim wanem ol gutpela samting?

• Bilong wanem ol skultok Pol i givim long ol Kolosi i stret yet long yumi long nau?

• Kolim sampela gutpela samting i stap “hait” long Krais na stori long en.

[Ol Piksa long pes 5]

Baibel i kain olsem wanpela mep i stiaim yumi i go long ol gutpela samting i stap “hait” long Krais