Yu Ting Baibel i Tambuim Pilai Laki?

PLANTI muvi na TV program i save soim pasin bilong pilai laki​—⁠na moa yet long ol haus kasino​—⁠olsem samting ol smatpela man, ol maniman, na ol manmeri i gat biknem i save amamas long en. Tru, planti man i luksave olsem ol dispela piksa i no tru na ol i driman nating tasol.

Tasol tru tru, ol loto tiket, bet long hosres, na ol pilai laki long Intenet i resis wantaim ol kasino bilong pulim tingting bilong ol man long pilai laki. Buk Internet Gambling i tok, pilai laki “em wanpela wok nogut i kirapim tru bel bilong planti man tru long insait long en.” Olsem: Poka em wanpela kas gem i stap planti long TV na Intenet. Long wanpela niuspepa, ol saveman i tok insait long 18 mun i go pinis, planti man moa long Amerika i pilai poka.

Long ol pilai laki ol man i save betim mani na ol i no save wanem samting bai kamap long mani bilong ol. Planti man i tok i no gat rong sapos man i yusim mani bilong em yet long pilai laki na em i no kalabus long dispela pasin. Buk New Catholic Encyclopedia i tok, pilai laki “em i no wanpela sin, tasol taim man i pilai laki na em i no mekim ol wok samting em i mas mekim, orait dispela em i sin.” Tasol ol i no kamapim wanpela tok bilong Baibel bilong helpim dispela tok ol i kamapim. Orait, ol Kristen i mas i gat wanem tingting long pasin bilong pilai laki? Yu ting Baibel i orait long pasin bilong pilai laki o Baibel i tambuim dispela pasin?

Em tru olsem Baibel i no kolim stret dispela tok pilai laki, nogat. Tasol dispela i no makim olsem i no gat tok bilong stiaim yumi long dispela samting. Baibel i no kolim ol liklik liklik lo long ol samting yumi mas mekim, tasol Baibel i kirapim yumi long “save gut long laik bilong Jehova.” (Efesus 5:17) Saveman bilong Baibel, E. W. Bullinger, i tok long tok Grik ol i tanim olsem “save gut,” i makim pasin bilong bungim ol liklik liklik hap bilong wanpela save long rot bilong “tingim tingim na skelim dispela samting.” Ol Kristen inap save gut long laik bilong God long dispela samting long rot bilong bungim na tingim tingim ol stiatok bilong Baibel i stori long pilai laki. Taim yu ritim ol skripsa insait long dispela stori, ating yu bai askim yu yet olsem: ‘Dispela ves i kamapim wanem tingting long pasin bilong pilai laki? Baibel i kamapim wanem tingting long dispela pasin?’

Strongpela Laik Bilong Winim Samting

Long ol pilai laki, ol man i save betim mani na ol i no save long wanem samting bai kamap long mani bilong ol, olsem na pasin bilong bilip strong olsem ol bai i gat sans long win, dispela i bikpela samting long tingting bilong ol. Olsem: Ol i save makim ol laki namba long ol loto tiket; wanpela kain lain bilong pilai laki i no ken kolim sampela tok namel long ol yet; na ol i save bloim win antap long dais paslain long ol i tromoi. Bilong wanem ol i mekim olsem? Ol dispela man i bilip olsem ol bai laki o ol bai i gat sans long ol i ken win.

Yu ting pasin bilong bilip olsem ol bai win, dispela i samting bilong amamas tasol? Sampela manmeri long Israel bilong bipo i bin ting olsem. Ol i bilip olsem ol god bai helpim ol long win na kisim planti samting. Jehova i gat wanem tingting long dispela samting? Long rot bilong profet Aisaia, God i tokim ol: “Yupela ol lain i save givim baksait long mi na yupela i no save kam long Saion, dispela maunten bilong mi, na lotu long mi, yupela bai i kisim taim nogut. Yupela i save lotuim Gat na Meni, em ol giaman god yupela i ting ol i save mekim yupela i win na yupela i gat gutpela taim.” (Aisaia 65:11) Long ai bilong God, pasin bilong bilip long kamap laki em wanpela pasin bilong lotuim god giaman, na i no stret long dispela pasin i stap insait long lotu i tru. Taim ol man i mekim olsem, ol i bilip long wanpela narakain strong na ol i no bilip long God. God i no senisim tingting bilong em long dispela samting.

Olsem Wanem Ol i Winim Ol Prais?

Maski ol man i pilai laki long rot bilong Intenet, baim loto tiket, bet long hosres samting, o ol i pilai long haus kasino, ol i no tingim rot em winmani bilong ol i kam long en. Pilai laki i no wankain long stretpela pasin bilong kisim mani, long wanem, long pilai laki, man i save winim nating mani bilong narapela man.a Lain Canada’s Centre for Addiction and Mental Health, i tok: “Taim wanpela man i winim loto na i kamap miliona, long wankain taim planti milion manmeri i lusim mani bilong ol!” Wanem ol stiatok bilong Baibel inap helpim ol Kristen long kliagut long tingting bilong God long dispela samting?

Namba 10 lo bilong Tenpela Lo em God i bin givim long lain Israel, i tok: “Yupela i no ken mangalim haus bilong narapela man. Na yupela i no ken aigris long meri bilong narapela man. Na yupela i no ken mangalim wokboi o wokmeri bilong en o bulmakau o donki o olgeta arapela samting bilong en tu.” (Kisim Bek 20:17) Pasin bilong mangalim ol samting bilong ol narapela, olsem mani kago na gutpela sindaun, dispela em i bikpela sin wankain olsem pasin bilong mangal long meri bilong narapela man. Planti handet yia bihain, aposel Pol i kolim gen dispela lo long ol Kristen na i tok: “Yu no ken mangal.” (Rom 7:⁠7) Sapos wanpela Kristen i tingting long winim mani bilong narapela, yu ting em i gat asua long pasin bilong mangalim samting?

Man bilong raitim nius, em J. Phillip Vogel i tok: “Maski ol [planti man bilong pilai laki] i tokaut o nogat, paslain long ol i pilai, ol i save driman olsem liklik mani ol i gat inap helpim ol long kisim planti mani tru.” Ol kain man olsem i ting wantu ol inap kisim planti mani tru na ol i no mas hatwok. Dispela tok i no stret wantaim tok bilong Baibel olsem Kristen i mas “wok hat na mekim ol gutpela wok long han bilong en bai em i gat ol samting bilong tilim long ol man i sot.” (Efesus 4:28) Na aposel Pol i tokaut stret olsem: “Sapos man i no laik wok, orait em i no ken kaikai.” Na em i tok moa olsem: “Ol i mas . . . mekim wok bai ol i ken lukautim ol yet long kaikai samting.” (2 Tesalonaika 3:​10, 12) Tasol yu ting pasin bilong pilai laki em wanpela wok i orait long mekim?

Maski man i lusim planti aua long pilai laki, mani em i kisim i no pe bilong wok em i mekim, nogat, em i winim nating tasol. Long pilai laki man i lusim mani long samting em i no save long en, sapos i gat sans em bai win, na em i tingting olsem dispela sans bai kamap. Taim man i pilai laki em i wok strong long kisim nating ol samting. Tasol Baibel i kirapim ol Kristen tru long kisim mani long rot bilong mekim stret wanpela wok. Saveman King Solomon i tok: “Yumi save kaikai na dring, na amamas long wok bilong yumi.” Na em i tok moa olsem: “God yet i as bilong en.” (Saveman 2:24) Yes, ol wokman bilong God i no driman nating o painim ol isipela rot bilong kisim amamas na gutpela sindaun, nogat, ol i bilip long God bai givim ol dispela samting long ol.

Wanpela “Trap” Yumi Mas Abrusim

Maski i gat sans na wanpela man i win, em i no ken tingim amamas em i kisim long sotpela taim tasol, nogat, i gutpela em i tingim samting em pasin bilong pilai laki bai mekim long em long bihain. Sindaun 20:21 i tok: “Sapos man i hariap long kisim ol samting . . . orait ol dispela samting bai i no inap i stap gut.” Planti man husat i bin winim loto na sampela narapela man bilong pilai laki, ol i luksave olsem mani samting ol i winim i no bringim amamas long ol. I gutpela moa long yumi bihainim tok bilong Baibel long yumi “no ken putim bilip bilong [yumi] long mani samting i bilong stap sotpela taim tasol, nogat. [Yumi] mas bilip long God husat i save givim yumi planti gutpela samting bilong mekim yumi amamas.”​—⁠1 Timoti 6:⁠17.

Man inap win o lus taim em i pilai laki, na i gat sampela samting moa i insait long en. Baibel i tok: “Ol man i strong long kisim planti mani, ol bai pundaun long traim na ol bai pundaun long trap na ol bai i gat ol laik nogut na bihainim longlong tingting. Na long dispela rot ol bai bagarap.” (1 Timoti 6:⁠9) Trap i bilong kalabusim abus. Planti manmeri tru i tingting strong long betim liklik mani tasol o ol i laik traim pilai wan wan taim tasol, tasol sori tru bihain ol i kalabus olgeta long pilai laki. Dispela i bin bagarapim wok mani bilong ol, bagarapim bel na tingting bilong famili, na bagarapim sindaun bilong ol.

Yumi skelim pinis planti skripsa i gat ol stiatok long pasin bilong pilai laki. Olsem wanem? Yu luksave long tingting bilong God long dispela samting? Aposel Pol i tokim ol wanlain Kristen olsem: “Yupela i no ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis. Olsem bai yupela i ken save tru long laik bilong God, em dispela laik em i gutpela, na em i orait, na i gutpela olgeta.” (Rom 12:⁠2) Ol Kristen i mas larim laik bilong God i stiaim ol na i no tingting bilong ol man. Jehova em i “God bilong amamas,” na em i laik bai yumi amamas long laip bilong yumi, na yumi abrusim ol hevi em pasin bilong pilai laki i save kamapim.​—⁠1 Timoti 1:⁠11.

[Futnot]

[Rait long pes 14]

Ol wokman bilong God i save kisim mani long rot bilong mekim stretpela wok

[Blok long pes 13]

Amamas Bilong Winim Mani

Olsem wanem? Man inap kalabus long pasin bilong pilai laki? Dokta Hans Breiter i mekim wok painimaut long samting i save kamap taim man i winim o lusim mani long pilai laki, na em i tok “taim man i winim mani long rot bilong pilai laki, dispela i save kamapim sampela kain wok long kru, wankain olsem samting i save kamap long kru bilong man taim em i kisim drak koken.”

[Piksa long pes 13]

Ol man bilong pilai laki i laik winim mani bilong husat?