Askim
Tok bilong Kamapim Tok Hait 7:3 long “putim mak” i toktok long wanem samting?
Kamapim Tok Hait 7:1-3 i tok: “Mi lukim 4-pela ensel i sanap i stap long ol 4-pela kona bilong graun. Ol i holimpas ol 4-pela win bilong graun, . . . na mi lukim narapela ensel i lusim hap bilong sankamap na i kam. Em i holim mak bilong God, em God i save stap laip oltaim, na em i singaut strong long dispela 4-pela ensel God i givim strong long ol bilong bagarapim graun wantaim solwara. Em i tok olsem, ‘Yupela i no ken hariap long bagarapim graun na solwara na ol diwai. Mipela i laik putim mak bilong God bilong yumi long pes bilong ol wokman bilong en pastaim.’ ”
Taim ol ensel i lusim “4-pela win,” taim bilong “bikpela hevi” tru bai kamap, na long dispela taim bagarap bai painim lotu giaman wantaim ol narapela samting nogut bilong dispela graun. (KTH 7:14) Ol dispela ‘wokman bilong God’ em ol brata bilong Krais God i bin makim na ol i stap yet long graun. (1 Pita 2:9, 16) Olsem na dispela tok profet i makim olsem wok bilong putim mak long ol brata bilong Krais bai pinis long taim bikpela hevi tru i kirap. Tasol sampela ves bilong Baibel i makim olsem paslain long dispela, ol manmeri God i bin makim ol i mas kisim narapela mak. Olsem na sampela taim mipela i toktok long namba wan mak, na laspela mak. Tupela mak i narapela narapela olsem wanem?
Yumi ken tingim mining bilong dispela tok “putim mak.” Long bipo ol i save katim wanpela mak long hap ain samting bilong putim mak long kontrak pepa samting. Dispela tok inap makim tu mak yet em hap ain i kamapim. Ol i save putim gris kandel bilong pasim pepa o narapela samting na putim mak long en bilong soim husat tru i papa bilong pepa o man i no giaman na raitim nating nem bilong em.—1 King 21:8; Jop 14:17.
Pol i tok holi spirit i kain olsem dispela mak, em i tok: “God . . . i bin makim yumi bilong em yet. Em i bin putim mak bilong em yet long yumi, na em i givim Holi Spirit bilong i stap long bel bilong yumi. Holi Spirit em i olsem namba wan hap bilong ol gutpela samting God i laik givim long yumi. Na yumi kisim Holi Spirit pinis.” (2 Korin 1:21, 22) Olsem na Jehova i save makim ol dispela Kristen long holi spirit bilong makim olsem ol i bilong em yet.
Tasol i gat tupela mak bilong putim long ol Kristen God i bin makim. Namba wan mak em i narapela kain long laspela mak (1) long wok bilong en na (2) long taim bilong en. Namba wan mak ol i kisim, em bilong makim wanpela nupela man bilong kam insait long lain Kristen God i bin makim long holi spirit. Laspela mak em bilong strongim tok olsem dispela Kristen em God i makim pinis na em i kisim pinis mak, em i bin kamapim klia tru olsem em i stap gut long God. Long dispela taim tasol God bai putim laspela mak i stap oltaim long pes bilong dispela man na i kamapim klia olsem em i bin winim ol traim na em i wanpela ‘wokman bilong God’ i stap gut long Em. Dispela wok bilong putim mak em Kamapim Tok Hait sapta 7 i stori long en, em i toktok long dispela laspela mak ol i kisim.—KTH 7:3.
Aposel Pol i toktok long taim bilong kisim namba wan mak na em i tokim ol Kristen God i bin makim: “Yupela tu i harim pinis tok tru, em dispela gutnius bilong God i kisim bek yupela. Na yupela i bilip pinis long Krais. Olsem na yupela i pas wantaim Krais, na God i . . . givim Holi Spirit long yupela, olsem mak bilong yupela i stap lain manmeri bilong em stret.” (Efesus 1:13, 14) Planti taim ol tok bilong Baibel i soim yumi olsem, ol Kristen long taim bilong ol aposel ol i bin kisim dispela mak bihain liklik long taim ol i harim gutnius na ol i bilip long Krais. (Aposel 8:15-17; 10:44) Dispela mak i kamapim klia olsem God i orait long ol. Tasol dispela i no makim olsem God i orait pinis long ol i go inap oltaim oltaim, nogat. Bilong wanem?
Pol i tok ol dispela Kristen God i bin makim ol i bin kisim ‘mak bilong soim ol olsem God i makim taim bilong mekim ol i kamap fri tru.’ (Efesus 4:30) Dispela tok i makim olsem bikpela haptaim bai lus, inap planti yia, bihain long ol i kisim dispela namba wan mak. Ol Kristen God i bin makim ol i mas i stap gut long God kirap long taim ol i bin kisim mak long holi spirit na i go inap long ‘taim bilong mekim ol i kamap fri tru’ na lusim bodi bilong graun—olsem i go inap long taim ol i dai. (Rom 8:23; Filipai 1:23; 2 Pita 1:10) Olsem na long pinis bilong laip bilong Pol, em inap tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God. Nau prais bilong man i winim resis em i redi na i wetim mi i stap.” (2 Timoti 4:6-8) Na Jisas i tokim lain Kristen God i bin makim: “Yu mas holim bilip, i go inap long taim yu dai, na bai mi givim yu laip olsem prais.”—KTH 2:10; 17:14.
Dispela tok “prais” i soim tu olsem, i gat haptaim i mas lus namel long namba wan mak ol i kisim na laspela mak. Bilong wanem i olsem? Long bipo, ol i save givim prais long man i bin ran na winim resis. Bilong kisim dispela prais, i no olsem em i mas i go insait long resis na em tasol, nogat. Em i mas ran i go inap long pinis bilong resis. Na olsem tasol, sapos ol Kristen God i bin makim ol i stap strong i go inap long pinis bilong dispela rot ol i bihainim—kirap long taim ol i kisim namba wan mak na i go inap long taim ol i kisim laspela mak—ol bai kisim prais olsem laip long heven na i no inap i dai moa.—Matyu 10:22; Jems 1:12.
Orait, dispela lain remnan bilong ol Kristen God i bin makim na i kisim pinis namba wan mak, wanem taim bai ol i kisim laspela mak? Ol manmeri bilong dispela lain i stap yet long graun ol bai kisim mak “long pes bilong ol” paslain liklik long taim bikpela hevi tru i kirap. Taim ol ensel i lusim 4-pela win bilong bikpela hevi tru, olgeta bilong lain Israel bilong spirit i kisim pinis laspela mak, maski sampela bilong ol i stap yet na i mas pinisim wok bilong ol hia long graun na i dai.