Yupela Papamama, Pasin Bilong Yupela i Lainim Ol Pikinini Long Wanem Samting?
“Bihainim ol pasin [God ] yet i save mekim.”—EFESUS 5:1.
1. Jehova i tokim namba wan man na meri long ol liklik liklik samting ol i mas mekim o olsem wanem?
JEHOVA i As bilong famili. Olgeta famili i stap, long wanem, em i kamapim namba wan famili na inapim namba wan man na meri long kamapim ol pikinini. (Efesus 3:14, 15) Em i givim tok long Adam na Iv long ol bikpela wok ol i mas mekim, tasol em i no kolim ol liklik liklik samting—em i larim tupela i tingim kain kain rot bilong mekim ol dispela wok. (Stat 1:28-30; 2:6, 15-22) Taim Adam tupela Iv i mekim sin pinis, ol hevi i painim ol famili i wok long kamap bikpela moa. Tasol Jehova i mekim pasin sori na givim sampela tok bilong stiaim ol wokboi bilong em long taim kain hevi olsem i kamap.
2. (a) Jehova i bin lainim ol man long rot bilong Baibel na long rot bilong wanem samting moa? (b) Ol papamama i mas givim wanem askim long ol yet?
2 Jehova em i Nambawan Tisa bilong yumi na em i bin kamapim wanpela buk i tokim yumi long ol samting yumi mas mekim na ol samting yumi mas abrusim, tasol i no dispela samting tasol em i bin mekim. Long bipo, em i lainim ol man long rot bilong dispela buk na long rot bilong ol pris na ol profet na ol het bilong famili. Tasol long nau, em i mekim wok long husat bilong lainim ol man? Em ol elda Kristen na ol papamama. Sapos yu wanpela papa o mama, yu save skulim famili bilong yu long ol pasin bilong Jehova?—Sindaun 6:20-23.
3. Pasin bilong Jehova long skulim ol man inap lainim ol het bilong famili long wanem samting?
3 Papamama i ken mekim wanem bilong skulim ol pikinini bilong ol olsem? Jehova yet i soim rot. Em i save tokaut klia long wanem samting i gutpela na wanem samting i nogut, na planti taim em i save kolim gen ol tok. (Kisim Bek 20:4, 5; Lo 4:23, 24; 5:8, 9; 6:14, 15; Josua 24:19, 20) Em i save kamapim ol gutpela askim bilong kirapim tingting bilong man. (Jop 38:4, 8, 31) Long rot bilong ol tok piksa na ol samting tru i bin kamap, em i save kirapim bel bilong yumi na stretim stretim bel bilong yumi. (Stat 15:5; Daniel 3:1-29) Yupela ol papamama, taim yupela i lainim ol pikinini, yupela i wok strong long bihainim dispela pasin?
4. Pasin bilong Jehova long stretim ol man inap skulim yumi long wanem samting? Bilong wanem pasin bilong stretim man em i bikpela samting?
4 Jehova i strong long bihainim pasin i stret, tasol em i save gut long ol samting sin i bin mekim long ol man. Olsem na taim em i no givim yet strafe long ol man i gat sin, em i save skulim ol na givim planti toksave long ol na ol tok bilong kirapim gen tingting bilong ol. (Stat 19:15, 16; Jeremaia 7:23-26) Taim em i stretim man, em i save givim strafe i stret; em i no givim strafe i bikpela tumas. (Song 103:10, 11; Aisaia 28:26-29) Sapos yumi mekim wankain pasin long ol pikinini bilong yumi, dispela bai kamapim long ples klia olsem yumi save long Jehova, na ol pikinini tu i no hatwok long kisim save long em.—Jeremaia 22:16; 1 Jon 4:8.
5. Pasin bilong Jehova long harim tok inap skulim ol papamama long wanem samting?
5 Jehova em i gutpela Papa bilong yumi i stap long heven na taim yumi beten toktok wantaim em, em i harim. Em i no tokim yumi long ol samting yumi mas mekim na em tasol, nogat. Em i laik kirapim yumi long autim olgeta tingting bilong yumi long em. (Song 62:8) Na sapos ol tok yumi kamapim i no stret tumas, nek bilong em i no pairap long heven na krosim yumi, nogat. Long pasin isi em i save skulim yumi. Olsem na dispela tok bilong aposel Pol em i stret: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim”! (Efesus 4:31–5:1) Em nau, Jehova i stap gutpela piksa tru bilong ol papamama i ken bihainim taim ol i wok long skulim ol pikinini bilong ol! Yumi pilim tru dispela gutpela pasin bilong em na i kirapim yumi long wokabaut long rot em i makim.
Pasin Bilong Yu Inap Mekim Bikpela Wok
6. Tingting na pasin bilong papamama inap mekim wanem long pikinini?
6 Long maus, papamama i save skulim pikinini, na tu, pasin bilong ol i save mekim bikpela wok. Maski papamama i laik o nogat, pikinini bai bihainim pasin bilong ol. Taim ol i harim pikinini i kamapim sampela tok ol yet i bin mekim, ating dispela bai amamasim papamama, o mekim ol i kirap nogut. Taim pasin na tingting bilong papamama i kamapim olsem ol i laikim tru ol samting bilong spirit, dispela i save helpim tru pikinini.—Sindaun 20:7.
7. Jepta i mekim wanem na em i stap gutpela piksa long pikinini meri bilong em? Wanem samting i bin kamap long dispela?
7 Baibel i helpim yumi long save long ol samting em pasin bilong papamama inap mekim long pikinini. Jepta, em wanpela man Jehova i bin mekim wok long en bilong helpim ol Israel long daunim ol Amon, na em i wanpela papa tu. Ol tok em i mekim long king bilong Amon i kamapim klia olsem planti taim Jepta i bin kaunim stori bilong ol samting Jehova i bin mekim long ol Israel. Em i no hatwok long kamapim ol dispela stori, na em i kamapim olsem em i bilip strong long Jehova. Ating pasin bilong em i bin helpim pikinini meri bilong em long kisim strongpela bilip na pasin bilong daunim laik bilong em yet, em ol pasin pikinini meri i bin kamapim taim em i orait long stap singel na givim bel long mekim wok bilong Jehova inap long taim em i dai.—Hetman 11:14-27, 34-40; skelim wantaim Josua 1:8.
8. (a) Papamama bilong Samuel ol i bihainim wanem gutpela pasin? (b) Dispela i bin helpim Samuel olsem wanem?
8 Taim Samuel em i manki yet, em i stap olsem gutpela piksa, na em i stap gut long God olsem wanpela profet inap long taim em i dai. Olsem wanem? Yu laik bai ol pikinini bilong yu i kamap wankain olsem em? Skelim ol samting papamama bilong Samuel, em Elkana na Hana, ol i bin mekim. Maski i gat sampela hevi insait long famili bilong ol, ol i save go oltaim long Silo bilong lotu long God—haus lotu sel i stap long dispela hap. (1 Samuel 1:3-8, 21) Taim Hana i beten, em i givim bel olgeta long mekim. (1 Samuel 1:9-13) Na tupela i ting wok bilong inapim ol promis ol i bin mekim long God em i bikpela samting. (1 Samuel 1:22-28) Yumi ken ting gutpela pasin bilong tupela i bin helpim Samuel long kisim ol pasin i bin helpim em long bihainim stretpela rot, na em i mekim olsem yet, maski em i stap namel long ol man i tok ol i mekim wok bilong Jehova, tasol ol i no daun long ol pasin God i laikim. Bihain, Jehova i givim wok long Samuel olsem profet bilong Em.—1 Samuel 2:11, 12; 3:1-21.
9. (a) Wanem ol samting long famili i bin helpim gut Timoti? (b) Timoti i bin kamap wanem kain man?
9 Olsem wanem? Yu laik bai pikinini man bilong yu i kamap olsem Timoti, em taim em i yangpela em i bin kamap wanpela wanwok bilong aposel Pol? Papa bilong Timoti em i no wanpela bilipman, tasol mama bilong Timoti na bubu meri bilong em ol i laikim tru ol samting bilong spirit. Yumi ken ting dispela gutpela pasin bilong tupela i bin helpim Timoti long kisim gutpela as bilong bilip olsem wanpela Kristen. Mama bilong em Yunis, na bubu bilong em Lois, ol i ‘bilip tru, ol i no giaman.’ Ol i bihainim tru tru ol pasin Kristen na ol samting ol i bilip long en, na ol i lainim yangpela Timoti long mekim olsem. Timoti i kamapim long ples klia olsem em i stap gut long wok bilong em na em i tingim tru ol narapela.—2 Timoti 1:5, Nupela Testamen na Ol Sam, bilong 1978; Filipai 2:20-22.
10. (a) Wanem ol samting ausait long famili inap pulim ol pikinini bilong yumi? (b) Yumi mas mekim wanem taim ol dispela samting i kamap long toktok o long pasin bilong pikinini?
10 Tasol ol man i save stiaim tingting na pasin bilong ol pikinini bilong yumi, i no olgeta i stap insait long famili, nogat. Olsem: I gat ol wanskul, na ol tisa em ol i gat wok long stretim stretim tingting bilong ol pikinini, na ol man i gat strongpela tingting olsem olgeta man i mas bihainim pasin bilong ples, na ol man i gat biknem long pilai spot, na ol bikman em ol nius i save stori long pasin bilong ol. Na tu, planti milion pikinini i bin lukim ol pait nogut. Olsem wanem? Yumi ken kirap nogut sapos ol dispela samting i stiaim toktok na pasin bilong ol pikinini bilong yumi? Taim ol dispela samting i mekim olsem, yumi save mekim wanem? Sapos yumi kirap kwik na krosim pikinini o givim strongpela tok long em, yu ting dispela bai stretim hevi? Mobeta yumi askim yumi yet, ‘Pasin Jehova i save mekim long yumi, dispela inap helpim yumi long tingim gut wanem rot yumi ken stretim dispela hevi long en?’—Skelim wantaim Rom 2:4.
11. Taim papamama i popaia, dispela inap mekim wanem long ol pikinini bilong ol?
11 Tasol ol papamama i no gutpela olgeta, olsem na sampela taim ol i no stretim ol hevi long gutpela rot. Ol bai mekim sampela popaia. Taim pikinini i kisim save long dispela samting, yu ting dispela inap mekim na pikinini i no daun moa long papamama? Dispela inap mekim olsem sapos papamama i mekim hatpela pasin na wok long haitim popaia bilong ol. Tasol sapos papamama i gat pasin daun na ol i tokaut long popaia bilong ol, ating dispela inap helpim pikinini. Long dispela samting ol inap stap gutpela piksa long pikinini, em tu i mas lain long mekim wankain pasin.—Jems 4:6.
Pasin Bilong Yumi Inap Skulim Ol
12, 13. (a) Pikinini i mas kisim wanem save long pasin sori? Papamama i mas mekim wanem bilong skulim gut pikinini long dispela samting? (b) Bilong wanem em bikpela samting ol pikinini i lain long pasin bilong sori?
12 Taim papamama i givim tok long pikinini na ol yet i stap olsem gutpela piksa, dispela inap lainim gut pikinini long planti gutpela samting. Tingim sampela olsem:
13 Ol i mas mekim pasin sori na ol i no ken tingim ol yet tasol: Wanpela bikpela samting pasin bilong yumi inap skulim pikinini long en, em pasin sori em i wanem samting. “Yumi save laikim ol arapela, long wanem, God i bin laikim yumi pastaim.” (1 Jon 4:19) Em i As bilong pasin sori na em i stap nambawan piksa tru long dispela pasin. Baibel i toktok long dispela kain pasin sori, olsem a·gaʹpe, inap 100 taim. Dispela pasin i makim husat ol i Kristen tru. (Jon 13:35) Yumi mas kamapim dispela pasin sori long God na Krais Jisas, na yumi mas mekim pasin sori long ol narapela tu, maski yumi no laikim tru ol. (Matyu 5:44, 45; 1 Jon 5:3) Bilong yumi ken skulim gut pikinini bilong yumi long dispela pasin, pastaim dispela pasin sori i mas stap long bel bilong yumi yet na em i mas kamap ples klia long i stap bilong yumi. Yumi mas mekim wok; yumi no ken toktok tasol. Insait long famili, pikinini i mas lukim na pilim pasin sori bilong papamama na save olsem ol i stap pren tru bilong em. Sapos papamama i no mekim olsem, dispela inap bagarapim skin na tingting na bel bilong pikinini. Na tu, pikinini i mas lukim papamama i mekim pasin sori long ol wanlain Kristen i no insait long famili bilong ol.—Rom 12:10; 1 Pita 3:8.
14. (a) Olsem wanem pikinini inap lain long pasin bilong mekim gut ol wok i save mekim gut bel bilong em? (b) Olsem wanem yu inap lainim pikinini bilong yu olsem?
14 Lain long pasin bilong mekim wok: Wok em i wanpela bikpela samting long i stap bilong yumi. Bilong man i ken kisim gutpela tingting long em yet, em i mas lain long pasin bilong mekim gut wanpela wok. (Saveman 2:24; 2 Tesalonaika 3:10) Sapos yumi givim sampela wok long pikinini, em ol wok yumi no bin skulim em long mekim, na nau yumi krosim em, long wanem, em i no mekim gut ol dispela wok, ating bai em i no lain long mekim gut ol wok. Tasol taim pikinini i wok wantaim papamama na em i lain, na ol i tok amamas long em, ating em bai lain long mekim ol wok i mekim gut bel bilong em. Na taim ol i wok wantaim, sapos papamama i stori long rot bilong mekim, ating pikinini bai lain tu long rot bilong stretim ol hevi em inap kamap long dispela wok, na long pasin bilong mekim wanpela wok i go inap long taim em i mekim pinis, na long pasin bilong skelim gut ol samting long tingting, na long tingim gut ol samting em i laik mekim. Na taim ol i wok wantaim olsem, papamama i ken helpim pikinini long save olsem Jehova tu i save wok, na em i save mekim gut ol wok, na Jisas i save bihainim pasin bilong Papa bilong em. (Stat 1:31; Sindaun 8:27-31; Jon 5:17) Sapos famili i wok gaden o ol i gat wanpela bisnis, ating sampela long famili ol i ken wok wantaim long mekim. O mama i ken lainim pikinini man o pikinini meri long kukim kaikai na wasim plet kap samting. Sapos papa i mekim wok mani longwe long haus, em i ken makim taim long mekim sampela wok long haus wantaim pikinini. Em gutpela samting tru taim papamama i tingting long skulim pikinini long mekim ol wok bilong helpim i stap bilong em long bihain na ol i no tingting long pinisim ol wok bilong nau tasol!
15. Olsem wanem papamama inap lainim pikinini long pasin bilong bilip? Stori long dispela samting.
15 Holimpas bilip long taim bilong hevi: Bilip tu em i wanpela bikpela samting long i stap bilong yumi. Insait long famili-stadi, taim famili i toktok long pasin bilong bilip, ating dispela bai helpim pikinini long kisim save long bilip em i wanem samting tru. Na ating pikinini bai luksave long sampela samting i mekim na bilip i wok long kamap long bel bilong em. Tasol taim em i lukim papamama yet i holimpas strong bilip bilong ol long taim ol i gat bikpela hevi, ating pikinini bai tingim dispela i go inap long taim em i dai. Long Panama, man bilong wanpela meri i stadi long Baibel em i tok em bai rausim em long haus sapos em i no lusim Jehova. Meri hia i no lusim Jehova. Em wantaim 4-pela pikinini i save wokabaut 16 kilomita, na bihain ol i kisim PMV na go 30 kilomita moa bilong kamap long Haus Kingdom. Pasin em i mekim i strongim 20 long famili bilong em na ol i kisim tok i tru.
Kaunim Baibel Long Olgeta De
16. Bilong wanem i gutpela yumi kaunim Baibel long olgeta de?
16 Wanpela gutpela pasin tru ol famili i ken bihainim, em pasin bilong kaunim Baibel long olgeta taim—dispela bai helpim papamama na makim gutpela rot ol pikinini i ken bihainim. Sapos inap, kaunim sampela hap bilong Baibel long olgeta de. Maski yu kaunim bikpela hap o liklik hap, dispela i no nambawan bikpela samting. Bikpela samting, em pasin bilong kaunim Baibel long olgeta taim na pasin yu bihainim long kaunim Baibel. Ol pikinini i ken harim ol kaset bilong Baibel Stori Buk Bilong Mi sapos i gat long tok ples bilong yu. Pasin bilong kaunim Baibel long olgeta de i save helpim yumi long tingim ol tingting bilong God long olgeta taim. Na sapos famili i bung wantaim na kaunim Baibel long olgeta de, na i no ol wan wan long famili tasol ol i kaunim, dispela bai helpim famili olgeta long wokabaut long rot Jehova i makim. Pilai Yupela Ol Famili—Kaunim Baibel Long Olgeta De! i bin kamap long “Bihainim Rot God i Makim” Kibung, i bin kirapim ol famili long bihainim dispela pasin.—Song 1:1-3.
17 Pasin bilong famili long bung wantaim na kaunim Baibel, dispela i stret wantaim ol tok aposel Pol i raitim long pas i go long ol Kristen long Efesus, olsem: “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.” (Efesus 6:4) Wanem insait bilong dispela tok? Dispela tok “skulim” i olsem “putim tingting i go insait long”; olsem na ol papa Kristen i mas putim ol tingting bilong God Jehova i go insait long pikinini bilong ol—ol i mas helpim pikinini long kisim save long ol tingting bilong God. Bilong mekim olsem, papa i ken strongim pikinini long putim sampela bikpela ves bilong Baibel long tingting. Yumi laik bai ol tingting bilong Jehova i ken stiaim tingting bilong pikinini bambai ol laik na ol pasin bilong pikinini i ken wok long bihainim ol lo bilong God, maski papamama i stap wantaim pikinini o nogat. Baibel i as bilong kain tingting olsem.—Lo 6:6, 7.
18. Taim yumi kaunim Baibel, ating yumi mas mekim wanem na bai (a) yumi inap kisim gut ol tok bilong en? (b) ol tok bilong en i ken helpim yumi? (c) yumi inap bihainim ol tok i kamapim laik bilong Jehova? (d) ol tok bilong en i stori long tingting na pasin bilong ol man i ken helpim yumi?
18 Tasol bilong Baibel i ken helpim yumi, yumi mas kisim gut ol tok bilong en. Olsem na sampela hap ating yumi mas kaunim tupela o 3-pela taim. Bilong klia gut long sampela tok, ating yumi mas lukim wanpela buk dikseneri o buk Insight on the Scriptures. Sapos ves i kamapim wanpela lo o sampela tok bilong stretim yumi, orait toktok long ol samting i save kamap long nau na i stret long dispela tok. Orait nau yu ken askim, ‘Sapos yumi bihainim ol dispela tok, olsem wanem dispela inap helpim yumi?’ (Aisaia 48:17, 18) Sapos ves i stori long sampela samting Jehova bai mekim bilong kamapim laik bilong em, askim olsem, ‘Dispela i mekim wanem long i stap bilong yumi?’ Ating yu kaunim wanpela stori i toktok long ol tingting na ol pasin bilong ol man. Wanem ol hevi i bin painim ol? Ol i bin mekim wanem bilong stretim ol dispela hevi? Pasin ol i bin mekim inap helpim yumi olsem wanem? Olgeta taim larim hap taim bilong toktok long stori yu kaunim, olsem stori i givim wanem tingting long yumi ol man long nau.—Rom 15:4; 1 Korin 10:11.
19. Sapos yumi bihainim ol pasin God i save mekim, yumi bai givim wanem samting long ol pikinini bilong yumi?
19 Dispela em i gutpela rot tru bilong putim ol tingting bilong God i go long tingting na long bel bilong yumi! Dispela bai helpim tru yumi long “bihainim ol pasin [God] yet i save mekim.” (Efesus 5:1) Na bai yumi stap olsem gutpela piksa inap tru long ol pikinini bilong yumi i ken bihainim.
Yu Tingim Yet?
◻ Olsem wanem pasin bilong Jehova inap helpim ol papamama?
◻ Taim papamama i tokim ol pikinini long ol samting ol i mas mekim, bilong wanem ol yet i mas i stap olsem gutpela piksa?
◻ Pasin bilong papamama yet inap skulim ol pikinini long wanem ol samting?
◻ Yumi ken mekim wanem na bai pasin bilong famili long bung wantaim na kaunim Baibel i ken helpim gut yumi?
17. Pasin bilong kaunim Baibel olsem famili na putim ol bikpela tok bilong Baibel long tingting, olsem wanem dispela inap helpim famili long bihainim tok bilong Efesus 6:4?
[Ol Piksa long pes 10]
Planti famili i bung wantaim na kaunim Baibel long olgeta de