“Mekim Gutpela Pait Bilong Bilip”
YUMI ken tingim wanpela soldia em bai amamas tru sapos kepten i tokim em: “Yu mas i go bek long ples na stap liklik haptaim wantaim meri na famili bilong yu.”
Wanpela soldia long taim bilong King Devit i bin kisim kain tok olsem. King yet i salim tok long Uria bilong lain Hit olsem em i ken i go bek long ples. Tasol Uria i no laik i go long haus bilong em. Taim King i askim em long as bilong dispela, Uria i tok, Bokis Kontrak, em i makim God i stap wantaim ol, na ami bilong Israel, ol i stap long ples pait. Em i tokim King: “Bai i luk nogut sapos mi wanpela tasol i go long haus bilong mi na kisim kaikai na dring na slip wantaim meri bilong mi.” Long tingting bilong Uria, i no stret liklik long mekim olsem long dispela taim nogut bilong pait.—2 Samuel 11:8-11.
Pasin bilong Uria i kamapim sampela bikpela askim, long wanem, yumi tu i stap long taim bilong pait. I gat wanpela pait i stap, na i no gat wanpela pait bilong ol kantri i bikpela olsem dispela pait. Tupela bikpela pait bilong olgeta hap i bin kamap, ol i olsem samting nating taim yumi skelim wantaim dispela pait, na yu yet yu insait long en. Bagarap inap painim yumi, na birua em i strongpela tru. Long dispela pait yumi no sut long gan o tromoi ol bom, tasol bilong mekim gut pait, yumi mas tingting gut na bihainim savepasin.
Bilong go insait long dispela ami, pastaim yu mas save, i stret yu mekim olsem o nogat, na yu bai pait bilong mekim wanem. Yu inap kisim gutpela samting long dispela pait, maski yu mas lusim sampela samting? As bilong dispela pait i kamap klia long pas aposel Pol i salim long Timoti. Em i tok: “Mekim gutpela pait bilong bilip.” Em nau, long dispela pait yu no gat wok long lukautim wanpela strongpela taun, yu mas lukautim “bilip”—em ol tok i tru bilong ol Kristen olsem i stap long Baibel. Em nau, yu mas bilip tru long ol tok i tru bilong dispela “bilip” na bai yu ken pait bilong lukautim bilip na winim pait.—1 Timoti 6:12, NW.
Soldia i gat gutpela tingting, em i wok strong long save gut long birua bilong em. Long dispela pait, birua i gat bikpela save moa long pait, em i bin mekim pait inap planti yia moa, na em i gat olgeta samting bilong pait. Na tu, em i gat bikpela strong moa, winim yumi ol man. Em i man nogut tru na man bilong bagarapim man; em Satan yet. (1 Pita 5:8) Ol gan na bom samting bilong graun, na olkain save na trik bilong ol man, em i no inap tru long daunim dispela birua. (2 Korin 10:4) Orait yu ken mekim wok long wanem ol samting bilong mekim dispela pait?
Nambawan samting bilong pait, em “bainat bilong Holi Spirit, em tok bilong God.” (Efesus 6:17) Aposel Pol i soim yumi long gutpela wok dispela bainat i mekim: “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. . . . Olsem na em i save gut tru long olgeta tingting na laik bilong bel bilong yumi.” (Hibru 4:12) Kain bainat olsem i gat bikpela sap tru na inap makim stret na sutim man na i go insait tru long tingting na bel, olsem na yumi mas save gut tru long mekim wok long en.
Maski ami i gat ol kain kain nupela samting bilong pait, tasol sapos ol soldia i no gat save long mekim wok long en, ol i samting nating tasol. Na yu tu, yu mas kisim skul na bai yu ken mekim gutpela wok long bainat bilong yu. Gutpela tru, i gat ol lain i save gut tru long mekim pait, na ol inap skulim yu. Jisas i bin kolim ol olsem lain “wokboi i gat gutpela tingting,” na ol i bin kisim wok bilong givim kaikai bilong spirit, o skul, long lain bilong em long taim stret em i bin makim. (Matyu 24:45) Yu inap luksave long dispela lain wokboi taim yu skelim pasin bilong ol long skulim man na givim tok lukaut long ol pasin trik bilong birua long mekim pait. Ol dispela mak i kamapim klia olsem dispela lain wokboi em lain God i bin makim long holi spirit na ol i insait long kongrigesen Kristen bilong ol Witnes Bilong Jehova.—KTH 14:1.
Dispela lain wokboi i no skulim ol man tasol, nogat. Ol i gat wankain tingting olsem aposel Pol, em i bin tokim kongrigesen long Tesalonaika: “Taim mipela i stap wantaim yupela, mipela . . . i bin stap olsem meri i givim susu long ol pikinini bilong en. Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” (1 Tesalonaika 2:7, 8) Olgeta wan wan soldia i mas kisim trening long dispela gutpela lain.
Olgeta Hap Bilong Klos Pait
Olgeta hap bilong klos pait i stap na yu ken putim bilong lukautim yu. Lista bilong olgeta wan wan hap bilong klos pait i stap long Efesus 6:13-18. Soldia i save was gut em i no inap go long pait sapos sampela hap bilong klos pait i lus o i bruk samting.
Kristen i mas i gat olgeta hap bilong klos pait, tasol hap plang em i bikpela samting moa. Olsem na Pol i tok: “Yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela.”—Efesus 6:16.
Dispela bikpela hap plang, em inap haitim olgeta hap bilong bodi, em i makim pasin bilong bilip. Yu mas bilip strong long ol samting Jehova i mekim bilong stiaim yumi, na bilip tru olsem olgeta promis bilong em bai kamap tru. Yu mas tingting olsem olgeta dispela promis i kamap tru pinis. Na yu mas bilip strong olsem pasin bilong dispela graun olgeta, em Satan i bosim, liklik taim Jehova bai pinisim, na graun bai kamap olsem paradais, na ol man i stap gut long God ol bai kamap gutpela olgeta.—Aisaia 33:24; 35:1, 2; KTH 19:17-21.
Tasol long dispela narapela kain pait bilong nau, yu mas i gat narapela samting moa—wanpela pren. Long ol pait bilong graun, taim narapela soldia i wok long strongim bel bilong narapela soldia na lukautim em, ol i save kamap gutpela poroman tru, na sapos laip bilong wanpela i laik lus, narapela i helpim em na em i stap gut. Tru, ol poroman i bikpela samting, tasol bilong abrusim bagarap long dispela pait, yu mas i gat wanpela poroman i win tru—em Jehova yet. Olsem na long pinis bilong lista bilong Pol long ol wan wan hap bilong klos pait, em i tok: “Yupela i mas prea oltaim. Yupela i mas strong long mekim ol kain kain beten na askim God long helpim yupela.”—Efesus 6:18.
Yumi save laik tru long i stap wantaim wanpela gutpela pren. Yumi save painim rot bilong poroman wantaim em. Sapos oltaim yumi toktok wantaim Jehova long rot bilong beten, bai yumi tingim em olsem man i stap tru tru, olsem wanpela pren yumi inap bilip tru long en. Disaipel Jems i tok: “Yupela i mas i go klostu tru long God, na em bai i kam klostu tru long yupela.”—Jems 4:8.
Ol Pasin Trik Bilong Birua
Bilong pait long ol samting bilong dispela graun, sampela taim i olsem yumi mas wokabaut long bikpela hap graun i gat planti bom ol i bin planim. Birua inap kam long kain kain hap, na em inap kam long wanpela taim yu no ting em bai kam. Tasol yu ken bilip tru olsem Jehova i bin givim yu olgeta samting yu mas i gat bilong lukautim yu.—1 Korin 10:13.
Sampela taim birua inap sutim tok long ol tok i tru bilong Baibel i as bilong bilip bilong yu. Na ol man i bin tromoi bilip tru, ating ol bai givim ol switpela tok long yu bilong grisim yu, na ol bai wok strong long paulim tok i tru na bai ol i ken daunim yu. Tasol ol i no tingim yu na i laik mekim gut long yu, nogat. Sindaun 11:9 i tok: “Sapos ol man bilong mekim pasin nogut i toktok, toktok bilong ol inap bagarapim ol arapela manmeri. Tasol gutpela tingting bilong ol stretpela man inap long helpim ol yet na bai ol i stap gut.”
Bai yu popaia tru sapos yu ting yu mas putim yau long tok bilong ol man i bin tromoi bilip i tru o ritim ol nius bilong ol na bai yu ken daunim tok bilong ol. Ol tingting na tok bilong ol i paul tru na i olsem marasin nogut em inap bagarapim yu long ol samting bilong spirit na bagarapim bilip bilong yu, olsem wanpela sua nogut i go bikpela hariap tru. (2 Timoti 2:16, 17) Gutpela yu bihainim tingting bilong Jehova long ol man i tromoi pinis bilip i tru. Jop i tok long Jehova olsem: “I no gat wanpela man bilong bikhet na lusim bilip inap i kam na sanap long ai bilong em.”—Jop 13:16, NW.
Na ating birua bai traim narapela rot, em wanpela rot i bin wok gut sampela taim. Sapos ami i mats long lain na birua inap grisim sampela long brukim lain na ol i go nabaut bilong painim ol amamas nogut olsem pamuk samting, dispela bai longlongim ol na i no inap mats gut long lain.
Ol amamas bilong graun, olsem ol piksa nogut bilong pamuk samting i save kamap long televisen na muvi, na ol musik nogut, i save pulim sampela. Sampela i tok ol inap lukim ol piksa bilong pasin pamuk o ritim ol buk i stori long pasin pamuk na dispela i no save paulim tingting bilong ol. Tasol wanpela man em planti taim em i bin lukim ol piksa i gat pasin pamuk long en em i tokaut olsem: “Yu no inap lusim tingting long ol dispela piksa. Taim yu tingim tingim i go, bai yu gat laik tru long mekim ol samting yu bin lukim . . . Dispela piksa i mekim na yu ting yu lus tru long sampela gutpela samting.” Tasol yu ting i gutpela yu mekim olsem na yu inap kisim bagarap long dispela rot?
Narapela samting bilong pait em birua i mekim wok long en, em pasin bilong laikim tumas mani samting. Yumi inap ting yumi no gat hevi long dispela, long wanem, yumi olgeta i mas i gat sampela samting bilong skin. Yumi mas i gat haus, kaikai, na klos, na i no gat rong sapos yumi gat sampela gutpela samting. Tasol samting yumi mas was gut long en, em tingting bilong yumi long ol samting bilong skin. Mani inap kamap bikpela samting tru, winim ol samting bilong spirit. Yumi inap kamap man bilong laikim tumas mani. Yumi mas tingim olsem mani i no inap helpim yumi long olgeta samting. Em i bilong nau tasol na strong bilong en i save pinis, tasol ol gutpela samting bilong spirit i save stap oltaim oltaim.—Matyu 6:19, 20.
Sapos ami i bel hevi long sampela samting, ating ol i no inap winim pait. “Sapos taim nogut i painim yu na bun bilong yu i slek, orait yu no gat strong tru.” (Sindaun 24:10) Pasin bilong bel hevi na bun i slek, em i wanpela samting Satan i bin mekim wok long en na sampela taim em i wok gut. Sapos yu putim “hat kapa,” olsem “pasin bilong wetim God i kisim bek yumi,” dispela bai helpim yu long sakim pasin bilong bel hevi na bun i slek. (1 Tesalonaika 5:8) Wok strong long mekim bilip bilong yu i strong olsem bilip bilong Abraham. Taim God i tokim em long givim pikinini bilong em Aisak olsem ofa, em i no gat tupela tingting long mekim. Em i bilip olsem God bai truim tok promis bilong Em long mekim gut long olgeta lain long rot bilong pikinini bilong em, na God inap kirapim bek Aisak bambai em i ken truim dispela promis.—Hibru 11:17-19.
No Ken Les na Lusim Pait
Sampela husat i bin pait strong inap planti yia, ating bun bilong ol i wok long slek na ol i no pait strong olsem bipo. Pasin bilong Uria, em pastaim yumi stori long en, em inap helpim olgeta man i insait long pait bilong bilip long ol i ken holim yet stretpela tingting. Planti wanlain Kristen i save karim planti hevi na sot long ol samting ol i mas kisim, o bagarap inap painim ol, o skin bilong ol i kol na ol i hangre. Olsem Uria, yumi no laik tingting long gutpela sindaun bilong yumi long nau, o bihainim laik bilong bel long painim gutpela malolo long i stap bilong yumi. Yumi laik i stap wantaim ami bilong Jehova i stap long olgeta hap na ol i stap gut long pait, na yumi laik pait strong i go inap long taim yumi ken kisim ol gutpela blesing bai kamap bihain.—Hibru 10:32-34.
Sapos yumi no was gut, olsem yumi ting laspela pait Satan bai mekim long yumi em bilong bihain bihain, yumi inap painim taim nogut. Stori bilong King Devit i kamapim klia dispela samting. Wanpela taim em i no stap wantaim ami bilong em long pait. Olsem na Devit i mekim wanpela bikpela rong i givim bikpela hevi moa long em i go inap long taim em i dai.—2 Samuel 12:10-14.
Orait sapos yu insait long dispela pait, na yu karim ol hevi bilong mekim pait, na ol man i tok bilas long yu, na yu givim baksait long ol amamas nogut bilong graun, yu ting dispela bai helpim yu? Ol man husat i mekim gut dispela pait ol i wanbel long tok, ol samting bilong dispela graun i gutpela long ai, olsem bilas i lait moa yet, tasol taim yumi go klostu na skelim gut, yumi lukim olsem em i samting nating tasol. (Filipai 3:8) Na planti taim ol dispela kain amamas i save kamapim bikpela pen na bel hevi.
Ol Kristen i insait long dispela pait bilong spirit ol i save poroman wantaim ol pren tru tru, na bel bilong ol i no gat tok, na ol inap bilip na wetim gutpela samting bai kamap bihain. Ol Kristen God i bin makim long holi spirit ol i wet long kisim laip long heven wantaim Krais Jisas na ol i no inap i dai moa. (1 Korin 15:54) Bikpela hap bilong lain Kristen insait long pait ol i wet long kisim laip long Paradais long graun na ol bai kamap gutpela olgeta. Yumi inap lusim olgeta samting bambai yumi ken kisim dispela gutpela prais, a? Na pait bilong yumi i no olsem ol pait bilong graun—yumi inap winim dispela pait sapos yumi stap gut long God. (Hibru 11:1) Tasol olgeta samting bilong dispela graun Satan i bosim, em bai bagarap na pinis olgeta.—2 Pita 3:10.
Taim yu wok long mekim pait, tingim tok bilong Jisas: “Bel bilong yupela i ken i stap strong. Mi winim pinis strong bilong dispela graun.” (Jon 16:33) Em i winim pait, long wanem, em i was gut na em i holimpas bilip taim ol bikpela hevi i painim em. Yumi tu inap mekim olsem.
[Rait long pes 27]
Yumi no sut long gan o tromoi ol bom, tasol bilong mekim gut pait, yumi mas tingting gut na bihainim savepasin
[Rait long pes 30]
Yumi inap winim dispela pait sapos yumi stap gut long God
[Piksa long pes 26]
Hat kapa, olsem pasin bilong wetim God i kisim bek yumi, em bai helpim yumi long sakim pasin bilong bel hevi na bun i slek
Mekim wok long hap plang i makim bilip, bambai yu ken sakim “olgeta spia paia” Satan i sutim
[Piksa long pes 28]
“Yupela i mas i go klostu tru long God, na em bai i kam klostu tru long yupela”
[Piksa long pes 29]
Yumi mas bilip olsem ol promis bilong God bai kamap tru