“Pasim Olgeta Klos Pait God i Save Givim Long Yumi”
OL KRISTEN i mas pasim klos pait? Bilong wanem ol i mas pasim kain samting olsem bilong pait? Ol i no man bilong pait, a? (2 Timoti 2:24) Tru, ol i no man bilong pait, tasol olgeta Kristen tru i stap insait long wanpela pait—ol i wok strong long winim pait; ol i no wok long kilim man i dai.
Sapos Satan i no bin bikhet, bai yumi no gat dispela pait. Tasol em i bikhet, na em i giamanim Adam na Iv long bihainim pasin bikhet bilong em. Olsem na kirap long dispela taim bipo na i kamap inap long nau, pasin bilong dispela graun “i stap aninit long strong bilong Satan.” (1 Jon 5:19) Ol man i stap aninit long King tru, em Jehova, ol i mas sakim pasin bilong dispela graun na bos bilong dispela graun. Ol i gat pait long mekim ol samting bambai ol i no ken bagarap long ol samting bilong spirit. Bilong helpim ol Kristen long mekim olsem, Baibel i kirapim ol long “pasim olgeta klos pait God i save givim long yumi, na bai [ol] inap long sanap strong na sakim olgeta kain pasin bilong trik na giaman Satan i save hait na mekim.”—Efesus 6:11.
Klos Pait God i Givim Long Yumi
Sapos yumi laik sanap strong olsem, yumi mas pasim “olgeta klos pait God i givim long yumi.” Olsem na gutpela sapos yumi skelim olgeta wan wan klos pait aposel Pol i stori long en, na skelim yumi yet bambai yumi ken save, yumi pasim olgeta dispela klos pait o nogat.—Efesus 6:14-17.
“Sapos yupela i laik sanap strong, orait yupela i mas pasim tok tru olsem let bilong yupela.” (Efesus 6:14a) Long taim bilong Baibel, ol soldia i pasim wanpela let ol i wokim long skin bilong animal na i braitpela inap olsem 15 sentimita. Dispela let i lukautim gut bel. Taim soldia i taitim gut let, dispela i makim olsem em i redi long pait.
Olsem na i stret Baibel i tok, tok i tru bilong God i olsem let bilong soldia! Dispela tok piksa i kamapim klia olsem yumi mas holimpas tok i tru bilong God, em Baibel, olsem yumi pasim let long skin bilong yumi. Yumi mas tingim gut as bilong ol tok bilong Baibel. Dispela bai lukautim yumi na bai ol tok giaman na trik i no ken paulim tingting bilong yumi. Na tu ol tok i kamap long maus bilong Jehova bai helpim na strongim yumi long spirit, na strongim yumi long stap gut long Jehova.
“Pasim stretpela pasin olsem siot kapa i karamapim bros bilong yupela.” (Efesus 6:14b) Siot kapa bilong soldia i lukautim gut wanpela bikpela samting—em klok bilong bel. Long dispela klos pait God i givim long yumi, stretpela pasin i lukautim bel bilong yumi. Long Baibel, bel bilong yumi i makim olgeta tingting na laik i stap insait long bel bilong yumi. Baibel i tok tu, bel bilong ol man i save tingting oltaim long mekim pasin nogut, olsem na i bikpela samting long yumi mas kamapim strongpela laik long bel long holimpas stretpela pasin bilong Jehova. (Jeremaia 17:9) Pasin bilong harim tok bilong God i no bilong skin tasol. Dispela pasin i mas stap long bel—bel i mas kirapim yumi long harim tok bilong God. Bilong mekim olsem yumi mas lain long laikim tru stretpela pasin, na nolaik tru long pasin nogut. (Buk Song 45:7) Long dispela rot bai yumi was gut long bel bilong yumi.
“Na yupela i mas redi long autim gutnius bilong God i laik wanbel wantaim ol manmeri, na putim dispela pasin olsem su bilong yupela.” (Efesus 6:15) Olsem wanem? Yu putim kain su olsem? Oltaim lek bilong yu i save kisim yu i go autim gutnius? Olsem wanem? Yu wok strong long mekim gut moa wok bilong yu long autim tok na lainim ol man? Tru, long sampela teritori ol man i no laik harim. Ating sampela ol i les long harim, o ol i birua long tok i tru. O taim yumi autim tok, ating ol man i mekim nogut long yumi. Tasol sapos ol Kristen i holim strong pasin bilong autim tok, dispela bai helpim ol long lain long pasin bilong sanap strong, em dispela pasin i helpim yumi long sakim ol trik na giaman bilong Satan. Pol i bin wok strong long autim tok maski ol man i bin mekim nogut long em, na dispela i strongim yumi long “bihainim pasin bilong [em] na wokabaut, olsem [em i] save bihainim pasin bilong Krais na wokabaut.”—1 Korin 11:1.
Sapos yumi autim tok long Kingdom long olgeta taim dispela bai strongim bilip bilong yumi long gutnius bilong Kingdom. Na tu, taim yumi autim tok, spirit bilong Jehova inap mekim wok long rot bilong yumi bilong inapim laik bilong Em. Dispela kain wok i mekim na yumi kamap wanwok bilong ol ensel na God Jehova yet. (1 Korin 3:9; Kamapim Tok Hait 14:6) Na sapos yumi “wok strong long mekim wok bilong Bikpela,” dispela i mekim na yumi “stap strong, na i no ken surik liklik.” (1 Korin 15:58) Tru tumas, dispela inap lukautim gut yumi!
“Kisim tu pasin bilong bilip, na holim strong olsem hap plang.” (Efesus 6:16) Soldia bilong bipo i holim wanpela bikpela hap plang bilong lukautim em yet long ol spia samting. Sapos em i no mekim wok long plang, bai em i kisim bagarap o i dai. Tasol ol spia samting ol Kristen i mas abrusim ol i moa nogut—em “olgeta spia paia” bilong dispela man nogut Satan. Ol dispela samting em olgeta samting Satan i mekim wok long en bilong bagarapim bilip bilong yumi, na bai yumi no strong moa long spirit na i olsem yumi dai. Ol dispela samting bilong bagarapim yumi em olsem: Ol man i mekim nogut long yumi, na ol tok giaman, na ol tingting bilong dispela graun i laik paulim yumi, na ol samting bilong pulim yumi long laikim tumas mani kago, na ol samting i laik pulim yumi long mekim pasin pamuk. Bilong helpim yumi bambai ol dispela samting i no ken pundaunim yumi, yumi mas i gat bikpela hap plang bilong haitim olgeta hap skin bilong yumi.
Abraham na meri bilong em Sara i gat strongpela bilip. Taim tupela i lapun na God i tok promis long tupela bai kamapim wanpela pikinini, tupela i bilipim dispela tok promis. Bihain Abraham i kamapim klia olsem em i gat bikpela bilip tru. Em wantaim Sara i gat wanpela pikinini tasol, em Aisak, tasol taim God i tokim Abraham long kilim i dai Aisak olsem ofa, Abraham i redi long bihainim tok bilong God. Jehova i pasim Abraham long mekim na em i givim wanpela sipsip man olsem senis bilong Aisak. Tasol Abraham i redi long bihainim tok bilong Jehova. Bilong wanem em i redi long mekim olsem? Long wanem em i bilip tru olsem Jehova inap kirapim bek pikinini bilong em na Jehova bai truim ol tok promis em i bin mekim long pikinini.—Rom 4:16-21; Hibru 11:11, 12, 17-19.
Moses tu i gat bikpela bilip, em dispela kain bilip yumi mas kisim. Em i sakim olgeta mani na bilas samting bilong Isip; em i ting i gutpela moa em i mas kisim hevi wantaim lain bilong God. Bilong wanem em i ting olsem? Long wanem em i bilip olsem Jehova i stap na em bai kisim bek lain Israel. Moses em i gat strongpela bilip tru, olsem na em “i mekim wankain pasin olsem man i bin lukim God, na em i stap strong tru.”—Hibru 11:6, 24-27.
Yumi gat strongpela bilip olsem long Jehova? Olsem wanem? Yumi pas tru wantaim Jehova na i olsem yumi inap lukim em? Yumi redi long lusim olgeta samting bilong yumi na karim olgeta hevi bambai yumi inap i stap pren bilong Jehova? Yumi bilip tru long Jehova? (Hibru 11:1) Sapos yumi bilip tru long Jehova bai i olsem yumi holim bikpela hap plang na ol spia paia bilong Satan i no inap bagarapim yumi.
“Yupela i mas tingting long God i kisim bek yupela pinis, na dispela tingting i mas i stap olsem hat kapa yupela i putim.” (Efesus 6:17a) Hat kapa bilong soldia i lukautim het na kru bilong em—kru em i hap bilong skin i kisim save na tingting na i bosim wok bilong ol narapela hap bilong skin. Kristen i bilip na wetim God i kisim bek em na Baibel i tok, dispela i olsem em i pasim hat kapa, long wanem, dispela bilip i lukautim tingting bilong em. Kristen i kisim stretpela save na dispela i mekim tingting bilong em i kamap nupela, tasol sin i stap yet long skin bilong dispela Kristen na em i no gat strong. (Rom 7:18; 12:2) Ol tingting doti bilong dispela graun em inap bagarapim bilip, sapos yumi larim dispela i go insait long tingting bilong yumi, orait bai yumi no bilip strong moa olsem God bai kisim bek yumi, na ating bai bilip bilong yumi i bagarap olgeta. Tasol sapos long olgeta taim yumi larim ol tok bilong God i save strongim bilip i go insait long tingting bilong yumi, bai bilip bilong yumi i stap strong. Olsem wanem? Yu pasim gut dispela hat kapa?
“Na yupela i mas holim bainat bilong Holi Spirit, em tok bilong God.” (Efesus 6:17b) Long pait Kristen, yumi no ken wok tasol long sakim ol samting i laik bagarapim yumi; yumi mas mekim pait tu. Yumi autim gutnius, olsem pasim su, na yumi raun autim tok namel long ol man i no bilip, tasol i no olsem yumi no gat samting bilong pait. Baibel, em Tok bilong God, em i olsem wanpela strongpela bainat bilong daunim ol bilip giaman na tingting giaman na bilong helpim ol man i gat gutpela bel long kisim pasin bilong i stap fri long samting bilong spirit.—Jon 8:31, 32.
Jisas i kamapim strong bilong dispela bainat taim em i wok long sakim Satan. Taim Jisas i stap long ples nating na Satan i traim em, 3-pela taim em i kamapim sampela tok bilong Baibel na sakim gut Satan. Em i tok: “Buk bilong God i gat tok olsem.” (Matyu 4:1-11) Sapos yumi lain long mekim gutpela wok olsem long dispela bainat, bai yumi inap helpim ol man i gat pasin daun long lusim strong bilong Satan. Na tu, ol elda long kongrigesen i mekim wok long Baibel bilong lukautim ol sipsip, na bai ol man i laik bagarapim bilip bilong ol sipsip i no strong ol i no inap mekim.—Aposel 20:28-30.
Soldia i mas wok strong bambai em inap lain gut long mekim wok long bainat. Em i mas lain na givim bel long mekim mekim wok long en inap longpela taim, na bai em inap mekim gut wok long bainat. Na i wankain long pait bilong spirit—yumi mas stadi gut long Baibel na mekim mekim wok long en long autim tok, na bai yumi lain long mekim gutpela wok long dispela Tok bilong God. Tru tumas, yumi mas wok strong long kamap man i save tru long mekim wok long bainat bilong spirit, na bai yumi inap “autim stret tok tru bilong God.”—2 Timoti 2:15.
Beten Oltaim na Sanap Strong
Sapos yumi laik stap gut long God yumi mas pasim olgeta wan wan klos pait. Tasol yumi ken mekim wanem na bai yumi no lusim wanpela bilong ol dispela klos pait? Yumi mas stadi long Baibel long olgeta taim, na redim ol tok bilong ol miting paslain long taim bilong miting, na harim gut ol tok na bekim tok long miting. Dispela bai helpim yumi long pasim olgeta klos pait na i no ken lusim wanpela. (2 Timoti 3:16; Hibru 10:24, 25) Sapos yumi wok strong long autim tok long olgeta taim na yumi bung wantaim ol Kristen, dispela bai helpim yumi long lukautim gut dispela klos pait.—Sindaun 13:20; Rom 15:15, 16; 1 Korin 15:33.
Na yumi mas kisim stretpela tingting tu—em bikpela samting. Yumi no ken aigris long ol samting bilong dispela graun na bai dispela i pulim nabaut tingting bilong yumi. ‘Ai bilong yumi i mas gutpela.’ (Matyu 6:19-24) Yumi mas bihainim pasin bilong Jisas na lain long laikim tumas stretpela pasin na nolaik tru long pasin nogut. (Hibru 1:9) Olgeta dispela samting i helpim yumi long pasim klos pait God i givim long yumi na i no ken lusim wanpela.
Pol i stori long olgeta wan wan klos pait, na bihain em i tok: “Long strong bilong Holi Spirit yupela i mas prea oltaim. Yupela i mas strong long mekim ol kain kain beten na askim God long helpim yupela. Oltaim yupela i mas was gut. Yupela i no ken malolo. Oltaim yupela i mas prea na askim God long helpim olgeta manmeri bilong en.” (Efesus 6:18) Ol gutpela soldia i save toktok wantaim ol lain i stap long hetkota bilong ami na ol i save bihainim tok. Yumi ol soldia Kristen, oltaim yumi mas toktok wantaim King bilong yumi, em God Jehova, long rot bilong “bikman” em i makim bilong bosim ol manmeri, em Krais Jisas. (Aisaia 55:4) Bilong mekim olsem, yumi no ken beten nating—yumi mas givim bel long beten askim God long helpim yumi, na dispela bai kamapim klia olsem yumi pas gut wantaim Jehova na givim bel tru long em. Sapos long olgeta taim yumi beten toktok wantaim Jehova, bai yumi kisim strong long olgeta de bilong strongim yumi long mekim pait.
Jisas i tok: “Mi winim pinis strong bilong dispela graun.” (Jon 16:33) Jehova i laik bai yumi tu mas winim strong bilong dispela graun. Paslain liklik long taim aposel Pol i dai, em inap tok: “Mi bin ran strong long gutpela resis bilong laip. Nau mi kamap pinis long mak, na mi bin holimpas bilip bilong mi long God.” (2 Timoti 4:7) Gutpela sapos yumi tu inap mekim kain tok olsem. Sapos yumi laik tru bai yumi inap mekim kain tok olsem, orait yumi mas “sanap strong na sakim olgeta kain pasin bilong trik na giaman Satan i save hait na mekim.” Bilong mekim olsem, yumi mas pasim olgeta klos pait God i save givim long yumi na i no ken lusim wanpela.—Efesus 6:11.