Askim

Efesus 3:​14, 15 i tok, God “i givim nem” long olgeta lain long heven na long graun. Olsem wanem? I gat ol lain long heven olsem famili famili? Na Jehova i bin givim nem long olgeta wan wan famili long graun?

I no gat ol famili long heven olsem i stap long graun, olsem papa na mama na pikinini. (Luk 24:39; 1 Korin 15:50) Jisas i kamapim klia olsem ol ensel i no save marit, na i no gat wanpela samting i makim olsem ol inap kamapim pikinini.​—⁠Matyu 22:30.

Tasol Baibel i tok piksa olsem God Jehova i marit, na oganaisesen bilong em long heven i olsem meri bilong em long spirit. (Aisaia 54:⁠5) Dispela oganaisesen long heven i kamapim ol pikinini, olsem ol ensel. (Jop 1:6; 2:1; 38:​4-7) Olsem na yumi ken tok, i olsem i gat wanpela gutpela famili spirit i stap long heven.

Na long tok piksa i olsem i gat narapela nupela famili i wok long kamap long heven, em Krais Jisas wantaim meri bilong em, em kongrigesen bilong 144,000. (2 Korin 11:⁠2) Planti bilong dispela lain em God i bin makim ol, ol i dai pinis, na ol i bilong i stap long heven. Sampela i stap yet long graun. Olgeta i wetim tru taim “bilong Pikinini Sipsip i marit” long heven. Baibel i tok, dispela marit bai kamap long taim bilong dispela bikpela hevi tru i kam klostu pinis​—⁠em dispela taim Bikpela Babilon bai i bagarap, na bihain olgeta samting Satan i bosim bai i pinis.​—⁠KTH 18:​2-5; 19:​2, 7, 11-21; Matyu 24:⁠21.

Tok bilong aposel Pol long Efesus 3:15 i no makim olsem Jehova i givim nem long olgeta wan wan famili long graun. Nogat. Dispela tok “lain” i makim lain wanblut i gat ol famili famili bilong en na nem bilong tumbuna bilong dispela lain i stap long ol. Olsem long taim bilong Josua. Josua 7:​16-19 i tok, Jehova i laik kamapim sin bilong Akan. Em i makim lain bilong Juda pastaim olsem em asua bilong ol. Bihain em i makim lain bilong Sera. Bihain tru em i kamapim klia olsem famili bilong Akan i gat asua. Akan wantaim meri pikinini bilong em ol i lain wanblut (o, famili) bilong Sapdi, em tumbuna papa bilong Akan. Na famili bilong Sapdi i lain wanblut i holim nem bilong tumbuna bilong ol, em Sera.

Long ol Hibru, lain famili i bikpela samting tru, na Baibel i kolim lista bilong planti man. God i wokim rot bilong helpim ol lain famili na ol i no ken lus, na sapos wanpela man i dai na em i no gat pikinini man, brata bilong em i mas maritim meri bilong em na kamapim pikinini, na bai nem bilong dispela man i no ken lus.​—⁠Stat 38:​8, 9; Lo 25:​5, 6.

Tingim narapela bikpela lain famili, em bilong Jisas, pikinini bilong Devit. Yumi save, Jisas i no pikinini tru bilong King Devit, long wanem, mama i karim em sampela handet yia bihain long Devit i dai. Tasol wanpela samting bilong makim stret Mesaia, em olsem: Em i mas kamap long lain bilong Devit, na ol Juda i save long dispela. (Matyu 22:42) Jisas em i kamap long lain bilong Devit long rot bilong mama na waspapa bilong em.​—⁠Matyu 1:1; Luk 2:⁠4.

Tasol olsem wanem ol dispela famili i bin kisim nem bilong ol long Jehova? I gat wan wan taim na Jehova i bin givim nem long het bilong wanpela famili, olsem em i bin mekim long Abraham na Aisak. (Stat 17:​5, 19) Tasol Jehova i no mekim olsem long olgeta lain. Em i no save givim nem long olgeta wan wan famili bilong ol i ken givim dispela nem long ol pikinini bilong ol.

Tasol Jehova i As bilong olgeta lain taim em i tokim Adam na Iv long “kamap planti na i go sindaun long olgeta hap bilong graun.” (Stat 1:28) Na Jehova i larim sinman Adam na Iv long kamapim pikinini, na long dispela rot olgeta famili long graun i kamap. (Stat 5:⁠3) Olsem na yumi ken tok, i olsem God em i Man bilong givim nem long olgeta lain.

Planti lain long nau, ol i no ting em bikpela samting long holim nem bilong tumbuna bilong lain bilong ol na i no ken lus. Tasol ol Kristen long olgeta kantri i save tenkyu long Jehova long em i bin kamapim famili, na ol i givim biknem long em taim ol i wok strong long helpim famili bilong ol yet long pas gut wantaim.