Lukluk i Go Long Prais
“Mi save ran strong bilong kamap long mak na kisim prais.”—FL. 3:14.
1. Aposel Pol inap kisim wanem prais?
APOSEL Pol, em ol i save kolim em tu olsem Sol bilong Tarsus, em i kam long wanpela famili i gat nem. Wanpela tisa bilong Lo i gat nem, em Gamaliel, i bin skulim Pol long lotu bilong ol tumbuna bilong em. (Ap. 22:3) Pol inap kamap bikman, tasol em i lusim lotu bilong em na kamap wanpela Kristen. Em i lukluk i go long prais bilong kisim laip oltaim em God i laik givim long em—em inap kamap king na pris bilong i stap oltaim oltaim insait long Kingdom Bilong God long heven. Dispela Kingdom bai bosim graun i kamap wanpela paradais.—Mt. 6:10; KTH 7:4; 20:6.
2, 3. Pol i ting olsem wanem long prais bilong kisim laip long heven?
2 Pol i tingim tru dispela prais, olsem na em i tok: “Ol samting i bilong helpim mi, mi redi long lusim bilong bihainim Krais. Yes, mi tingim olgeta samting i olsem samting nating, na as bilong dispela em nambawan gutpela save long Krais Jisas, Bikpela bilong mi. Long em tasol, mi orait long olgeta samting i lus na mi tingim ol olsem pipia nating.” (Fl. 3:7, 8, NW ) Taim Pol i kisim save long ol samting Jehova i tingting pinis long mekim bilong helpim ol man, em i ting namba, mani kago, wok mani, na biknem, ol i olsem pipia nating em ol samting planti man i ting i bikpela samting.
3 Kirap long dispela taim na i kam, nambawan bikpela samting long Pol em save em inap kisim long Jehova na Krais, em Jisas i tok long dispela samting taim em i beten long God olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jo. 17:3) Bikpela laik bilong Pol long kisim laip oltaim i kamap ples klia long tok em i mekim long Filipai 3:14: “Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em.” Yes, em i lukluk i go long prais bilong kisim laip oltaim long heven insait long Kingdom Bilong God.
Stap Oltaim Long Graun
4, 5. Planti milion man husat i mekim laik bilong God long nau, ol inap kisim wanem prais?
4 Ol man i laik mekim laik bilong God, prais em planti bilong ol i wok strong long kisim, em laip oltaim long nupela taim God bai kamapim. (Sng. 37:11, 29) Jisas i kamapim klia olsem ol man inap kisim dispela kain laip. Em i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Mt. 5:5) Jisas yet em i nambawan man bilong kisim graun, olsem Buk Song 2:8 i kamapim, na 144,000 manmeri bai i wok king wantaim em long heven. (Dan. 7:13, 14, 22, 27) Ol arapela sipsip bai i “kisim” dispela graun aninit long Kingdom em ‘Papa i bin redim na makim bilong ol pinis, long taim graun i kamap nupela yet.’ (Mt. 25:34, 46) Na dispela samting bai kamap tru, long wanem, God husat i tok promis long en, “em i no save giaman.” (Ta. 1:2) Yumi ken bilip olsem ol tok promis bilong God bai kamap tru, wankain olsem Josua i bin bilip long en taim em i tokim lain Israel: “Olgeta samting em i bin promis long mekim, ol i kamap pinis, na i no gat wanpela promis i popaia.”—Jos. 23:14.
5 Laip long nupela taim God bai kamapim bai i no wankain olsem laip long nau em planti man i bel hevi long en. Em bai narapela kain tru: bai i no gat woa, pasin raskol, stap rabis, pasin i no stret, sik, na indai. Ol man bai i gat strongpela skin na ol bai stap long graun i bin kamap wanpela paradais. Dispela kain laip bai givim bikpela amamas tru long yumi, winim ol samting yumi driman long en. Yes, long dispela taim olgeta wan wan de bai i gutpela tru. Em wanpela gutpela prais tru, a?
6, 7. (a) Olsem wanem Jisas i kamapim klia ol samting bai kamap long nupela taim God bai kamapim? (b) Olsem wanem ol man i dai pinis bai statim nupela laip?
6 Taim Jisas i stap long graun, em i kisim strong long holi spirit bilong God long kamapim klia ol gutpela samting bai kamap long olgeta hap bilong graun long nupela taim. Olsem, wanpela man husat i bin paralais inap 38 yia, Jisas i tokim em long wokabaut. Baibel i tok dispela man i mekim olsem. (Ritim Jon 5:5-9.) Narapela taim, Jisas i bungim ‘wanpela man i aipas pinis taim mama i karim em’ na em i oraitim em. Bihain, ol man i askim dispela man bipo em i aipas long husat i bin oraitim em, na em i tok: “Long bipo tru na i kam inap nau i no gat stori bilong wanpela man em i stap aipas long taim mama i karim em, na bihain wanpela man i opim ai bilong em. Sapos God i no bin salim dispela man i kam, orait em i no inap mekim wanpela samting.” (Jo. 9:1, 6, 7, 32, 33) Jisas inap mekim olgeta dispela samting, long wanem, God i givim strong long em. Long olgeta hap Jisas i go long en, em “i mekim orait ol manmeri i gat sik.”—Lu. 9:11.
7 Jisas inap oraitim ol sikman na ol man skin bilong ol i bagarap, na tu, em inap kirapim bek ol man i dai pinis. Olsem, wanpela liklik meri i gat 12-pela krismas i dai, na papamama bilong em i bel hevi tru. Tasol Jisas i tok: “Liklik meri, mi tokim yu, yu kirap.” Na liklik meri i kirap! Yu inap pilim tingting bilong papamama na ol narapela i stap long haus? (Ritim Mak 5:38-42) Long nupela taim God bai kamapim, ol man bai amamas nogut tru taim planti bilion manmeri i kirap bek. Baibel i tok: “God bai i kirapim bek ol man i dai pinis, em ol stretpela man na ol man nogut wantaim.” (Ap. 24:15; Jo. 5:28, 29) Ol dispela lain bai statim nupela laip na ol inap wet long kisim laip i stap gut oltaim oltaim.
8, 9. (a) Long Taim Bilong Wan Tausen Yia Bilong Krais i Stap King, wanem samting bai kamap long sin yumi bin kisim long Adam? (b) God bai kotim ol man i dai pinis long wanem samting?
8 Ol man i kirap bek ol i gat rot bilong kisim laip. God bai i no kotim ol long ol samting ol i bin mekim paslain long ol i dai. Nogat. (Ro. 6:7) Insait long Taim Bilong Wan Tausen Yia Bilong Krais i Stap King, taim ofa bilong baim bek ol man i wok long helpim ol man, ol man i bihainim tok na i stap aninit long Kingdom ol bai kamap gutpela olgeta, na ol samting nogut em sin bilong Adam i save kamapim bai pinis. (Ro. 8:21) Jehova ‘bai i pinisim dai tru. God, Bikpela bai i pinisim krai bilong ol olgeta.’ (Ais. 25:8) Baibel i tok tu olsem ‘ol i opim ol buk,’ dispela i makim olsem ol man i stap long dispela taim, ol bai kisim sampela nupela tok. (KTH 20:12) Taim graun i wok long kamap wanpela paradais, ‘ol manmeri bilong graun bai skul long stretpela pasin.’—Ais. 26:9.
9 Ol man i kirap bek, God bai i no kotim ol long sin ol i bin kisim long Adam, nogat, em bai kotim ol long ol pasin ol yet i makim bilong bihainim. Kamapim Tok Hait 20:12 i tok: ‘Ol i opim ol buk i gat tok long pasin ol dispela manmeri i bin mekim. Na man i sindaun long sia king i lukim tok i stap long dispela buk, na em i skelim pasin bilong ol manmeri i dai pinis,’ em ol pasin ol i mekim bihain long taim ol i kirap bek. Dispela i kamapim klia tru pasin marimari, pasin laikim, na stretpela pasin bilong Jehova! Na tu, “ol man bai i no inap tingim moa” ol samting nogut i bin painim ol long dispela taim nau. (Ais. 65:17) Ol bai kisim ol nupela tok bilong strongim bel na laip bai pulap long ol gutpela samting tasol, olsem na ol bai i no bel hevi moa long ol samting nogut bilong bipo. Ol bai lusim tingting olgeta long ol dispela samting. (KTH 21:4) Wankain samting bai painim “planti manmeri tru” em ol bai abrusim bagarap long Armagedon.—KTH 7:9, 10, 14.
10. (a) Laip bilong ol man bai wanem kain long nupela taim God bai kamapim? (b) Yu ken mekim wanem bilong helpim yu yet long lukluk i go long prais?
10 Long nupela taim God bai kamapim, ol man bai i no kisim sik o dai moa. ‘I no gat man bai i tok olsem, “Mi gat sik.” ’ (Ais. 33:24) Bihain, taim ol manmeri bilong nupela taim i kirap long olgeta moning na helt bilong ol i gutpela tru, ol bai amamas long mekim ol gutpela wok na bung wantaim ol arapela husat i save tingim ol tru. Kain laip olsem em i gutpela prais tru! Gutpela sapos yu opim Baibel bilong yu long ol tok profet i stap long Aisaia 33:24 na 35:5-7. Traim long piksaim yu yet long dispela hap. Dispela bai helpim yu long lukluk i go long prais.
Sampela i No Lukluk Moa Long Prais
11. Stori long gutpela kirap bilong wok king bilong Solomon.
11 Taim yumi kisim save pinis long dispela prais, yumi mas wok strong long lukluk i go long en, long wanem, sapos yumi no mekim olsem bai yumi no tingim moa dispela prais. Olsem, taim Solomon i kamap king long Israel bilong bipo, long pasin daun em i beten askim God long givim em gutpela tingting na save bambai em i ken bosim lain bilong Em long stretpela pasin. (Ritim 1 King 3:6-12.) Na Baibel i tok “God i givim planti gutpela tingting na save long Solomon.” Tru tumas, “gutpela tingting na save bilong en i winim save bilong ol saveman bilong hap sankamap na bilong ol saveman bilong Isip.”—1 Kin. 4:29-32.
12. Jehova i givim wanem tok lukaut long ol man i kamap king long Israel?
12 Tasol pastaim Jehova i bin givim tok lukaut olsem man i kamap king em “i no ken kisim planti hos bilong ami bilong en” na “i tambu long king i maritim planti meri, long wanem, ol bai i mekim em i givim baksait long Bikpela.” (Lo 17:14-17) Sapos king i kisim planti hos, dispela bai soim olsem em i bilip long ami bilong em long lukautim lain Israel, na em i no wetim Jehova long helpim ol, em Man Bilong Sambai long ol. Na sapos em i maritim planti meri, dispela inap kamapim bikpela hevi, long wanem, ating sampela bilong ol i bilong ol lain haiden i insait long lotu giaman, na ol dispela meri inap pulim king na em i lusim lotu tru bilong Jehova.
13. Wanem samting i mekim na Solomon i no tingim moa ol samting em i bin kisim?
13 Solomon i no bihainim ol dispela tok lukaut. Nogat. Em i mekim ol samting em Jehova i bin tok long ol king i no ken mekim. Em i kisim planti tausen hos na ol soldia i sindaun long hos. (1 Kin. 4:26) Em i kisim tu 700 meri na 300 namba tu lain meri, planti bilong ol i bilong ol lain haiden i stap klostu. Ol i ‘pulim tingting bilong en i go long ol giaman god. Olsem na Solomon i no bihainim tru God, Bikpela bilong en.’ Solomon i insait long lotu giaman bilong ol haiden em ol meri bilong em i save bihainim. Olsem na Jehova i tok em bai “rausim [Solomon] long wok king” bilong em.—1 Kin. 11:1-6, 11.
14. Solomon na lain Israel i no bihainim tok, na dispela i kamapim wanem samting?
14 Solomon i no tingim moa gutpela wok bilong em olsem mausman bilong trupela God. Dispela king i givim bel tru long lotu giaman. Bihain, lain Israel olgeta i tromoi lotu i tru na ol i bagarap long 607 B.C.E. Maski bihain ol Juda i kirapim gen lotu i tru, sampela handet yia bihain Jisas i tokaut olsem: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” Dispela samting i kamap tru. Jisas i tok: “Harim. Nau ples bilong yupela bai i bagarap na i stap nating.” (Mt. 21:43; 23:37, 38) Dispela pasin bilong lusim lotu i tru i mekim na lain Israel i no stap moa olsem lain bilong trupela God. Long 70 C.E., lain ami bilong Rom i bagarapim Jerusalem na tempel bilong en, na planti Juda i kamap wokboi nating.
15. Stori long sampela man husat i no tingim moa wanem samting i bikpela samting tru.
15 Judas Iskariot em wanpela bilong 12-pela aposel bilong Jisas. Judas i harim ol gutpela tok Jisas i lainim ol man long en na lukim ol mirakel em i wokim long strong bilong holi spirit bilong God. Tasol Judas i no was gut long bel bilong em. Em i gat wok bilong lukautim bokis mani bilong Jisas na 12-pela aposel. Tasol ‘em i stilman, na em i save stilim mani ol i putim long bokis.’ (Jo. 12:6) Pasin mangal bilong em i go bikpela taim em i wokim plen wantaim ol bikpris long givim Jisas long han bilong ol birua. Em i kisim 30 mani silva long dispela wok. (Mt. 26:14-16) Narapela husat i no bin tingim moa ol bikpela samting em Demas, husat i bin poromanim aposel Pol. Demas i no was gut long bel bilong em. Pol i tok: “Demas em i lusim mi pinis. Em i laikim tumas ol pasin bilong dispela graun.”—2 Ti. 4:10; ritim Sindaun 4:23.
Skul Yumi Olgeta Wan Wan i Kisim
16, 17. (a) Birua bilong yumi i strong olsem wanem? (b) Wanem samting inap helpim yumi long sakim ol samting Satan i mekim bilong birua long yumi?
16 Olgeta wokboi bilong God i mas tingim tru stori bilong ol man long Baibel. Baibel i tok: “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis.” (1 Ko. 10:11) Long nau, yumi stap long taim bilong las de bilong pasin nogut bilong dispela graun.—2 Ti. 3:1, 13.
17 Satan “em giaman god bilong dispela graun,” em i save olsem “em i gat sotpela taim tasol bilong i stap.” (2 Ko. 4:4; KTH 12:12) Em bai mekim olgeta samting em inap mekim bilong pulim ol wokboi bilong Jehova long brukim ol stiatok Kristen. Satan i bosim dispela graun na ol rot bilong en long kamapim ol tok bilong grisim ol man. Tasol lain bilong Jehova i gat samting i strong moa—“em i strong bilong God.” (2 Ko. 4:7) Yumi inap bilip long dispela strong i kam long God long helpim yumi long sakim olgeta samting Satan i mekim bilong birua long yumi. Olsem na yumi mas beten oltaim, na bilip olsem Jehova bai “givim Holi Spirit long ol man i askim em.”—Lu. 11:13.
18. Yumi mas i gat wanem tingting long ol samting bilong dispela graun?
18 Yumi save olsem klostu nau graun olgeta bilong Satan bai pinis na ol Kristen tru bai abrusim bagarap, dispela save i strongim bel bilong yumi. Baibel i tok: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jo. 2:17) Olsem na em i no savepasin long wanpela wokboi bilong God i ting olsem i gat sampela gutpela samting long dispela graun i winim pasin bilong em long pas gut wantaim Jehova! Dispela graun bilong Satan bai pinis, tasol Jehova i bin givim yumi kongrigesen Kristen em dispela inap lukautim ol gutpela wokboi bilong em. Taim nupela taim i wok long i kam klostu, ol wokboi bilong God inap bilip tru long dispela tok promis: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.” (Sng. 37:9) Olsem na lukluk i go long dispela gutpela prais!
Yu Inap Tingim?
• Pol i ting olsem wanem long prais em inap kisim?
• Ol man husat bai kisim laip oltaim long graun, God bai skelim ol long wanem samting?
• Em i savepasin long yu bihainim wanem rot long nau?
[Piksa long pes 12, 13]
Taim yu ritim Baibel, yu save piksaim long tingting olsem yu kisim prais pinis?