Amamas Long Jehova!
“Oltaim yupela i mas amamas long Bikpela. Mi tok gen, yupela i mas amamas.”—FILIPAI 4:4.
LONG nau i no gat planti samting ol man i ken amamas long en. Hevi i save painim ol man bilong graun, na ol Kristen tru, na mekim ol i bel hevi. Sampela hevi em olsem: no gat wok, sik, wanpela insait long famili i dai, ol i kros long pasin bilong narapela, famili i no bilip o ol pren bilong bipo i birua long ol. Olsem na wanem insait bilong tok bilong Pol, em i tok: “Oltaim yupela i mas amamas”? Planti hevi na samting nogut i save painim yumi olgeta, olsem na ating yumi no inap amamas oltaim, a? Sapos yumi skelim ol ves i stap klostu long dispela tok, bai yumi inap kisim gut dispela tok.
Amamas—Bilong Wanem? na Olsem Wanem?
2 “Oltaim yupela i mas amamas long Bikpela. Mi tok gen, yupela i mas amamas.” Yumi inap tingim wankain tok ol i bin givim long ol Israel inap 2,400 yia bipo, olsem: “Yupela i mas amamas long Bikpela na bai em i strongim yupela.” (Nehemia 8:10) Sapos yumi stap amamas, dispela i strongim yumi; amamas i olsem strongpela haus yumi ken ran i go long en na i stap gut. Jisas em i gutpela man olgeta tasol amamas i bin helpim em long sanap strong. Em i tingting long amamas em bai kisim bihain na “em i stap strong, na em i karim pen na i dai . . . Na nau em i sindaun long han sut bilong sia king bilong God.” (Hibru 12:2) Tru tumas, taim hevi i painim yumi, sapos yumi inap amamas, dispela em i bikpela samting bilong helpim yumi long i stap strong na kisim laip.
3 Ol Israel i laik go insait long Graun Bilong Promis na Moses i tokim ol: “Yupela i mas amamas long olgeta gutpela samting God, Bikpela bilong yumi, i givim pinis long yupela.” Sapos ol i no amamas long lotuim Jehova, samting nogut bai painim ol. “Olgeta kain hevi na bagarap bai i kamap long yupela, inap yupela i pinis olgeta. Long wanem, . . . God, Bikpela bilong yumi, i givim yupela planti gutpela samting, tasol yupela i no laik amamas na belgut na mekim wok bilong em.”—Lo 26:11; 28:45-47.
4 Olsem na long nau lain remnan wantaim “ol arapela sipsip” ol i mas amamas! (Jon 10:16) Pol i tok, yumi mas amamas, na em i “tok gen” olsem, na dispela i kamapim klia olsem, i bikpela samting yumi mas amamas long ol gutpela samting Jehova i givim long yumi. Olsem wanem? Yumi save amamas olsem? O yumi gat planti wok long olgeta de na sampela taim yumi lusim tingting long ol planti samting yumi ken amamas long en? Olsem wanem? Ol hevi i kamap planti na pasim tingting bilong yumi na yumi no tingim moa Kingdom na ol blesing bilong en? O yumi mekim sampela samting i no stret—olsem brukim lo bilong God, givim baksait long tok bilong em, les long mekim ol wok Kristen—na dispela i mekim na yumi no amamas?
5 “Yupela i mas isi isi long olgeta man na larim ol i lukim dispela gutpela pasin bilong yupela. Tingim. Klostu nau Bikpela bai i kam.” (Filipai 4:5) Man i no save isi long narapela man, em i no gat stretpela tingting. No gat as, tasol em i tingting planti oltaim na putim hevi nating long skin bilong em. Ating em i no lain long skelim gut samting em i no inap mekim, na bai em i stap isi. Em i putim mak i antap tumas na em i hatwok long winim. O em i painim rot bilong slek long wok na em i tok em i no inap mekim. Em nau em i no tingting stret; em i no isi, na em i no stap amamas.
6 Maski ol birua i ting yumi olsem longlong man, ol brata Kristen i mas lukim olsem yumi save isi long narapela man. Ol inap lukim olsem taim yumi bihainim stretpela tingting na yumi no ting yumi yet o ol narapela man i mas mekim ol samting i kamap stret olgeta. Yumi no ken putim hevi long ol, olsem putim mak i antap tumas, winim mak Baibel i putim. Aposel Pol i tok: “Mi no tok olsem mipela i bosim bilip bilong yupela. Nogat. . . . Mipela i save wok wantaim bilong kamapim amamas bilong yupela.” (2 Korin 1:24) Bipo Pol em i wanpela Farisi na em i save gut, taim ol man i gat namba i putim ol strongpela lo, dispela i save pinisim amamas, tasol sapos ol wanwok i givim gutpela tingting long man, bai em i amamas moa. “Klostu nau Bikpela bai i kam” na man i save isi long narapela man em i tingim dispela samting na em i save, yumi no ken ‘skelim pasin bilong wokboi bilong narapela man. Sapos em i sanap strong, o em i pundaun, em samting bilong Bikman bilong em yet.’—Rom 14:4.
7 “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” (Filipai 4:6) Nau yumi stap long taim bilong “planti hevi nogut tru,” em Pol i tok long en. (2 Timoti 3:1-5) Olsem na ol Kristen i mas save, hevi inap painim ol. Tru, Pol i tok yumi mas ‘amamas oltaim,’ tasol i no olsem bel bilong gutpela Kristen i no ken hevi liklik long sampela taim. Olsem Pol yet i tok: “Ol kain kain hevi i save kamap long mipela, tasol ol i no pinisim tru strong bilong mipela. . . . Ol man i save mekim nogut long mipela, tasol God i no save lusim mipela.” (2 Korin 4:8, 9) Maski Kristen i tingting planti o bel hevi inap liklik taim, bihain bai amamas bilong em i daunim na pinisim dispela bel hevi. Amamas bilong em i givim strong long em bambai em inap wok i go, na em i no lusim tingting long ol planti samting em i ken amamas long en.
8 Taim hevi i kamap, maski em i wanem kain hevi, Kristen i stap amamas em i save mekim pasin daun na beten askim Jehova long helpim em. Em i no larim dispela hevi i bagarapim tingting bilong em olgeta. Em i mekim olgeta samting em inap mekim bilong stretim hevi na em i larim Jehova yet i makim wanem samting bai kamap, olsem Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” Na Kristen i wok yet long tok tenkyu long Jehova long olgeta gutpela samting Em i givim long em.—Song 55:22; lukim tu Matyu 6:25-34.
9 “God bai i mekim yupela i stap bel isi tru, . . . yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:7) Taim Kristen i kisim save long tok i tru bilong Baibel, ol tok giaman i no kalabusim moa tingting bilong em na em inap tingting gut. (2 Timoti 1:13) Dispela i helpim em long abrusim ol pasin i no stret na krankipasin em inap mekim na bai em i no stap gut wantaim ol narapela. Em i no save les na kros kros long ol pasin i no stret na pasin nogut em i lukim; em i wetim Jehova i stretim ol hevi long rot bilong Kingdom. Dispela kain bel isi i lukautim bel bilong em na kamapim ol gutpela laik tasol, na i stiaim tingting bilong em long bihainim stretpela pasin. Man i gat ol gutpela laik na stretpela tingting, i gat planti samting em i ken amamas long en, maski ol lain bilong dispela graun i mekim nabaut na kamapim kain kain hevi.
10 “Ol brata, . . . oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” (Filipai 4:8) Kristen i no save amamas long toktok o tingting long samting nogut, olsem na em i mas sakim planti amamas bilong dispela graun. Sapos em i pulapim ol samting nogut long tingting na long bel, olsem ol tok giaman, na tok pilai nogut, na samting i no stret, o i no klinpela, o i no gutpela, o i sting, o i nogut tru, orait em i no inap holimpas amamas Kristen. Man i pulapim ol samting i doti long tingting na long bel, em i no inap i stap amamas tru. Long dispela graun nogut bilong Satan, yumi amamas long save, i gat planti gutpela samting ol Kristen i ken tingting na toktok long en!
Planti Samting Tru Bilong Amamas Long En
11 Wanpela samting yumi ken amamas long en em lain brata bilong yumi long olgeta hap. (1 Pita 2:17) Ol man bilong dispela graun i save birua long man bilong narapela lain o skin, tasol ol manmeri bilong God i save pas gut wantaim na narapela i laikim tru narapela. Pasin wanbel bilong ol i kamap ples klia long ol kibung intenesenel bilong ol. Wanpela brata bilong Amerika i go long kibung olsem long Kiev, long Yukren, long 1993, na em i tok: “Ol i amamas na aiwara i kamap, na ai bilong ol i lait, na narapela i holim narapela olsem famili tru bilong em, na long narapela narapela hap bilong stediam ol i holim ol ambrela na hankisip i gat kala kala na mekim i go i kam bilong salim gude long ol narapela—ol dispela samting i kamapim klia gutpela pasin wanbel bilong lain bilong God. Bel bilong mipela i amamas tru taim mipela i tingim dispela mirakel Jehova i bin kamapim, em lain brata bilong olgeta hap. Mitupela meri bilong mi i pilim tru na em i strongim bilip bilong mipela.”
12 Taim ol Kristen i lukim ol tok profet bilong Baibel i kamap tru long nau, dispela i strongim bilip bilong ol! Tingim tok bilong Aisaia 60:22: “Ol lain i liklik tru bai ol i kamap planti moa . . . Mi Bikpela, mi tok, ol dispela samting bai i kamap hariap long taim mi makim pinis.” Taim Kingdom i kamap long yia 1914, i gat liklik lain ol i autim tok, inap 5,100. Tasol insait long 5-pela yia i go pinis, lain brata long olgeta hap i go bikpela tru—inap 5,628 nupela Witnes i baptais long olgeta wik! Long yia 1993, bikpela lain tru i autim tok, inap olsem 4,709,889. Olaman! “Ol lain i liklik tru” long 1914 ol i kamap planti moa!
13 Kirap long yia 1914, King Krais Jisas i bin mekim wok bos namel long ol birua. Ol manmeri bilong em i helpim wok bilong em—ol i givim taim na strong na mani bilong ol bilong helpim wok bilong autim tok long olgeta hap na wok bilong wokim ol haus brens samting. (Song 110:2, 3) Ol Witnes Bilong Jehova i amamas i gat ol kontribusen bilong inapim ol dispela wok, maski wan wan taim tasol ol i toktok long mani long miting bilong ol.a (Lukim 1 Stori 29:9.) I no gat wok long subim ol Kristen tru long givim samting; ol i amamas long helpim King bilong ol inap long skel bilong ol. Olgeta wan wan i “tingting gut pastaim” na save gut wanem samting ol i laik givim; ol man i no subim ol long givim na ol i bel hevi long mekim. Nogat.—2 Korin 9:7.
14 Lotu i tru i kamap strong gen namel long ol manmeri bilong God, olsem em i tok promis pinis, na long dispela rot paradais bilong spirit i bin kamap. Kirap long yia 1919 dispela paradais i wok long i go bikpela. (Song 14:7; Aisaia 52:9, 10) Na wanem samting i bin kamap? Ol Kristen tru “i amamas moa yet.” (Aisaia 51:11) Gutpela kaikai i kamap na dispela i makim bikpela wok spirit holi bilong God inap mekim long rot bilong ol sinman. God i mekim dispela kaikai i kamap na yumi mas litimapim nem bilong em tasol, tasol man i kamap wanwok bilong God em i kisim bikpela blesing, a? (1 Korin 3:9) Sapos i no gat narapela rot, Jehova i gat strong inap long mekim ol ston i singaut na autim tok i tru. Tasol em i no mekim olsem. Em i kirapim ol man i olsem das long mekim dispela wok, em ol i gat laik long mekim.—Luk 19:40.
15 Ol wokboi bilong Jehova i litimapim nem bilong em na tingim tru ol samting bilong nau i stret long ol bikpela tok profet bilong Baibel. Planti gavman i mekim bikpela wok bilong kamapim gutaim tasol ol i no inap, olsem na ol i askim Yunaitet Nesen long helpim ol kantri i gat bikpela hevi. (KTH 13:15-17) Tasol lain bilong God i wetim wanpela gutpela samting tru bilong amamas em bai kamap. Long olgeta de dispela i kam klostu moa. “Yumi ken belgut na amamas moa yet na litimapim nem bilong en, long wanem, taim i kamap pinis bilong Pikinini Sipsip i marit, na meri bilong en i redi i stap.”—KTH 19:7.
Autim Tok—Hevi o Amamas?
16 “Olgeta pasin mi bin skulim yupela long mekim na . . . yupela i bin lukim mi i mekim, dispela olgeta pasin yupela i mas mekim oltaim. Na God, em i as bilong pasin bilong bel isi, em bai i stap wantaim yupela.” (Filipai 4:9) Taim ol Kristen i bihainim ol tok na pasin ol i skul long en, ol i ken save God bai mekim gut long ol. Wanpela bikpela samting ol i skul long en, em olsem: Ol i mas autim tok bilong Kingdom long ol man. Husat inap i stap bel isi na amamas sapos em i pasim maus na em i no autim dispela tok ol man i gat gutpela bel i mas harim bambai ol inap kisim laip?—Esekiel 3:17-21; 1 Korin 9:16; 1 Timoti 4:16.
17 Yumi amamas taim yumi painim pinis ol man i olsem sipsip, em ol i laik save long Jehova! Sapos stretpela tingting i kirapim man long mekim wok bilong Kingdom, em bai amamas oltaim long mekim. Long wanem, nambawan as na yumi stap Witnes Bilong Jehova em bilong litimapim nem na wok King bilong em. (1 Stori 16:31) Man i pilim tru dispela samting em bai amamas, maski ol man i no tingting gut i sakim gutpela tok em i autim, em bai amamas. Em i save, wok bilong autim tok long ol man i no bilip bai pinis; tasol wok bilong litimapim nem bilong Jehova bai stap oltaim.
18 Taim ol man i bihainim lotu i tru, dispela i kirapim ol long mekim ol pasin Jehova i laikim. Ol i no mekim, long wanem, ol i mas mekim. Nogat. Ol i gat laik long mekim. (Song 40:8; Jon 4:34) Planti man i hatwok long save long dispela samting. Wanpela meri i tokim wanpela Witnes: “Mi mas litimapim nem bilong yu, long wanem, mi yet mi no laik i go long ol haus na tokim ol man long lotu bilong mi olsem yu mekim.” Pes bilong Witnes i lait na em i tok: “Mi pilim tingting bilong yu. Taim mi no kamap yet wanpela Witnes Bilong Jehova, mi no inap tru i go toktok wantaim ol man long lotu na yu no inap subim mi i go. Tasol nau mi gat laik long mekim.” Meri i tingting na em i tok: “Mi lukim olsem lotu bilong yu i gat gutpela samting, lotu bilong mi i no gat. Ating mi mas kisim save long en.”
19 Yia-teks bilong 1994 i stap ples klia long ol Haus Kingdom na i tok: “Yu mas bilip strong long [Jehova].” (Sindaun 3:5) Em nau, i gat as tru na yumi ken amamas—yumi inap bilip tru long Jehova, em i olsem strongpela haus yumi ken hait long en. Song 64:10 i tok: “Olgeta stretpela manmeri bai ol i amamas long Bikpela, na bai ol i go long em na hait long samting nogut.” Nau em i no taim bilong surik o lusim wok. Long olgeta mun yumi kam klostu moa long samting tru ol wokboi bilong Jehova i bin wetim kirap long taim bilong Abel. Nau em i taim bilong bilip strong long Jehova na givim bel olgeta long mekim, long wanem, yumi save i gat planti samting tru yumi ken amamas long en, winim olgeta taim bipo!
[Ol Futnot]
a Long ol kibung na wanpela taim long mun long ol kongrigesen, ol i kaunim liklik tokaut i makim hamas mani ol man i bin givim long laik bilong ol yet, olsem kontribusen, na hamas mani kongrigesen o kibung i bin tromoi bilong baim ol samting. Sampela taim kongrigesen o Sosaiti i salim pas bilong tokaut long wok ol i mekim long ol kontribusen. Long dispela rot olgeta i save i gat hamas mani bilong lukautim wok bilong ol Witnes Bilong Jehova long olgeta hap.
Bai Yu Bekim Olsem Wanem?
◻ Nehemia 8:10 i kolim wanem as na yumi mas amamas?
◻ Olsem wanem tok bilong Lo 26:11 na De 28:45-47 i kamapim klia olsem em bikpela samting long yumi mas amamas?
◻ Olsem wanem tok bilong Filipai 4:4-9 inap helpim yumi long amamas oltaim?
◻ Yia-teks bilong 1994 i kolim wanem samting yumi ken amamas long en?
[Askim Bilong Stadi]
1. Pol i tok ol Kristen i mas amamas oltaim, tasol olsem wanem na i hatwok long kisim gut insait bilong dispela tok?
2, 3. Ol samting i bin kamap long Jisas na ol Israel bilong bipo i makim amamas i bikpela samting olsem wanem?
4. Bilong wanem sampela taim yumi no amamas?
5. Man i no save isi long narapela man, olsem wanem i hatwok long em i stap amamas?
6. (a) Ol brata Kristen i mas lukim wanem pasin long yumi? Wanem taim ol inap lukim olsem? (b) Olsem wanem tok bilong Pol long 2 Korin 1:24 na Rom 14:4 i helpim yumi long kamap man bilong isi long narapela man?
7, 8. Olsem wanem ol Kristen i ken save, bai ol i gat hevi? Tasol olsem wanem ol inap i stap amamas yet?
9. Taim yumi kisim save long tok i tru, olsem wanem dispela i helpim yumi long i stap bel isi? Na dispela bel isi i kamapim wanem gutpela samting long ol Kristen?
10. Yumi mas toktok na tingting long wanem kain samting na bai yumi inap i stap amamas tru?
11. (a) Yumi ken amamas long wanem samting na yumi no ken ting em i samting nating? Bilong wanem yumi no ken ting em i samting nating? (b) Wanpela brata na meri bilong em i go long wanpela kibung intenesenel na ol i pilim olsem wanem?
12. Olsem wanem tok bilong Aisaia 60:22 i kamap tru long ai bilong yumi?
13. (a) Wanem ol samting i bin kamap kirap long yia 1914? (b) Olsem wanem ol Witnes Bilong Jehova i bihainim tok bilong Pol long 2 Korin 9:7?
14. Wanem gutpela samting i kamap insait long lain bilong God kirap long yia 1919? Olsem na ol i ken amamas long wanem samting?
15. (a) Yumi tingim tru wanem ol samting i kamap long nau? (b) Yumi amamas na wetim wanem samting i kamap?
16. Stori long olsem wanem Kristen i no inap i stap amamas sapos em i no bihainim ol tok na pasin em i bin skul long en?
17. Olsem wanem yumi inap amamas oltaim long mekim wok bilong yumi long autim tok?
18. Wanem samting i kirapim Kristen long mekim laik bilong Jehova?
19. Olsem wanem na nau em i taim bilong amamas moa yet, winim olgeta taim bipo?
[Piksa long pes 16]
Ol Witnes bilong Rasia na Jemani i amamas ol i insait long bikpela lain brata bilong olgeta hap
[Piksa long pes 17]
Wok bilong autim tok i tru long ol man em wanpela as bilong amamas