Famili na Pasin Pren
Planti i hatwok long strongim pasin pren wantaim ol narapela. Skelim sampela stiatok bilong Baibel we inap helpim yu long mekim pasin pren bilong yu wantaim ol narapela i kamap gutpela.
NO KEN TINGIM YU YET
STIATOK BILONG BAIBEL: “Yupela i no ken tingim laik bilong yupela yet tasol, nogat, yupela i mas tingim tu laik bilong ol arapela.”—Filipai 2:4.
MAKIM WANEM SAMTING: Pasin bilong givim i save strongim pasin pren. Sapos yu save tingim yu yet, yu inap bagarapim pasin pren bilong yu wantaim ol narapela. Olsem, poroman marit i save tingim em yet i no inap stap gut long poroman marit bilong em. Na tu, no gat man i laik stap pren bilong wanpela husat i save hambak long samting em i gat o save bilong em. Olsem na Buk The Road to Character i tok, “pasin bilong tingim yu yet inap kamapim planti hevi.”
SAMTING YU KEN MEKIM:
Helpim ol narapela. Pasin pren i stap strong long rot bilong trastim na redi long helpim narapela narapela. Sampela wok painimaut i soim olsem ol man husat i save helpim ol narapela ol i no save karim hevi bilong dipresen na dispela i strongim ol.
Pilim hevi bilong narapela. Pasin bilong pilim hevi bilong narapela i makim olsem yu pilim hevi bilong narapela long bel bilong yu. Sapos yu pilim hevi bilong narapela, yu bai no inap mekim ol tok bilong rabisim em, olsem, mekim tok pani bilong bagarapim bel bilong em.
Taim yu pilim hevi bilong narapela, bai yu no tingim pasin bilong ol. Dispela bai helpim yu long sakim pasin bilong tingim wanpela lain i winim narapela, na tu, yu inap kisim ol pren bilong narapela kalsa o bekgraun.
Givim taim bilong yu. Sapos yu lusim bikpela haptaim long stap wantaim ol narapela, bai yu save gut long ol. Bilong kisim gutpela pren, yu mas toktok gut wantaim ol narapela. So kisim pasin bilong putim gut yau. Soim olsem yu tingim tru ol samting pren bilong yu i tingting long en. Wanpela wok painimaut i tok, “taim ol man i stori gut wantaim ol narapela, dispela i mekim ol i amamas.”
MAKIM GUT OL POROMAN
STIATOK BILONG BAIBEL: “Ol poroman nogut i save bagarapim ol gutpela pasin bilong man.”—1 Korin 15:33.
MAKIM WANEM SAMTING: Ol man yu bung wantaim ol i gat bikpela strong long senisim pasin bilong yu—long kamap gutpela o nogut. Ol saveman i tok pasin pren inap mekim planti samting long laip bilong yu. Olsem, ol i tok sapos yu stap wantaim ol man i save smok o ol man i divos, ating yu bai stat long smok o yu laik divos.
SAMTING YU KEN MEKIM: Kisim ol pren i gat ol pasin em yu laikim o yu laik bihainim. Olsem, bung wantaim ol man i save skelim gut samting, soim rispek, givim samting, na lukautim ol narapela.
OL NARAPELA STIATOK BILONG BAIBEL
Watsim ol vidio em Baibel i as bilong en, em ol i wokim bilong helpim ol marit, tineja, na ol pikinini na bai famili i stap gut
NO KEN MEKIM TOK I BAGARAPIM NARAPELA.
“Man i no tingting gut na toktok, tok bilong em i olsem bainat i sutim man.”—PROVEP 12:18.
GIVIM SAMTING.
“Man i gat pasin bilong givim, i stap bilong em bai kamap gutpela moa.”—PROVEP 11:25.
MEKIM PASIN YU LAIK BAI OL NARAPELA I MEKIM LONG YU.
“Olgeta samting yupela i laik bai ol man i mekim long yupela, yupela i mas mekim long ol.”—MATYU 7:12.