Epafroditus Ol Filipai i Salim Em i Go — Wastaua INTENET LAIBRERI

Epafroditus Ol Filipai i Salim Em i Go

POL i bin raitim pas long ol Filipai olsem: “Yupela i mas amamas tru long kisim Epafroditus long nem bilong Bikpela. Yupela i mas givim biknem long ol dispela kain man.” Sapos wanpela wasman Kristen i mekim kain gutpela tok olsem long yumi, bai yumi amamas, a? (Filipai 2:29) Tasol Pol i toktok long husat? Na dispela man i bin mekim wanem na Pol i mekim gutpela tok olsem long em?

Bekim bilong namba wan askim i olsem: Dispela man em Epafroditus. Na bilong bekim namba 2 askim, yumi mas tingim ol samting i bin kamap na Pol i mekim dispela tok.

Long yia olsem 58 C.E., ol Filipai i bin harim stori olsem wanpela lain nogut long Jerusalem i bin holimpas Pol na pulim em i go ausait long banis bilong haus lotu na ol i paitim em nogut, na ol ofisa i kalabusim em. Tasol taim ol i no stretim tok yet long samting ol bai mekim long em, ol i pasim em long sen na salim em i go long Rom. (Aposel 21:27-33; 24:27; 27:⁠1) Ol Filipai i tingting planti long i stap bilong Pol, na ating ol i tingting, ol inap mekim wanem bilong helpim em. Ol i stap rabis long skin, na ol i stap longwe long Pol, olsem na ol i no inap helpim em tumas. Tasol bipo ol i save givim bel tru long Pol na dispela i kirapim ol long helpim em long wok bilong em long autim tok, na dispela i wok yet long kirapim ol; na nau dispela tingting i kirapim ol moa yet, long wanem, taim nogut i painim em.—⁠2 Korin 8:1-4; Filipai 4:16.

Ating ol Filipai i tingting olsem i gutpela sapos wanpela inap i go lukim Pol na givim wanpela presen long em na helpim em sapos em i sot long ol samting. Tasol em i longwe rot tru na skin bilong dispela man bai les tru long wokabaut, na em inap kisim bagarap taim em i helpim Pol! Wanpela man, em Joachim Gnilka, i tok: “Bilong i go lukim wanpela kalabus, man i mas i gat strongpela bel, na em i mas i gat strongpela bel moa bilong go lukim wanpela man em ol i no bin kamapim klia ‘rong’ bilong em.” Man bilong raitim buk, em Brian Rapske, em i tok: “Sapos man i pren tumas o i laik helpim dispela kalabus o wanbel long tingting bilong em, em inap kisim nogut long dispela tu. . . . Sapos em i no tingting gut na em i mekim wanpela hap tok o wanpela samting, dispela inap mekim na bai ol i kilim i dai dispela kalabus na helpim bilong em wantaim.” Orait, ol Filipai inap salim husat?

Yumi inap ting ol man bai tingting planti long mekim kain raun olsem, tasol Epafroditus (i no Epafras bilong Kolosi) i orait long mekim dispela wok i gat hatwok tru long en. Nem Afrodait i insait long dispela nem Epafroditus, olsem na ating em i wanpela man bilong ol narapela lain na em i bin tanim bel na kamap Kristen—⁠papamama bilong em ol i save lotuim wanpela god bilong ol Grik, em god meri bilong pasin bilong bel i kirap long man o meri na bilong kamapim pikinini. Taim Pol i raitim pas long ol Filipai bilong tok tenkyu long ol i bin salim ol samting long em, i stret em i stori long Epafroditus olsem “yupela i bin salim em i kam long mi bilong em i ken helpim mi.”—⁠Filipai 2:25.

Taim yumi kaunim stori bilong Epafroditus long Baibel yumi inap save, maski em i givim bel long mekim ol wok bilong helpim Pol na helpim kongrigesen bilong em yet, em i gat ol wankain hevi olsem i save painim yumi. Orait yumi ken stori long Epafroditus, em i stap olsem gutpela piksa bilong yumi.

‘Em i Kam Bilong Helpim Mi’

Tru, yumi no save long olgeta samting long stori bilong Epafroditus, tasol yumi ken ting skin bilong em i les tru taim em i kamap long Rom. Ating em i bin wokabaut long wanpela rot bilong ol Rom ol i kolim Via Egnatia, em rot i brukim kantri Masedonia. Na ating Epafroditus i bin brukim solwara Edriatik na kamap long poin bilong Itali daunbilo na nau em i bihainim rot Apia na kamap long Rom. Em i longwe rot tru (1,200 kilomita), na ating em i bin wokabaut inap wanpela mun samting.—⁠Lukim blok long pes 29.

Orait, Epafroditus i gat wanem tingting taim em i lusim Filipai bilong go long Pol? Ol i bin salim em bilong mekim wanpela wok olsem “helpim,” o lei·tour·giʹa, bilong Pol. (Filipai 2:30) Long pastaim tru, dispela tok Grik i makim wanpela wok em gavman i singaut long en na man i mekim long laik bilong em yet. Bihain dispela hap tok i makim wanpela wok em gavman i tok ol man i mas mekim, em ol man i gat save tru long mekim dispela wok. Wanpela saveman i stori long pasin bilong Ol Skripsa Grik long kolim dispela tok. Em i tok: “Kristen em wanpela man i save mekim wok bilong God na ol man, long wanem, bel bilong em i gat bikpela laik tru long mekim, na namba 2 as i olsem: Em i pilim olsem em i mas mekim olsem—⁠em i laikim tumas Krais na em i pilim olsem em i gat wok long mekim olsem.” Em nau, Epafroditus i givim bel olgeta long mekim dispela wok bilong em!

Em i No Tingim Skin Bilong Em Yet

Pol i kolim wanpela tok em ol man bilong pilai laki ol i save mekim—⁠em i tok, Epafroditus “i no tingting [pa·ra·bo·leu·saʹme·nos] long [laip bilong] em yet i mas i stap gut,” o i olsem em i “pilai laki” long laip bilong em bilong mekim wok bilong Krais. (Filipai 2:30) Yumi no ken ting Epafroditus i mekim wanpela pasin kranki, nogat. Em i save, bilong inapim tru dispela wok holi bilong em, em inap kisim bagarap. Olsem wanem? Ating em i bin makim wanpela taim nogut bilong ren o kol samting bilong i go na helpim Pol? Na taim bikpela sik i painim em long rot, em i strong long wokabaut i go yet na bai em inap mekim tru wok bilong em? Yumi no save long ol dispela samting, tasol yumi save, “em i sik, na klostu em i dai pinis.” Ating em i bin tingting long i stap longtaim liklik wantaim Pol bilong helpim em, olsem na Pol i laik tokaut long as na Epafroditus i mas go bek hariap liklik.—⁠Filipai 2:27.

Tasol Epafroditus em wanpela man i gat strongpela bel na em i amamas long karim ol samting i go bilong helpim ol man i sot, maski em yet inap kisim bagarap long dispela wok.

Orait, yumi ken askim yumi yet: ‘Sapos taim nogut i painim ol brata spirit bilong mi, bai mi strong long helpim ol i go inap long wanem mak?’ Dispela pasin bilong redi long helpim ol brata, i no olsem ol Kristen i ken mekim sapos ol i laik, nogat. Jisas i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” (Jon 13:34) Taim Epafroditus i mekim dispela wok, “klostu em i dai pinis.” Olsem na em i olsem gutpela piksa bilong man i holim kain “tingting” em Pol i laik kirapim ol Filipai long kisim. (Filipai 2:5, 8, 30) Orait, olsem wanem long yumi? Bai yumi orait long helpim ol brata, maski yumi inap kisim bagarap long mekim dispela wok?

Tasol bihain Epafroditus i bel hevi. Bilong wanem?

Bel Hevi Bilong Em

Yu ken ting olsem wankain samting i painim yu olsem i bin painim Epafroditus. Pol i tok: “Em i wari tru long yupela na em i laik lukim yupela. Na em i save, yupela i harim tok long em i gat sik, na dispela i mekim em i bel hevi.” (Filipai 2:26) Epafroditus i save pinis, ol brata long kongrigesen bilong em ol i save em i gat sik na em i no inap helpim Pol inap long mak ol i laikim. Na i olsem Epafroditus i putim sampela hevi moa long Pol. Dokta Luk, em poroman bilong Pol, ating em i mas lusim sampela wok bilong em na bai em i ken lukautim Epafroditus?—⁠Filipai 2:27, 28; Kolosi 4:14.

Ating dispela samting i mekim na Epafroditus i bel hevi. Ating em i tingting olsem ol brata long kongrigesen bilong em ol i ting em i no inap mekim gut wok bilong em. Ating bel bilong em i gat tok na em i “wari” long ol na i laik lukim ol bambai em i ken tokim ol, em i bin stap gut long wok bilong em. Taim Pol i stori long Epafroditus, em i mekim wanpela strongpela tok Grik, a·de·mo·neʹo, olsem “i stap bel hevi.” Saveman J. B. Lightfoot i tok, dispela tok Grik inap makim tu olsem ‘tingting i paul, i no stap isi, tingting i raun, na as bilong en em wanpela sik samting bilong skin, o tingting i bagarap, olsem bel hevi long wanpela i dai, o sem, o bel hevi long wanpela samting, o kain samting olsem.’ Long Ol Skripsa Grik dispela tok Grik i kamap wanpela taim moa tasol, em long taim Jisas i stap long gaden bilong Getsemani na em i pilim nogut tru.—⁠Matyu 26:⁠37.

Pol i ting i gutpela sapos em i salim Epafroditus i go bek long ol Filipai na karim wanpela pas i stori long as na em i mas i go bek. Taim Pol i tok, “Mi ting mi mas salim Epafroditus i kam long yupela,” Pol i laik bai ol i save, em yet i tok na Epafroditus i go bek, na ol i no ken ting Epafroditus i bin pundaun long mekim wok bilong em. (Filipai 2:25) Klostu Epafroditus i dai bambai em i ken inapim tru wok bilong em long helpim Pol! Pol i tokim ol: “Yupela i mas amamas tru long kisim Epafroditus long nem bilong Bikpela. Yupela i mas givim biknem long ol dispela kain man. Em i mekim wok bilong Krais na klostu em i dai pinis. Em i no tingting long em yet i mas i stap gut. Nogat. Em i tingting tasol long wok yupela i bin givim em bilong helpim mi, na em i sakim sik bilong en na mekim wok yet.”—⁠Filipai 2:29, 30.

“Givim Biknem Long Ol Dispela Kain Man”

Yumi save amamas tru long ol man na meri ol i gat wankain tingting olsem bilong Epafroditus. Ol i save tingting long wok ol i mas mekim na ol i no tingting long ol yet i mas i stap gut. Yumi tingim ol manmeri i bin lusim ples bilong ol na go long ol longwe hap bilong mekim wok olsem misineri, o wasman bilong raun, o wok long wanpela brens-ofis bilong Sosaiti Was Taua. Sapos long nau sampela i go lapun o ol i gat wanpela sik i pinisim strong bilong ol na ol i no inap mekim bikpela wok olsem bipo ol i bin mekim, yumi mas givim biknem long ol, long wanem, ol i bin i stap gut long wok bilong God inap planti yia.

Tasol sapos yumi gat wanpela sik i pinisim strong bilong yumi, dispela inap mekim na yumi bel hevi o bel bilong yumi i gat tok. Yumi laik mekim bikpela wok, tasol yumi no inap! Sapos kain hevi olsem i bin painim yu, orait yu ken tingim Epafroditus. Yu ting em asua bilong em na sik i painim em? Nogat tru! (Stat 3:17-19; Rom 5:12) Epafroditus i gat laik long mekim wok bilong God na helpim ol brata bilong em, tasol em i gat sik na em i no inap mekim bikpela wok.

Pol i no krosim Epafroditus long dispela sik i bin mekim na em i bel hevi, nogat. Pol i tokim ol Filipai long sambai long em. Yumi tu i mas wok long mekim gut bel bilong ol brata taim ol i stap bel hevi. Yumi ken litimapim nem bilong ol, long wanem, ol i bin i stap gut long wok bilong God na ol i stap olsem gutpela piksa. Yumi save Pol i amamas long Epafroditus, long wanem, Pol i bin mekim ol gutpela tok long em, na ating dispela i strongim bel bilong em na daunim bel hevi bilong em. Yumi tu inap save, ‘God em i no man nogut na bai em i lusim tingting long ol gutpela wok yumi bin mekim. Nogat. Yumi bin givim bel long God, na dispela i bin kirapim yumi long helpim ol manmeri bilong em. Na yumi save mekim olsem yet.’—⁠Hibru 6:10.

[Blok long pes 29]

Longwe Rot i Gat Hatwok Long En

Long nau, sapos yumi kirap long wanpela biktaun long Yurop na go long narapela biktaun bilong en, i no gat hatwok long mekim. Yumi ken sindaun gut long wanpela smokbalus na kamap insait long wanpela o tupela aua samting. Tasol long taim bilong ol aposel i no olsem. Long dispela taim bipo, ol man i laik i go long ol narapela narapela ples, ol i gat hatwok. Bilong wokabaut long lek, em inap wokabaut olsem 30-35 kilomita insait long wanpela de, na strongpela san o kol o ren bai mekim save long em, na i gat ol samting inap bagarapim em, olsem “ol stilman i save pulim samting bilong ol man i wokabaut long rot.”—⁠2 Korin 11:⁠26.

Na olsem wanem long ol ples slip long rot na ol kaikai samting em i mas kisim?

Man bilong raitim stori bilong ol samting i bin kamap bipo, em Michelangelo Cagiano de Azevedo, em i tok, long arere bilong ol bikrot bilong ol Rom, “i gat ol mansiones, olsem ol gutpela haus pasindia, na ol kaikai samting bilong man i ken baim, na haus bilong putim ol hos, na ples slip bilong ol wokman bilong pasindia; na long rot namel long ol mansiones, i gat ol mutationes, olsem ol liklik haus pasindia bilong slip wanpela nait, na ol inap senisim ol hos o wilka samting, na baim kaikai.” Tasol ol dispela liklik haus pasindia, olsem haus dring, ol i no gat gutpela nem liklik, long wanem, ol man i save slip long ol dispela ples em ol pipia lain tasol. Papa bilong ol dispela liklik haus pasindia ol i save stilim mani bilong ol pasindia, na ol i save kisim mani tu long rot bilong ol meri pamuk. Wanpela man Latin em i save raitim ol stori, nem bilong em Juvenal, em i tok, sapos man i mas ‘slip long wanpela haus dring olsem, ating em i mas slip klostu long wanpela man nogut bilong kilim man i dai, ol boskru bilong ol bot, ol stilman, ol wokboi nating i bin ranawe, ol man bilong hangamapim man long haus kalabus, na ol man bilong wokim bokis bilong man i dai pinis. I gat wanpela kap tasol bilong olgeta man; man i no inap kisim wanpela bet bilong em yet tasol, o wanpela tebol bilong em yet tasol.’ Sampela man moa bilong raitim stori long bipo ol i bin tok, wara bilong dring em wara nogut, na ol man i pas pas insait long ol rum slip, na ol rum i doti, na hat, na ol laus i pulap tru.

[Mep/Piksa long pes 27]

Rom

[Piksa]

Wanpela man bilong raun long taim bilong ol Rom

[Kredit Lain]