Yumi Mas Sori Tru Long Ol Narapela
“Yupela i mas sori tru long ol arapela na mekim gut long ol.” —KOLOSI 3:12.
LONG nau ol man i sot tru long man bilong mekim pasin sori long ol, winim olgeta taim bipo. Sik, hangre, no gat wok mani, pasin raskol, ol bikpela pait, ol man i no bihainim moa ol lo, ol bikpela guria na tait wara samting, ol dispela samting i mekim na planti milion manmeri i sot tru long man bilong helpim ol. Tasol i gat wanpela hevi i bikpela moa—ol man i stap nogut tru long ol samting bilong spirit. Satan i save em i gat sotpela taim tasol, olsem na em i “giamanim olgeta manmeri bilong graun.” (KTH 12:9, 12) Olsem na olgeta man i mas was gut, nogut ol i lus; na dispela bagarap inap painim moa yet ol man i stap ausait long lain Kristen tru. Baibel i kamapim klia olsem ol man em God i bagarapim ol long bikpela de bilong em long skelim olgeta man long kot, ol i no inap kirap bek.—Matyu 25:31-33, 41, 46; 2 Tesalonaika 1:6-9.
2 Nau yumi stap klostu long pinis tru bilong taim bilong las de, tasol God Jehova i wok yet long isi na sori long ol man i no save tenkyu long em na ol man nogut tu. (Matyu 5:45; Luk 6:35, 36) I gat as na Jehova i mekim olsem, na i gat wankain as na em i no bin givim strafe hariap long lain Israel, em ol i no stap gut long em. Jehova i tokim ol: “Mi no save amamas long taim ol man bilong mekim sin, ol i dai. Mi save amamas long ol dispela man i givim baksait long pasin bilong sin na ol i stap gut. Yupela ol Israel, harim. Yupela i mas givim baksait long pasin nogut yupela i save mekim na kam bek long mi. Bilong wanem yupela i laik i dai?”—Esekiel 33:11.
3 Jehova i mekim pasin sori tu long ol lain nogut bilong Ninive. Jehova i salim profet Jona i go long ol bilong toksave long bikpela bagarap bai painim ol. Ol i pilim tru dispela tok Jona i autim long ol na ol i tanim bel. Olsem na Jehova, em God bilong sori, em i no bagarapim dispela taun long dispela taim. (Jona 3:10; 4:11) Orait, sapos Jehova i bin sori long ol Ninive, em ol inap kirap bek long bihain, em bai sori moa yet long ol man bilong nau em wanpela bikpela bagarap tru i laik painim ol na ol bai lus olgeta, inap oltaim oltaim!—Luk 11:32.
Wanpela Bikpela Wok Sori
4 Jehova i gat pasin sori, olsem na em i givim wok long ol Witnes bilong em long i go oltaim long haus bilong ol man na autim “dispela gutnius bilong kingdom” long ol. (Matyu 24:14) Na taim ol man i laik harim na ol i amamas long dispela wok bilong helpim ol man long abrusim bagarap, Jehova i save tanim bel bilong ol na bai ol inap kisim gut tok bilong Kingdom. (Matyu 11:25; Aposel 16:14) Ol Kristen tru i bihainim pasin bilong God bilong ol na ol i mekim pasin sori na i go bek lukim ol man i laik harim, na sapos ol inap, ol i stadi wantaim ol long Baibel. Olsem na long 1993, winim 4 na hap milion Witnes Bilong Jehova long 231 kantri ol i lusim wan bilion aua samting long i go long ol haus na autim tok na stadi wantaim ol man long Baibel. Orait nau ol dispela nupela man i gat rot long dediket long Jehova na kisim baptais na kam insait long lain Witnes i baptais pinis. Em nau, ol tu i mas mekim dispela bikpela wok sori bilong helpim sampela man moa long kamap disaipel, em ol i stap kalabus yet long dispela graun bilong Satan i laik bagarap.—Matyu 28:19, 20; Jon 14:12.
5 Klostu nau Jehova bai kirap mekim wok olsem “strongpela soldia tru.” (Kisim Bek 15:3) Em i sori long nem bilong em na lain bilong em, olsem na em bai pinisim olgeta pasin nogut na kamapim nupela taim i gat stretpela pasin long en. (2 Pita 3:13) Namba wan lain bilong kisim belhat bilong God, em ol lotu bilong graun i gat nem Kristen. Bipo tu God i no bin larim haus lotu bilong em long Jerusalem i stap—em i salim king bilong Babilon i kam bagarapim. Na olsem tasol God i no ken larim ol dispela lotu i stap, em ol i giaman long mekim wok bilong em. God bai givim tingting long ol lain insait long Yunaitet Nesen long bagarapim olgeta lotu bilong dispela graun i gat nem Kristen na ol narapela lotu giaman tu. (KTH 17:16, 17) Jehova i tok: “Bai mi no inap marimari long ol na mi no inap larim wanpela i stap.”—Esekiel 9:5, 10.
6 Long dispela liklik hap taim i stap yet, ol Witnes Bilong Jehova i wok yet long mekim pasin sori long ol man na ol i wok strong long autim tok bilong God long kisim bek ol man. Na sapos inap, ol i helpim ol man tu long ol samting bilong skin ol i sot long en—tasol ol i mas tingting pastaim long helpim famili bilong ol yet na ol wanbilip long ol samting ol i sot long en. (Galesia 6:10; 1 Timoti 5:4, 8) Planti taim ol Witnes i bin kamapim dispela pasin sori bilong ol taim ol bikpela bagarap i kamap na ol wanbilip i lus long ol samting bilong skin. Tasol ol Kristen i no save wet long wanpela bagarap i kamap na bai ol i ken mekim pasin sori long ol man, nogat. Ol i mekim pasin sori na helpim ol long ol hevi i save painim ol long ol wan wan de.
Em Wanpela Pasin Bilong “Nupela Man”
7 Tru, i gat sampela samting i pasim rot bilong yumi long mekim pasin sori, olsem sin bilong yumi, na pasin bilong dispela graun bilong Satan i laik stiaim tingting bilong yumi. Olsem na Baibel i tok strong long yumi mas rausim “pasin bilong kros na belhat na bel nogut, na . . . tok nogut long ol arapela na . . . mekim toktok i doti.” Yumi mas “kamap nupela man,” bambai pasin bilong yumi i wankain olsem bilong God yet. Baibel i tok, yumi mas ‘sori tru long ol arapela na mekim gut long ol, na daunim yumi yet na mekim pasin isi long ol man, na no ken belhat kwik long ol man i rongim yumi.’ Orait nau Baibel i soim yumi long olsem wanem yumi ken kamapim ol dispela gutpela pasin. “Sapos wanpela man namel long yupela em i gat tok long narapela brata i bin mekim rong long em, orait em i mas . . . lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” I no hatwok tumas long lusim rong bilong man sapos yumi bin kisim pasin bilong “sori tru” long ol brata.—Kolosi 3:8-13.
8 Tasol sapos yumi no mekim pasin sori na lusim rong bilong man, yumi no inap pas gut wantaim Jehova. Jisas i kamapim klia dispela samting long tok piksa bilong wokboi i no sori long wanwok, na bikman bilong em i putim em long kalabus “inap em i bekim olgeta dinau bilong en.” I stret em i kisim nogut, long wanem, wanwok i bin krai long em i ken marimari long em, tasol wokboi i no sori liklik long em. Bilong pinisim dispela tok piksa, Jisas i tok: “Olsem tasol Papa bilong mi . . . bai i mekim wankain pasin tasol long yupela sapos yupela i no lusim tru ol rong ol brata i mekim long yupela.”—Matyu 18:34, 35.
9 Bilong laikim tru ol man, yumi mas mekim pasin sori long ol. Dispela pasin bilong laikim tru ol man, em i wanpela mak bilong lotu Kristen tru. (Jon 13:35) Olsem na Baibel i tok: “Yupela i mas givim bel . . . long ol arapela manmeri. Dispela pasin i winim tru olgeta arapela . . . na mekim yumi i stap wanbel.”—Kolosi 3:14, 15.
Bel Nogut—Em i Pasim Pasin Sori
10 Sin i stap long yumi, olsem na pasin bilong bel nogut long narapela inap kamap long bel bilong yumi. Ating wanpela brata o sista i gat save long mekim wok o em i gat planti samting bilong skin na yumi no gat ol dispela samting. O ating wanpela i kisim wanpela gutpela blesing o wok bilong spirit. Orait, sapos yumi bel nogut long ol, olsem wanem yumi inap mekim pasin sori long ol? Yumi no inap, a? Ating bihain bel bilong yumi bai kamap ples klia na yumi mekim sampela tok o pasin i daunim ol. Jisas i tok: “Kain tingting i pulap long bel, em maus i save autim.” (Luk 6:45) Ating sampela bai helpim yumi long dispela pasin yumi mekim, na dispela inap bagarapim pasin wanbel bilong famili o kongrigesen bilong lain bilong God.
11 Tingim samting i bin kamap long wanpela bikpela famili. Tenpela pikinini man bilong Jekop i bel nogut long liklik brata bilong ol Josep, long wanem, papa i save laikim em tumas. Dispela i mekim na “ol i no save mekim gutpela toktok long em.” Bihain Jehova i givim sampela driman long Josep, na dispela i kamapim klia olsem Jehova i laikim em. Olsem na “bel bilong ol i nogut moa yet.” Ol i no rausim dispela pasin long bel bilong ol, olsem na ol i no inap mekim pasin sori long Josep, na bihain ol i mekim bikpela rong.—Stat 37:4, 5, 11.
12 Ol i baim Josep i go long sampela lain olsem wokboi nating. Ol i laik haitim rong bilong ol, olsem na ol i giamanim papa bilong ol na bai em i ting wanpela animal bilong bus i bin kilim i dai Josep. Planti yia bihain rong bilong ol i kamap ples klia. Bikpela hangre i kamap na ol i mas i go long Isip bilong baim kaikai. Man bilong bosim kaikai em Josep, tasol ol i no luksave long em. Em i sutim tok long ol olsem ol i kam bilong lukstil tasol, na sapos ol i laik bai em i helpim ol, ol i mas kisim liklik brata bilong ol, Benjamin, i kam. Papa bilong ol i save laikim tumas Benjamin, olsem na ol i save, Jekop i no inap larim em i go.
13 Taim ol i sanap yet long ai bilong Josep, bel bilong ol i kotim ol na ol i toktok namel long ol yet: “Tru tumas, yumi bin mekim nogut long brata bilong yumi [Josep] na yumi gat asua. . . . Olsem tasol na nau dispela hevi i kamap long yumi.” (Stat 42:21) Josep i sori long ol, tasol em i mekim strongpela pasin tu, na long dispela rot em i helpim ol long kamapim bel bilong ol olsem ol i tanim bel pinis. Orait nau em i tokaut long ol olsem em i Josep tasol, na em i lusim rong bilong ol. Nau famili i kamap wanbel gen. (Stat 45:4-8) Dispela stori i lainim yumi ol Kristen long wanpela samting, olsem: Yumi save, pasin bilong bel nogut long man em inap kamapim samting nogut, olsem na yumi mas beten askim Jehova long helpim yumi long rausim pasin bilong bel nogut na kisim pasin bilong “sori tru” long man.
Ol Narapela Samting i Pasim Pasin Sori
14 Sapos planti taim yumi lukim ol piksa o spot i gat pait na bagarapim man, dispela bai daunim pasin sori long bel bilong yumi. Em inap kirapim bel bilong yumi long laikim tumas pait na bagarapim man, olsem wanpela rot bilong kisim amamas. Long taim bilong Baibel, ol haiden long ol hap em Rom i bosim ol i save go long ol ples bilong pilai na lukim ol man i resis long pait na ol narapela kain pilai nogut bilong bagarapim man. Wanpela man bilong raitim ol stori bilong bipo i tok, ol dispela kain amamas i bin pinisim pasin bilong ol man long sori long man i karim pen, em dispela pasin i makim ol man i narapela kain long ol animal. Planti piksa na pilai bilong nau i save mekim olsem. Tasol ol Kristen i wok strong long bihainim pasin sori, olsem na ol i mas skelim gut ol buk ol i laik kaunim o ol piksa wokabaut o piksa long televisen ol i laik lukim. Ol i mas tingim gut tok bilong Song 11:5 (NW), i tok: “Jehova . . . i no laikim tru ol man i laikim pasin pait.”
15 Sapos man i tingim em yet tasol, ating em tu i no gat pasin sori. Dispela em i samting nogut, olsem Jon i tok: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man.” (1 Jon 3:17) Long tok piksa bilong Jisas long gutpela man Samaria, em i stori long wanpela pris na wanpela Livai ol i no mekim pasin sori. Ol i lukim wanpela wantok Juda i bagarap i stap long rot, tasol ol i brukim rot na wokabaut i go. (Luk 10:31, 32) Tasol ol Kristen i gat pasin sori, kwiktaim ol i save helpim ol brata i sot long ol samting bilong skin na bilong spirit. Na ol i olsem dispela man Samaria long tok piksa bilong Jisas—ol i save helpim tu ol man ol i no save long ol. Olsem na ol i amamas long lusim taim na strong na mani bilong ol long mekim wok bilong kamapim ol disaipel. Long dispela rot ol i helpim planti milion manmeri bambai ol i ken kisim laip i stap oltaim.—1 Timoti 4:16.
Mekim Pasin Sori Long Ol Sikman
16 Sik i save painim yumi olgeta man i gat sin na i save dai, na em i save painim ol Kristen tu. Planti ol i no save long wok dokta samting, na ol i no inap wokim mirakel bilong oraitim sik olsem ol Kristen bilong pastaim em ol i bin kisim strong long Krais na ol aposel bilong em. Taim ol aposel na ol Kristen i bin wok wantaim ol ol i dai, strong bilong wokim ol mirakel i pinis. Olsem na yumi no inap helpim tumas ol man i gat kain kain sik, na ol sik olsem tingting i paul na i no wok gut.—Aposel 8:13, 18; 1 Korin 13:8.
17 Planti man, taim ol i gat sik ol i save bel hevi. Gutpela man Jop i bel hevi nogut tru long bikpela sik na ol narapela hevi Satan i bin kamapim long em. (Jop 1:18, 19; 2:7; 3:3, 11-13) Em i mas i gat sampela pren inap sori tru long em na “strongim bel” bilong em. (1 Tesalonaika 5:14) Tasol tripela pren giaman i kam lukim em na ol i kisim tingting kranki long sik bilong em. Ol i tok, em i gat asua long sampela samting na nau ol dispela hevi i painim em. Dispela tok i bagarapim moa yet bel bilong Jop. Tasol ol Kristen i gat pasin sori, olsem na taim sampela wanbilip i gat sik o bel hevi, ol i no mekim tok kranki olsem tripela pren giaman bilong Jop na bagarapim bel bilong ol, nogat. Sampela taim, bikpela samting bilong helpim ol, em ol elda o ol narapela strongpela Kristen i ken i go lukim ol, na long pasin sori ol i ken putim gut yau long tok bilong ol na pilim hevi bilong ol, na kamapim sampela gutpela tok bilong Baibel bilong strongim bel bilong ol.—Rom 12:15; Jems 1:19.
Sori Long Ol Man i No Strong
18 Ol elda i mas go pas long mekim pasin sori. (Aposel 20:29, 35) Baibel i tok: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol.” (Rom 15:1) Yumi olgeta i save popaia. (Jems 3:2) Ol elda i mas mekim pasin sori taim ol i laik stretim wanpela man i bin popaia na “mekim sin.” (Galesia 6:1) Ol i no laik bihainim pasin bilong ol Farisi em ol i putim sampela tok bilong ol yet i go long Lo bilong God na ol i strong tumas long ol man i mas bihainim, na ol i no isi long ol.
19 Tasol ol elda i bihainim pasin sori bilong God Jehova na Krais Jisas. Nambawan wok bilong ol, em bilong givim kaikai na strongim bel bilong ol sipsip bilong God. (Aisaia 32:1, 2) Ol i no laik putim planti lo na bai ol i ken bosim strong ol sipsip—ol i kamapim ol gutpela as lo bilong Baibel bilong helpim ol. Olsem na wok bilong ol elda em bilong strongim bel bilong ol brata na kirapim ol long amamas na pilim tru ol gutpela pasin Jehova i mekim long ol. Sapos wanpela wanbilip i mekim wanpela liklik popaia, elda i no save stretim em long ai bilong ol narapela na ol inap harim dispela tok, nogat. Sapos elda i mas givim sampela tok long em, elda bai sori tru long em na toktok wantaim em long ples i no gat narapela inap harim. (Skelim wantaim Matyu 18:15.) Maski wanpela man i gat strongpela pasin na i hatwok long toktok gut wantaim em, elda i mas isi long em na helpim em. Elda i no ken wok long painim rot bilong rausim em long kongrigesen. Na sapos man i mekim bikpela rong na i mas i gat wanpela komiti bilong harim kot, ol elda bilong komiti i mas mekim pasin sori long em taim ol i harim kot bilong em. Ating pasin isi bilong ol inap helpim em long tanim bel.—2 Timoti 2:24-26.
20 Tasol sampela taim ol wokman bilong Jehova i no inap mekim pasin sori long man. (Skelim wantaim Lo 13:6-9.) Sapos ol i bin rausim wanpela pren o wanblut bilong Kristen long kongrigesen, orait nau Kristen “i no ken i stap wantaim em.” Ating dispela em i bikpela traim bilong Kristen. Tasol em i mas sanap strong na no ken sori long dispela man. (1 Korin 5:11-13) Sapos em i sanap strong olsem, ating dispela bai kirapim man long tanim bel. Na sapos wanpela man Kristen i mas helpim wanpela meri Kristen i gat hevi, nogut man i mekim sampela pasin bilong kamapim sori bilong em—dispela inap kirapim bel bilong tupela long mekim pasin pamuk.
21 Yumi mas mekim pasin sori tu taim yumi helpim ol lapun, o sampela i bel hevi long wanpela bilong famili i dai, o sampela i kisim bikpela hevi long ol poroman marit i no bilip. Na yumi mas sori long ol elda tu, ol i save mekim bikpela wok. (1 Timoti 5:17) Yumi mas daun long ol na helpim ol. (Hibru 13:7, 17) Pita i tok: “Yupela i mas laikim tru ol . . . na marimari long ol.” (1 Pita 3:8) Sapos yumi mekim pasin sori long olgeta taim i stret long mekim, bai yumi helpim kongrigesen long i stap wanbel na amamas, na dispela bai pulim ol man bilong ausait long kam long tok i tru. Na bikpela samting tru, bai yumi litimapim nem bilong Papa bilong yumi, Jehova, em i Man bilong sori tru.
Ol Askim Olsem Rivyu
◻ Jehova i mekim wanem pasin sori long ol sinman bilong graun?
◻ Bilong wanem yumi mas sori tru long ol man?
◻ Wanem sampela samting i save pasim yumi long mekim pasin sori?
◻ Yumi mas mekim wanem kain pasin long ol sikman na ol man i bel hevi?
◻ Husat i mas go pas long mekim pasin sori long ol man? Bilong wanem ol i mas mekim olsem?
[Askim Bilong Stadi]
1. Bilong wanem i gat bikpela wok bilong pasin sori long nau?
2. Bilong wanem Jehova i no kirap kwik na bagarapim ol man nogut?
3. Wanem stori long Baibel i kamapim klia olsem Jehova i save sori long ol man i no lain bilong em? Dispela inap lainim yumi long wanem samting?
4. Olsem wanem Jehova i mekim pasin sori long ol manmeri bilong nau?
5. Taim belhat bilong Jehova i kirap, em bai mekim wanem long ol lotu i giaman long bihainim tok bilong God?
6. I gat wanem ol rot na ol Witnes Bilong Jehova i mekim pasin sori long ol man?
7. (a) Long Kolosi 3:8-13, olsem wanem pasin sori i insait long pasin bilong kamap olsem “nupela man”? (b) Pasin sori inap helpim ol Kristen long mekim wanem?
8. Bilong wanem yumi mas lusim rong bilong man?
9. Olsem wanem pasin sori i insait long nambawan bikpela pasin bilong “nupela man”?
10. (a) Wanem samting inap mekim na yumi bel nogut long man? (b) Wanem ol samting nogut inap kamap long dispela pasin bilong bel nogut long man?
11. Tenpela brata bilong Josep i mekim wanem na dispela i rausim pasin sori long bel bilong ol? Wanem samting i kamap?
12, 13. Taim pasin bilong bel nogut long man i kamap long bel bilong yumi, yumi mas mekim wanem?
14. Bilong wanem yumi no ken lukim ol piksa samting i gat pasin bilong pait na bagarapim man?
15. (a) Wanem samting i makim olsem man i no gat pasin sori? (b) Ol Kristen tru i mekim wanem taim ol i lukim ol wanbilip na ol narapela man i sot long ol samting?
16. Olsem wanem yumi no inap helpim tumas ol man i gat sik?
17. Taim Jop i gat bikpela sik na em i bel hevi long ol pikinini bilong em i bagarap, ol tok ol pren giaman i givim long em inap lainim yumi long wanem samting?
18, 19. (a) Ol elda i mas mekim wanem pasin long ol man i no strong o man i mekim rong? (b) Sapos ol elda i mas kamapim wanpela komiti bilong harim kot, bilong wanem ol elda i mas mekim pasin sori long man i bin mekim rong?
20. Wanem taim i no stret long mekim sampela pasin i kamapim sori bilong yumi? Bilong wanem i no stret?
21. Wanem ol narapela taim yumi mas mekim pasin sori? Wanem gutpela samting bai kamap?
[Blok long pes 19]
OL FARISI I NO GAT PASIN SORI
GOD i bin givim de Sabat bilong malolo long lain bilong em olsem wanpela gutpela blesing bilong skin na bilong spirit. Tasol ol bikman bilong lotu Juda i kamapim planti lo i nogutim lo bilong Sabat God i bin givim, na i putim bikpela hevi long lain bilong em. Olsem: Sapos wanpela man i kisim bagarap o em i gat sik, ol man i no inap helpim em long de Sabat. Sapos em i laik i dai, long dispela taim tasol ol inap helpim em.
Wanpela skul bilong ol Farisi i kamapim tingting bilong ol yet long lo Sabat na i putim strongpela lo olsem: “Long de Sabat man i no ken mekim gut bel bilong ol man i krai sori long wanpela i dai pinis, o go lukim sikman.” Sampela bikman bilong lotu i larim ol man i mekim olsem long Sabat, tasol ol i tok: “I tambu long krai.”
Olsem na Jisas i krosim tru ol bikman bilong lotu Juda, long wanem, ol i kalapim ol bikpela samting bilong Lo ol man i mas bihainim, olsem stretpela pasin, na pasin sori, na marimari. I gat as tru na em i tokim ol Farisi: “Yupela i bihainim pasin yupela i bin kisim long ol tumbuna, na yupela i daunim tok bilong God.”—Mak 7:8, 13; Matyu 23:23; Luk 11:42.
[Ol Piksa long pes 17]
Long 231 kantri ol Witnes Bilong Jehova i mekim wanpela bikpela wok sori long haus bilong ol man, na long rot, na long ol haus kalabus tu
[Piksa long pes 18]
Taim yumi lukim pasin bilong pait na bagarapim man, olsem long televisen samting, dispela i save daunim pasin sori long bel bilong yumi