Yu Inap Brukim Samting i Pasim Rot!
BIKPELA balus ol i kolim jambo em inap karim sampela handet pasendia na planti ton kago. Olsem wanem hevipela balus olsem inap go antap? Strong bilong win i mekim.
Balus i ran spit tru long rot bilong en long ples balus na brukim win; dispela i kirapim strongpela win i kam paitim wing bilong balus na long dispela strong, balus i go antap. Sapos kago bilong balus i hevi tumas, bai em i hatwok long go antap, na ating bai em i no inap.
Sampela taim yumi olsem balus i karim kago i hevi tumas. Sampela handet yia bipo King Devit i tok ol rong bilong em ‘i olsem kago em i karim na i hevi tumas.’ (Song 38:4) Na Krais Jisas i tok, yumi mas lukaut, nogut yumi wari long ol samting bilong bodi, dispela inap kamap olsem hevipela samting i daunim yumi. (Luk 21:34) Sapos yu tingim ol samting nogut tasol na yu bel nogut na bel hevi, dispela inap daunim yu, na bai yu hatwok olsem “balus i hevi tumas na i no inap go antap.” Olsem wanem? Kain samting olsem i daunim yu? O sampela samting i pasim yu na yu no kamap strong long spirit? Wanem samting inap helpim yu?
Yu Les?
Long nau planti manmeri i les. Pasin bilong les inap pasim tingting bilong sampela long lain bilong Jehova tu. Ol yangpela i save les hariap na nau ol i no laik mekim sampela wok samting. Olsem wanem? Sampela taim yu les long i go long ol miting Kristen? Sapos olsem, orait yu ken mekim wanem na bai yu amamas long i go?
Yu mas insait long ol samting bilong miting. Pol i tokim yangpela man Timoti: “Yu mas lain gut long pasin bilong God. Yu save, sapos yumi laik mekim bodi bilong yumi i kamap strong, na yumi save trening oltaim, dispela bai i helpim yumi liklik. Tasol sapos yumi trening long mekim pasin bilong God i kamap strong long yumi, dispela bai i helpim yumi moa yet. Em inap long helpim yumi long dispela laip nau yumi stap long en, na long laip yumi bai kisim bihain tu.” (1 Timoti 4:7, 8) Sapos yu gat wanpela buk bilong helpim yu long mekim bodi i kamap strong, tasol yu no eksasais na wokim skin olsem buk i tok, bai yu les long kaunim tok bilong en na bai buk inap helpim yu liklik tasol. Ol miting Kristen i bilong helpim yu long wokim tingting, na ol bai mekim olsem sapos yu redim ol tok na bekim tok. Sapos yu mekim ol wok olsem, bai yu amamas long ol miting na yu no ken les.
Wanpela yangpela meri Kristen, nem bilong em Mara, em i stori olsem: “Sapos mi no redim tok bilong miting, mi no save amamas long miting. Taim mi redi pastaim, bel na tingting bilong mi i redi long harim tok. Mi kisim gut ol tok bilong miting, na mi amamas long bekim tok.”
Sapos yu lain long putim gut yau, dispela tu bai helpim yu. Taim yumi harim gutpela musik, i no hatwok long putim yau na wantu yumi amamas. Tasol yumi no inap amamas wantu tasol long olgeta samting. Bilong amamas long ol tok bilong miting, yumi mas putim gut yau long en; i no gat narapela rot. Wanpela Kristen, nem bilong em Rachel, em i tok: “Sapos man bilong mekim tok i no givim bel tumas long mekim, mi mas bosim strong tingting bilong mi bambai tingting i no wokabaut. Mi bihainim lo olsem: ‘Sapos tok i no kirapim gut tingting, mi mas wok strong moa long putim gut yau.’ . . . Taim em i kolim sampela tok bilong Baibel, mi save putim gut yau bambai mi ken kisim gut ol dispela tok.” Yumi mas bosim strong tingting olsem Rachel bambai yumi inap putim gut yau. Buk Sindaun i tok: “Pikinini, putim yau gut long tok bilong mi. Mi laik givim gutpela tingting na save long yu.”—Sindaun 5:1.
Sampela tok bilong ol miting, i olsem ol i kamapim gen planti taim. Ol i mas mekim olsem! Yumi olgeta wokboi bilong God i mas kisim ol tok bilong kirapim yumi long tingim gen samting yumi save pinis long en, long wanem, yumi gat sin, na skin i save pulim yumi long mekim ol pasin kranki, na yumi save lusim tingting. Aposel Pita i tok, ol wanbilip bilong em ‘ol i sanap strong long tok i tru, tasol em i no laik bai ol i lusim tingting long sampela samting ol i save pinis long en, olsem na olgeta taim em i laik tokim ol gen.’ (2 Pita 1:12) Jisas i tok: “Olgeta saveman bilong lo . . . i olsem papa bilong wanpela bikpela haus. Em i go insait long wanpela rum olkain gutpela samting bilong en i pulap i stap long en, na em i kisim ol nupela samting na ol olpela samting wantaim, na bringim i kam ausait.” (Matyu 13:52) Olsem na long ol miting ol i kamapim “ol olpela samting,” olsem ol tok bilong Baibel yumi save pinis long en, na i gat “ol nupela samting” tu yumi ken amamas long en.
Sapos yu tingting strong long kisim gut ol tok bilong ol miting, bai ol miting i strongim yu tru long spirit. Jisas i tok: “Ol manmeri i save, ol i stap rabis tru long ol samting bilong God [sot long samting bilong spirit], em ol i ken amamas.” (Matyu 5:3) Sapos yu gat kain tingting olsem long ol gutpela kaikai bilong spirit yu kisim long ol miting, bai yu no inap les.—Matyu 24:45-47.
Yu Bel Hevi Long Pasin Nogut Bilong Narapela?
Olsem wanem? Yu bel hevi long pasin bilong wanpela long kongrigesen bilong yu? Yu tingting olsem, ‘Olsem wanem wanpela brata inap mekim kain pasin olsem na holim yet gutnem?’ Sapos yu gat tingting olsem, dispela inap pasim tingting bilong yu na bai yu no pilim olsem i gutpela tumas yu bung wantaim lain bilong God.—Song 133:1.
Ating sampela long kongrigesen bilong Kolosi i gat kain hevi olsem. Pol i tokim ol: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata.” (Kolosi 3:13) Pol i save, ating sampela Kristen long Kolosi i mekim pasin i no gutpela tumas na i gat as na ol narapela i gat tok long ol. Olsem na yumi no ken kirap nogut sapos wanpela brata o sista bilong yumi i sot long wanpela gutpela pasin Kristen sampela taim. Jisas i makim gutpela rot bilong stretim bikpela hevi i kamap. (Matyu 5:23, 24; 18:15-17) Tasol planti taim yumi inap karim tasol hevi na lusim sin bilong brata em i sot long sampela gutpela pasin. (1 Pita 4:8) Sapos yumi mekim olsem, dispela inap helpim yumi yet na ol narapela tu. Olsem wanem em inap mekim olsem?
Sindaun 19:11 i tok: “Man i gat gutpela tingting, em i no inap kros kwik. Nambawan pasin bilong en i olsem. Em i no save tingim rong narapela man i mekim long em.” Nogut yumi belhat na bel nogut; gutpela yumi lusim rong bilong narapela! Salvador em wanpela elda i gat nem long mekim gutpela pasin sori, na em i tok: “Taim wanpela brata i mekim pasin nogut o tok nogut long mi, mi save askim mi yet, ‘Olsem wanem mi ken helpim brata bilong mi? Mi ken mekim wanem na bai mitupela i stap wanbel yet?’ Mi save, i no hatwok long mekim tok kranki. Sapos man i no tingting gut pastaim bai em i mekim. Gutpela rot bilong stretim dispela hevi em olsem: Em i mas kisim bek dispela tok na kirap gen long mekim toktok, tasol em i no inap mekim olsem. Olsem na mi bihainim narapela rot: Mi no tingim tok em i mekim. Mi save tingting olsem, ating sin long skin bilong em i kirapim em long mekim tok olsem; dispela i no pasin tru bilong em.”
Olsem wanem? Yu ting i no hatwok long mekim tok olsem, tasol em hatwok long bihainim? Tasol bikpela samting, em yumi mas stiaim tingting bilong yumi. Pol i tok: “Oltaim yupela i mas tingting tasol long . . . ol naispela samting.” (Filipai 4:8) Dispela tok “naispela samting” i makim samting i kirapim ol man long laikim ol narapela. Jehova i laik bai yumi tingim ol gutpela pasin bilong ol narapela, olsem ol samting i kirapim yumi long laikim ol; yumi no ken tingim ol samting i kirapim yumi long bel nogut long ol. Jehova yet i stap gutpela piksa tru bilong dispela pasin. Man bilong raitim Song i tok: “Sapos yu [Jehova] kaunim olgeta sin bilong mipela bai husat inap long winim kot bilong yu?”—Song 103:12; 130:3.
Tru, sampela taim yumi inap bel hevi long pasin wanpela brata i mekim, tasol planti wanlotu bilong yumi ol i bihainim tru gutpela pasin Kristen. Sapos yumi tingim dispela, bai yumi tenkyu tru long Jehova olsem Devit i mekim, na bai yumi amamas ‘long bung wantaim ol narapela na litimapim nem bilong em.’—Song 109:30.
Yu Ting i Hatwok Tumas Long i Stap Witnes?
Sori tru, i gat narapela samting i pasim tingting bilong sampela na ol i no kirap yet long litimapim nem bilong Jehova. Planti man i no Witnes Bilong Jehova ol i save lukautim gut famili bilong ol, na helpim meri bilong ol long mekim wok bilong Jehova. Ol i mekim gutpela pasin pren na ol i laik save long kongrigesen, tasol ol i surik long dediket na kamap wokboi bilong God. Wanem samting i pasim rot bilong ol?
Sampela i lukim meri bilong ol i mekim planti wok bilong God na ol i pilim olsem i hatwok tumas long kamap Witnes na mekim planti wok olsem. O ating ol i pret na pilim olsem bai ol i no inap i go long ol haus na autim tok. Ol i tingim tumas ol wok na ol i no tingim ol blesing. Olsem wanem ol i kisim dispela tingting i pasim rot bilong ol? Planti manmeri i stadi long Baibel, isi isi ol i kisim save na kirap long bihainim. Tasol ol man marit i no bilip, ol i kisim save long olgeta wok ol Kristen i mas mekim taim ol i no stadi yet na kisim laik long mekim.
Manuel em kain man olsem. Em i tok: “Inap 10-pela yia mi go wantaim meri bilong mi long ol kibung na long ol miting. Mi mas tok stret, mi amamas long poromanim ol Witnes, winim ol narapela man, na mi amamas long helpim ol long taim mi gat rot. Mi pilim tru gutpela pasin bilong ol, em narapela i laikim tru narapela. Tasol taim mi tingim wok bilong go long ol haus na autim tok, dispela i olsem bikpela banis i pasim rot bilong mi, na mi tingting planti, nogut ol wanwok i tok bilas long mi.
“Meri bilong mi i no les kwik long mi na em i no wok long subim mi long stadi long Baibel. Gutpela pasin bilong em wantaim ol pikinini, dispela i ‘autim tok’ long mi. Wanpela elda long kongrigesen, em José, em i mekim pasin pren long mi. Mi ting tok bilong em i strongim mi na bihain mi kirap givim bel long stadi. Taim mi baptais pinis, mi save samting i pasim rot bilong mi i stap long tingting tasol. Taim mi tingting pinis long mekim wok bilong Jehova, em i helpim mi long daunim pret.”
Ol meri marit na ol elda Kristen i ken mekim wanem bilong helpim ol man olsem Manuel, na bai ol i daunim samting i pasim tingting bilong ol? Sapos ol i stadi long Baibel, dispela inap helpim ol long kisim laik long mekim wok bilong God. Sapos man i save gut long ol tok bilong Baibel, bai em i bilip na bai bilip bilong em i kirapim em long mekim wok na wetim gutpela samting bilong bihain.—Rom 15:13.
Wanem samting inap kirapim kain man olsem long stadi? Sapos wanpela brata long kongrigesen i pilim hevi bilong man na em i mekim gutpela pasin pren long em, dispela inap helpim em. Ating wanpela elda o narapela brata i gat save pinis em i ken toktok wantaim kain man olsem. Taim narapela i save gut long narapela, sapos brata i tokim em long stadi, ating bai em i orait long dispela. (1 Korin 9:19-23) Meri Kristen i gat gutpela tingting em bai givim sampela liklik hap kaikai bilong spirit long man bilong em, tasol em i save em i no ken subim man long stadi.—Sindaun 19:14.
Manuel i kisim save olsem taim man i kamap strong long spirit, samting i pasim rot bilong em long pastaim na i olsem bikpela maunten, nau em i kamap olsem liklik hip graun tasol. Jehova i save givim strong long ol man i laik mekim wok bilong em. (Aisaia 40:29-31) Strong bilong God na gutpela wok bilong ol strongpela Witnes inap helpim man na bai ol samting i pasim rot bilong em inap tekewe. Bai em i no pret tumas long go long ol haus na autim tok, na bai em i no pret moa long ol wanwok. Bai em i laik givim bel olgeta long mekim wok bilong God.—Aisaia 51:12; Rom 10:10.
Wok Strong i Go
Yumi inap brukim ol samting i pasim rot bilong yumi, olsem 3-pela samting yumi stori pinis long en. Taim balus i laik go antap, ol ensin i mas wok strong tru na kepten wantaim lain bilong em ol i mas putim olgeta tingting i go long wok bilong ol. Taim balus i go antap, ol ensin i pulim bikpela bensin moa, winim olgeta narapela taim. Olsem tasol sapos yumi laik lusim pasin bilong tingim ol samting nogut tasol na pasin bilong bel hevi na bel nogut, yumi mas wok strong tru na putim olgeta tingting bilong yumi i go long dispela wok. Bilong kirap long mekim samting, em hatwok, tasol taim yu kirap pinis i no hatwok tumas long wok strong i go.—Skelim wantaim 2 Pita 1:10.
Yu inap wok strong i go sapos yu bihainim hariap ol tok bilong Baibel em bilong strongim yu. (Song 119:60) Yu ken save kongrigesen i laik helpim yu. (Galesia 6:2) Na bikpela samting tru em olsem: God Jehova yet bai helpim yu. Olsem Devit i tok: “Yumi litimapim nem bilong Bikpela. Olgeta de em i save karim ol hevi bilong yumi.” (Song 68:19) Taim yumi beten na kamapim ol hevi bilong yumi long God, nau yumi pilim olsem samting yumi karim i no hevi tumas.
Sampela taim balus i go antap long taim bilong ren, tasol taim em i brukim ol klaut i go antap moa, nau em i kamap long ples i klin tru na san i lait. Yumi tu inap lusim pasin bilong tingim ol samting nogut. God inap helpim yumi na bai yumi brukim ‘ol klaut,’ olsem ol samting i pasim rot, na bai yumi stap amamas olsem long gutpela san insait long lain bilong Jehova, em ol i stap long olgeta hap bilong graun.
[Ol Piksa long pes 23]
Jehova inap helpim yumi long brukim ol samting i pasim tingting