Olsem Wanem Bel Isi Krais i Save Givim Inap Bosim Bel Bilong Yumi?
“Krais i save givim bel isi long yumi . . . na dispela bel isi i ken bosim tru bel bilong yupela. God i bin singautim yupela bai yupela i ken kamap wanpela bodi tasol.”—KOLOSI 3:15.
1, 2. ‘Bel isi Krais i givim’ i bosim bel bilong Kristen olsem wanem?
DISPELA tok “bosim” em i wanpela tok planti man i no laikim, long wanem, ol i tingim olsem samting bilong subim ol na ol i mas bihainim laik bilong narapela. Olsem na dispela tok Pol i givim ol Kristen long Kolosi, olsem “Krais i save givim bel isi long yumi . . . na dispela bel isi i ken bosim tru bel bilong yupela,” ating sampela i ting dispela tok i no gutpela. (Kolosi 3:15) Yumi stap fri long skelim ol samting yumi laik mekim, a? Olsem na bilong wanem yumi mas larim wanpela samting o wanpela man i bosim bel bilong yumi?
2 Pol i no tokim ol Kolosi long ol i mas daunim olgeta laik bilong ol yet, nogat. Tok Grik ol i tanim olsem “bosim” long Kolosi 3:15 i wankain liklik olsem tok ol i bin mekim long man bilong bosim wanpela spot long dispela taim bipo na givim prais long man i winim pilai. Ol man insait long spot ol i mas bihainim lo bilong en, tasol ol i stap fri liklik long mekim sampela samting. Tasol man i bosim spot em yet i skelim husat i bin bihainim lo bilong dispela spot na i winim pilai. Na yumi tu, yumi stap fri long tingim planti samting yumi mas mekim, tasol taim yumi mekim olsem, bel isi Krais i givim i mas bosim bel bilong yumi.
3. ‘Bel isi Krais i givim’ em i wanem samting?
3 Dispela ‘bel isi Krais i givim’ em i wanem samting? Dispela i makim olsem bel i stap isi, na yumi save kisim dispela kain bel isi taim yumi kamap disaipel bilong Jisas na yumi kisim save olsem God Jehova na Pikinini bilong em i save laikim yumi na orait long yumi. Taim Jisas i laik lusim ol disaipel, em i tokim ol: “Bel isi bilong mi, em mi givim long yupela. . . . Olsem na yupela i no ken bel hevi na tingting planti, na yupela i no ken pret.” (Jon 14:27) Inap olsem 2,000 yia, dispela bel isi i bin stap long lain bilong Krais em spirit holi i bin makim ol, na long nau, dispela bel isi i stap long ol poroman bilong ol, em “ol arapela sipsip.” (Jon 10:16) Dispela kain bel isi i mas bosim bel bilong yumi. Taim yumi kisim bikpela hevi, dispela bel isi bai helpim yumi na bel bilong yumi i no bagarap long pret o tingting planti tumas. Orait nau yumi ken stori long olsem wanem dispela bel isi inap helpim yumi long taim narapela i mekim pasin i no stret long yumi, na long taim yumi tingting planti, na long taim yumi pilim olsem yumi nogut tasol.
Pasin i No Stret
4. (a) Olsem wanem Jisas i bin kisim save long pasin i no stret? (b) Ol Kristen i bin mekim wanem taim ol narapela i mekim pasin i no stret long ol?
4 King Solomon i tok: “Sampela bikman i wok long daunim ol arapela manmeri na mekim nogut long ol.” (Saveman 8:9) Jisas i save dispela tok em i tru. Taim em i stap long heven, em i lukim ol pasin i no stret ol man i mekim long narapela. Long graun, em yet i bin kisim bikpela hevi long pasin i no stret ol man i mekim long em—ol i sutim tok long em olsem em i tok bilas long God, na ol i kilim em i dai olsem wanpela man nogut, maski em i no gat sin. (Matyu 26:63-66; Mak 15:27) Long nau, dispela kain pasin i no stret i stap yet long olgeta hap, na i bin painim ol Kristen tru—‘olgeta lain manmeri i bel nogut tru long ol.’ (Matyu 24:9) Ol i bin kisim bikpela hevi na pen long ol kalabus nogut bilong ol Natsi na ol Soviet, na ol man i bin bung bung bilong mekim nogut long ol, na sampela i bin sutim tok giaman long ol, tasol bel isi Krais i givim i bin helpim ol long stap strong. Ol i bihainim pasin bilong Jisas, em Baibel i stori long em olsem: “Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God.”—1 Pita 2:23.
5. Taim yumi harim olsem wanpela i mekim pasin i no stret long narapela insait long kongrigesen, pastaim yumi mas tingim wanem samting?
5 Orait, olsem wanem sapos yumi ting ol i bin mekim pasin i no stret long wanpela brata o sista insait long kongrigesen Kristen? Long kain taim olsem, ating bai yumi gat wankain tingting olsem bilong Pol, em i tok: “Sapos samting i kamap na i mekim wanpela Kristen i pundaun long sin, orait mi save kros tru long dispela samting.” (2 Korin 11:29) Yumi ken mekim wanem? Yumi mas askim yumi yet, ‘Tru ol i bin mekim pasin i no stret long em?’ Ating yumi no save long olgeta samting bilong dispela hevi, na yumi kirap nogut taim wanpela i stori long yumi long dispela hevi na em i tok em i save gut long en. Em nau, i gat as tru na Baibel i tok: “Ol man i gat liklik save tasol, ol i save bilipim olgeta kain tok.” (Sindaun 14:15) Olsem na yumi mas was gut, a?
6. Sapos yumi ting wanpela i bin mekim pasin i no stret long narapela insait long kongrigesen, yumi ken mekim wanem?
6 Tasol olsem wanem sapos yumi ting narapela i bin mekim pasin i no stret long yumi yet? Sapos bel isi bilong Krais i stap long bel bilong yumi, bai yumi mekim wanem? Ating bai yumi lukim olsem yumi mas toktok wantaim man i bin rongim yumi. Orait bihain, nogut yumi go na kamapim dispela tok long ol man i laik putim yau long en—yumi mas beten na kamapim dispela hevi long Jehova na bilip olsem em bai wokim rot bilong stretim dispela samting. (Song 9:10; Sindaun 3:5) Taim yumi mekim olsem pinis, ating bai yumi stretim dispela hevi long bel bilong yumi yet na “pasim maus.” (Song 4:4) Long planti hevi olsem, yumi ken bihainim tok bilong Pol: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.”—Kolosi 3:13.
7. Long ol samting ol brata i mekim long yumi, olgeta taim yumi mas tingim wanem samting?
7 Tasol maski yumi mekim wanem, yumi mas save yumi no inap bosim ol samting i bin kamap, tasol yumi inap bosim samting yumi yet i mekim. Sapos yumi ting wanpela i bin mekim pasin i no stret long yumi na nau yumi kirap mekim samting i no gat stretpela tingting long en, dispela inap bagarapim bel isi bilong yumi, winim dispela pasin i no stret yumi ting narapela i bin mekim long yumi. (Sindaun 18:14) Na tu, yumi inap pundaun na lusim pasin bilong bung wantaim kongrigesen i go inap long taim yumi ting kongrigesen i stretim pinis dispela rong. Man bilong raitim Song i tok, ol man i laikim tru lo bilong Jehova, “i no gat wanpela samting inap mekim ol i pundaun.” (Song 119:165) Yumi save, sampela taim i gat sampela i save mekim pasin i no stret long yumi. Tasol yu no ken larim ol dispela kain hevi i pasim yu long mekim wok bilong Jehova. Yu mas larim bel isi Krais i givim i bosim bel bilong yu.
Taim Yumi Tingting Planti
8. Wanem sampela samting i mekim na man i tingting planti tumas? Pasin bilong tingting planti inap mekim wanem?
8 Pasin bilong tingting planti i kamap strong tru nau long “taim bilong las de.” (2 Timoti 3:1) Tru, Jisas i tok: “Yupela i no ken tingting planti long laip bilong yupela, na tok, ‘Bai yumi kaikai wanem?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ ” (Luk 12:22) Tasol i no ol samting bilong skin tasol i mekim na yumi tingting planti, nogat. Lot em i “bel hevi tru” long ol kain kain pasin pamuk bilong ol man bilong Sodom. (2 Pita 2:7) Pol i save “tingting planti long pasin bilong lukautim gut olgeta sios.” (2 Korin 11:28) Long nait paslain long taim Jisas i dai, em i pilim hevi nogut tru, na dispela i mekim na “tuhat bilong en i kamap olsem blut na i pundaun long graun.” (Luk 22:44) Olsem na i no olgeta pasin bilong tingting planti i makim olsem yumi no bilip strong. Tasol maski wanem samting i as bilong en, sapos yumi tingting planti tumas na yumi stap olsem i go i go, dispela inap tekewe bel isi bilong yumi. Pasin bilong tingting planti i bin daunim sampela na ol i pilim olsem ol i no inap mekim moa ol wok bilong Jehova. Baibel i tok: “Sapos man i save wari oltaim, em bai i bel hevi tru na tingting bilong en bai i bagarap.” (Sindaun 12:25) Orait yumi ken mekim wanem sapos yumi tingting planti tumas?
9. Wanem sampela samting yumi ken mekim bilong daunim pasin bilong tingting planti? Yumi no inap pinisim wanem ol hevi i save kirapim yumi long tingting planti?
9 Long sampela kain hevi, ating i gat sampela samting yumi ken mekim bilong helpim yumi. Sapos yumi gat wanpela sik na dispela i as na yumi tingting planti, i gutpela sapos yumi wok long stretim dispela sik, tasol samting yu mekim em samting bilong yu yet.a (Matyu 9:12) Sapos yumi gat planti wok tumas, ating yumi ken tilim sampela wok i go long narapela. (Kisim Bek 18:13-23) Tasol olsem wanem long sampela—olsem ol papamama—em ol i gat bikpela wok ol i no inap tilim i go long narapela? Olsem wanem long Kristen i sindaun wantaim poroman marit i birua long lotu bilong em? Olsem wanem long famili i sot tru long mani o ol i sindaun long hap bilong pait? Tru, nau long dispela taim yumi no inap pinisim olgeta hevi i save kirapim yumi long tingting planti. Tasol yumi inap holimpas bel isi Krais i save givim. Olsem wanem yumi ken mekim?
10. Wanem tupela samting Kristen i ken mekim bilong daunim pasin bilong tingting planti tumas?
10 Wanpela samting, em yumi ken lukim Baibel, em i gat ol tok long en bilong mekim bel i stap isi. King Devit i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Song 94:19) Ol tok bilong Jehova bilong mekim ‘bel i stap isi’ ol i stap long Baibel. Sapos oltaim yumi ritim Baibel, dispela bai helpim yumi long holimpas bel isi Krais i save givim. Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Na tu, Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi . . . bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Sapos yumi beten oltaim na beten strong, dispela bai helpim yumi long holimpas bel isi bilong yumi.
11. (a) Jisas i mekim wanem na em i stap gutpela piksa long pasin bilong beten? (b) Yumi mas i gat wanem tingting long pasin bilong beten?
11 Jisas i stap gutpela piksa tru long dispela samting. Sampela taim, em i beten toktok wantaim Papa bilong em long heven inap sampela aua. (Matyu 14:23; Luk 6:12) Beten i helpim em long sanap strong taim bikpela hevi tru i painim em. Long nait paslain long em i dai, em i bel hevi nogut tru. Em i mekim wanem? Em i beten “strong moa.” (Luk 22:44) Tru tumas, dispela Pikinini bilong God i gutpela olgeta em i man bilong beten. Olsem na i bikpela samting moa long yumi lain bilong em i gat sin yumi kisim pasin bilong beten, a? Jisas i lainim ol disaipel long ol i mas “beten long olgeta taim, na ol i no ken les.” (Luk 18:1) Taim yumi beten, yumi toktok wantaim dispela Man em i save gut long olgeta samting bilong yumi, winim yumi yet. (Song 103:14) Em nau, bilong holimpas dispela bel isi Krais i givim, yumi mas “beten oltaim.”—1 Tesalonaika 5:17.
Winim Ol Hevi Bilong Yumi
12. I gat wanem as na ating sampela i pilim olsem wok bilong Jehova ol i mekim i no gutpela tumas?
12 Jehova i tingim olgeta wan wan wokboi bilong em i olsem gutpela samting tru. (Hagai 2:7, NW ) Tasol ating planti ol i hatwok long bilip olsem. Ating sampela i bel hevi, long wanem, ol i wok long go lapun, o wok bilong ol insait long famili i go bikpela, o ol i gat sampela sik. Na sampela i pilim olsem ol i no inap mekim gut wanpela wok, long wanem, taim ol i pikinini yet, i gat sampela hevi i bin painim ol long sindaun bilong ol. Na sampela, em bel bilong ol i gat tok long sampela rong bipo ol i bin mekim, na ol i ting Jehova i no inap lusim tingting long rong bilong ol. (Song 51:3) Taim ol i gat dispela kain bel hevi, ol i ken mekim wanem?
13. Wanem sampela tok bilong Baibel i mekim gut bel bilong ol man i pilim olsem ol i no inap mekim gut wanpela wok?
13 Bel isi Krais i givim bai strongim bel bilong yumi long bilip olsem Jehova i save laikim tru yumi. Yumi inap kamapim bek dispela bel isi taim yumi tingting olsem, Jisas i no bin tok yumi mas skelim wok bilong yumi wantaim wok bilong ol narapela na bai yumi ken save yumi gutpela o nogat. (Matyu 25:14, 15; Mak 12:41-44) Tasol em i kamapim klia olsem pasin bilong i stap gut long God em i bikpela samting. Em i tokim ol disaipel: “Ol manmeri i stap strong inap long las de, God bai i kisim bek ol.” (Matyu 24:13) Ol man i bin “rabisim” Jisas, tasol em i bilip tru olsem Papa bilong em i laikim em tru. (Aisaia 53:3; Jon 10:17) Na em i tokim ol disaipel, em yet wantaim Papa i laikim tru ol. (Jon 14:21) Bilong strongim dispela tok, Jisas i tok: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” (Matyu 10:29-31) Em nau, yumi ken bilip tru olsem Jehova i laikim tru yumi!
14. Olsem wanem yumi ken bilip olsem Jehova i tingim yumi olgeta wan wan i olsem gutpela samting tru?
14 Jisas i tok tu: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Jehova i bin bringim yumi i kam long Jisas bilong yumi ken bihainim em, olsem na yumi save Em i laik kisim bek yumi. Jisas i tokim ol disaipel: “Papa bilong yupela i stap long heven em i no laik bai wanpela bilong ol dispela liklik pikinini i lus.” (Matyu 18:14) Olsem na sapos yu givim bel olgeta long mekim wok bilong God, bai yu inap amamas long ol gutpela wok yu mekim. (Galesia 6:4) Sapos bel bilong yu i gat tok long ol rong bipo yu bin mekim, yu ken bilip tru olsem Jehova i save lusim sin bilong ol man i tanim bel tru. (Aisaia 43:25; 55:7) Sapos i gat narapela as na yu bel hevi, yu mas tingim olsem “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”—Song 34:18.
15. (a) Satan i save mekim wanem bilong tekewe bel isi bilong yumi? (b) Yumi ken bilip tru long wanem pasin bilong Jehova?
15 Satan i gat bikpela laik long tekewe bel isi bilong yu. Em i as bilong sin yumi bin kisim long papamama na yumi olgeta i hatwok long daunim. (Rom 7:21-24) Em i laik bai yu ting olsem yu sinman tasol na God i no inap orait long wok bilong yu. No ken larim Satan i kirapim yu long ting yu nogut tasol! Yu mas save long ol tingting na pasin trik bilong em, na bai yu strong long karim hevi na sanap strong. (2 Korin 2:11; Efesus 6:11-13) Tingim, “sori bilong God i bikpela tru, winim bel bilong yumi, na em i save long olgeta samting.” (1 Jon 3:20, NW ) Jehova i no save lukim ol pasin kranki tasol bilong yumi. Em i save lukim tu bel bilong yumi na ol tingting bilong bel. Tok bilong man bilong raitim Song inap mekim gut bel bilong yu: “Bikpela i no inap lusim ol manmeri bilong en. Tru tumas, em i no inap givim baksait long ol manmeri bilong en.”—Song 94:14.
Stap Wanbel Long Bel Isi Krais i Givim
16. Olsem wanem yumi no stap wanpis taim yumi wok strong long karim hevi na sanap strong?
16 Pol i tok yumi mas larim bel isi Krais i givim i bosim bel bilong yumi, long wanem, God i bin ‘singautim yumi long kamap wanpela bodi.’ Ol Kristen God i makim ol long spirit holi na Pol i raitim pas long ol, wantaim ol narapela bilong dispela lain i stap yet long graun, God i bin singautim ol na bai ol i ken kamap bodi bilong Krais. Ol poroman bilong ol bilong “ol arapela sipsip,” ol i stap wanbel wantaim ol insait long “wanpela lain sipsip” aninit long “wanpela wasman,” Jisas Krais. (Jon 10:16) Dispela “lain sipsip” i stap long olgeta hap, ol inap olsem planti milion na ol i wok wantaim long larim bel isi bilong Krais i bosim bel bilong ol. Em nau, yumi save yumi no stap wanpis, na dispela i helpim yumi long karim hevi na sanap strong. Pita i tok: “Yupela i mas i stap strong long bilip na sakim [Satan]. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.”—1 Pita 5:9.
17. I gat wanem as na yumi mas larim bel isi Krais i givim i bosim bel bilong yumi?
17 Olsem na yumi olgeta i mas wok long kisim pasin bilong bel isi, em wanpela pasin spirit holi bilong God i kamapim. (Galesia 5:22, 23) Ol man Jehova i lukim ol i stap klin na i no gat asua na ol i stap wanbel wantaim, bihain ol bai kisim laip oltaim long Paradais long graun i gat stretpela pasin tasol i stap long en. (2 Pita 3:13, 14) Olsem na i gat as tru na yumi mas larim bel isi Krais i givim i bosim bel bilong yumi.
[Futnot]
a Sampela taim, as bilong tingting planti em sampela sik olsem sik bilong bel hevi.
Yu Inap Tingim?
• Wanem dispela bel isi Krais i givim?
• Olsem wanem bel isi Krais i givim inap bosim bel bilong yumi taim wanpela i mekim pasin i no stret long yumi?
• Olsem wanem bel isi Krais i givim i helpim yumi taim yumi tingting planti?
• Olsem wanem bel isi Krais i givim i mekim gut bel bilong yumi taim yumi pilim olsem yumi nogut tasol?
[Piksa long pes 15]
Taim ol i sutim tok long Jisas, em i putim em yet long han bilong Jehova
[Piksa long pes 16]
Kain olsem gutpela papa i holim yumi, ol tok bilong Jehova inap mekim isi bel bilong yumi taim yumi tingting planti
[Piksa long pes 18]
Pasin bilong sanap strong em i bikpela samting long ai bilong God