Kisim Tok Bilong Stretim Yu na Bai Yu Lain Long Bihainim Tok
SAPOS yu sanap antap long bikpela maunten na yu lukluk nabaut, bai yu pilim olsem yu fri tru na yu amamas!
Tasol yu no fri tru, long wanem, sapos yu kalap o putim kranki lek bilong yu bai yu inap bagarap. Tasol gutpela tru i gat dispela samting, olsem wanpela lo, na i save holim gut yu long graun na bai yu no trip i go antap na lusim graun. Em i bilong helpim yu, a? Olsem na taim yu sanap antap long dispela maunten, gutpela yu bihainim dispela lo na bai yu stap laip.
Tru, sampela taim sapos yumi mas bihainim ol lo na tok, dispela i pasim yumi liklik, tasol yu ting i gutpela yumi mas mekim olsem?
God i Ting Olsem Wanem Long Pasin Bilong Bihainim Tok
“God i bin wokim yumi olgeta,” na em i “as tru bilong laip bilong olgeta samting,” olsem na i stret long olgeta man i mas daun long God Jehova na bihainim tok bilong em. Baibel i tok: “Yumi daunim het na lotu long em. Bikpela i bin wokim yumi. Orait yumi . . . brukim skru. Em yet i God bilong yumi. Em yet i save lukautim yumi.”—Saveman 12:1; Song 36:9; 95:6, 7.
Long olgeta taim Jehova i laik bai olgeta samting i mas daun long em. Sapos Adam tupela Iv i bin mekim olsem, ol inap i stap yet long Paradais. (Stat 2:16, 17) Na ol ensel tu i mas mekim olsem, maski ol i spirit na i winim yumi ol man bilong graun. Bipo sampela bilong ol “dispela ol spirit . . . i bin sakim tok bilong God long taim bilong Noa,” olsem na “God i no larim ol. Nogat. Em i kalabusim ol long . . . dispela hul i tudak nogut tru. Na ol i kalabus i stap yet na wetim De bilong bikpela kot bilong God.”—1 Pita 3:19, 20; 2 Pita 2:4.
Orait, yumi ken tok klia olsem: Yumi mas bihainim tok bilong God na bai em i ken orait long yumi. Baibel i tok: “Bikpela i laikim wanem pasin? . . . Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.”—1 Samuel 15:22.
Mas Lain Long Bihainim Tok
Taim yumi bihainim tok bilong God yumi stap olsem stretpela man long ai bilong em, olsem na yumi mas lain long mekim dispela samting. I olsem long taim yumi lainim narapela tok ples, yumi mas bihainim lo bilong dispela tok ples. Ol yangpela i save kisim kwik ol save, olsem na Baibel i tok yumi mas lainim pikinini taim em i liklik yet.—Josua 8:35.
Sampela man i tok, dispela tok i no stret. Ol i tok, no ken subim pikinini long bihainim tok; larim em i bihainim tingting na laik bilong em yet; no ken bosim em. Ol i save tok olsem.
Bihain liklik long 1960 planti papamama i bin ting olsem, tasol wanpela saveman, em Wilhelm Hansen, em i tok, dispela i no stret. Em i tok: ‘Taim pikinini i liklik yet papamama i mas bosim em na tambuim em long mekim ol samting i no stret, na ol i mas lainim em long ol samting i stret. Olsem na em i mas bihainim tok na bai em i ken abrusim ol pasin nogut na wokabaut long stretpela pasin na stap gut long ol gutpela lo.’—Lukim Sindaun 22:15.
Baibel i tok, yumi mas lain long bihainim tok. Em i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) I gat planti stori bilong ol man ol i bihainim laik bilong ol yet na hevi i painim ol. Long wanem, ol man yet i no gat save inap long stiaim wokabaut bilong ol na bai i ken i go stret. Save bilong ol i no inap; em i sot. Na ol i bin kisim pasin kranki long papamama bilong ol tu. Bihain long Tait Wara Jehova i bin tok: “Stat long taim ol manmeri i yangpela yet ol i save tingting long mekim ol pasin nogut.”—Stat 8:21.
Em nau, taim mama i karim yumi, pasin bilong bihainim tok bilong Jehova i no stap long bel bilong yumi. Olsem na yumi mas skulim ol pikinini long olgeta taim, na yumi olgeta i mas lain long olgeta taim long bihainim tok bilong Jehova. Na yumi mas i gat tingting olsem bilong King Devit, em i bin beten olsem: “God, yu mas skulim mi long gutpela pasin bilong yu, na soim mi long rot bilong yu. Lainim mi long bihainim tok tru bilong yu.”—Song 25:4, 5.
Bihainim Tok na Bai Yu Lainim Ol Narapela Tu Long Mekim
Mama na waspapa bilong Jisas i save long olsem wanem Maria i bin kisim bel na karim Jisas, olsem na tupela i save bai i gat bikpela wok Jehova i laik bai Jisas i mas mekim long bihain. (Lukim Luk 1:35, 46, 47.) Tupela i pilim tru wanpela tok i tok: “God i mekim gut long yumi na givim yumi ol pikinini olsem presen.” (Song 127:3) Tupela i save ol i gat bikpela wok long lukautim na lainim gut dispela pikinini, na tupela i mas larim God i stiaim tingting bilong tupela, olsem long taim God i tokim tupela long kisim pikinini na ranawe i go long Isip, na bihain ol i mas kam bek long Galili.—Matyu 2:1-23.
Na papamama bilong Jisas i save tu long ol i mas stretim Jisas long sampela taim. Tru, taim Jisas i stap yet long heven em i lain pinis long bihainim tok, tasol taim em i kam long graun em i lain moa long mekim olsem long olgeta taim. Em i mas bihainim tok bilong Josep tupela Maria, maski tupela i no gutpela olgeta. Tru, ol i no gat wok long strafim em, tasol ol i mas skulim na lainim em long ol samting, na em i bin harim gut tok bilong tupela. Baibel i tok: “Em i go bek wantaim tupela, na ol i kamap long Nasaret, na oltaim em i bihainim tok bilong tupela.”—Luk 2:51.
Na Josep tupela Maria yet i save bihainim gutpela pasin na bai Jisas i ken lukim na mekim olsem. Na tupela i save tu em wok bilong tupela long lainim gut Jisas na stretim em long taim ol i wok long mekim bikpela long em. Baibel i tok: “Long olgeta yia papamama bilong Jisas i save go long Jerusalem bilong lukim Bikpela De [pasova].” (Luk 2:41) Josep i tingim famili i mas strong long ol samting bilong spirit, olsem na em i kisim ol i go bilong lotuim Jehova, na dispela i save lainim ol. Olsem tasol long nau, ol papamama i mas bihainim ol samting bilong lotu na bai ol pikinini i ken lain long mekim olsem.
Josep tupela Maria i skulim Jisas long stretpela pasin, olsem “na Jisas i kamap bikpela, na save bilong en i kamap gutpela tru. Na God i laikim em tru na ol man tu i laikim em.” Em gutpela pasin ol papamama Kristen bilong nau tu i ken mekim!—Luk 2:52.
“Bihainim Tok . . . Long Olgeta Samting”
Baibel i tok: “Yupela pikinini, yupela i mas bihainim tok bilong papamama bilong yupela long olgeta samting. Bikpela i save laikim dispela kain pasin.” (Kolosi 3:20) I no hatwok long Jisas i bihainim tok bilong papamama bilong em long olgeta samting, long wanem, tupela yet i bihainim tok bilong Jehova, olsem na tupela i no ken tokim Jisas o ol narapela pikinini bilong tupela long mekim wanpela samting i no stret long laik bilong Jehova.
Long nau tu planti papamama i bin lainim gut ol pikinini long bihainim tok long olgeta samting. Harim stori bilong 3-pela papa nau ol i wok long brens-ofis bilong Sosaiti Was Taua.
Tio na meri bilong em i bin mekim bikpela long 5-pela pikinini man, na em i tok: “Yumi mas tokim pikinini, yumi tu i save popaia planti taim na olgeta taim yumi mas askim Papa long heven long lusim ol dispela rong na helpim yumi, na mipela i no haitim long pikinini ol hatwok bilong mipela long bihainim pasin i stret, olsem ol tu i hatwok long mekim olsem.”
Sapos pikinini i mas lain long bihainim tok, pasin sori i mas i stap namel long pikinini wantaim papamama. Hemon i tok: “Meri bilong mi i bin stap gutpela mama na gutpela pren bilong ol pikinini bilong mipela, na ol i amamas long dispela, olsem na i no hatwok long ol i bihainim tok.” Na bilong helpim ol famili, Hemon i tok: “Mipela i no bin kisim masin bilong wasim ol plet samting, long wanem, mipela laik wok wantaim long mekim dispela wok na bai mipela i ken toktok na amamas wantaim.”
Olsem yumi tok pinis, pasin sori i mas i stap namel long papamama wantaim ol pikinini, wankain olsem i stap namel long Kristen wantaim Jehova. Rudolf i stori long em wantaim meri bilong em i bin mekim olsem long tupela pikinini bilong ol, na em i tok: “Oltaim mipela i wokim famili-stadi, na mi givim wok long tupela long painim sampela save long ol samting insait long stadi. Na mipela wantaim i bung na kaunim Baibel na stori long en. Tupela i save papamama tu i mas bihainim tok bilong Jehova, i no ol pikinini tasol.”
Baibel i tok, “Tok bilong papamama i olsem wanpela lam i lait gutpela bilong soim rot long yu. Na taim tupela i stretim yu, tupela i soim yu gutpela pasin yu mas bihainim long laip bilong yu.” Olsem na papamama Kristen i save ol tu i mas bihainim tok bilong Jehova. Pikinini i mas bihainim tok bilong papamama long olgeta samting, na papamama i mas bihainim tok bilong Jehova long olgeta samting. Papamama wantaim ol pikinini i mas strongim pasin sori namel long ol, na ol i mas mekim olsem long pasin sori i stap namel long ol wantaim God.—Sindaun 6:23.
Amamas Long Bihainim Tok
Yumi amamas long Baibel i givim gutpela tok long yumi long pasin bilong mekim bikpela long pikinini! (Lukim blok.) Sapos papamama i skulim gut pikinini long stretpela pasin na long bihainim tok, dispela pikinini bai givim bikpela amamas long tupela, na ol narapela Kristen tu bai amamas long em.
Yumi mas bihainim tok bilong God na bai yumi ken i stap laip, olsem na yumi no ken kalapim sampela lo bilong God liklik na bai yumi ken bihainim laik bilong yumi. Sapos yumi stap antap long maunten, na yumi maski long dispela lo i holim gut yumi long graun, na yumi kalap, na yumi ting bai yumi flai olsem pisin, bai yumi pundaun na kisim bagarap, a?
Sapos yumi lain long bihainim tok, bai yumi kisim gutpela pasin na stretpela tingting, na yumi ken save yumi no inap mekim olgeta samting yumi gat tingting long mekim, o strong long bihainim laik bilong yumi yet, o givim baksait long laik bilong ol narapela man. Na bai yumi save long ol samting yumi mas mekim, na bai yumi stap amamas.
Olsem na maski yu bikpela pinis o yu pikinini, yu mas lain long bihainim tok na bai “olgeta wok samting yu mekim i ken kamap gutpela, na bai yu stap longpela taim long dispela graun.” (Efesus 6:1-3) Nogut yumi bikhet na nau yumi no inap stap laip oltaim, a?—Jon 11:26.
[Blok long pes 29]
PAPAMAMA, SKULIM OL LONG BIHAINIM TOK NA STRETPELA PASIN
1. Bihainim tok bilong Baibel taim yu stretim ol.
2. No ken tok ol i mas bihainim tok; tokim ol, pasin bilong bihainim tok em savepasin.—Matyu 11:19b.
3. No ken belhat o bikmaus taim yu stretim ol.—Efesus 4:31, 32.
4. Bihainim pasin sori taim yu stretim ol.—Kolosi 3:21; 1 Tesalonaika 2:7, 8; Hibru 12:5-8.
5. Stretim pikinini taim em i liklik yet.—2 Timoti 3:14, 15.
6. Stretim ol long olgeta taim.—Lo 6:6-9; 1 Tesalonaika 2:11, 12.
7. Stretim yu yet na dispela bai lainim ol long mekim olsem.—Jon 13:15; lukim Matyu 23:2, 3.
8. Taim yu stretim ol, beten askim Jehova long helpim yu long mekim olsem.—Hetman 13:8-10.
[Piksa long pes 28]
Ol i “stretim yu” na “soim yu gutpela pasin yu mas bihainim long laip bilong yu”