“Oltaim Yupela i Mas Mekim Gutpela Tok Tasol”
1 “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” (Kl. 4:6) Bilong mekim gutpela tok tasol, dispela i makim olsem yumi mas tingim ol tok i stret long mekim na mekim long pasin ol man i amamas long harim. Em i bikpela samting tru long mekim olsem taim yumi mekim wok autim tok.
2 Pasin Bilong Jisas: Taim Jisas i malolo klostu long wanpela hul wara, em i kirap long toktok wantaim wanpela meri Samaria husat i kam bilong kisim wara. Taim ol i toktok, inap planti taim liklik, meri hia i toktok long pasin birua i stap namel long ol Juda na ol Samaria. Em i tok tu olsem em i bilip olsem ol Samaria ol i tumbuna pikinini bilong Jekop, maski ol Juda i bilip strong olsem ol Samaria i tumbuna pikinini bilong ol narapela lain. Jisas i no kirap tok pait wantaim dispela meri, nogat, em i kamapim ol gutpela tok. Olsem na Jisas inap autim ol tok i helpim dispela meri na ol man bilong taun.—Jo. 4:7-15, 39.
3 Taim yumi autim tok, yumi mas tingim samting yumi laik mekim—em long “autim gutnius bilong ol gutpela samting.” (Ro. 10:15, NW ) Yumi laik autim ol gutpela tok bilong Baibel i strongim bel bilong man, na yumi no laik bai man bilong haus i ting yumi sutim tok long ol bilip bilong em. Sapos em i kamapim tok i no stret, yumi no gat wok long stretim tok bilong em. Olsem wanem? Em i mekim sampela tok yumi ken wanbel long en o yumi ken tok amamas long en? Ating yumi ken kamapim wanpela skripsa na tok, “Sampela taim yu bin tingting long dispela tok?”
4 Olsem wanem sapos man bilong haus i tok nogut long yumi o i luk olsem em i laik tok pait tasol? Yumi mas mekim yet pasin isi long rot bilong pasin na toktok bilong yumi. (2 Ti. 2:24, 25) Sapos man i no laik harim tok bilong Kingdom, mobeta yumi lusim man long gutpela pasin.—Mt. 7:6; 10:11-14.
5 Ol Gutpela Samting i Kamap: Taim wanpela sista i traim long autim tok long neiba bilong em, dispela meri i kros na mekim tok swea. Long gutpela pasin sista i tok: “Sori tru long yu pilim olsem. Em orait, bai mi lusim yu.” Tupela wik bihain, dispela meri i paitim dua bilong sista hia, na tok sori long pasin em i bin mekim, na tok olsem em i laik harim tok sista i laik autim. Planti taim ol gutpela tok i kamapim ol gutpela samting!—Snd. 15:1; 25:15.
6 Wok strong long mekim ol gutpela tok taim yu autim gutnius. Maski sapos man bilong haus i no laik harim tok, ating bihain taim wanpela Witnes Bilong Jehova i kam long haus bilong em, em bai redi long putim yau.
[Askim Bilong Stadi]
1. Wanem mining bilong tok “mekim gutpela tok tasol”?
2. Olsem wanem Jisas inap autim tok long wanpela meri Samaria?
3. Olsem wanem yumi ken bihainim pasin bilong Jisas taim yumi autim tok?
4. Yumi mas mekim wanem sapos man bilong haus i tok nogut long yumi?
5. Wanem gutpela samting i painim wanpela sista i bekim tok long gutpela pasin?
6. Bilong wanem em i bikpela samting long mekim ol gutpela tok taim yumi autim tok?