LESEN 15
Jisas Em i Husat?
Kirap long bipo yet na i kam, planti manmeri i save long Jisas. Planti i save long nem bilong Jisas, tasol ol i no save gut long em, na planti i gat kain kain tingting long Jisas i husat tru. Baibel i tok wanem long Jisas?
1. Jisas em i husat?
Jisas em i wanpela spirit i gat bikpela strong i stap long heven. Jehova God i wokim Jisas paslain long em i wokim olgeta arapela samting. Dispela i as na Baibel i kolim em olsem “fesbon bilong olgeta samting God i bin wokim.” (Kolosi 1:15) Baibel i kolim Jisas olsem “dispela Pikinini tru” bilong God bikos Jehova yet i wokim Jisas. (Jon 3:16) Jisas i wok gut wantaim Papa bilong em, Jehova, na helpim em long wokim olgeta arapela samting. (Ritim Provep 8:30.) Jisas i pas gut yet wantaim Jehova. Em i stap gut long wok bilong em olsem mausman bilong God, olsem “Tok,” na em i bringim tok bilong God i go long ol man.—Jon 1:14.
2. Wai na Jisas i kam daun long graun?
Inap 2,000 yia i go pinis, Jehova i wokim wanpela mirakel. Em i yusim holi spirit long kisim laip bilong Jisas long heven na putim insait long bel bilong wanpela yangpela meri, husat i no bin slip wantaim man. Nem bilong em Maria. Long dispela rot, Jisas i bon olsem wanpela man long graun. (Ritim Luk 1:34, 35.) Jisas i kam long graun olsem Mesaia, o Krais, em man God i bin tok promis long en na em bai kisim bek ol man.a Jisas i inapim olgeta tok promis em Baibel i mekim long Mesaia, na dispela i helpim ol manmeri long luksave olsem Jisas em i “dispela Krais, Pikinini bilong dispela God i stap laip.”—Matyu 16:16.
3. Nau Jisas i stap we?
Bihain long Jisas i dai olsem wanpela man bilong graun, God i kirapim em bek olsem wanpela spirit na em i go bek long heven. Na “God i givim bikpela namba moa long em.” (Filipai 2:9) Nau Jisas i gat bikpela namba—tasol em i stap namba 2 long Jehova.
KISIM SAMPELA SAVE MOA
Kisim save moa long Jisas em i husat tru na wai na em i bikpela samting long kisim save long em.
4. Jisas i no God i Gat Olgeta Strong
Baibel i tok olsem maski Jisas em i wanpela spirit i gat bikpela strong i stap long heven em i aninit long Jehova, em God na Papa bilong em. I gat wanem as na yumi tok olsem? Pilaim VIDIO na lukim tok Baibel i mekim long hau na namba bilong Jisas i no wankain long namba bilong God i Gat Olgeta Strong.
Ol dispela skripsa bai helpim yumi long kliagut olsem Jehova na Jisas i no wankain. Ritim wan wan skripsa na stori long ol askim.
Ritim Luk 1:30-32.
Olsem wanem tok ensel i mekim i soim olsem Jisas na Jehova, em “God Antap Tru,” tupela i no wankain?
Ritim Matyu 3:16, 17.
Taim Jisas i baptais pinis, wanpela nek long heven i tok wanem?
Yu ting em nek bilong husat?
Ritim Jon 14:28.
Husat i gat bikpela krismas na bikpela namba moa? Papa o pikinini man?
Taim Jisas i kolim Jehova olsem Papa bilong em, dispela i skulim yumi long wanem samting?
Ritim Jon 12:49.
Olsem wanem? Jisas i ting em i gat wankain namba olsem Papa bilong em? Wanem tingting bilong yu.
5. Wanem ol samting i soim olsem Jisas em i Mesaia?
Baibel i gat planti tok profet inap helpim ol manmeri long luksave long Mesaia—em man God i makim bilong kisim bek ol manmeri. Pilaim VIDIO bilong kisim save long sampela tok profet em Jisas i inapim taim em i kam long graun.
Ritim ol dispela tok profet bilong Baibel, na stori long ol dispela askim:
Ritim Maika 5:2 bilong kisim save long wanem hap Mesaia bai bon.b
Yu ting Jisas i bon long dispela hap olsem Baibel i tok profet long en?—Matyu 2:1.
Ritim Buk Song 34:20 na Sekaraia 12:10 bilong kisim save long ol tok profet Baibel i mekim long dai bilong Mesaia.
Olsem wanem? Ol dispela tok profet i kamap tru?—Jon 19:33-37.
Yu ting Jisas i mekim ol samting bilong stiaim ol dispela tok profet long kamap tru?
Dispela i kamapim klia wanem samting long Jisas?
6. Yumi kisim save long Jisas na dispela i helpim yumi
Baibel i tokaut olsem em i bikpela samting long yumi mas kisim save long Jisas na ol samting God i laik em i mas mekim. Ritim Jon 14:6 na 17:3, na stori long dispela askim:
Bilong wanem em i bikpela samting long kisim save long Jisas?
SAMPELA MAN I TOK: “Ol Witnes Bilong Jehova i no bilip long Jisas.”
Bai yu tok wanem?
OL BIKPELA POIN
Jisas em i wanpela spirit i gat bikpela strong. Em i Pikinini Man Bilong God na em dispela Mesaia.
Riviu
Wai na Baibel i kolim Jisas olsem “fesbon bilong olgeta samting God i bin wokim”?
Jisas i bin mekim wanem ol samting paslain long em i kam daun long graun?
Olsem wanem yumi save olsem Jisas em dispela Mesaia?
MEKIM WOK PAINIMAUT
Kisim save moa long hau yumi save Jisas em i Mesaia.
“Yu Ting Ol Tok Profet Bilong Mesaia i Soim Olsem Jisas Em i Mesaia?” (Atikol long websait)
Painimaut sapos Baibel i stori olsem God i kamapim Jisas long wankain pasin olsem ol man bilong graun i save kamapim ol pikinini.
“Wai na Baibel i Kolim Jisas Olsem Pikinini Bilong God?” (Atikol long websait)
Skelim wai na Baibel i no as bilong dispela bilip bilong God Triwan.
Ritim stori bilong wanpela meri em i skelim tok Baibel i mekim long Jisas na dispela i senisim laip bilong em.
“Wanpela Meri Juda i Stori Long As na Em i Skelim Gen Bilip Bilong Em” (Kirap!, Me 2013)