“Yupela Lukaut, Nogut Wanpela i Trapim Yupela”!

 1. Olsem Kolosi 2:4, 8 i tok, Satan i yusim wanem samting olsem trap bilong pulim yumi long bihainim tingting bilong em?

SATAN i laik bai yumi givim baksait long Jehova. Em i traim long pulim tingting bilong yumi na stiaim yumi long bihainim tingting bilong em. Em i yusim wanpela trap—em i yusim ol samting yumi laikim o amamas long en.—Ritim Kolosi 2:4, 8.

2-3. (a) Wai na yumi mas tingim tok lukaut i stap long Kolosi 2:8? (b) Long dispela atikol, yumi bai stori long wanem samting?

² Yu ting tru tru em isi long Satan inap paulim yumi? Yes, em isi tru! Long Kolosi 2:8, Pol i givim tok lukaut long ol Kristen em God i anointim long holi spirit. (Kol. 1:2, 5) Maski i olsem, ol i kisim tok lukaut bikos Satan i laik tru long trikim ol, na em i laik trikim yumi long nau tu. (1 Kor. 10:12) Bilong wanem? Jisas na ol ensel i tromoi Satan i kam daun long graun, na em i holim wanpela tingting tasol long giamanim ol wokman bilong God. (Rev. 12:9, 12, 17) Na tu, yumi stap long haptaim we ol man nogut na ol man bilong giaman “i go nogut moa.”—2 Tim. 3:1, 13.

³ Long dispela atikol, yumi bai stori long olsem wanem Satan i yusim ol “tok giaman” bilong pulim tingting bilong yumi. Yumi bai painimaut long 3-pela “pasin trik” bilong em. (Efe. 6:11) Long atikol i kamap bihain, yumi bai stori long olsem wanem yumi inap rausim ol tingting bilong Satan. Pastaim yumi ken stori long skul yumi inap kisim long pasin Satan i bihainim long trikim lain Israel bihain long ol i go sindaun long Graun Bilong Promis.

4-6. Olsem Lo 11:10-15 i kamapim, wanem senis i kamap long sait bilong wok gaden taim lain Israel i go sindaun long Graun Bilong Promis?

⁴ Satan i trikim lain Israel na ol i lotuim ol imis. Hau na em i trikim ol? Em i save olsem ol i nidim kaikai, olsem na em i traim long yusim dispela laik long pulim ol long bihainim laik bilong em. Taim lain Israel i go sindaun long Graun Bilong Promis, ol i mas lainim nupela wei bilong wokim gaden. Long Isip, ol i bin go long Nail na kisim wara bilong yusim long gaden. Tasol long Graun Bilong Promis, i no gat bikpela wara bilong helpim ol. Ol i mas wetim ren long pundaun, o larim wara bilong nait i givim wara long gaden. (Ritim Lo 11:10-15; Ais. 18:4, 5) Olsem na lain Israel i mas lainim ol nupela wei bilong wokim gaden. Dispela i no isi bikos planti bilong ol lain husat i save gut long wokim gaden, ol i dai taim lain Israel i stap yet long ples drai nating.

⁵ Jehova i tokim ol manmeri bilong em olsem sindaun bilong ol i senis. Bihain em i givim tok lukaut; ating long pastaim i luk olsem dispela tok lukaut i no stret long sait bilong wok gaden. God i tok: “Yupela i mas was gut, nogut bel bilong yupela i kirap na yupela go longwe long mi na lotuim ol arapela god na brukim skru long ol.” (Lo 11:16, 17) Jehova i tokim lain Israel long kisim save long nupela wei bilong wokim gaden. Olsem na bilong wanem em i tok lukaut long pasin bilong lotuim ol giaman god?

⁶ Jehova i save olsem lain Israel bai tingting long i go long ol lain haiden i stap klostu na kisim save long ol nupela wei bilong wokim gaden. Em tru olsem ol dispela lain i gat bikpela save bilong wok gaden, olsem na lain Israel inap go long ol na kisim sampela gutpela save, tasol hevi inap kamap. Ol dispela fama bilong Kenan i lotuim god Bal. Ol i bilip olsem Bal em papa bilong skai na man bilong givim ren. Jehova i no laik bai ol dispela kain bilip giaman i paulim lain bilong em. Tasol planti taim lain Israel i bihainim pasin bilong lotuim Bal. (Nam. 25:3, 5; Het. 2:13; 1 Kin. 18:18) Orait yumi bai stori nau long olsem wanem Satan i pulim lain Israel long bihainim tingting bilong em.

 7. Wanem traim i painim lain Israel taim ol i go sindaun long Graun Bilong Promis?

⁷ Namba 1 trap bilong Satan: Em i yusim samting em lain Israel i laik bai kamap—ren i mas pundaun na givim wara long graun. Long Graun Bilong Promis, ren i no save pundaun tumas long pinis bilong mun Epril i go inap long Septemba. Lain Israel i save wetim ren i pundaun long Oktoba na bai ol inap kisim wara bilong dring, kukim kaikai, na yusim long gaden. Satan i trikim ol long bilip olsem sapos ol i laik bai ol i gat gutpela sindaun, orait ol i mas bihainim ol kastam bilong lain haiden. Ol haiden i bilip olsem ol i mas bihainim sampela kain kastam na bai ol god bilong ol i mekim ren i pundaun. Ol lain husat i slek long bilip, ol i ting dispela tasol em rot bilong mekim ren i pundaun, olsem na ol i bihainim kastam bilong ol haiden na lotuim god Bal.

 8. Wanem namba 2 trap bilong Satan? Eksplenim.

⁸ Satan i yusim namba 2 trap bilong trikim lain Israel. Em i kirapim ol long inapim ol laik nogut bilong bodi. Long wok lotu bilong ol haiden, ol i save mekim olgeta kain pasin pamuk i nogut tru. Olsem na ol manmeri i mekim wok pamuk long tempel. Na tu, man i slip wantaim man, meri i slip wantaim meri, na ol man i mekim kain kain pasin sem na ol i pilim olsem dispela em nomol samting! (Lo 23:17, 18; 1 Kin. 14:24) Ol haiden i bilip olsem ol dispela kastam i amamasim ol god bilong ol, olsem na ol dispela god i mekim graun i kamapim planti kaikai. Planti manmeri bilong lain Israel i laikim ol dispela kastam we i sapotim pasin pamuk, olsem na ol tu i kirap lotuim ol god giaman. Long dispela rot, Satan i kalabusim ol.

 9. Olsem Hosea 2:16, 17 i kamapim, olsem wanem Satan i mekim na lain Israel i lusim tingting long ol pasin tru bilong Jehova?

⁹ Satan i yusim namba 3 trap. Em i mekim na lain Israel i lusim tingting long ol pasin tru bilong Jehova. Long taim bilong profet Jeremaia, Jehova i tok ol giaman profet i kirapim ol manmeri long “tingim Bal” na lusim tingting long nem bilong Jehova. (Jer. 23:27) Ol manmeri bilong God i stop long yusim nem Jehova na ol i senisim wantaim nem Bal, mining bilong en “Papa bilong wanpela samting” o “Bosman.” Dispela i mekim na ol Israel i hatwok long luksave olsem Jehova i no wankain long god Bal, olsem na ol i miksim ol kastam bilong lotuim Bal wantaim pasin bilong lotuim Jehova.—Ritim Hosea 2:16, 17 na futnot.

10. Satan i yusim wanem ol trap long nau?

¹⁰ Long nau, Satan i yusim ol wankain trap long kalabusim ol manmeri. Em i kirapim ol long inapim laik bilong bodi, em i strongim pasin pamuk, na stiaim ol manmeri long lusim tingting long ol stretpela lo bilong Jehova. Pastaim yumi ken skelim dispela namba 3 trap.

11. Satan i mekim wanem na ol manmeri i lusim tingting long Jehova?

¹¹ Satan i mekim na ol manmeri i lusim tingting long Jehova. Bihain long ol aposel i dai, ol apostet i stat long skulim ol man long ol bilip giaman. (Apo. 20:29, 30; 2 Tes. 2:3) Dispela i pasim ol manmeri long save long God tru em i husat. Taim ol apostet i mekim ol kopi bilong Baibel, ol i stop long yusim nem bilong God na ol i putim ol kain tok olsem “Bikpela.” Olsem na i hatwok long ol man i luksave olsem Jehova i narapela kain long ol man em Baibel i kolim ol olsem “bikpela.” (1 Kor. 8:5) Ol i yusim wankain tok, “Bikpela,” bilong makim Jehova na Jisas, olsem na i hatwok long ol man i save olsem Jehova na Pikinini bilong em ol i narapela narapela. (Jon 17:3) Dispela i paulim ol man na ol i kamapim bilip bilong God Triwan—Baibel i no as bilong dispela bilip. Olsem na planti manmeri i pilim olsem God i stap longwe tru na yumi no inap tru long save gut long em. Dispela em wanpela bikpela tok giaman!—Apo. 17:27.

12. (a) Ol lotu giaman i mekim wanem pasin i kamap olsem nomol samting? (b) Olsem Rom 1:28-31 i kamapim, dispela i kamapim wanem hevi?

¹² Satan i kirapim ol man long inapim ol laik nogut bilong bodi. Long taim bilong ol Israel long bipo, Satan i yusim lotu giaman long strongim pasin pamuk. Em i mekim wankain samting long nau. Ol lotu giaman i orait long pasin pamuk na mekim dispela pasin i kamap olsem nomol samting. Olsem na ol manmeri husat i tok ol i lotuim God, ol i stop long bihainim ol stretpela lo bilong God. Aposel Pol i stori long hevi i kamap long dispela pasin taim em i raitim pas i go long ol Kristen long Rom. (Ritim Rom 1:28-31.) Sampela bilong “ol pasin i no stret” em olkain pasin pamuk, kain olsem man i slip wantaim man na meri i slip wantaim meri. (Rom 1:24-27, 32; Rev. 2:20) Em i bikpela samting tru long yumi mas bihainim gut ol tok bilong Baibel!

13. Wanem narapela trap bilong Satan?

¹³ Satan i laik kirapim ol man long inapim ol nomol laik bilong bodi. Yumi olgeta i laik kisim sampela kain trening na bai yumi yusim dispela save long mekim wok mani na lukautim yumi yet na famili bilong yumi. (1 Tim. 5:8) Yumi inap kisim gutpela trening taim yumi go long skul na stadi gut. Tasol yumi mas was gut. Ol skul long planti kantri i skulim ol sumatin long save bilong mekim wok, na tu, ol i skulim ol long savetingting bilong dispela graun. Ol i kirapim ol sumatin long sakim tok bilong Baibel na kisim tupela tingting long God, olsem em i no stap tru. Ol i tokim ol sumatin olsem olgeta saveman i bilip olsem laip i kamap long rot bilong evolusen. (Rom 1:21-23) Dispela tok i no stret wantaim “savetingting bilong God.”—1 Kor. 1:19-21; 3:18-20.

14. Savetingting bilong graun i kirapim ol man long mekim wanem?

¹⁴ Savetingting bilong ol man i no stret wantaim ol stretpela lo bilong Jehova. Savetingting bilong graun i kirapim ol man long mekim “ol pasin em laik nogut bilong bel i kamapim,” na ol i sakim ol pasin em holi spirit i kamapim. (Gal. 5:19-23) Ol i kisim pasin antap na apim nem bilong ol yet, na ol i “laikim ol yet tasol.” (2 Tim. 3:2-4) Ol dispela pasin i nogut tru na i no wankain long pasin em God i laik bai ol wokman bilong em i bihainim, em pasin daun. (2 Sml. 22:28) Sampela Kristen i go skul long yunivesiti, na ol i sakim tingting bilong God na larim savetingting bilong dispela graun i stiaim ol. Yumi ken skelim wanpela eksampel bilong dispela hevi.

15-16. Yu kisim wanem skul long ekspiriens bilong wanpela sista?

¹⁵ Wanpela sista husat i stap long fultaim sevis winim 15 yia nau i tok: “Mi baptais na kamap Witnes, olsem na mi bin ritim na harim ol tok lukaut i kamap long hevi bilong i go skul long yunivesiti, tasol mi no bihainim ol dispela tok lukaut. Mi ting olsem hevi i no inap painim mi.” Dispela sista i bungim wanem ol hevi? Em i tok: “Mi lusim bikpela haptaim na strong bilong mi long stadi long samting mi skul long en, na mi no gat taim long beten long Jehova olsem mi save mekim long pastaim, na mi pilim taiet tru na mi no gat strong long stori wantaim ol narapela long tok bilong Baibel o redim gut miting. Taim mi luksave olsem yunivesiti inap bagarapim pasin pren bilong mi wantaim Jehova, mi save olsem mi mas lusim yunivesiti. Na mi mekim olsem.”

¹⁶ Bikpela skul i mekim wanem long tingting bilong dispela sista? Em i tok: “Mi sem long tok stret olsem skul mi kisim i kirapim mi long sutim tok long popaia bilong ol narapela, moa yet ol bratasista, na mi ekspektim ol long mekim ol samting ol i no inap long mekim, na mi no laik bung moa wantaim ol. Longpela haptaim i lus paslain long mi inap senisim dispela tingting. Ekspiriens bilong mi i helpim mi long luksave olsem bikpela hevi bai painim yumi sapos yumi sakim ol tok lukaut i kam long Papa bilong yumi long heven long rot bilong oganaisesen bilong em. Mi ting mi save long mi yet, tasol Jehova i save gut moa long mi. Mi rigret olsem mi no bin harim tok bilong em na bihainim!”

17. (a) Yumi mas tingting strong long mekim wanem? (b) Neks atikol bai stori long wanem samting?

¹⁷ Yu mas tingting strong long no ken larim “savetingting bilong ol man na tok giaman” bilong graun bilong Satan i kalabusim yu. Oltaim yu mas was gut na sakim ol trap bilong Satan. (1 Kor. 3:18; 2 Kor. 2:11) No ken larim Satan i mekim na yu lusim tingting long Jehova. Bihainim ol stretpela lo bilong Jehova. No ken larim Satan i trikim yu na yu sakim skultok bilong Jehova. Tasol olsem wanem sapos yu luksave olsem yu kisim pinis tingting bilong dispela graun? Neks atikol bai stori long hau Baibel inap helpim yumi long daunim ol savetingting na pasin we “i gat strong” long pulim yumi.—2 Kor. 10:4, 5.