Nau Em Bikpela Taim Tru Bilong Yumi Mas Was i Stap!

“Nogut yumi slip, olsem ol arapela man. Mobeta ai bilong yumi i op i stap, na tingting bilong yumi i klia.”​​—⁠1 TESALONAIKA 5:⁠6.

1, 2. (a) Pompeii na Herculaneum ol i wanem kain taun? (b) Planti manmeri bilong Pompeii na Herculaneum i bin sakim wanem mak? Wanem samting i kamap long dispela?

LONG taim bilong ol aposel, Pompeii na Herculaneum em tupela taun Rom i gat planti wok bisnis. Ol i stap klostu long maunten Vesuvius. Dispela tupela taun em ples planti maniman Rom i save go long en long taim bilong malolo bilong ol. Ol haus stediam long ol dispela taun ol inap long 1,000 manmeri i ken sindaun long en, na long Pompeii i gat wanpela bikpela haus stediam em inap long klostu olgeta manmeri bilong taun. Ol man i digim graun long Pompei ol i painim pinis 118 haus dring, em sampela i bin stap olsem haus laki o haus pamuk. Pasin pamuk na pasin bilong laikim tumas mani kago samting em i pulap long dispela taun, em ol piksa long ol banis na ol narapela samting ol i bin painim i kamapim klia.

² Long Ogas 24, 79 C.E., maunten Vesuvius i stat long pairap. Ol man bilong skelim maunten paia i ting olsem samting i bin kamap long namba wan pairap​—⁠blakpela ston i no gat hevi na sit bilong paia i pundaun long tupela taun​—⁠dispela i no inap pasim ol man long lusim taun. Na tru tumas, i luk olsem planti man i bin mekim olsem. Tasol ol narapela, em ol i ting bagarap i no inap kamap o ol i no tingim ol mak bilong bagarap i laik kamap, ol i no lusim taun. Orait long biknait tru, bikpela smok i hat nogut tru na ol ston i spit i go daun long maunten na i go insait long Herculaneum na bagarapim olgeta manmeri i stap yet long taun. Long moningtaim tru, wankain samting i kamap long Pompeii na i kilim i dai olgeta manmeri. Sori tru! Bikpela bagarap i bin painim ol, long wanem, ol i no tingim ol mak!

Pinis Bilong Pasin na Lo Bilong Lain Juda

 3. Wanem samting i wankain long bagarap bilong Jerusalem na bilong Pompeii na Herculaneum?

³ Bagarap bilong Pompeii na Herculaneum em i nogut tru, tasol 9-pela yia bipo, i gat wanpela bagarap i moa nogut, em bikpela bagarap i bin painim Jerusalem, tasol dispela bagarap em samting man yet i bin kamapim. Ol man i tok em “wanpela taim nogut tru, winim bagarap i bin painim planti narapela taun long bipo,” na wan milion Juda i bin i dai. Tasol wankain olsem dispela bagarap i bin kamap long Pompeii na Herculaneum, bagarap bilong Jerusalem i no bin kamap wantu tasol na i no gat sampela mak i bin kamap pastaim, nogat.

 4. Jisas i kolim wanem mak, olsem tok profet, bilong toksave long lain bilong em olsem pasin na lo ol Juda i stap aninit long en i laik pinis? Long taim bilong ol aposel, liklik truim bilong dispela mak i bin kamap olsem wanem?

⁴ Jisas Krais i bin tok profet olsem dispela taun bai bagarap, na em i bin stori long ol samting i mas kamap paslain​​—⁠pait, hangre, guria, na pasin bilong sakim lo. Bai i gat ol profet giaman i stap, tasol wok bilong autim gutnius bilong Kingdom bilong God bai kamap long olgeta hap. (Matyu 24:​4-7, 11-​14) Tru, dispela tok bilong Jisas i gat bikpela truim bilong en long nau, tasol i gat liklik truim bilong en long dispela taim bipo. Stori bilong ol samting i bin kamap bipo i tok wanpela bikpela hangre i bin kamap long Judia. (Aposel 11:28) Saveman Josifas, em wanpela Juda, i tok wanpela guria i bin kamap long hap bilong Jerusalem paslain liklik long taim taun i bagarap. Taim bagarap bilong Jerusalem i kam klostu, ol man i kirapim pait long gavman, na ol Juda bilong ol narapela narapela lain politik i pait wantaim, na long sampela taun we ol Juda na ol man bilong ol narapela lain i sindaun wantaim, ol man i bagarapim nating planti man. Tasol wok bilong autim gutnius bilong Kingdom i wok long kamap “long olgeta manmeri i stap long graun.”​​—⁠Kolosi 1:​23.

5, 6. (a) Wanem tok profet bilong Jisas i bin kamap tru long 66 C.E.? (b) I gat wanem as na planti man moa yet i bin i dai taim Jerusalem i bagarap long 70 C.E.?

⁵ Long 66 C.E., ol Juda i bikhet long Rom. Taim Sestius Galus i bringim wanpela ami i kam banisim Jerusalem, lain bilong Jisas i tingim bek tok bilong Jisas: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap. Na ol man i stap ausait long taun, ol i no ken i go insait long en.” (Luk 21:​20, 21) Em nau, taim i kamap pinis bilong lusim Jerusalem​​—⁠tasol olsem wanem ol bai lusim? Bihain, wantu tasol, Galus i kisim ami bilong em na lusim Jerusalem, na dispela i opim rot long ol Kristen long Jerusalem na Judia i ken bihainim tok bilong Jisas na ranawe i go long ples maunten.​​—⁠Matyu 24:​15, 16.

⁶ Fopela yia bihain, long taim bilong Pasova, ol soldia Rom aninit long Jeneral Taitus​—⁠em i gat strongpela tingting long daunim pasin bikhet bilong ol Juda​—⁠ol i kam bek. Ami bilong em i “raunim bikpela banis” long Jerusalem na i no gat rot long ranawe. (Luk 19:​43, 44) Maski ol Juda i save olsem pait inap kamap, planti Juda bilong olgeta hap Rom i bosim ol i bin kam long Jerusalem bilong mekim Pasova. Nau ol i no gat rot long ranawe. Josifas i tok, planti man ol Rom i bagarapim, em dispela lain i bin kam i stap long Jerusalem.a Taim ol Rom i daunim Jerusalem, wanpela long olgeta 7-pela 7-pela Juda bilong ol hap Rom i bosim, ol i bagarap. Bagarap bilong Jerusalem wantaim tempel bilong en, dispela i makim pinis bilong gavman bilong ol Juda na pasin bilong lotu bilong ol em Lo Bilong Moses i as bilong en.b​​—⁠Mak 13:​1, 2.

 7. Taim Jerusalem i bagarap, olsem wanem na ol Kristen i stap gut long God ol i abrusim bagarap?

⁷ Long 70 C.E., ol Juda Kristen inap kisim bagarap o go long kalabus wantaim olgeta narapela i stap long Jerusalem. Tasol ol i bin bihainim tok lukaut Jisas i bin kolim 37 yia bipo. Ol i bin lusim taun na ol i no bin kam bek.

Ol Tok Lukaut Bilong Ol Aposel

 8. Pita i luksave long wanem samting? Ating em i tingim wanem tok bilong Jisas?

⁸ Long nau, i gat wanpela bagarap i laik kamap i moa nogut, na dispela bai pinisim pasin bilong dispela graun olgeta. Sikspela yia paslain long Jerusalem i bagarap, aposel Pita i kamapim sampela gutpela tok i stret moa yet long ol Kristen long nau: Was i stap! Pita i luksave olsem ol Kristen i mas kirapim tingting bilong ol na bai ol i ken tingting gut na ol i no ken lusim “lo bilong Bikpela,” Jisas Krais. (2 Pita 3:​1, 2) Taim Pita i tokim ol Kristen long was i stap, ating em i tingim ol tok em i bin harim Jisas i givim long ol aposel sampela de paslain long Em i dai: “Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap.”​​—⁠Mak 13:​33.

 9. (a) Sampela bai kisim wanem kain tingting? (b) Olsem wanem na pasin bilong tupela tingting inap nogutim yumi?

⁹ Long nau, sampela i mekim tok bilas olsem: “Em i bin tok olsem em bai i kam bek gen, a? Orait em i stap we? Em i no inap i kam.” (2 Pita 3:​3, 4) Ol dispela man i ting olsem ol samting i no save senis tru tru; stat long taim graun i kamap, ol samting i stap olsem yet. Dispela kain tingting inap nogutim yumi. Pasin bilong tupela tingting inap mekim na yumi no pilim moa olsem taim i sot pinis, na dispela inap pulim yumi long inapim laik bilong skin tasol. (Luk 21:34) Olsem Pita i tok, ol dispela man bilong tok bilas ol i lusim tingting olsem Bikpela Tait long taim bilong Noa i bin pinisim pasin bilong graun olgeta i bin stap long dispela taim. Pasin bilong dispela graun i bin senis tru tru long dispela taim bipo!​​—⁠Stat 6:​13, 17; 2 Pita 3:​5, 6.

10. Wanem ol tok bilong Pita i strongim bel bilong ol man i les kwik?

¹⁰ Pita i helpim ol man i ritim pas bilong en long kisim pasin bilong wet na stap isi​—⁠em i kirapim ol long tingim as na sampela taim God i no save kirap kwik na mekim wok. Pastaim Pita i tok: “Long tingting bilong Bikpela wanpela de i olsem 1,000 yia, na 1,000 yia i olsem wanpela de.” (2 Pita 3:⁠8) Jehova i save stap oltaim oltaim, olsem na em inap skelim olgeta samting na makim wanem taim i gutpela tru long kirap mekim wok. Orait nau Pita i tok, Jehova i laik bai ol man long olgeta hap i ken tanim bel. God i wet i stap, olsem na em bai kisim bek planti man em ol bai lus sapos em i bin kirap kwik na pinisim pasin nogut bilong graun. (1 Timoti 2:​3, 4; 2 Pita 3:⁠9) Tasol pasin bilong Jehova long stap isi na wet i stap i no makim olsem em i no ken kirap na mekim wok, nogat. Pita i tok: “De bilong Bikpela bai i kamap wantu tasol olsem ol stilman i save kam.”​​—⁠2 Pita 3:​10.

11. Wanem samting bai helpim yumi long was i stap long ol samting bilong spirit? Olsem wanem bai dispela i olsem “hariapim” de bilong Jehova?

¹¹ Pita i skelim de bilong Jehova wantaim pasin bilong ol stilman. I hatwok long holim ol stilman, tasol sapos wasman i was i stap long nait olgeta na em i no slip, ating bai em inap lukim stilman i kam, winim wasman em sampela taim em i save slip. Wanem samting bai helpim wasman long was i stap na no ken slip? Pasin bilong wokabaut inap helpim em, winim pasin bilong sindaun tasol long nait olgeta. Na olsem tasol, pasin bilong mekim wok bilong spirit bai helpim yumi ol Kristen long was i stap. Olsem na Pita i tok yumi mas wok strong long “wokabaut long pasin holi na bihainim olgeta pasin bilong God.” (2 Pita 3:​11) Dispela wok bai helpim yumi long “hariapim dispela De” bilong Jehova. (2 Pita 3:​12) Tru, yumi no inap senisim taim em Jehova i bin makim, nogat. De bilong em bai kamap long taim stret em i bin makim. Tasol dispela hap taim kirap long nau i go inap long dispela de, i olsem em bai go hariap sapos yumi wok strong long mekim wok bilong em.​​—⁠1 Korin 15:⁠58.

12. Taim Jehova i stap isi na wet yet, yumi wan wan i ken mekim wanem?

¹² Olsem na sapos sampela i pilim olsem Jehova i isi isi tumas long kamapim de bilong em, ol i mas bihainim tok bilong Pita na stap isi na wet i stap long dispela taim Jehova i bin makim. Yumi ken mekim gutpela wok long dispela hap taim em God i isi long ol man na wet i stap. Olsem: Yumi ken wok yet long kisim ol gutpela pasin Kristen yumi mas kisim, na autim gutnius long planti man moa em ol i no inap harim sapos God i bin kirap kwik na kamapim de bilong em. Sapos yumi was i stap, orait long pinis bilong dispela pasin bilong nau, Jehova bai lukim olsem yumi ‘stap klin long ai bilong em na yumi no gat asua long wanpela samting na yumi stap wanbel wantaim em.’ (2 Pita 3:​14, 15) Em bai wanpela gutpela blesing tru!

13. Wanem ol tok Pol i givim long ol Kristen long Tesalonaika i stret moa yet long nau?

¹³ Long namba wan pas Pol i raitim long ol Kristen long Tesalonaika, em tu i toktok long pasin bilong was i stap. Em i tok: “Nogut yumi slip, olsem ol arapela man. Mobeta ai bilong yumi i op i stap, na tingting bilong yumi i klia.” (1 Tesalonaika 5:​2, 6) Dispela em bikpela samting moa yet long nau, long wanem, pinis bilong pasin bilong dispela graun olgeta i kam klostu! Ol man i lotu long Jehova ol i stap namel long ol man i no tingim ol samting bilong spirit, na dispela inap mekim nogut long ol. Olsem na Pol i tok: “Yumi mas tingting klia. Yumi mas kisim pasin bilong bilip long God na pasin bilong laikim tru ol arapela, na pasim dispela pasin olsem siot kapa. Na pasin bilong wetim God i kisim bek yumi, em yumi mas putim olsem hat kapa, na yumi mas sanap strong na was gut.” (1 Tesalonaika 5:⁠8) Pasin bilong stadi oltaim long Tok Bilong God na bung wantaim ol brata bilong yumi long ol miting, dispela bai helpim yumi long bihainim dispela tok bilong Pol na holimpas pasin bilong yumi long tingim olsem taim i sot pinis.​​—⁠Matyu 16:​1-3.

Planti Milion Manmeri i Save Was i Stap

14. Wanem ol namba i soim olsem bikpela lain long nau i save bihainim tok bilong Pita long was i stap?

¹⁴ Olsem wanem? I gat planti man long nau i bihainim dispela tok bilong was i stap? Yes, i gat. Long sevis yia bilong 2002, inap 6,304,645 pablisa​​—⁠winim sevis yia 2001 inap 3.1 pesen​​—⁠ol i kamapim klia ol i was i stap taim ol i lusim 1,202,381,302 aua long tokim ol man long Kingdom bilong God. Ol i no tingim dispela wok i olsem liklik samting tasol, nogat. Em nambawan bikpela wok bilong ol. Tingting bilong planti bilong ol i wankain olsem tingting bilong Eduardo na Noemi long El Salvado.

15. Wanem samting i bin kamap long El Salvado i soim olsem planti ol i was i stap?

¹⁵ Sampela yia i go pinis, Eduardo na Noemi i tingim dispela tok bilong Pol: “Pasin bilong dispela graun i save senis.” (1 Korin 7:​31, NW ) Ol i kirap senisim sampela samting long sindaun bilong ol na ol i kirap mekim wok painia. Bihain, ol i kisim kain kain blesing na mekim wok sekit na wok distrik tu. Maski sampela bikpela hevi i bin painim ol, Eduardo na Noemi i bilip tru olsem ol i bin bihainim stretpela rot taim ol i lusim sampela samting long sindaun bilong ol bambai ol inap mekim wok bilong God fultaim. Planti bilong ol 29,269 pablisa​​—⁠na 2,454 painia tu​​—⁠long El Salvado, ol tu i bin daunim sampela laik bilong skin bambai ol i ken helpim ol narapela, na dispela em i wanpela as na lain pablisa long dispela kantri i bin go bikpela, winim sevis yia 2001 inap 2 pesen.

16. Wanpela yangpela brata long Kot Diwa i kamapim wanem tingting?

¹⁶ Long Kot Diwa, wanpela yangpela Kristen i kamapim wankain tingting. Em i salim pas long brens-ofis na i tok: “Mi wanpela kongrigesen sevent. Tasol mi no ken tokim ol brata long mekim wok painia, long wanem, mi yet mi no stap gutpela piksa long dispela samting. Olsem na mi lusim pinis gutpela wok mani bilong mi na kirapim bisnis bilong mi yet, na dispela i mekim na mi inap lusim planti aua moa long wok autim tok.” Dispela yangpela man em i kamap wanpela bilong ol 983 painia long Kot Diwa, na long yia i go pinis i gat 6,701 pablisa​—⁠winim sevis yia 2001 inap 5 pesen.

17. Wanpela yangpela Witnes long Beljam i mekim wanem na dispela i kamapim klia olsem em i no larim pasin bilong tingting nogut long ol Witnes i pretim em?

¹⁷ Sampela i birua long ol Witnes na tingting nogut long ol na daunim ol na dispela i wok yet long givim hevi long ol 24,961 pablisa bilong Kingdom long Beljam. Tasol ol i wok strong yet​—⁠ol i no larim dispela samting i pretim ol. Long skul, taim tisa i skulim ol sumatin long ol stretpela pasin narapela i mas mekim long narapela, wanpela Witnes i gat 16 krismas i harim tisa i tok ol Witnes Bilong Jehova ol i wanpela liklik lain lotu nogut, olsem na em i tokim tisa em i laik mekim sampela tok bilong helpim sait bilong ol Witnes. Long rot bilong video Jehovah’s Witnesses​​—⁠The Organization Behind the Name na buklet Ol Witnes Bilong Jehova​—⁠Ol i Husat?, em i bin stori gut long ol Witnes ol i wanem kain lain. Ol i amamas long ol dispela tok, na long wik bihain, tisa i givim tes long ol sumatin, na ol askim bilong tes i bilong lotu Kristen bilong ol Witnes Bilong Jehova.

18. Wanem samting i kamapim klia olsem ol pablisa long Ajentina na Mosambik ol i no bin larim ol hevi bilong mani i mekim na ol i lusim wok bilong Jehova?

¹⁸ Kain kain bikpela hevi i save painim planti Kristen nau long dispela taim bilong las de. Tasol ol i wok strong na bai ol dispela samting i no ken pulim nabaut tingting bilong ol. Maski Ajentina i gat planti hevi long mani, long yia i go pinis i gat 126,709 Witnes long dispela kantri, em bikpela lain tru, winim olgeta yia bipo. Long Mosambik, planti man i stap rabis yet. Tasol 37,563 i autim tok, winim yia 2001 inap 4 pesen. I stap bilong planti man long Albenia i gat hatwok long en, tasol lain pablisa long dispela kantri i bin go bikpela inap 12 pesen, na nau i gat 2,708 pablisa. Tru tumas, taim ol wokboi bilong Jehova i putim ol wok bilong Kingdom i go pas, ol bikpela hevi i no save pasim wok bilong spirit bilong em.​​—⁠Matyu 6:​33.

19. (a) Wanem samting i kamapim klia olsem i gat planti man i stap yet ol i kain olsem sipsip na ol i hangre long kisim tok i tru bilong Baibel? (b) Wanem sampela samting moa bilong ripot bilong yia i kamapim klia olsem ol wokboi bilong Jehova i save was i stap? (Lukim sat long pes 12-15.)

¹⁹ Ol 5,309,289 Baibel-stadi ol i bin mekim long olgeta mun long yia i go pinis long olgeta hap, em i kamapim klia olsem i gat planti man i stap yet ol i kain olsem sipsip na ol i hangre long kisim tok i tru bilong Baibel. Inap 15,597,746 i kam long Memorial, em planti bilong ol i no mekim yet wok bilong Jehova. I gutpela sapos ol i wok long kisim sampela save moa na laikim tru Jehova na bikpela lain brata. Yumi amamas tru long lukim bikpela lain, olsem “planti manmeri tru,” bilong “ol arapela sipsip” ol i wok yet long karim kaikai taim ol i mekim wok bilong God long ‘san na long haus bilong em,’ wantaim ol brata bilong ol em God i bin makim ol long spirit holi.​​—⁠KTH 7:​9, 15; Jon 10:⁠16.

Pasin Bilong Lot i Skulim Yumi

20. Pasin bilong Lot na meri bilong em i skulim yumi long wanem samting?

²⁰ Tru, inap liklik hap taim ol gutpela wokboi bilong God ol tu inap lusim pasin bilong tingim taim i sot pinis. Tingim Lot, pikinini bilong brata bilong Abraham. Tupela ensel i kam tokim em, klostu nau God bai bagarapim Sodom na Gomora. Lot i no bin kirap nogut long dispela tok, long wanem, em i bin “lukim ol kain kain pasin pamuk samting bilong ol dispela man nogut na em i bel hevi tru.” (2 Pita 2:⁠7) Tasol taim tupela ensel i kam bilong bringim em i go ausait long Sodom, em i “no hariap.” Ol ensel i mas holim han bilong em wantaim meri na tupela pikinini bilong em na bringim ol i go ausait long taun. Ol i lusim taun na i kam, na meri bilong Lot i sakim tok bilong tupela ensel na lukluk i go bek. Em i no bihainim dispela toksave, na laip bilong em i lus. (Stat 19:​14-​17, 26) Jisas i tok: “Tingim samting i bin kamap long meri bilong Lot.”​​—⁠Luk 17:⁠32.

21. Bilong wanem nau em bikpela taim tru bilong yumi mas was i stap, winim olgeta taim bipo?

²¹ Dispela bagarap i bin kamap long Pompeii na Herculaneum na ol samting i bin kamap taim Jerusalem i bagarap, na Tait Wara long taim bilong Noa na pasin bilong Lot, olgeta dispela samting i skulim yumi olsem yumi mas tingim gut ol samting i olsem tok lukaut. Yumi ol wokboi bilong Jehova i bin lukim mak na yumi save olsem, yumi stap long taim bilong las de. (Matyu 24:⁠3) Yumi lusim pinis ol lotu giaman. (KTH 18:⁠4) Olsem ol Kristen long taim bilong ol aposel, yumi tu i mas “hariapim dispela De” bilong Jehova. (2 Pita 3:​12) Yes, nau long dispela taim yumi mas strong moa long was i stap! Bilong helpim yumi long was i stap, yumi ken wok long mekim wanem ol samting na kisim wanem ol pasin? Stori i kamap bihain long dispela bai stori long ol dispela samting.

[Ol Futnot]

Bai Yu Bekim Olsem Wanem?

• Wanem samting i bin kamap na i givim rot long ol Kristen Juda long abrusim bagarap bilong Jerusalem?

• Olsem wanem ol tok bilong aposel Pita na Pol inap helpim yumi long was i stap?

• Husat long nau i kamapim long ples klia olsem ol i was i stap?

• Stori bilong Lot na meri bilong em i skulim yumi long wanem samting?

[Sat long pes 12-15]

RIPOT BILONG WOK BILONG OL WITNES BILONG JEHOVA LONG 2002

(Lukim buk o magasin)

[Piksa long pes 9]

Long 66 C.E., ol Kristen long Jerusalem ol i bihainim tok lukaut bilong Jisas

[Ol Piksa long pes 10]

Pasin bilong mekim wok i save helpim ol Kristen long was i stap