Wok Strong Long “Wetim God i Kisim Bek Yumi”!
“Pasin bilong wetim God i kisim bek yumi, em yumi mas putim olsem hat kapa.”—1 TESALONAIKA 5:8.
1. Olsem wanem “pasin bilong wetim God i kisim bek yumi” i save helpim yumi long sanap strong na no ken les?
TAIM bagarap i laik painim man, sapos em i gat tingting olsem wanpela bai kam helpim em na bai em i no ken bagarap, dispela tingting inap strongim em na em bai wok strong long lukautim laip bilong em. Sapos sip i bagarap long solwara na wanpela man bilong sip i kalap long samting olsem bet gumi na i trip long solwara, em inap stap strong na no ken les sapos em i save olsem sampela i laik kam na helpim em. Na olsem tasol, inap planti tausen yia pinis ol man i gat strongpela bilip ol i wetim Jehova i helpim ol, na dispela i bin strongim ol long taim bilong hevi, na pasin bilong wetim em i no bin lus nating, nogat. (Kisim Bek 14:13; Song 3:8; Rom 5:5; 9:33) Aposel Pol i tok, “pasin bilong wetim God i kisim bek yumi” em i olsem “hat kapa” bilong klos pait bilong spirit ol Kristen i save pasim. (1 Tesalonaika 5:8; Efesus 6:17) Tru tumas, taim yumi bilip strong olsem Jehova bai kisim bek yumi, dispela i helpim yumi long holimpas stretpela tingting, maski wanem kain hevi o birua o traim i painim yumi.
2. Olsem wanem na “pasin bilong wetim God i kisim bek yumi” em i bikpela samting tru bilong ol man i lotu tru long Jehova?
2 Wanpela buk (The International Standard Bible Encyclopedia) i tok: “Pasin bilong wet long gutpela samting bai kamap bihain, em i no pasin bilong ol haiden long bipo,” em ol lain i bin i stap long taim bilong ol aposel. (Efesus 2:12; 1 Tesalonaika 4:13) Tasol “pasin bilong wetim God i kisim bek yumi” em i bikpela samting tru bilong ol man i lotu tru long Jehova. Em i bikpela samting olsem wanem? Wanpela samting i olsem: Jehova i tingim nem bilong em, olsem na em bai kisim bek ol wokman bilong em. Asap, em man bilong raitim Song, i beten olsem: “God, yu God bilong kisim bek mipela. Tingting long biknem bilong yu na helpim mipela. Kisim bek mipela.” (Song 79:9; Esekiel 20:9) Na tu, bilong pas gut wantaim Jehova yumi mas bilip long ol tok promis bilong em long givim ol gutpela blesing long yumi. Pol i tok: “Man i no bilip long God, em i no inap bihainim laik bilong God. . . . Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Na Pol i tok olsem wok bilong kisim bek ol man i bin tanim bel, em i wanpela bikpela as na Jisas i bin kam long graun. Pol i tok: “Jisas i bin kam long graun bilong kisim bek yumi manmeri bilong mekim sin.” (1 Timoti 1:15) Na aposel Pita i tok, ‘God i wok long kisim bek yumi, long wanem, yumi bilip long Krais.’ (1 Pita 1:9) Olsem na i stret yumi bilip na wetim God i kisim bek yumi. Tasol wanem insait bilong dispela tok ‘kisim bek yumi’? Na yumi mas mekim wanem bambai God i ken kisim bek yumi?
‘Kisim Bek Yumi’
3. Long bipo Jehova i bin kisim bek ol wokboi bilong em olsem wanem?
3 Long Ol Skripsa Hibru, dispela tok ‘kisim bek yumi’ i makim pasin bilong kisim bek ol man long han bilong ol lain i save daunim ol, o taim ol birua i laik bagarapim ol. Olsem: Devit i bin kolim Jehova olsem man bilong “kisim bek” em, na em i tok: “God i olsem bikpela ston mi save go long en na hait . . . Em i gat strong bilong kisim bek mi na lukautim mi. . . . Mi beten long Bikpela na em i helpim mi, na ol birua i no inap bagarapim mi. Yumi mas litimapim nem bilong Bikpela.” (2 Samuel 22:2-4) Devit i save, taim ol gutpela wokboi bilong Jehova i krai long em bilong helpim ol, em i save harim.—Song 31:22, 23; 145:19.
4. Ol wokboi bilong Jehova i bin stap paslain long taim bilong ol Kristen ol i gat wanem tingting long laip long bihain?
4 Ol wokboi bilong Jehova paslain long taim bilong ol Kristen ol tu i bilip long ol bai stap laip long bihain. (Jop 14:13-15; Aisaia 25:8; Daniel 12:13) Long Ol Skripsa Hibru, planti tok promis bilong kisim bek ol man ol i olsem tok profet bilong samting i gutpela moa—olsem kisim bek ol man na bai ol i ken i stap oltaim oltaim. (Aisaia 49:6, 8; Aposel 13:47; 2 Korin 6:2) Long taim bilong Jisas, planti Juda i wet long kisim laip i stap oltaim oltaim, tasol ol i no laik bilip long Jisas olsem rot bilong kisim dispela laip. Jisas i bin tokim ol hetman bilong lotu olsem: “Yupela i ting tok i stap long buk bilong God i save givim yupela laip i stap gut oltaim oltaim. Olsem na yupela i save wok long ritim na skelim olgeta tok i stap long buk bilong God. Tasol buk bilong God tu i save tokaut long mi.”—Jon 5:39.
5. Bihain, taim God i kisim bek ol man, dispela bai mekim wanem long ol?
5 Long rot bilong Jisas, God i kamapim long ples klia olgeta samting i olsem insait bilong dispela tok ‘kisim bek yumi.’ Sampela insait bilong en i olsem, lusim kalabus bilong sin, lusim kalabus bilong ol lotu giaman, lusim pasin bilong dispela graun em Satan i bosim, lusim pasin bilong pret long ol man, na lusim tu pasin bilong pret long i dai. (Jon 17:16; Rom 8:2; Kolosi 1:13; KTH 18:2, 4) Tru, bilong helpim ol gutpela wokboi bilong em long bihain, God bai kisim bek ol long han bilong ol lain i save daunim ol, na kisim bek ol long ol hevi, tasol i no dispela samting tasol, nogat. Ol bai i gat rot tu long kisim laip i stap oltaim oltaim. (Jon 6:40; 17:3) Jisas i skulim ol disaipel olsem, bilong kisim bek wanpela “liklik lain,” God bai kirapim bek ol long indai na ol bai kisim laip long heven bambai ol i ken mekim wok king wantaim Krais long Kingdom. (Luk 12:32) Bilong kisim bek ol narapela manmeri bilong graun, God bai helpim ol na ol bai kamap gutpela olgeta na pas gut wantaim God, olsem Adam tupela Iv i bin mekim long gaden Iden taim ol i no mekim sin yet. (Aposel 3:21; Efesus 1:10) Laik bilong God long pastaim tru, em i laik bai ol man i ken i stap oltaim oltaim long kain gutpela ples paradais olsem. (Stat 1:28; Mak 10:30) Tasol olsem wanem God bai kamapim bek dispela kain gutpela sindaun?
Pe Bilong Baim Bek Ol Man
6, 7. Jisas i gat wanem wok long kisim bek yumi?
6 I gat wanpela rot tasol na bai God i ken kisim bek yumi na yumi stap oltaim oltaim: Dispela rot em ofa bilong Krais bilong baim bek ol man. Bilong wanem i gat dispela wanpela rot tasol? Baibel i tok, taim Adam i mekim sin, nau em i baim em yet wantaim yumi olgeta lain pikinini bilong em i go long sin, olsem “wokboi nating” bilong en. Olsem na i mas i gat wanpela pe bilong baim bek ol man bambai i gat as na ol i ken wetim gutpela samting bai painim ol long bihain. (Rom 5:14, 15; 7:14) Ol animal ol i bin kilim na mekim ofa long en aninit long Lo Bilong Moses, ol i makim olsem God bai givim wanpela pe bilong baim bek olgeta man. (Hibru 10:1-10; 1 Jon 2:2) Ofa bilong Jisas i truim ol dispela piksa bilong samting bai kamap bihain. Taim mama bilong Jisas i no karim em yet, ensel bilong Jehova i tokaut olsem: “Em bai i tekewe sin bilong ol manmeri bilong en na kisim bek ol.”—Matyu 1:21; Hibru 2:10.
7 Long rot bilong mirakel, wanpela nupela meri, Maria, i karim Jisas, na Jisas em i Pikinini bilong God, olsem na em i no kisim indai long Adam. Na em i bihainim stret pasin bilong i stap gut long God, na dispela tupela samting i mekim na laip bilong em i gat pe bilong en inap stret long baim bek ol man long sin na indai. (Jon 8:36; 1 Korin 15:22) Em i no bin kisim kot long pasin bilong mekim sin na em i mas i dai, nogat. Long laik bilong em yet em i bin kam daun long graun “bilong givim laip bilong em bilong baim bek planti manmeri.” (Matyu 20:28) Em i mekim pinis dispela wok, na em i kirap bek pinis long matmat na em i stap King, olsem na nau em inap kisim bek olgeta manmeri ol inapim mak bilong bihainim ol lo bilong God.—KTH 12:10.
Yumi Mas Mekim Wanem?
8, 9. (a) Taim yangpela maniman i askim Jisas long olsem wanem em inap kisim laip oltaim, Jisas i bekim wanem tok? (b) Jisas i mekim wok long dispela samting i bin kamap na em i skulim ol disaipel long wanem samting?
8 Bipo wanpela yangpela maniman bilong lain Israel i askim Jisas: “Bai mi mekim wanem na mi ken kisim laip i stap gut oltaim?” (Mak 10:17) Ating dispela askim i kamapim tingting bilong ol Juda i stap long taim bilong em—olsem God i strong long ol man i mas mekim sampela gutpela wok, na sapos ol i mekim planti gutpela wok i go inap long mak God i laikim, orait God inap kisim bek ol. Tasol pasin bilong tingim ol yet tasol em inap kirapim ol man long lotuim God long skin tasol. Ol kain wok olsem i no as na bai ol man i ken wet long God i kisim bek ol, long wanem, i no gat wanpela man bilong dispela graun em inap bihainim stret ol lo bilong God.
9 Bilong bekim askim bilong dispela man, Jisas i tok tasol olsem em i mas bihainim ol lo bilong God. Orait kwiktaim yangpela man i tokim Jisas, kirap long taim em i liklik yet, em i save bihainim ol dispela lo. Tok bilong em i mekim na bel bilong Jisas i sori tru long em. Jisas i tokim em: “Yu sot yet long wanpela samting. Yu go salim ol samting bilong yu, na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” Tasol yangpela man i bel hevi long dispela tok na em i go, “long wanem, em i gat planti samting tru.” Olsem na bihain Jisas i tokim ol disaipel, sapos man i givim bel tumas long ol mani kago samting bilong dispela graun, em bai hatwok long kisim laip i stap oltaim. Na em i tok moa olsem man i no inap kisim laip i stap oltaim long ol wok em yet i mekim, nogat. Tasol Jisas i mekim gut bel bilong ol na em i tok: “Ol man yet ol i no inap, tasol God em inap. God em inap mekim olgeta samting.” (Mak 10:18-27; Luk 18:18-23) Orait yumi mas mekim wanem na bai God i ken kisim bek yumi?
10. Yumi mas mekim wanem ol samting na bai God i ken kisim bek yumi?
10 Pasin bilong God long kisim bek ol man, em wanpela presen em i givim long ol, tasol em i no save givim nating long man, nogat. (Rom 6:23) I gat sampela samting man i mas mekim. Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Na aposel Jon i tok moa olsem: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip.” (Jon 3:16, 36) Em nau, ol man i laik kisim laip i stap oltaim, ol i mas bilip na bihainim tok. Olgeta wan wan i mas pasim tok long bel olsem ol bai bilip long pe Jisas i bin givim bilong baim bek ol man, na ol bai bihainim lek bilong Jisas.
11. Olsem wanem wanpela sinman bilong graun em inap mekim ol samting na bai God i ken orait long em?
11 Yumi ol sinman bilong graun tasol, olsem na i no pasin bilong yumi long bihainim tok. Na yumi no inap tru long bihainim stret olgeta tok bilong God. Olsem na Jehova i givim wanpela pe bilong karamapim ol sin bilong yumi. Tasol oltaim yumi mas wok strong long bihainim ol pasin i stret wantaim tok bilong God. Olsem Jisas i bin tokim dispela yangpela maniman, yumi mas bihainim ol lo bilong God. Sapos yumi mekim olsem, God bai orait long yumi, na tu, bel bilong yumi bai amamas tru, long wanem, “ol lo bilong en i no givim hevi long yumi”—ol i olsem ‘marasin i save helpim yumi.’ (1 Jon 5:3; Sindaun 3:1, 8) Tasol i hatwok long holimpas pasin bilong bilip na wetim God i kisim bek yumi.
“Lukautim Bilip Bilong Yupela”
12. Pasin bilong wetim God i kisim bek yumi, olsem wanem dispela inap strongim Kristen long sakim pasin pamuk samting i laik traim em?
12 Disaipel Jut i laik raitim pas long ol Kristen bilong bipo long “wok God i bin mekim bilong kisim bek [ol man].” Tasol em i lukim olsem pasin pamuk samting i kamap strong long dispela taim, olsem na em i ting em i mas tokim ol brata long ‘wok strong long lukautim bilip bilong ol.’ Tru tumas, maski yumi bilip, na yumi holimpas bilip Kristen tru, na yumi bihainim tok bilong God taim i no gat sampela hevi o traim i painim yumi, dispela tasol i no inap na bai God i ken kisim bek yumi. Yumi mas givim bel tru long Jehova, inap long yumi ken sakim ol traim na ol pasin nogut bilong pamuk samting ol man i save mekim na ol inap pulim yumi. Tasol pasin pamuk na ol narapela pasin i gat sem, na sakim tok bilong ol man i gat wok long bosim ol, na brukim lain, na tingting i bruk nabaut, ol i wok long paulim tingting na pasin bilong ol Kristen bilong bipo. Bilong helpim ol long sakim ol dispela kain tingting na pasin nogut, Jut i tokim ol wanlain Kristen long tingim gut mak ol i laik winim. Em i tok: “Yupela ol brata tru, oltaim yupela i mas larim bilip bilong yupela i strongim bel bilong yupela, . . . Yupela i mas i stap klostu long [God] na larim em i laikim yupela oltaim. Na oltaim yupela i mas wetim Bikpela bilong yumi Jisas Krais, bai em i kamapim sori bilong en long ples klia, na yupela bai i kisim tru laip bilong i stap gut oltaim oltaim.” (Jut 3, 4, 8, 19-21) Pasin bilong wetim God i kisim bek ol em inap strongim ol na bai ol inap wok strong long sakim ol pasin nogut na bihainim yet stretpela pasin.
13. Olsem wanem yumi ken kamapim klia olsem yumi no lusim nating marimari bilong God?
13 Ol man God Jehova bai kisim bek ol, em i laik bai ol i mas mekim ol pasin i stret tasol. (1 Korin 6:9, 10) Tasol bilong holimpas ol stretpela lo bilong God, i no olsem yumi mas skelim pasin bilong ol narapela, nogat. Em i no wok bilong yumi long makim husat husat bai kisim laip i stap oltaim. God yet bai mekim dispela wok, olsem Pol i bin tokim ol Grik long Atens: “Em i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot”—em Jisas Krais. (Aposel 17:31; Jon 5:22) Sapos yumi bilip long ofa bilong Jisas bilong baim bek ol man na i stap bilong yumi i stret long dispela bilip, yumi no ken pret long wanpela de bilong kot bai kamap bihain. (Hibru 10:38, 39) Bikpela samting i olsem: “[Yumi] kisim pinis marimari bilong God [olsem yumi bin kamap wanbel wantaim em long rot bilong ofa bilong Jisas], na nogut [yumi] lusim nating marimari bilong em,” olsem yumi larim ol tingting na pasin nogut i pulim yumi. (2 Korin 6:1) Na tu, taim yumi wok long helpim ol man bambai God i ken kisim bek ol, yumi kamapim olsem yumi no lusim nating marimari bilong God. Orait yumi ken helpim ol olsem wanem?
Tokaut Long Samting Yumi Wet Long En
14, 15. Jisas i bin givim wok long husat bilong autim gutnius long God i laik kisim bek ol man?
14 Pol i kamapim tok bilong profet Joel na em i tok: “Olgeta manmeri i singaut long nem bilong Jehova, bai em i kisim bek ol.” Em i tok moa olsem: “Tasol sapos ol i no bilip long em, olsem wanem bai ol i askim em long helpim ol [olsem singaut long em]. Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” Orait sampela ves bihain long dispela, Pol i kamapim klia olsem bilip i no save kamap nating long yumi, nogat; “yumi harim tok bilong God na dispela i kirapim bilip,” na dispela tok yumi harim, em i ‘tok bilong Krais.’—Rom 10:13, 14, 17; NW; Joel 2:32, NW.
15 Husat bai kisim dispela ‘tok bilong Krais’ i go long ol narapela lain? Jisas i givim dispela wok long ol disaipel bilong em—em ol man i skul pinis long dispela “tok.” (Matyu 24:14; 28:19, 20; Jon 17:20) Taim yumi autim tok bilong Kingdom na kamapim ol disaipel, yumi mekim samting aposel Pol i toktok long en, em wanpela tok bilong Aisaia em i kamapim, olsem: “Ol manmeri i autim gutnius bilong ol gutpela samting, lek bilong ol i naispela tru!” Maski planti man i no bilip long gutnius yumi autim, lek bilong yumi i “naispela tru” long ai bilong Jehova.—Rom 10:15, NW; Aisaia 52:7, NW.
16, 17. Wok bilong yumi long autim tok, em i mekim wanem tupela wok?
16 Dispela wok i mekim tupela bikpela samting. Namba wan, em yumi mas autim gutnius na bai yumi litimapim nem bilong God, na ol man i laik bai em i kisim bek ol, ol bai save ol i mas i go long em. Pol i tok: “Bikpela i tokim mipela olsem, ‘Mi mekim yu i kamap olsem lait bilong olgeta kantri, na bai yu helpim ol manmeri long olgeta hap bilong graun, na bai mi kisim bek ol.’ ” Olsem na yumi olgeta disaipel bilong Krais yumi mas insait long wok bilong bringim tok long ol man olsem God i laik kisim bek ol manmeri.—Aposel 13:47; Aisaia 49:6.
17 Namba tu samting i olsem: Taim yumi autim tok bilong gutnius, dispela i mekim na i gat as bilong stretpela kot bilong God. Jisas i tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.” Tru, taim bilong mekim dispela kot na tilim ol man em bai kamap long “taim Pikinini Bilong Man i kam bek olsem king wantaim olgeta ensel.” Tasol wok bilong autim tok i givim rot long ol man long nau na ol inap luksave long ol brata spirit bilong Krais na nau ol inap helpim ol na wok wantaim ol bambai God i ken kisim bek ol bilong i stap oltaim oltaim.—Matyu 25:31-46.
‘Wetim God i Mekim Gut Long Yumi’
18. Olsem wanem yumi ken wok strong long “wetim God i kisim bek yumi”?
18 Taim yumi mekim wok autim tok, dispela tu i save helpim yumi long wok strong long “wetim God i kisim bek yumi.” Pol i tok: “Yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi.” (Hibru 6:11) Olsem na yumi olgeta wan wan i mas putim “hat kapa,” em “pasin bilong wetim God i kisim bek yumi,” na sapos yumi mekim olsem, bai yumi holim strong tingting olsem “God i no makim yumi bilong pilim belhat bilong em. Nogat. Em i makim yumi bai Jisas Krais, Bikpela bilong yumi, em i ken kisim bek yumi.” (1 Tesalonaika 5:8, 9) Na tu, yumi mas putim gut long bel dispela tok bilong Pita: “Oltaim tingting bilong yupela i mas i stap redi na yupela i mas bosim gut wokabaut bilong yupela. Yupela i mas bilip strong na wetim God i mekim dispela gutpela samting em i laik mekim long yupela.” (1 Pita 1:13) Ol man i mekim olsem, bai ol i lukim samting ol i wet long en i kamap tru long ol!
19. Long stori i kamap bihain long dispela, bai yumi toktok long wanem samting?
19 Orait yumi mas ting olsem wanem long dispela hap taim i stap yet? Olsem wanem yumi ken mekim wok long dispela hap taim bambai God i ken kisim bek yumi yet na ol narapela? Bai yumi toktok long ol dispela askim long stori i kamap bihain long dispela.
Yu Inap Stori Long Dispela?
• Bilong wanem yumi mas wok strong long “wetim God i kisim bek yumi”?
• Wanem ol samting i insait long dispela tok ‘kisim bek yumi’?
• Yumi mas mekim wanem na bai God i ken kisim bek yumi, olsem wanpela presen yumi kisim long em?
• Wok bilong yumi long autim tok i mekim wanem samting i stret wantaim laik bilong God?
[Ol Piksa long pes 10]
Pasin bilong kisim bek yumi bilong i stap oltaim oltaim, em i narapela kain long pasin bilong kisim bek yumi bilong abrusim bagarap