Amamas na Wetim Kingdom!
“Yupela i save bilip na wetim Bikpela i mekim gut long yupela, olsem na yupela i mas amamas. Sapos hevi i kamap long yupela, orait yupela i mas sanap strong.”—ROM 12:12.
1. Olsem wanem na yumi ken amamas long i stap wanbel wantaim Jehova? Aposel Pol i kirapim ol Kristen long mekim wanem?
GOD “em i as bilong pasin tru bilong amamas.” (1 Timoti 1:11) Olgeta samting em i bin wokim i save givim bikpela amamas long em. Jehova em i As bilong olgeta gutpela samting na olgeta samting i save mekim yumi i amamas, olsem na olgeta man na olgeta ensel inap amamas long i stap wanbel wantaim em. Ol Kristen i save long God Jehova, na i stret aposel Pol i kirapim ol long pilim tru dispela gutpela samting ol i ken amamas long en. Na Pol i tok, ol i mas tenkyu long God long olgeta gutpela samting God i bin wokim na long gutpela pasin sori em i mekim long ol. Pol i tok: “Oltaim yupela i mas amamas long Bikpela.”—Filipai 4:4; Buk Song 104:31.
2. Yumi wetim wanem samting na dispela i givim bikpela amamas long yumi? Ol Kristen i mas mekim wanem long samting ol i wetim?
2 Olsem wanem? Yumi bihainim dispela tok bilong Pol? Tru tumas, yumi mekim! Ol brata spirit bilong Krais Jisas i save amamas na wetim gutpela samting God i laik givim long ol. (Rom 8:19-21; Filipai 3:20, 21) Ol i save bai ol i wok wantaim Krais long Kingdom o gavman bilong em long heven, na bai ol inap helpim ol manmeri—i stap laip na i dai pinis—long kisim gutpela samting long bihain. Bai ol i amamas tru long mekim wok king na wok pris wantaim Krais long heven! (Kamapim Tok Hait 20:6) Ol bai amamas tru long helpim ol manmeri i bin stap gut long God bambai skin na tingting bilong ol i ken kamap gutpela olgeta, na ol i ken kamapim bek Paradais hia long graun! I gat as tru na olgeta wokboi bilong Jehova long nau i ken “bilip strong na wetim God i givim laip bilong i stap oltaim long ol. Bipo tru, . . . [God] i tok pinis long em bai i givim dispela laip long yumi. Na em i no save giaman.” (Taitus 1:2) I gat dispela gutpela samting yumi ken wetim i kamap, olsem na aposel Pol i strongim yumi olgeta long ‘amamas na wetim Bikpela i mekim gut long yumi.’—Rom 12:12.a
Amamas Tru—Em Samting Bilong Bel
3, 4. (a) Wanem insait bilong dispela tok “amamas”? Ol Kristen i mas amamas long hamas taim? (b) Amamas tru em wanem kain amamas? Yumi mas kisim wanem samting na bai yumi inap amamas tru?
3 Dispela tok “amamas” i makim man i stap belgut na em i mekim ol samting i kamapim dispela long ples klia. I no makim pasin bilong amamas amamas nating long olgeta taim. Nogat. Ol hap tok Hibru na Grik long Baibel ol i tanim olsem “belgut” na “amamas moa yet” na “amamas,” ol dispela tok i makim pasin bilong man i stap belgut na ol samting em i mekim bilong kamapim dispela long ples klia. Baibel i tokim ol Kristen: “Oltaim yupela i mas amamas.”—1 Tesalonaika 5:16.
4 Tasol olsem wanem yumi ken amamas oltaim? Yumi inap mekim olsem, long wanem, amamas tru em i samting bilong bel. (Lo 28:47; Sindaun 15:13; 17:22) Em wanpela gutpela pasin spirit bilong God i kirapim ol man long bihainim. Long lista bilong ol dispela gutpela pasin, Pol i kolim pasin bilong sori pastaim na bihain pasin bilong amamas. (Galesia 5:22) Amamas em i samting bilong bel, olsem na ol samting ausait, na ol brata Kristen tu, i no as bilong en. Tasol i gat wanpela samting yumi mas kisim na bai yumi inap i stap amamas, em spirit bilong God. As bilong amamas bilong yumi em olsem: Insait tru long bel yumi save ol tok yumi bilip long en em tok i tru, na yumi save wetim Kingdom, na yumi save yumi mekim pasin Jehova i laikim. Olsem na pasin bilong amamas i no wanpela pasin i stap long skin bilong yumi taim mama i karim yumi; nogat; em wanpela pasin yumi lain long bihainim taim yumi kamap “nupela man.” Em wanpela gutpela pasin bilong Krais Jisas na i makim em i narapela kain long ol narapela man.—Efesus 4:24; Kolosi 3:10.
5. Sapos man i amamas, ating em bai kamapim dispela long wanem taim? Na em bai kamapim olsem wanem?
5 Amamas em i samting bilong bel, tasol i gat sampela samting yumi inap lukim na bai yumi save man i stap belgut na amamas, olsem ating bai pes bilong em i lait, o bai em i kalap kalap. (1 King 1:40; Luk 1:44; Aposel 3:8; 6:15) Tasol yu ting ol manmeri i no save toktok tumas, o ol i no save lap oltaim, ol i no amamas? Nogat! Man i stap amamas tru, dispela i no kirapim em long toktok o lap oltaim. Long narapela narapela taim em i kamapim amamas bilong em long narapela narapela pasin. Olsem: Taim yumi go long Haus Kingdom, i no amamas tasol i kirapim yumi long sekanim ol brata na toktok gut wantaim ol. Nogat. Yumi laikim tru ol brata na dispela i kirapim yumi long mekim olsem.
6. Olsem wanem ol Kristen inap amamas oltaim, maski samting nogut i painim ol?
6 Tasol oltaim yumi save amamas, long wanem, yumi kamap nupela man na bel bilong yumi i stap amamas oltaim. Tru sampela taim bai yumi tingting planti long sampela samting, o bai samting nogut i painim yumi, tasol bel bilong yumi inap i stap amamas yet. Sampela Kristen bilong pastaim i stap wokboi nating na ol i gat bos nogut. Yu ting ol dispela Kristen inap amamas oltaim? Ol inap mekim, long wanem, ol i wetim Kingdom na amamas i pulap long bel bilong ol.—Jon 15:11; 16:24; 17:13.
7. (a) Jisas i tok wanem long karim hevi na stap amamas? (b) Wanem samting i helpim yumi long karim hevi na sanap strong? Husat i stap olsem gutpela piksa tru long pasin bilong sanap strong na karim hevi?
7 Aposel Pol i tok: “Yupela i save bilip na wetim Bikpela i mekim gut long yupela, olsem na yupela i mas amamas.” Na bihain stret long dispela, em i tok: “Sapos hevi i kamap long yupela, orait yupela i mas sanap strong.” (Rom 12:12) Jisas tu i tok, yumi inap i stap amamas, maski hevi i painim yumi. Long Matyu 5:11, 12 em i tok, ‘Sapos ol i tok nogut long yupela na ol i mekim nogut long yupela, orait yupela i ken belgut na amamas tru, long wanem, bikpela pe i wetim yupela long heven.’ Ol i amamas, tasol i no olsem ol bai kalap kalap o mekim narapela samting i kamapim klia dispela samting. Nogat. Amamas i pulap long bel bilong ol, long wanem, ol i save taim ol i karim hevi na sanap strong, Jehova na Jisas i save amamas. (Aposel 5:41) Amamas i mekim na yumi inap long karim hevi na sanap strong. (1 Tesalonaika 1:6) Jisas em i gutpela piksa tru long pasin bilong karim hevi na sanap strong. Baibel i tok: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong.”—Hibru 12:2.
Amamas na Wetim Bikpela, Maski Yu Gat Hevi
8. I gat wanem ol hevi inap painim yumi? Tasol olsem wanem na ol dispela hevi i no save pinisim amamas bilong yumi?
8 Tru, yumi wokboi bilong Jehova, tasol i no olsem hevi i no inap painim yumi, olsem ol hevi bilong famili, na bilong mani, o sik i painim yumi, o wanpela famili bilong yumi i dai. Ol kain samting olsem inap mekim yumi i bel hevi, tasol ol i no inap tekewe bilip bilong yumi, em yumi save bilip na wetim Kingdom—ol i no tekewe dispela amamas i pulap long bel bilong yumi.—1 Tesalonaika 4:13.
9. Wanem ol hevi i bin painim Abraham? Tasol olsem wanem yumi save, amamas i pulap long bel bilong em?
9 Tingim Abraham. Sampela taim hevi i bin painim em. Em i gat hevi long famili. Hagar, em olsem namba 2 meri bilong Abraham, na Sara, em meri tru bilong Abraham, tupela i save kros. (Stat 16:4, 5) Ismael i tok bilas long Aisak na mekim nogut long em. (Stat 21:8, 9; Galesia 4:29) Na bihain meri bilong Abraham, em Sara, em i dai. (Stat 23:2) Ol dispela hevi i painim Abraham, tasol Abraham i amamas na wetim dispela Pikinini bilong Kingdom i kamap, em olgeta lain man bai kisim blesing long rot bilong em. (Stat 22:15-18) Abraham i lusim as ples bilong em, em taun Ur, na inap long taim em i dai, olsem 100 yia samting bihain, em i stap strong long wok bilong Jehova. Maski ol hevi i painim em, em i stap amamas tasol. Olsem na Baibel i tok: “Oltaim Abraham i bilip na i wet long lukim dispela taun i stap strong tru, em dispela taun God wanpela tasol i bin . . . wokim.” Abraham i bilip tru na wetim Kingdom bilong Krais Jisas, olsem na taim God i makim Jisas pinis bilong i stap king, Jisas inap tok: “Taim . . . Abraham em i tingting long lukim taim bilong mi, em i bin amamas. Na taim em i lukim pinis, orait bel bilong en i gutpela tru.”—Hibru 11:10; Jon 8:56.
10, 11. (a) Yumi ol Kristen i gat wanem pait? Tasol wanem samting i helpim yumi long winim dispela pait? (b) Yumi no inap winim dispela pait olgeta long daunim ol laik nogut bilong skin, tasol wanem samting inap helpim yumi?
10 Yumi sinman bilong graun na yumi mas wok strong bambai yumi inap daunim ol laik nogut bilong skin na bihainim pasin i stret. I olsem yumi gat pait. Dispela pait inap givim bikpela hevi na hatwok long yumi. Tasol i no olsem i no gat gutpela samting yumi ken wetim i kamap. Pol i pilim tru hevi bilong dispela pait na i tok: “Husat bai i helpim mi na mi lusim dispela bodi bilong i dai? Mi tenkyu long God! Long han bilong Jisas Krais, Bikpela bilong yumi, em bai i helpim mi.” (Rom 7:24, 25) Long rot bilong Krais Jisas na ofa bilong em, God i helpim yumi.—Rom 5:19-21.
11 Yumi no inap winim dispela pait olgeta, tasol ofa bilong Krais i helpim yumi. Yumi ken amamas long dispela ofa, long wanem, em i mekim bel bilong yumi i kamap klin na i tekewe rong bilong yumi. Long Hibru 9:14, Pol i stori long “blut bilong Krais” i gat strong long “pinisim asua bilong yumi na yumi save olsem yumi stap klin tru long ai bilong God.” Olsem na bel bilong ol Kristen i no ken kotim ol—ol i no ken bel hevi na pilim olsem ol i gat asua. Nogat. Dispela samting na gutpela samting yumi wetim, dispela i mekim na amamas i pulap long bel bilong yumi. (Buk Song 103:8-14; Rom 8:1, 2, 32) Yumi tingim gutpela samting yumi wetim na dispela i strongim yumi olgeta long wok strong long winim dispela pait.
Tingim Gut Samting Yumi Wetim
12. Ol Kristen em God i makim, ol i ken wetim wanem samting?
12 Liklik lain remnan, em God i makim ol long spirit holi, wantaim ol arapela sipsip, ol i mas kisim “pasin bilong wetim God i kisim bek” ol na ol i mas pasim oltaim olsem hat bilong lukautim ol. (1 Tesalonaika 5:8) Ol dispela Kristen i ken tingim gutpela samting ol inap kisim, em laip i stap oltaim long heven. Bai ol inap i go klostu long God Jehova, na amamas long bung wantaim Krais Jisas na ol aposel na ol narapela bilong lain 144,000, em ol i bin i stap gut long God. Em gutpela samting tru!
13. Lain remnan i ting olsem wanem long samting ol i wetim?
13 Lain remnan, em ol i stap yet long graun, ol i ting olsem wanem long wetim Kingdom? F. W. Franz, em presiden bilong Sosaiti Was Taua na em i bin kisim baptais long yia 1913, em i kamapim gut tingting bilong ol. Em i tok: “Mipela i save bai mipela i kisim tru dispela samting mipela i wetim. Mipela i save God bai truim tok promis bilong em na mekim gut tru long mipela olgeta wan wan bilong lain 144,000, winim tru ol samting mipela ting bai em i mekim. Mipela ol manmeri bilong lain remnan, em mipela i bin i stap long yia 1914 long taim mipela i ting God bai kisim mipela olgeta i go long heven, mipela i tingting strong yet olsem samting mipela i wetim em i gutpela samting tru. . . . Maski mipela i wet longtaim, mi laikim tru dispela samting mipela i wetim, na mi no laik lusim dispela pasin. Ol samting liklik lain i wet long en i kamapim klia olsem bikpela lain arapela sipsip tu bai i kisim tru ol samting ol i wet long en, olsem God i tok promis long en. . . . Long dispela as mipela i sanap strong i kam inap long dispela taim nau, na mipela bai sanap strong i go inap long God i ‘givim yumi olgeta samting i nambawan tru na i bikpela moa yet, em ol samting em i bin promis long givim long yumi.’ ”—2 Pita 1:4; Namba 23:19; Rom 5:5.
Amamas Nau Long Wetim Paradais
14. Bikpela lain i mas tingim gut wanem samting ol i wetim?
14 Kain tok olsem bilong man i bilip na amamas tru i kirapim ol manmeri bilong bikpela lain arapela sipsip long pilim tru olsem i gat gutpela as na ol i ken amamas. (Kamapim Tok Hait 7:15, 16) Ol dispela arapela sipsip i mas tingting strong long samting ol i wet long en, em ol i wet long abrusim bagarap long taim bilong Armagedon. Tru tumas, ol i mas tingting strong long lukim Kingdom bilong God i kamapim bikpela hevi tru na pinisim olgeta man nogut em Satan i god bilong ol, na long dispela rot bai Kingdom i kamapim klia olsem God Jehova em i Nambawan Bikpela bilong heven na graun na mekim holi nem bilong Em. Sapos yumi winim taim bilong bikpela hevi tru bai yumi amamas moa yet!—Daniel 2:44; Kamapim Tok Hait 7:14.
15. (a) Taim Jisas i stap long graun, em i bin mekim wanem wok bilong oraitim sik bilong ol man? I gat wanem as na em i mekim dispela wok? (b) Olsem wanem long skin bilong ol man i abrusim bagarap long Armagedon? Tasol olsem wanem long ol manmeri i kirap bek long matmat?
15 Kamapim Tok Hait 7:17 i stori long bikpela lain na i tok: “Pikinini Sipsip . . . bai i stap wasman bilong ol. Em bai i bringim ol i go long ol hul i gat wara i kamap, em wara bilong givim laip. Na God bai i mekim . . . na ol bai i no krai moa.” I gat truim bilong dispela tok profet long nau long ol samting bilong spirit. Tasol ol man i abrusim bagarap long Armagedon bai lukim truim bilong en i kamap long skin bilong ol man. Dispela samting bai kamap olsem wanem? Taim Jisas i stap long graun em i bin mekim orait ol bun krungut na ol lek nogut. Em i opim ai bilong ol aipas na yau bilong ol yaupas. Em i oraitim ol lepraman, na ol man em bun bilong ol i dai olgeta. Em i “mekim orait olgeta kain sik i stap long bodi bilong ol [man].” (Matyu 9:35; 15:30, 31) Kain kain sik i painim yumi ol Kristen long nau, a? Na ol dispela kain sik bilong dispela taim nau bai i stap yet long skin bilong bikpela lain em ol i abrusim bagarap na i go insait long nupela taim. Orait, yumi ken ting Pikinini Sipsip bai mekim wanem bilong helpim ol? Samting em i mekim bilong helpim ol bai narapela kain long samting em bai mekim long ol manmeri i kirap bek long matmat, long wanem, taim ol i kirap bek bai ol i kisim gutpela skin i no gat sik na i no bagarap liklik. Tru, bai ol i gat sin, tasol bai skin bilong ol i gutpela. Olsem na bai Jisas i no gat wok long stretim bek skin bilong ol. Tasol bikpela lain ol i narapela kain—ol bai abrusim bagarap long Armagedon na planti bai ol i sik yet o lek nogut samting. Olsem na Pikinini Sipsip i mas wokim mirakel bilong oraitim bek skin bilong ol, na em bai mekim olsem. Wanpela bikpela as na Jisas i bin oraitim sik bilong ol man taim em i stap long graun em bilong strongim bel bilong ol manmeri bilong bikpela lain na ol i ken amamas na wet long gutpela samting ol bai kisim bihain, olsem bai ol i abrusim bagarap long Armagedon, na bihain bai ol kain sik bilong ol i pinis.
16. (a) Wok bilong oraitim sik bilong ol manmeri i winim Armagedon, ating em bai kirap long wanem taim? Na wanem samting bai kamap? (b) Long Taim Bilong 1,000 Yia bai yumi amamas yet long wetim wanem samting?
16 Dispela wok bilong oraitim sik bilong ol i mas kirap kwik bihain long Armagedon, na bai i gat bikpela hap taim liklik na nau ol manmeri i kirap bek long matmat. (Aisaia 33:24; 35:5, 6; Kamapim Tok Hait 21:4; skelim wantaim Mak 5:25-29.) Long dispela taim bai ol manmeri i tromoi aiglas bilong ol, na ol stik bilong helpim ol long wokabaut, na ol wilsia, na tit giaman, na samting bilong yau bilong helpim ol long harim tok, na ol narapela samting kain olsem. Dispela bai mekim na bai ol i amamas tru! Bai Jisas i kirap kwik long oraitim ol kain sik bilong ol dispela manmeri i winim Armagedon na dispela i stret bilong helpim wok bilong ol, em ol bai stap olsem as bilong “nupela graun.” Olgeta kain sik i save painim ol nau long dispela taim, bai pinis. Na long olgeta taim insait long Taim Bilong 1,000 Yia, ol bai amamas long wet long kisim laip i gutpela olgeta hia long graun long pinis bilong dispela 1,000 yia.
17. Wanem ol amamas bai kamap long wok bilong kamapim bek Paradais long graun?
17 Sapos yu wetim dispela samting, orait yu mas tingim tu gutpela wok bai yu inap insait long en, em yu inap wok wantaim ol narapela long kamapim bek Paradais long graun. (Luk 23:42, 43) Ol manmeri i abrusim bagarap long Armagedon bai ol i wok wantaim long klinim ples na stretim dispela graun bambai i gat ol gutpela ples bilong ol man i kirap bek long matmat i ken i stap long en. Bai i no gat wok moa long planim man i dai pinis. Bai yumi amamas long sekanim ol manmeri i kirap bek long matmat. Ol manmeri yumi laikim tumas ol na ol i dai pinis, bai ol tu i kirap bek. Bai yumi inap bung na toktok wantaim ol bilipman bilong bipo em ol i kirap bek. Yu laik toktok wantaim husat? Ating Abel, o Enok, o Noa, o Jop, o Abraham, o Sara, o Aisak, o Jekop, o Josep, o Moses, o Josua, o Rahap, o Debora, o Samson, o Devit, o Elaija, o Elisa, o Jeremaia, o Esekiel, o Daniel, o Jon Bilong Baptais? Em nau, em wanpela gutpela samting yu ken wetim. Bai yu inap toktok wantaim ol dispela bilipman, na bai ol inap givim save na tingting long yu, na bai yu inap wok wantaim ol long mekim olgeta hap bilong graun i kamap gutpela ples Paradais.
18. Yumi ken tingim wanem ol narapela amamas yumi inap kisim?
18 Tingim tu gutpela kaikai na klinpela wara na win yumi inap kisim taim olgeta samting hia long graun i wok gut wantaim gen olsem Jehova i wokim long pastaim. Long dispela taim bihain bai yumi no sindaun nating na amamas long gutpela sindaun bilong yumi. Nogat. Bai i gat planti gutpela wok yumi ken amamas long mekim. Bai i no gat pasin raskol, o pasin bilong man i tingim em yet tasol, o pasin bilong tingting nogut long narapela man, o kros pait—bai olgeta manmeri long olgeta hap i pas gut wantaim olsem brata brata na bai olgeta i bihainim ol gutpela pasin em spirit bilong God i kirapim ol man long bihainim. Em samting tru bilong amamas long en!—Galesia 5:22, 23.
Gutpela Samting Yumi Wetim Em i Mekim Yumi i Stap Amamas
19. (a) Wanem taim yumi inap kisim dispela amamas em Pol i tok long en long Rom 12:12? (b) Bilong wanem yumi mas sanap strong na no ken larim ol hevi i daunim yumi, nogut yumi no tingim moa gutpela samting yumi wetim?
19 Taim yumi kisim pinis samting yumi wet long en, yumi no ken wetim moa, olsem na dispela amamas Pol i tok long en long Rom 12:12 em yumi inap kisim long nau. (Rom 8:24) Taim yumi tingting long ol gutpela samting Kingdom bilong God bai kamapim long bihain, dispela i mekim yumi i amamas na wetim Kingdom. Olsem na yumi mas sanap strong na yumi no ken larim ol hevi bilong dispela taim nogut nau i daunim yumi o pulim tingting bilong yumi, nogut yumi no tingim moa dispela gutpela samting yumi wetim i stap. Yumi no ken les long sanap strong, nogut yumi no tingim moa gutpela samting yumi wetim na klostu nau bai yumi kisim. (Hibru 12:3) Sapos yu lusim rot Kristen, dispela i no ken helpim yu long stretim ol hevi bilong yu. Yu mas tingting gut. Sapos man i larim ol hevi bilong nau i daunim em na em i lusim wok bilong God, bai ol dispela hevi bilong em i stap yet, na bai i no gat wanpela gutpela samting em i ken wetim—bai em i lus na i no inap amamas long ol gutpela samting tru liklik taim bai kamap.
20. Ol man i bilip na wetim Kingdom, dispela bilip bilong ol i mekim wanem long ol? Bilong wanem em i mekim olsem?
20 I gat planti samting tru na lain bilong Jehova ol inap i stap amamas. Ol i wetim gutpela samting i kamap na dispela i mekim ol i stap amamas. Na ol i wok strong long tokim ol narapela man long dispela gutpela samting ol i wetim. (2 Korin 3:12) Olsem na ol man i bilip na wetim Kingdom, dispela bilip bilong ol i strongim bel bilong ol na ol i no pret. Na ol i wok long strongim bel bilong ol narapela—ol i tokim ol long ol gutpela tok i kam long God. Ol man i bilip long dispela tok ol i stap amamas, long wanem, ol i wetim wanpela gutpela samting i winim tru ol narapela samting ol manmeri i bin wetim—ol i wetim Kingdom em bai kamapim bek Paradais long graun. Sapos ol man i no bilip long dispela tok yumi autim long ol, maski, yumi stap amamas yet, long wanem, i gat dispela gutpela samting yumi wetim. Ol man i no laik harim tok, ol tasol bai lus long kisim gutpela samting—yumi nogat.—2 Korin 4:3, 4.
21. Wanem samting i klostu pinis? Yumi mas ting olsem wanem long samting yumi wetim?
21 God i tok promis olsem: “Harim. Mi mekim olgeta samting i kamap nupela.” (Kamapim Tok Hait 21:5) Nupela taim na olgeta gutpela blesing bilong en bilong i stap oltaim i klostu pinis. Samting yumi bilip long en na yumi wet long kisim—olsem laip long heven o long paradais long graun—em gutpela samting tru, olsem na yumi mas holimpas bilip. Yumi stap long taim bilong planti hevi. Yumi stap long las taim. Olsem na nau, winim olgeta taim bipo, yumi mas holimpas bilip. Samting God i tokim yumi long wetim i mas i stap “olsem gutpela strongpela anka bilong laip bilong yumi.” Sapos yumi bilip tru long Jehova, “em strongpela ples hait bilong yumi,” orait bai i gat strongpela as na long dispela taim nau yumi ken ‘amamas na wetim’ ol samting God i tok long givim long yumi.—Hibru 6:19; Aisaia 26:4.
[Ol Futnot]
a Long 1992, ol Witnes Bilong Jehova long olgeta hap bai tingim dispela tok, em teks bilong yia: ‘Amamas na wetim Bikpela . . . Beten oltaim.’—Rom 12:12.
Sampela Askim Bilong Kamapim Gen Ol Bikpela Tok
◻ Wanem nambawan gutpela samting ol man i ken wetim?
◻ Amamas tru em wanem kain amamas?
◻ Ol man i winim Armagedon, ating wok bilong oraitim sik bilong ol bai kirap long wanem taim?
◻ Bilong wanem yumi no ken larim ol hevi i daunim yumi na yumi no tingim moa gutpela samting yumi wetim?
◻ Yu wet long kisim wanem ol amamas long nupela taim?
[Piksa long pes 9]
Sapos yu lukim kain wok olsem Jisas i bin mekim taim em i oraitim ol sik, bai amamas i pulap long bel bilong yu, a?
[Piksa long pes 10]
Ol man i amamas long Kingdom ol i save tokim ol narapela long en na strongim bel bilong ol