‘Go Antap na Bungim Bikpela’—Olsem Wanem?

PINIS bilong dispela pasin nogut bilong graun i klostu tru, na ol bikpela samting em tok profet i bin makim bipo, ol bai kamap. Olsem wanem? Dispela bilip olsem ol Kristen bai go antap na bungim Krais, em i insait long ol dispela samting i mas kamap? Sapos olsem, orait wanem taim em bai kamap, na em bai kamap olsem wanem?

Ol man i bilip long dispela samting ol i kolim tok bilong aposel Pol long 1 Tesalonaika 4:17 bilong helpim dispela bilip. Orait, yumi ken glasim gut dispela tok bilong Baibel. Pol i tok:

“Ol brata, mipela i laik bai yupela i ken save gut long wanem ol samting bai i kamap long ol manmeri i dai pinis. . . . Yumi bilip olsem Jisas i dai na i kirap bek gen. Olsem na yumi save, long strong bilong Jisas, God bai i kirapim ol Kristen i dai pinis na ol bai i kam bek wantaim Jisas. Mipela i autim tok bilong Bikpela long yupela olsem: Taim Bikpela i kam bek, yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat. God bai i tok strong, na namba wan ensel bai i singaut, na biugel bilong God bai i krai. Na Bikpela bai i lusim heven na i kam daun. Na ol man i bilip long Jisas na i dai pinis, ol bai i kirap bek pastaim. Long dispela taim yumi manmeri i gat laip na i stap yet, yumi bai i go antap long klaut wantaim ol dispela manmeri, na yumi olgeta bai i bungim Bikpela. Na yumi bai i stap wantaim Bikpela oltaim oltaim. Orait yupela i mas autim dispela tok long ol arapela manmeri bilong God, bilong strongim bel bilong ol.”​—⁠1 Tesalonaika 4:​13-18.

Pol i bin raitim dispela namba wan pas i go long ol Kristen long Tesalonaika long yia 50 samting, na long dispela taim kongrigesen i olsem nupela yet. Sampela ol i bel hevi, long wanem, sampela namel long ol i dai pinis. Tasol tok bilong Pol long ol man i dai pinis bai kirap bek, dispela i strongim bel bilong ol.

Krais i ‘Kam Bek na i Stap’

Tasol Pol i tok moa olsem: “Taim Bikpela i kam bek, yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat.” (Ves 15) Dispela tok long Bikpela i “kam bek,” long tok Grik long Baibel bilong pastaim em pa·rou·siʹan, olsem ‘stap klostu long.’

Taim wanpela bikman bilong gavman i kam long wanpela kantri, ol i save tokaut long de em bai stap long dispela kantri. Na ol i bin mekim olsem tu long taim Bikpela Krais Jisas i kam bek na i stap. Inap longtaim pinis, dispela nius Wastaua i tokaut long ol mak i kamap bilong makim olsem Jisas i “kam bek” pinis na i stap long Kingdom bilong heven na em i kirap mekim wok king long yia 1914. Ol samting i kamap bihain long dispela yia i makim stret olsem Jisas i kam i stap pinis long Kingdom, tasol yumi no inap lukim em i kam i stap. (Matyu 24:​3-14) Olsem na taim Pol i tok, sampela Kristen bai ‘go antap long klaut na bungim Bikpela,’ em i laik tok olsem ol dispela manmeri i stap laip yet taim Krais i kam bek na i stap King, ol bai bungim Krais antap long heven stret, em ples Jisas i stap long en na i sindaun long han sut bilong God. (Hibru 1:​1-3) Tasol husat dispela lain ol ‘i go antap’?

“Israel Bilong God”

Baibel i toktok long ol Israel bilong skin na i toktok tu long “Israel bilong God.” Ol bilipman bilong lain Juda na bilong ol narapela lain ol i bilong inapim namba bilong dispela lain em God i bin makim ol long spirit holi o strong bilong em. (Galesia 6:16; Rom 11:​25, 26; 1 Jon 2:​20, 27) Kamapim Tok Hait long Baibel i makim klia olsem i gat 144,000 Israel bilong spirit, na i makim olsem olgeta i stap wantaim Pikinini Sipsip, Krais Jisas, long Maunten Saion bilong heven. Ol i bilong i stap king na pris wantaim Krais. (KTH 7:​1-8; 14:​1-4; 20:⁠6) Sampela namel long ol em ol Kristen long kongrigesen bilong Tesalonaika na ol narapela hap, maski ol i bilong wanem kantri o ol i gat wanem kain skin.​—⁠Aposel 10:​34, 35.

Bilong i go antap long heven na kisim dispela gutpela wok, pastaim olgeta wan wan Israel bilong spirit i stap gut long God ol i mas mekim wanpela samting. Tingim Jisas: Pastaim em i bin i dai long pos na bihain em i kirap bek na i go antap. Olsem tasol, ol Kristen i bilong i go long heven ol i mas i dai pastaim na bai ol i ken kisim dispela gutpela pe, olsem laip oltaim long heven. (1 Korin 15:​35, 36) Na i wankain tu long olgeta wan wan bilong lain Israel bilong spirit long taim bilong ol aposel na long ol manmeri bilong nau em ol i bilong dispela lain na ol i stap laip yet.

Taim Pol i toktok pinis long Bikpela bai “kam bek,” nau em i toktok long taim ol Israel bilong spirit i stap gut long God ol bai kisim gutpela pe bilong ol long heven. Em i tok: “Namba wan ensel bai i singaut, na biugel bilong God bai i krai. Na Bikpela bai i lusim heven na i kam daun. Na ol man i bilip long Jisas na i dai pinis, ol bai i kirap bek pastaim.” (Ves 16) Olsem na taim Jisas i kam bek i stap na em i kirap mekim wok king, yumi ken ting, long dispela taim ol manmeri bilong lain Israel bilong spirit em bipo ol i holimpas bilip na ol i dai pinis, ol bai kirap bek na i go antap long heven. (1 Korin 15:23) Nau ol i mekim wok king wantaim Jisas long heven. Tasol olsem wanem long liklik hap bilong dispela lain Kristen em God i bin makim ol na ol i stap laip yet long graun? Ol i wetim Jisas i kam kisim ol na ol i go antap, o olsem wanem?

“Go Antap” Olsem Wanem?

Pol i stori pinis long ol Kristen bilong dispela lain ol i dai pinis, na bihain em i tok: “Long dispela taim yumi manmeri i gat laip na i stap yet, yumi bai i go antap long klaut . . . na yumi olgeta bai i bungim Bikpela.” (Ves 17) Ol dispela “manmeri i gat laip na i stap yet” em dispela hap lain i stap laip yet taim Jisas i stap pinis olsem King. Ol bai “go antap” na bungim Bikpela Jisas. Olsem ol gutpela Kristen bilong pastaim ol i bin mekim, ol tu i mas i dai pastaim na bai ol i ken i go bung wantaim Krais long heven.​—⁠Rom 8:​17, 35-39.

Taim Pol i raitim pas long ol Kristen long Korin, em i tok: “Mi tok stret long yupela, man bilong dispela graun em i no inap i go insait long kingdom bilong God . . . Na samting bilong bagarap i no inap kisim samting i no save bagarap. Yupela harim. Mi laik autim wanpela tok hait long yupela. Bai yumi olgeta i no i dai [na slip]. Tasol bai yumi olgeta i senis na i kamap narakain. Dispela bai i kamap wantu tasol, long taim bilong las biugel i krai. Yes, biugel bai i krai, na ol man i dai pinis bai i kirap, na ol i no inap bagarap moa. Na yumi man i no i dai yet, yumi bai i senis na i kamap narakain.” (1 Korin 15:​50-52) Nau long taim Jisas i stap pinis olsem King, ol wan wan bilong dispela liklik hap bilong lain Israel bilong spirit ol i stap yet, taim ol i dai, “wantu tasol” bai ol i kirap bek olsem spirit na i go antap long heven na bung wantaim Jisas na mekim wok king wantaim em long Kingdom. Tasol olsem wanem long ol narapela manmeri i lotuim Jehova? Klostu nau na dispela pasin nogut bilong graun bai pinis, olsem na ol tu bai go antap long heven, o olsem wanem?

Abrusim Bagarap​—⁠Tasol i No Go Antap

Jisas i kamap King long 1914, olsem na nau yumi stap tru long “taim bilong las de.” (Daniel 12:⁠4) Pol i toksave long yumi olsem: “Ol brata, . . . Yupela yet i save pinis, De bilong Bikpela bai i kamap wantu tasol olsem stilman i kam long nait. Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, . . . Na ol bai i no inap abrusim dispela samting.” (1 Tesalonaika 5:​1-3) Tasol ol Kristen i was i stap ol bai abrusim bagarap. Ol bai abrusim olsem wanem?

Taim dispela tok i kamap, olsem: “Nau em i gutpela taim tru. Yumi stap gut,” em nau, wanpela taim nogut em Jisas i kolim olsem “bikpela hevi tru” em bai kamap. Kamapim Tok Hait long Baibel i stori long “planti manmeri tru,” ol i stap gut long God na ol i gat tingting long i stap oltaim long paradais long graun. Baibel i tok, ol i bin abrusim “bikpela hevi” na “ol i bin wasim ol klos bilong ol long blut bilong Pikinini Sipsip, na ol klos i kamap waitpela.” (KTH 7:​9, 14; Luk 23:43) Ol i no bilong i go antap long heven. Ol i gat tingting long abrusim dispela bagarap na i stap long graun. Bilong redi long mekim olsem, ol i mas was i stap na tingting i klia na tingim ol samting bilong spirit. Olsem wanem yu ken mekim olsem na abrusim bagarap long pinis bilong dispela taim nogut?

Olsem Baibel i tok, ‘nogut yu slip. Ai bilong yu i mas op i stap na tingting bilong yu i mas klia, na yu mas bilip long God na laikim tru ol arapela.’ (1 Tesalonaika 5:​6-8) Nau em i taim bilong putim yau long ol tok profet bilong God. Taim i sot pinis, olsem na yu mas tingim gut tok bilong Pol, em i tok: “Yupela i no ken bel nogut long ol man i laik autim tok profet long yupela. Tasol yupela i mas skelim gut olgeta tok na pasin. Na yupela i mas holimpas ol gutpela pasin na abrusim olgeta kain pasin nogut.” (1 Tesalonaika 5:​20, 21) Olsem na ol Witnes Bilong Jehova i amamas long singautim yu i kam long Haus Kingdom bilong ol na kisim save long ol tok profet bilong Baibel na ol narapela tok bilong en.

Taim yu wok long kisim stretpela save long Baibel na bilip bilong yu i kamap strong, bai yu save long laik bilong God Jehova long rausim olgeta birua bilong em na kamapim bek paradais long graun. Sapos yu bilip tru na yu kamapim bilip bilong yu, yu tu inap insait long dispela lain ol bai abrusim bagarap long taim bilong “bikpela hevi tru,” na yu ken i stap na mekim gut long ol manmeri i kirap bek long matmat na i stap aninit long Kingdom, em God i putim long han bilong Krais Jisas na dispela lain ol i kirap bek long spirit na ol i ‘go antap na bungim Bikpela’!

Tasol olsem wanem long ol narapela manmeri i bihainim tok bilong God? Baibel i makim wanem gutpela samting bilong ol? Ol inap i stap oltaim long dispela graun, aninit long Kingdom bilong God.

[Piksa long pes 7]

Ol manmeri i abrusim bagarap long taim bilong “bikpela hevi tru,” ol bai i stap na mekim gut long ol manmeri i kirap bek long matmat na i stap aninit long Kingdom, em God i putim long han bilong Krais Jisas wantaim dispela lain i kirap bek na ‘go antap’ long heven