Krais Jisas
Stori: Em dispela wanpela Pikinini tasol God Jehova yet i kamapim. God i wokim em paslain long olgeta narapela samting. Long rot bilong em, olgeta narapela samting long heven na long graun i bin kamap. Em i gat bikpela namba tru—em i namba tu long Jehova. Jehova i salim em i kam long graun bilong i dai na baim bek ol man, na long dispela rot bai ol lain bilong Adam i bilip ol inap kisim laip i stap oltaim. Dispela Pikinini i kisim bek biknem long heven na nau em i stap King, na em i gat strong bilong bagarapim olgeta lain nogut na kamapim laik bilong God long graun olsem God i laik mekim long pastaim tru. Insait bilong nem Jisas long tok Hibru i olsem “Jehova i Kisim Bek”; na insait bilong nem Krais (tok Hibru, Ma·shiʹach) em “Man God i Makim.”
Krais Jisas i bin i stap tru long graun, o olsem wanem?
Baibel yet i kamapim klia olsem Krais Jisas i bin i stap tru long graun long bipo. Ol tok bilong 4-pela Gutnius i kolim planti samting i makim taim stret na ples stret em Jisas i bin kamap long en; dispela i no stori nating. Lukim Luk 3:1, 2, 21-23.
Wanpela Juda bilong raitim stori bilong bipo em i stap long taim bilong ol aposel, em Josifas, em i stori long ol i bin tromoi ston na kilim i dai “Jems, em brata bilong Jisas ol i kolim Krais.” (The Jewish Antiquities, bilong Josifas, Buk 20, hap 200) Na Buk 18, hap 63, 64, i kolim nem bilong Jisas na mekim gutpela tok long em, tasol sampela man i tok, Josifas i no bin raitim; ol i ting narapela man i bin raitim bihain o ol Kristen i bin skruim sampela tok long en. Tasol ol i tok, dispela hap tok wantaim pasin bilong raitim i olsem bilong Josifas, na dispela tok i stap long olgeta rait bilong dispela buk em ol i stap yet.
Tasitus bilong Rom em i stap long yia 80 samting na em i raitim stori bilong bipo, na em i tok: “Kristus [em “Krais” long tok Rom] em i as bilong nem Kristen, na wanpela namba wan gavman bilong yumi, em Pontius Pailat, i bin kilim em i dai long taim bilong King Taiberius.”—Buk The Complete Works of Tacitus, “The Annals,” Buk 15, par. 44.
Sampela man i no Kristen i bin raitim stori bilong Jisas, na wanpela bikpela buk i tok: “Ol dispela stori bilong ol narapela i kamapim klia olsem long bipo ol birua bilong lotu Kristen tu i no gat tupela tingting long Jisas i bin i stap tru long graun.”—The New Encyclopædia Britannica (1976), Macropædia, Vol. 10, p. 145.
Krais Jisas em i wanpela gutpela man tasol?
Jisas i krosim wanpela man i kolim em “Gutpela Tisa,” long wanem em i save, God i winim em long gutpela pasin. (Mk 10:17, 18) Tasol sapos wanpela man i save mekim tok i tru, ol narapela i save ting em i gutpela man. Olsem na yumi save Jisas em i wanpela gutpela man. Ol birua tu i tok, em i save mekim ol tok i tru. (Mk 12:14) Tasol em i no olsem wanpela gutpela man tasol. Em yet i tok, taim em i no kamap man yet long graun, em i bin i stap, na em i dispela wanpela Pikinini tasol bilong God, na em i man God i makim bilong kisim bek ol manmeri, na ol tok bilong Ol Skripsa Hibru i makim em bai kam.—Jo 3:13; 10:36; 4:25, 26; Lu 24:44-48.
Yu ting Jisas em i profet nating i gat namba wankain olsem bilong Moses, Buda, Mohamet, o narapela bikman bilong lotu?
Jisas i lainim ol man olsem em i dispela wanpela Pikinini tasol em God yet i bin kamapim (Jo 10:36; Mt 16:15-17), na em i man God i makim bilong kisim bek ol (Mk 14:61, 62), na bipo em i stap long heven (Jo 6:38; 8:23, 58), na ol man i mas kilim em i dai, na em bai kirap bek long namba 3 de, na bihain bai em i go bek long heven. (Mt 16:21; Jo 14:2, 3) Ol dispela tok i tru o nogat? Tru Jisas i narapela kain long olgeta narapela profet bilong God na ol bikman bilong lotu, o nogat? Dispela i kamap klia long namba 3 de bihain long em i dai. Olsem wanem? Long dispela de God i bin kirapim bek em na ol man inap save, em i bin mekim tok i tru, na tru tumas em i Pikinini bilong God? (Ro 1:3, 4) Winim 500 man i bin lukim Jisas taim em i kirap bek pinis, na long ai bilong ol yet ol gutpela aposel i lukim em i go antap long heven na bihain smok bilong antap i haitim em na ol i no lukim em moa. (1 Ko 15:3-8; Ap 1:2, 3, 9) Ol i bilip tru olsem em i kirap bek, olsem na ol i strong long tokim ol man long dispela, maski ol inap kisim bagarap long mekim olsem.—Ap 4:18-33.
Bilong wanem planti Juda i no bilip olsem Jisas em i dispela man God i makim?
Wanpela buk i tok: “Ol Juda long taim bilong ol Rom i ting God bai salim [Mesaia, em dispela man God i makim], na em bai rausim ol haiden i bosim ol na kamapim gen kingdom bilong Israel.” (Encyclopaedia Judaica, 1971, Vol. 11, blok 1407) Ol i no laik kalabus moa aninit long ol Rom. Ol buk i stori olsem sampela Juda i tingim tok profet bilong Daniel 9:24-27 na ol i ting, dispela man God i makim bai kam long taim bilong ol aposel. (Lu 3:15) Tasol dispela tok profet i makim olsem taim em i kam em taim bilong ‘pinisim sin’ tu, na Aisaia sapta 53 i makim olsem dispela Man i mas i dai bambai dispela samting inap kamap. Tasol planti Juda i ting i no gat wok long wanpela man i dai bilong pinisim sin bilong ol. Ol i ting ol i stap gutpela long ai bilong God, long wanem, ol i lain bilong Abraham. Wanpela buk i tok: “Abraham [i stap gutpela long ai bilong God] na dispela i gat bikpela strong inap long tekewe olgeta liklik pasin kranki na tok giaman Israel i mekim long dispela graun.” (A Rabbinic Anthology, p. 676) Ol Juda i sakim Jisas; ol i no bilip olsem em i dispela man God i tok long salim i kam. Long dispela rot ol i truim wanpela tok profet i tok: “Ol i givim baksait olgeta long em. Na yumi bin lukim em olsem man nating.”—Ais 53:3.
Klostu long taim Moses i dai, em i mekim tok profet olsem ol Israel bai lusim lotu i tru, na long dispela as bai ol samting nogut i kamap long ol. (Kaunim Lo 31:27-29.) Stori bilong Buk Hetman long Baibel i kamapim klia olsem dispela i kamap planti taim. Long taim bilong profet Jeremaia, lain Israel i lusim Jehova na ol i go kalabus long Babilon. Na bilong wanem God i larim ol Rom i bagarapim Jerusalem na haus lotu bilong en long yia 70? Ol Israel i bin mekim wanem pasin nogut na God i no lukautim ol moa olsem em i bin mekim long taim ol i stap gut long em? Ol i bin sakim Jisas—ol i no bilip olsem em i dispela man God i makim bilong kisim bek ol.
Krais Jisas em i God o nogat?
Jo 17:3: “[Jisas i beten long Papa olsem:] Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jisas i no tok em i God; em i tok, Papa bilong em long heven em ‘wanpela tasol em i God tru.’)
Jo 20:17: “Jisas i tokim [Maria bilong Makdala] olsem, ‘Yu mas i go long ol brata bilong mi na tokim ol olsem, mi bai go antap, na mi go long Papa bilong mi na Papa bilong yupela. Na mi go long God bilong mi na God bilong yupela.’ ” (Jisas i kirap bek pinis na em i tingim Papa em i God bilong em olsem Papa em i God bilong Maria bilong Makdala. Na i no gat wanpela taim long Baibel em Papa i tokim Pikinini, “Yu God bilong mi.”)
Lukim tu het-tok “God Triwan,” pes 132, 133, 138, 139.
Yu ting Jon 1:1 i makim olsem Jisas em i God?
Jo 1:1: “Bipo bipo tru, taim olgeta samting i no kamap yet, Tok i stap. Tok i stap wantaim God na Tok em yet i God [na tu RS, KJ, JB, Dy, Kx, NAB].” Long sampela Baibel ol i tanim dispela tok olsem: “Tok i kain olsem God.” (Mo; AT; Sd) Na long sampela Baibel ol i tanim olsem: “Tok em i wanpela god.” (NW; NTIV)
Ol dispela man bilong tanim tok i lukim wanem samting long rait Grik na sampela ol i no laik tanim dispela tok olsem “Tok em yet i God”? Long dispela ves, paslain long namba wan tok “God” (tok Grik, the·osʹ) i gat wanpela hap tok Grik (dispela) i stap, na em i no stap paslain long namba 2 tok “God.” Long rait Grik, taim ol i skruim dispela hap tok long narapela tok, dispela i makim olsem ol i stori long man yet, na taim i no gat dispela hap tok, ol i stori long pasin bilong man, em i kain olsem wanem. Olsem na dispela ves i no stori long Tok (Jisas) em i dispela God em Tok i stap wantaim em. Nogat. Dispela ves i stori long Jisas em i kain olsem God, em i wanpela god.
Wanem insait bilong tok bilong aposel Jon long Jon 1:1? Yu ting Jon i laik tok Jisas yet em i God, o Jisas wantaim Papa i wanpela God? Long Jon 1:18, Jon i tok: “I no gat wanpela man [RS, KJ, Dy] i bin lukim God. Nogat tru. Dispela wanpela Pikinini Bilong God . . . i bin soim God long yumi.” Olsem wanem? I gat sampela man i bin lukim Krais Jisas, em Pikinini bilong God? Tru tumas! Olsem na yu ting Jon i laik tok, Jisas em i God? Nogat, a? Klostu long pinis bilong Gutnius Jon i raitim, em i tokaut klia olsem: “Dispela tok mi raitim, em mi raitim bai yupela i ken bilip long Jisas em . . . i Pikinini Bilong God [em i no God].”—Jo 20:31.
Yu ting tok bilong Tomas long Jon 20:28 i makim Jisas em i God?
Jo 20:28 i tok: “Na Tomas i bekim tok bilong em olsem, ‘Yu Bikpela bilong mi. Yu God bilong mi.’ ”
I no gat rong long Tomas i kolim Jisas olsem “God,” sapos tru Tomas i gat dispela tingting na em i mekim dispela tok. Dispela bai i stret wantaim tok bilong Jisas yet, em i kamapim tok bilong Buk Song i tok long sampela man i gat namba na i kolim ol olsem “god.” (Jo 10:34, 35; Sng 82:1-6) Tasol Krais i gat bikpela namba moa, winim ol dispela man. Em i stap namba tu long Jehova, olsem na long Jon 1:18 Baibel (NW) i tok, Jisas “em i dispela wanpela god tasol God i bin kamapim.” (Lukim tu Ro na By.) Na long Aisaia 9:6, Baibel i tok profet long Jisas na kolim em “God i gat bikpela strong,” tasol em i no God i Gat Olgeta Strong. Dispela olgeta tok i stret wantaim tok bilong Jon 1:1 i tok, Jisas em i “wanpela god” (NW), o “kain olsem God” (AT).
Tok bilong ol ves i stap klostu i helpim yumi long kisim stretpela tingting long dispela tok. Paslain liklik long taim Jisas i dai, Tomas i bin harim Jisas i mekim beten na i tok long Papa olsem: “Yu wanpela tasol yu God tru.” (Jo 17:3) Taim Jisas i kirap bek pinis, em i salim tok i go long ol aposel, em Tomas i bilong dispela lain, na em i tokim ol: “Mi go long God bilong mi na God bilong yupela.” (Jo 20:17) Aposel Jon i raitim tok Tomas i mekim taim em i lukim Krais i kirap bek pinis na putim han long em, na nau Jon i tok: “Dispela tok . . . mi raitim bai yupela i ken bilip long Jisas em . . . i Pikinini Bilong God.” (Jo 20:31) Olsem na sapos long tok bilong Tomas wanpela man i kisim tingting olsem Jisas ‘wanpela tasol em i God tru,’ o Jisas em i “God Pikinini” insait long wanpela God Triwan, orait dispela man i mas skelim gen tok bilong Jisas yet long Jon 20:17, na em i mas skelim tok klia aposel Jon i mekim long Jisas long Jon 20:31.
Yu ting tok bilong Matyu 1:23 i makim olsem taim Jisas i stap long graun em i God?
Mt 1:23: “ ‘Harim. Wanpela meri i no bin slip wantaim man, em bai i gat bel na i karim wanpela pikinini man. Na bai ol i kolim nem bilong en Emanuel.’ As bilong dispela nem i olsem, God i stap wantaim yumi.”
Taim ensel bilong Jehova i tokaut long meri bai karim Jisas, em i tok pikinini em God yet o olsem wanem? Nogat. Ensel i tok: “Em bai i stap bikman. Na bai ol i kolim em Pikinini bilong God Antap Tru.” (Lu 1:32, 35) Na i no gat wanpela taim Jisas i tok, ‘Mi God.’ Oltaim em i save tok, “Mi Pikinini Bilong God.” (Jo 10:36) God i salim dispela Pikinini bilong em Jisas i kam long graun; olsem na long rot bilong em, God i stap wantaim ol man.—Jo 3:17; 17:8.
Planti nem Hibru i gat tok “God” insait long en, o sotpela pasin bilong kolim nem tru bilong God. Olsem: Insait bilong nem Eliata i olsem “God i Kam Pinis”; Jehu i olsem “Em Jehova”; Elaija i olsem “God Bilong Mi Em Jehova.” Tasol man i gat kain nem olsem, dispela i no makim olsem em yet i God.
Wanem insait bilong tok bilong Jon 5:18?
Jo 5:18: “Ol Juda i harim dispela tok na ol i laikim moa yet long kilim Jisas i dai, long wanem, em i no kalapim lo bilong de Sabat tasol. Nogat. Em i tok, God em i Papa bilong em stret. Long dispela tok em i mekim em yet i kamap wankain olsem God.”
Ol Juda i no bilip, ol i ting Jisas i laik mekim em yet i kamap wankain olsem God, long wanem, em i tok God em i Papa bilong em. I stret Jisas i kolim God olsem Papa bilong em, tasol i no gat wanpela taim em i tok em i bikpela olsem God. Nogat. Em i bekim stret tok long ol Juda, olsem: “Tru tumas mi tokim yupela, Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim.” (Jo 5:19; lukim tu Jon 14:28; 10:36.) Ol dispela Juda i mekim narapela tok kranki tu, ol i tok Jisas i kalapim lo bilong Sabat. Tasol Jisas i save bihainim tru lo bilong Sabat, na em i tok: “Em i orait long yumi mekim gutpela pasin long de Sabat.”—Mt 12:10-12.
Sapos sampela i lotu long Jisas, yu ting dispela i makim olsem em i God?
Long Hibru 1:6, sampela Baibel (RS, TEV, KJ, JB, NAB) i tok, ol ensel i mas “lotu” long Jisas. Tasol Baibel NW i tok, ol i mas “brukim skru” long em. Na long Matyu 14:33, sampela Baibel (RS, TEV, KJ) i tok, ol disaipel i bin “lotu” long Jisas, tasol sampela Baibel i tok, ol i “mekim pasin bilong givim biknem long em” (NAB), “brukim skru long ai bilong em” (JB), “pundaun klostu long lek bilong em” (NE), “brukim skru long em” (NW).
Hap tok Grik (pro·sky·neʹo) yumi tanim olsem “lotu long,” em wanpela buk i stori long en olsem: “Ol i kolim dispela tok bilong makim pasin bilong daunim het i go daun long graun klostu long lek bilong man na givim kis long lek bilong em o long arere bilong klos bilong em o long graun.” (A Greek-English Lexicon of the New Testament and Other Early Christian Literature, p. 716) Ol i raitim dispela hap tok long Matyu 14:33 bilong makim pasin ol disaipel i mekim long Jisas; na ol i raitim long Hibru 1:6 bilong makim pasin ol ensel i mas mekim long em. Taim ol i tanim ol tok bilong Ol Skripsa Hibru long tok Grik (Septuagint), ol i raitim dispela tok long Stat 22:5 bilong makim pasin Abraham i mekim long Jehova, na ol i raitim long Stat 23:7 bilong makim pasin Abraham i mekim long ol man bilong bisnis, em i bihainim pasin bilong ol man long dispela taim; na ol i raitim long 1 King 1:23 bilong makim pasin em profet Natan i mekim long taim em i laik i go klostu long King Devit.
Long Matyu 4:10, Jisas i tok: “Yu mas aninit long God, Bikpela bilong yu. Na yu mas lotu long [tok Grik, pro·sky·neʹo] em wanpela tasol.” (Jisas i kamapim tok bilong Lo 6:13, na nem tru bilong God, em dispela 4-pela leta, i stap long dispela ves.) Olsem na yumi save, dispela hap tok Grik (pro·sky·neʹo) i makim pasin yumi mas mekim long God tasol, olsem yumi go klostu long em long bel na long tingting na yumi lotu long em.
Yu ting ol mirakel Jisas i wokim i makim em i God?
Ap 10:34, 38: “Pita i tok olsem, ‘ . . . God i bin makim Jisas bilong Nasaret, na givim Holi Spirit na bikpela strong long em. Na Jisas i go long ol ples nabaut na i helpim ol manmeri. God i stap wantaim em na em i mekim orait gen olgeta man Satan i bin bagarapim ol.’ ” (Olsem na taim Pita i lukim Jisas i wokim sampela mirakel, em i no kisim tingting olsem Jisas em i God; em i tok, God i stap wantaim Jisas. Skelim wantaim Matyu 16:16, 17.)
Jo 20:30, 31: “Jisas i wokim planti arapela mirakel [RS, TEV, Kx] . . . na mi no raitim olgeta long dispela buk. Tasol dispela tok mi raitim, em mi raitim bai yupela i ken bilip long Jisas em dispela man God i makim bilong kisim bek ol manmeri bilong en. Em i Pikinini Bilong God.” (Olsem na taim yumi tingim ol mirakel Jisas i bin wokim, i stret yumi kisim tingting olsem em i “dispela man God i makim” na em i “Pikinini Bilong God.” Em i no “God Pikinini.” Nogat tru.)
Ol profet i stap paslain long Krais, olsem Elaija na Elisa, ol i bin wokim sampela mirakel kain olsem bilong em, tasol dispela i no makim olsem ol i God, a?
Yu ting Jisas em Jehova bilong “Olpela Testamen”?
Lukim bikpela het-tok “Jehova,” pes 172, 173.
Yu ting yumi mas bilip tasol long Jisas na bai God i kisim bek yumi?
Ap 16:30-32: “ ‘Tupela bikman, mi mas mekim wanem samting na bai God i kisim bek mi?’ Na [Pol tupela Sailas] i tok olsem, ‘Yu mas bilip long Bikpela Jisas . . . ’ Na tupela i autim tok bilong Bikpela [“God,” NAB, AT, na liklik tok daunbilo long JB na NE] long em na long ol lain bilong em.” (Bilong “bilip long Bikpela,” yu ting woda i mas tok tasol em i bilip? Pol i kamapim klia olsem em i mas mekim sampela samting moa—em i mas kisim save na bilip long Tok Bilong God olsem nau Pol tupela Sailas i autim long em. Sapos wanpela man i tok em i bilip long Jisas, tasol em i no lotu long dispela God em Jisas i lotu long Em, o em i no mekim ol pasin na wok Jisas i makim bilong ol disaipel bilong em, orait yu ting dispela man i bilip tru long Jisas? Tru, yumi no inap kisim laip olsem pe bilong ol wok yumi mekim. Nogat. I gat wanpela rot tasol bilong kisim laip, em yumi mas bilip long ofa bilong Krais, em i lusim laip bilong em bilong baim bek yumi. Tasol yumi no ken tok tasol yumi bilip; yumi mas mekim ol wok na pasin i stret wantaim bilip bilong yumi, maski dispela i givim hatwok long yumi. Long Matyu 10:22, Jisas i tok: “Ol manmeri i stap strong inap long las de, God bai i kisim bek ol.”)
Taim Jisas i no kamap man yet, em i bin stap long heven, o nogat?
Kl 1:15-17: “Em [Jisas] i wankain olsem God yet. Em i namba wan pikinini bilong God, na em i [namba wan] bilong olgeta samting God i bin mekim ol i kamap. Long han bilong dispela Pikinini, God i bin wokim olgeta samting long heven na long graun. . . . Taim olgeta dispela samting i no kamap yet, em i stap.”
Jo 17:5: “[Jisas i beten olsem:] Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.” (Na Jon 8:23)
Long heven Jisas i gat bodi bilong graun o olsem wanem?
1 Ko 15:42-50: “Bodi yumi planim, em i bilong graun. Bodi i kirap bek, em i bilong heven. . . . Buk bilong God i tok olsem, ‘Namba wan man, Adam, i bin kisim laip.’ Tasol narapela Adam i kamap bihain tru [Jisas, em i gutpela olgeta wankain olsem Adam long pastaim], em i bin kamap spirit bilong givim laip long man.”
1 Pi 3:18: “Long graun [Krais] i stap man, na ol i kilim em i dai, tasol em i kirap bek na em i stap spirit long heven.” (Lukim pes 196.)
Tok piksa: Sapos wanpela man i givim pe bilong bekim dinau bilong pren bilong em na wantu em i kisim bek dispela pe, orait bai dinau i stap yet, a? Olsem tasol, taim Jisas i kirap bek, sapos em i bin kisim bek skin bilong graun em i bin givim olsem pe bilong baim bek yumi, orait bai “dinau,” o sin, bilong ol man i bilip i no inap tekewe, a? Bai i stap yet.
Tru, taim Jisas i kirap bek em i bin kamap long ai bilong ol disaipel long skin bilong man. Tasol olsem wanem na sampela taim ol i no luksave long em? (Lu 24:15-32; Jo 20:14-16) Wanpela taim, bilong helpim Tomas, Jisas i kamap long ai bilong ol long skin bilong man i gat mak bilong nil long han na sua long sait long ples spia i sutim. Tasol long dispela taim ol i lokim pinis olgeta dua, orait olsem wanem em inap i kam sanap namel long ol? (Jo 20:26, 27) Yumi ken save, Jisas em i spirit, tasol em i bin tanim i kamap man long ol dispela taim, olsem ol ensel i bin mekim sampela taim. Taim God i kirapim bek Jisas, i no hatwok long God i pinisim skin bilong Jisas bilong graun. Tru, God i no lusim skin bilong Jisas i stap long matmat (em bilong strongim bilip bilong ol disaipel long Jisas i kirap bek pinis), tasol ol laplap ol i bin karamapim long skin ol i stap. Tasol taim Jisas i kirap bek na em i kamap long ai bilong ol, em i pasim klos.—Jo 20:6, 7.
Krais Jisas em i nambawan ensel Maikel o olsem wanem?
Nem bilong dispela ensel Maikel i stap 5-pela taim tasol long Baibel. Baibel i tok, em i “ensel i save lukautim yupela ol Israel,” na “namba wan ensel.” (Dan 12:1; Ju 9) Insait bilong dispela nem Maikel i olsem, “Husat i Olsem God?” Dispela nem i makim olsem Maikel em i man bilong i go pas long litimapim wok king bilong God Jehova na bagarapim ol birua bilong God.
Long 1 Tesalonaika 4:16, taim Krais Jisas i tok long ol man i dai pinis i mas kirap bek, Baibel i tok ‘namba wan ensel i singaut,’ na Jut 9 i tok, dispela nambawan ensel em Maikel. Sapos nambawan ensel i no gat bikpela namba olsem bilong Jisas, i no stret Baibel i tok, singaut bilong Jisas i olsem bilong nambawan ensel, a? Olsem na yumi ken save, nambawan ensel Maikel em Krais Jisas yet. (I no gat planti “namba wan ensel”; Baibel i kolim dispela tok long wanpela tasol.)
Kamapim Tok Hait 12:7-12 i tok, taim Krais i kamap King, Maikel wantaim ol ensel bilong em i mas pait wantaim Satan na rausim em wantaim ol ensel nogut long heven. Bihain Baibel i stori long Krais i go pas long ol ami bilong heven bilong pait long ol lain bilong dispela graun. (KTH 19:11-16) Olsem na i stret yumi ken ting Jisas bai pait tu long “hetman i save bosim dispela graun,” em Satan. (Jo 12:31) Daniel 12:1 i tok, taim ‘Maikel i kamap,’ olsem em i kam wantaim namba bilong mekim wok, “long dispela taim bikpela hevi tru bai i kamap. Bipo kain hevi olsem i no bin kamap long wanpela kantri bilong graun.” Kain bikpela hevi olsem bai painim ol lain man long taim Krais i kam wantaim ol ami bilong heven bilong bekim pe nogut long ol. Olgeta dispela samting i makim olsem, taim Pikinini bilong God i no kam daun yet long graun, ol i kolim em Maikel, na taim em i go bek long heven em i holim yet dispela nem.
Sapos Man i Tok—
‘Yu no bilip long Jisas’
Yu ken tok: ‘Yu bilip long Jisas, a? Na mi tu mi bilip long em. Sapos nogat, mi no ken i kam lukim yu long haus long nau.’ Na ating yu ken tok moa olsem: ‘Ol buk na nius bilong mipela i save tokaut olsem i bikpela samting long yumi mas bilip long Jisas. (Kamautim buk yu laik tilim na opim long sapta i stori long Jisas, na stori long wok king bilong Jisas. O kaunim ol tok long pes 2 bilong Wastaua, i stori long wok bilong dispela nius.)’
O yu ken tok: ‘Mi laik askim yu, i gat wanem as na yu ting mi no bilip long Jisas?’
Narapela tok, em olsem: ‘Ating wanpela man i bin tokim yu, mipela i no bilip long Jisas, tasol em i no stret. Mipela i bilip strong long Krais Jisas.’ Na ating yu ken tok moa olsem: (1) ‘Tasol mipela i no bilip long olgeta tok ol man i mekim long Jisas. Sampela i tok, em i gutpela man, tasol em i no Pikinini bilong God. Mipela i no bilipim dispela tok. Olsem wanem long yu? . . . Baibel i no tok olsem.’ (2) ‘Na mipela i no bilip long tok bilong sampela lain i narapela kain long tok Jisas yet i mekim long Papa i bikpela long em. (Jo 14:28) Papa i putim em i stap King na dispela i mekim sampela samting long yumi olgeta long nau. (Dan 7:13, 14)’
‘Yu bilip olsem Jisas em i Man bilong kisim bek yu?’
Yu ken tok: ‘Baibel i tok klia olsem . . . (kolim tok bilong Ap 4:12). Mi bilip olsem. Tasol mi save, man i bilip olsem, em i gat bikpela wok. Sapos mi bilip tru long Jisas, mi no ken bilip inap tasol long skel mi yet mi laikim.’ Na ating yu ken tok moa olsem: ‘Em i givim laip bilong em olsem ofa bambai sin bilong yumi inap tekewe. Tasol mi save, i bikpela samting tu long yumi mas bihainim tok bilong em na mekim ol wok em i givim long yumi ol Kristen. (Ap 1:8; Mt 28:19, 20)’
Stori gut long yu bilip olsem Jisas em i Man bilong kisim bek yu yet na olgeta man i bilip long em, na nau yu ken tok: ‘Em bikpela samting long yumi mas bilip long ol samting em i mekim long bipo na long nau tu. (Mt 25:31-33)’
‘Mi bilip pinis olsem Jisas em i Man bilong kisim bek mi’
Yu ken tok: ‘Gutpela yu bilip long Jisas, long wanem, planti man long nau i no tingting liklik long ol samting Jisas i bin mekim bilong helpim yumi. Yu save gut long tok bilong Jon 3:16, a? . . . Tasol ol dispela manmeri bai kisim laip i stap oltaim we? Sampela bai stap wantaim Krais long heven. Tasol yu ting Baibel i tok, olgeta gutpela man bai go long heven? (Mt 6:10; 5:5)’