Olsem Wanem Ofa Bilong Krais i Kisim Bek Yumi?
“Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.”—JO. 3:36.
1, 2. I gat wanem as na ol i kirap wokim Zion’s Watch Tower?
LONG Oktoba 1879, namba 4 bilong dispela nius, bipo ol i kolim Zion’s Watch Tower, i tok: “Sapos yumi stadi gut long Baibel, bai yumi save olsem dai bilong Krais em i bikpela samting tru.” Bilong pinisim atikol, nius i tok: “Yumi mas sakim olgeta samting i makim olsem dai bilong Krais i no wanpela ofa bilong tekewe sin.”—Ritim 1 Jon 2:1, 2.
2 Wanpela as na ol i kirap wokim namba wan Zion’s Watch Tower long Julai 1879, em bilong helpim tok bilong Baibel long pe bilong baim bek man. Ol tok bilong dispela nius em ‘kaikai long taim bikman i makim,’ long wanem, bihain long 1870, planti man i tok ol i Kristen ol i kirap long tok olsem dai bilong Jisas i no inap tekewe sin bilong yumi. (Mt. 24:45) Long dispela taim, planti man i kirap bilipim tok bilong evolusen, em wanpela tok i pait wantaim dispela tok bilong Baibel olsem pastaim man i stap gutpela olgeta na bihain em i no stap gutpela moa. Ol lain i bilip long evolusen ol i tok olsem long strong bilong man yet, man i wok long kamap gutpela moa na i no gat wok long ofa bilong Jisas bilong baim bek man. Olsem na tok aposel Pol i givim long Timoti i stret: “Timoti, yu mas was gut long dispela wok God i bin givim long yu. Givim baksait long olkain toktok nabaut i no bihainim tingting bilong God. Na stap longwe long ol man i ting ol i gat gutpela save na ol i mekim kain kain toktok i pait long tingting bilong God. Sampela man i bihainim dispela kain save na ol i lusim pinis pasin bilong bilip.”—1 Ti. 6:20, 21.
3. Nau bai yumi skelim wanem ol askim?
3 Ating yu gat strongpela tingting long yu no ken ‘lusim pasin bilong bilip.’ Olsem na i gutpela sapos yu skelim ol dispela askim: Bilong wanem mi nidim pe bilong baim bek man? Dispela i bin mekim wanem long Jehova yet na Jisas? Mi mas mekim wanem na bai pe bilong baim bek man inap helpim mi long abrusim belhat bilong God?
Yumi Inap Abrusim Belhat Bilong God
4, 5. Wanem samting i kamapim ples klia olsem belhat bilong God i stap long dispela taim nogut bilong nau?
4 Tok bilong Baibel na ol samting i bin kamap i soim olsem kirap long taim Adam i mekim sin, belhat bilong God ‘i bin stap’ long olgeta manmeri. (Jo. 3:36) Samting i kamapim ples klia dispela samting em olsem: I no gat wanpela man i bin abrusim dai. Wok bos bilong Satan i no bin lukautim ol man taim ol bikpela bagarap i kamap, na i no gat wanpela gavman long graun i bin helpim ol manmeri bilong en long kisim ol samting ol i mas i gat. (1 Jo. 5:19) Olsem na ol man i wok yet long kisim ol hevi bilong woa, pasin raskol, na pasin bilong i stap rabis.
5 Em nau, i klia tru olsem blesing bilong Jehova i no stap long dispela taim nogut bilong nau. Pol i tok: “God i stap long heven na em i kamapim ples klia belhat bilong en. Em i bekim pe nogut long olgeta man i givim baksait long em na i mekim pasin nogut.” (Ro. 1:18-20) Olsem na ol man i save mekim pasin nogut na ol i no tanim bel, bai ol i no inap abrusim bagarap. Long nau, belhat bilong God i kamap ples klia long ol strongpela tok bilong strafe bilong God yumi autim long ol lain bilong dispela graun bilong Satan, na dispela tok i stap long planti buk bilong yumi.—KTH 16:1.
6, 7. Ol Kristen God i bin makim ol i go pas long mekim wanem wok? Wanem rot i op yet long ol man i stap aninit long wok bos bilong Satan?
6 Orait, yu ting em leit tumas long ol man i ken lusim wok bos bilong Satan na kamap wanbel wantaim God? Nogat. Dua i op yet i stap. Ol Kristen God i bin makim, em ol i olsem “maus bilong Krais,” ol i go pas long tokim ol man bilong olgeta lain: “Lusim pasin birua na kamap wanbel wantaim God.”—2 Ko. 5:20, 21.
7 Aposel Pol i tok, Jisas bai ‘kisim bek yumi long belhat bilong God i laik kamap bihain.’ (1 Te. 1:10) Taim dispela belhat i kamap, ol man i no tanim bel ol bai bagarap inap oltaim oltaim. (2 Te. 1:6-9) Husat bai abrusim bagarap? Baibel i tok: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip. Nogat. Belhat bilong God i stap long em.” (Jo. 3:36) Yes, olgeta man husat i stap laip na bilip long Jisas na long ofa bilong em taim pasin nogut bilong nau i pinis, ol bai abrusim dispela belhat bilong God i laik kamap.
Pe Bilong Baim Bek Man i Wok Olsem Wanem?
8. (a) Adam na Iv inap wetim wanem gutpela samting? (b) Olsem wanem Jehova i bin kamapim olsem em i God bilong stretpela pasin?
8 God i wokim Adam na Iv i gutpela olgeta. Sapos tupela i bin bihainim tok bilong God, long nau graun bai pulap long ol tumbuna pikinini bilong ol em ol i stap amamas wantaim tupela long Paradais. Tasol sori tru, long laik bilong ol yet, tupela tumbuna bilong yumi bilong pastaim ol i bin sakim tok bilong God. Olsem na God i tok tupela i mas i dai—no gat kirap bek—na em i rausim ol long Paradais bilong pastaim. Taim Adam na Iv i kamapim ol pikinini, sin i wok long bagarapim ol man, na bihain tupela i go lapun na ol i dai. Dispela i kamapim klia olsem Jehova i save truim tok bilong em. Na tu, em i God bilong stretpela pasin. Jehova i bin tokim Adam olsem sapos em i kisim prut tambu, em bai dai—na tru tumas, em i dai.
9, 10. (a) Bilong wanem ol tumbuna pikinini bilong Adam i dai? (b) Olsem wanem yumi inap abrusim dai i no gat kirap bek bilong en?
9 Yumi ol tumbuna pikinini bilong Adam, olsem na yumi bin kisim bodi i gat sin na yumi save dai. Taim Adam i mekim sin na God i tok em i mas i dai, dispela tok i karamapim yumi tu, long wanem, yumi kamap long Adam. Sapos Jehova i bin pinisim dai na em i no bin givim samting bilong baim bek yumi, bai i olsem em i no truim tok bilong em. Dispela tok bilong Pol i makim yumi olgeta, em i tok: “Yumi save, lo bilong God, em i samting i kam long God yet. Tasol mi gat olpela bel, na mi no inap long bihainim laik bilong God, long wanem, sin i kalabusim mi na mi stap wokboi nating bilong em. O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?”—Ro. 7:14, 24.
10 God Jehova tasol inap stretim rot bilong fogivim ol sin bilong yumi na bai dai i no ken kalabusim yumi moa. Em i mekim olsem taim em i salim Pikinini em i laikim tumas i kam daun na i bon long graun olsem man i gutpela olgeta, na em inap givim laip bilong em olsem pe bilong baim bek yumi. Adam i bin mekim sin, tasol Jisas i “no bin mekim sin.” Em i stap man i gutpela olgeta. (1 Pi. 2:22) Olsem na Jisas inap kamapim wanpela lain pikinini i gutpela olgeta. Tasol em i no mekim olsem. Em i larim ol birua bilong God i kilim em i dai na bai em inap adoptim ol tumbuna pikinini bilong Adam, em ol i gat sin, na bai ol man i bilip long em inap kisim laip oltaim oltaim. Baibel i tok: “Wanpela God tasol i stap. Na i gat wanpela namelman tasol i sanap namel long God na ol manmeri, em dispela man Krais Jisas. Long taim God i makim, Krais i bin givim laip bilong em yet bilong baim bek olgeta manmeri.”—1 Ti. 2:5, 6.
11. Yumi ken mekim wanem tok piksa long olsem wanem pe bilong baim bek man i helpim yumi? (b) Pe bilong baim bek man i helpim husat?
11 Bilong helpim yumi long save pe bilong baim bek man i wok olsem wanem, yumi ken tok piksa long ol man em ol i bin putim olgeta mani bilong ol long haus beng na papa bilong beng i paulim mani na olgeta mani bilong ol i lus. Kot i tok papa bilong beng i mas kalabus inap sampela yia. Tasol olsem wanem long ol man i bin putim mani bilong ol long beng? Nau ol i stap rabis na ol i no inap baim ol dinau bilong ol. I gat wanpela rot tasol bilong helpim ol, olsem: Wanpela maniman i gat gutpela pasin i kisim dispela beng na em i givim bek olgeta mani bilong ol i bin lus, na nau ol inap baim ol dinau bilong ol. Na olsem tasol, God Jehova na gutpela Pikinini bilong em ol i bin baim ol pikinini bilong Adam na pinisim sin bilong ol long rot bilong blut bilong Jisas i bin kapsait. Olsem na Jon Bilong Baptais inap tok long Jisas olsem: “Lukim. Em i Pikinini Sipsip Bilong God. Em i kam bilong rausim sin bilong olgeta manmeri bilong graun.” (Jo. 1:29) Em i no rausim tasol sin bilong ol man i stap laip, nogat, ol daiman tu.
Samting Pe Bilong Baim Bek Man i Mekim Long God na Jisas
12, 13. Samting Abraham i pilim taim em i redi long givim Aisak olsem ofa, dispela i lainim yumi long wanem samting?
12 Yumi no inap kliagut olgeta long samting pe bilong baim bek man i mekim long Papa bilong yumi long heven na long Pikinini bilong em.Tasol Baibel i kamapim sampela stori em ol inap helpim yumi long tingim gut dispela samting. Tingim samting Abraham i pilim taim em i wokabaut 3-pela de i go long Moria olsem God i bin tokim em: “Yu mas kisim dispela pikinini [yu laikim em tumas] na yu go long hap bilong Moria, na bai mi soim yu wanpela maunten. Na long dispela maunten yu mas givim Aisak long mi olsem ofa bilong paia i kukim olgeta.”—Stt. 22:2-4.
13 Orait nau Abraham i kamap long Moria. Tingim, lewa bilong em i mas bruk stret taim em i pasim hanlek bilong pikinini bilong em na slipim em long alta em yet i bin wokim. Bel bilong Abraham i mas bagarap stret taim em i apim naip bilong kilim em. Tingim tu samting Aisak i pilim taim em i slip long alta na wet long naip i sutim em na em i mas i dai. Tasol ensel bilong Jehova i kamap long taim stret na pasim Abraham. Samting Abraham na Aisak i mekim long dispela taim i helpim yumi long save gut long bikpela pen Jehova i pilim taim em i larim ol wokboi bilong Satan i kilim i dai Pikinini bilong Em. Aisak i wok gut wantaim Abraham na i redi long dai na dispela i makim pasin bilong Jisas long redi long kisim pen na dai bilong helpim yumi.—Hi. 11:17-19.
14. Wanem samting i bin painim Jekop na dispela inap helpim yumi long pilim tru samting pe bilong baim bek man i bin mekim long Jehova?
14 Samting i bin kamap long Jekop, dispela tu inap helpim yumi long pilim samting pe bilong baim bek man i bin mekim long Jehova. Jekop i laikim tru Josep, winim ol narapela pikinini bilong em. Tasol sori tru, ol brata bilong Josep ol i bel nogut long em na ol i heitim em. Tasol Josep i redi long papa i salim em i go painimaut olsem ol brata bilong em ol i stap gut o nogat. Long dispela taim, ol i lukautim ol sipsip bilong Jekop long hap i stap 100 kilomita longwe long ples bilong ol long Hebron. Tingim samting Jekop i pilim taim ol pikinini bilong em i kam bek wantaim saket bilong Josep em blut i karamapim! Jekop i tok: “Em saket bilong Josep, pikinini bilong mi. Wanpela laion samting i kilim em pinis, na kaikaim em olgeta.” Ol dispela samting i bagarapim tru bel bilong Jekop, na em i krai long pikinini bilong em inap planti de. (Stt. 37:32-34) Tru, samting Jehova i save pilim i no wankain stret long samting yumi ol sinman i pilim. Tasol taim yumi tingim tingim long bel dispela samting i bin kamap long Jekop, dispela inap helpim yumi long kisim sampela save long samting God i bin pilim taim ol birua i mekim nogut tru long Pikinini bilong em na kilim em i dai.
Ofa Bilong Jisas i Helpim Yumi
15, 16. (a) Olsem wanem Jehova i soim olsem em i orait long ofa bilong Jisas? (b) Dispela ofa i bin helpim yu yet olsem wanem?
15 God Jehova i kirapim bek gutpela Pikinini bilong em olsem wanpela spirit. (1 Pi. 3:18) Inap 40 de, Jisas husat i kirap bek pinis em i kamap long ai bilong ol disaipel. Em i strongim bilip bilong ol na redim ol long mekim bikpela wok bilong autim tok. Bihain em i go antap long heven. Long dispela hap em i givim pe bilong blut bilong em long God, bilong helpim ol manmeri husat i bilip long ofa bilong em. God Jehova i soim olsem em i orait long ofa bilong Krais taim em i givim wok long Jisas bilong kapsaitim holi spirit long ol disaipel bilong em i bin bung long Jerusalem long de Pentikos 33 C.E.—Ap. 2:33.
16 Orait nau ol dispela Kristen God i bin makim ol i kirap tokim ol wantok bilong ol long kisim baptais long nem bilong Jisas Krais na bai God i ken lusim sin bilong ol. Long dispela rot bai ol inap abrusim belhat bilong God. (Ritim Aposel 2:38-40.) Kirap long dispela taim na i kam inap long nau, planti milion manmeri bilong olgeta lain i bin kirap lotuim God na pas gut wantaim em long rot bilong bilip long ofa bilong Jisas. (Jo. 6:44) Nau yumi laik skelim tupela askim moa: God bai givim laip oltaim oltaim long yumi, long wanem, yumi wan wan yet i bin mekim ol gutpela wok? I gat sampela samting inap mekim na yumi lusim dispela gutpela samting yumi bilip na wet long en?
17. Yumi mas ting olsem wanem long gutpela blesing bilong i stap pren bilong God?
17 Pe bilong baim bek man em samting yumi kisim nating, i no olsem yumi kisim long gutpela wok yumi bin mekim, nogat. Long rot bilong bilip long en, planti milion manmeri i bin kamap pren bilong God na ol inap wet long kisim laip i stap oltaim long wanpela paradais long graun. Tasol taim yumi kamap pren bilong God, dispela tasol i no makim olsem yumi bai pas gut oltaim wantaim em, nogat. Bilong abrusim belhat bilong God i laik kamap bihain, yumi mas wok yet long pilim tru “wok Krais Jisas i mekim bilong baim bek yumi.”—Ro. 3:24; Ritim Filipai 2:12.
Wok Yet Long Bilip Long Pe Bilong Baim Bek Man
18. Man i bilip long ofa bilong Krais, em i mas mekim wanem ol samting?
18 As skripsa bilong dispela stadi, Jon 3:36, i soim olsem man i bilip long Bikpela Jisas Krais em i mas bihainim tok bilong em. Pasin bilong bilip long ofa bilong Jisas i mas kirapim yumi long bihainim ol tok bilong em na sakim ol pasin em i tok long yumi mas abrusim. (Mk. 7:21-23) “Belhat” bilong God bai kamap long ol man i save mekim ol pasin nogut na i no tanim bel. Em ol kain pasin olsem: pasin pamuk, tok pilai nogut, na “olgeta kain pasin doti,” olsem pasin bilong lukim ponografi oltaim.—Ef. 5:3-6.
19. Long wanem ol gutpela rot yumi ken kamapim olsem yumi bilip long ofa bilong Krais?
19 Pasin bilong pilim tru ofa bilong Krais, dispela i mas kirapim yumi long wok strong oltaim long “bihainim olgeta pasin bilong God.” (2 Pi. 3:11) Yumi mas makim taim bilong beten oltaim, stadi long Baibel, go long olgeta miting, mekim famili lotu, na givim bel long autim tok bilong Kingdom. Na yumi ‘mas mekim gutpela pasin long ol manmeri, na sapos sampela i sot long ol samting, yumi mas givim sampela samting long ol, long wanem, em dispela kain ofa God i save laikim tru.’—Hi. 13:15, 16.
20. Olgeta man i wok yet long bilip long ofa bilong Krais, ol inap wet long kisim wanem ol gutpela blesing long bihain?
20 Taim belhat bilong Jehova i painim ol man nogut bilong dispela graun, yumi bai amamas tru yumi bin bilip long ofa bilong Krais na yumi bin kamapim olsem yumi pilim tru dispela ofa! Na long nupela taim God i tok promis long en, oltaim bai yumi tenkyu long dispela ofa i bin helpim yumi long abrusim belhat bilong God.—Ritim Jon 3:16; KTH 7:9, 10, 13, 14.
Bai Yu Bekim Olsem Wanem?
• Bilong wanem yumi nidim pe bilong baim bek man?
• Pe bilong baim bek man i bin mekim wanem long Jehova na Jisas?
• Ofa bilong Krais i helpim yumi olsem wanem?
• Olsem wanem yumi inap soim olsem yumi bilip long ofa bilong Jisas?
[Piksa long pes 13]
Rot bilong kamap wanbel wantaim Jehova i op yet i stap
[Ol Piksa long pes 15]
Taim yumi tingim samting i bin painim Abraham, Aisak, na Jekop, dispela inap helpim yumi long pilim tru samting pe bilong baim bek man i bin mekim long Jehova na Jisas