Buk Bilong Baibel Namba 53—2 Tesalonaika
Man Bilong Raitim: Pol
Ples Em i Bin Raitim: Korin
Raitim Pinis: 51 C.E. samting
APOSEL POL i raitim namba 2 pas bilong ol Tesalonaika bihain liklik long taim em i raitim namba wan pas. Yumi save Pol i raitim kwiktaim bihain long namba wan pas na em i stap long Korin taim em i raitim, long wanem, Sailas tupela Timoti i stap yet wantaim em na salim gude long kongrigesen bilong Tesalonaika olsem ol i bin mekim long namba wan pas. Tripela i wasman bilong raun lukim ol kongrigesen Kristen bilong pastaim, na Baibel i no stori long narapela taim tripela i bung wantaim; long dispela taim long Korin tasol. (2 Te. 1:1; Ap. 18:5, 18) Ol samting pas i stori long en i makim olsem sampela tok giaman i paulim tingting bilong kongrigesen na Pol i pilim olsem em i mas stretim kwik tingting bilong ol.
2 Olsem Namba Wan Tesalonaika, i gat planti samting bilong makim namba 2 pas tu em i hap tru bilong Baibel. Airenius (170 C.E. samting) na sampela man moa bilong raitim ol buk long bipo, olsem Jastin Matir (em i bin stap long wankain taim olsem Airenius), ol tu i kamapim sampela tok bilong dispela pas. Jastin Matir i stori long “man bilong sakim lo” na i olsem em i kamapim tok bilong 2 Tesalonaika 2:3. Namba 2 Tesalonaika i stap long ol olpela lista em Namba Wan Tesalonaika i stap long en. Tru, nau em i no stap long olpela rait Chester Beatty Papyrus Namba 2 (P46), tasol bihain long Namba Wan Tesalonaika 7-pela lip bilong dispela rait i lus, na yumi ken ting Namba 2 Tesalonaika i bin stap long namba wan na namba 2 lip bilong dispela 7-pela lip.
3 I gat wanem as na Pol i raitim dispela pas? Ol tok bilong Pol i givim save long yumi olsem sampela brata long Tesalonaika i tok klostu nau bai Krais i kam bek, na ol i wok strong long autim dispela tok i no gat as bilong en, na dispela i paulim tingting bilong planti brata insait long kongrigesen. Sampela i ting dispela tok i givim rot long ol na ol i ken sindaun nating na i no ken mekim wanpela wok bilong lukautim ol yet. (2 Te. 3:11) Long namba wan pas bilong em, Pol i stori long Krais bai i kam bek, na yumi save, taim ol dispela man bilong autim tok kranki ol i harim tok bilong dispela pas, kwiktaim ol i kirap paulim tok bilong Pol na ol i kamapim kranki insait bilong tok bilong em. Na ating i gat wanpela pas ol man i giaman na i tok Pol i bin raitim, na ol i tok dispela pas i makim olsem “De bilong Bikpela i kamap pinis.”—2:1, 2.
4 Ating Pol i harim tok bilong dispela hevi long brata i bin kisim namba wan pas i go long kongrigesen, na yumi save em i laik stretim tingting bilong ol dispela brata em i laikim ol tumas. Olsem na long yia 51 C.E., Pol wantaim tupela poroman bilong em i stap long Korin ol i salim pas long kongrigesen bilong Tesalonaika. Pol i stretim tingting kranki bilong ol long taim Krais bai i kam bek, na long gutpela pasin em i kirapim ol long sanap strong long tok i tru.
HELPIM YUMI OLSEM WANEM?
10 Dispela sotpela pas bilong ol Tesalonaika, em holi spirit i kirapim Pol long raitim, em i kamapim kain kain tok i tru bilong lotu Kristen na i gutpela yumi tingim olgeta dispela tok. Tingim sampela as tok bilong bilip na sampela lo em pas i kamapim: Jehova em i God bilong kisim bek yumi, na long rot bilong holi spirit na bilip bilong yumi long tok i tru, em i mekim yumi i kamap holi (2:13); Kristen i mas karim hevi na sanap strong bambai em inap insait long Kingdom Bilong God (1:4, 5); taim Bikpela Jisas Krais i kam bek, bai ol Kristen i bung wantaim em (2:1); God bai mekim stretpela kot na givim strafe long ol man i no bihainim gutnius (1:5-8); ol man God i singautim ol, ol bai kisim biknem wantaim Krais Jisas, na bai God i marimari long ol (1:12); em i singautim ol long rot bilong gutnius ol man i autim (2:14); ol i mas bilip, em bikpela samting (1:3, 4, 10, 11; 2:13; 3:2); man i autim tok, i stret em i mekim wok bilong lukautim em yet long kaikai samting; sapos man i no mekim wok, em inap kamap lesman na kirap toktok nabaut long samting bilong ol narapela man (3:8-12); pasin bilong laikim tru God na pasin bilong sanap strong i save poroman wantaim (3:5). Tru tumas, planti gutpela tok bilong strongim yumi i stap long dispela sotpela pas em spirit bilong God i bin kamapim!
11 Long dispela pas Pol i kamapim klia olsem em i tingim tru ol brata long Tesalonaika na em i laik bai kongrigesen i stap wanbel na ol i stap strong long bilip. Em i stretim tingting bilong ol long taim De Bilong Jehova bai kamap; em i tok “man bilong sakim lo” i mas kamap ples klia pastaim, na em i mas sindaun insait long “haus bilong God, na em bai i autim tok olsem, ‘Mi yet mi God.’ ” Tasol ol man ol “inap tru long i stap insait long kingdom bilong [God]” ol i ken bilip tru olsem Bikpela Jisas bai kamap ples klia long heven, na em bai kam long bikpela paia na mekim save long ol man nogut, na long dispela taim “olgeta manmeri i bin bilip long em, ol bai i litimapim nem bilong em na amamas tru long em. Na [ol Tesalonaika] tu bai i amamas wantaim ol, long wanem, [ol] i bin bilip tru long tok bilong God.”—2:3, 4; 1:5, 10.