Stap Insait Long Pasin Laikim Bilong God!
“Ol brata tru, . . . larim [God] i laikim yupela oltaim . . . , na yupela bai i kisim tru laip bilong i stap gut oltaim oltaim.”—JUT 20, 21.
1, 2. Olsem wanem yu inap stap insait long laikim bilong God?
JEHOVA i laikim tumas olgeta manmeri bilong graun, olsem na em i givim Pikinini bilong em na bai ol manmeri i bilip long em i ken kisim laip oltaim. (Jon 3:16) Em i gutpela samting tru long pilim dispela pasin laikim! Sapos yu wanpela wokboi bilong Jehova, bai yu gat laik long God i laikim yu i go inap oltaim oltaim.
2 Disaipel Jut i stori long olsem wanem yu inap i stap insait long laikim bilong God. Jut i tok: “Oltaim yupela i mas larim bilip bilong yupela i strongim bel bilong yupela . . . Na oltaim yupela i mas prea long strong bilong Holi Spirit. God i save laikim yupela tru, na yupela i mas i stap klostu long em na larim em i laikim yupela oltaim. Na oltaim yupela i mas wetim Bikpela bilong yumi Jisas Krais, bai em i kamapim sori bilong en long ples klia, na yupela bai i kisim tru laip bilong i stap gut oltaim oltaim.” (Jut 20, 21) Taim yu stadi long Tok Bilong God na autim gutnius, yu save larim ‘bilip bilong yu’—ol bilip Kristen—i strongim yu. Bilong stap insait long laikim bilong God, yu mas prea “long strong bilong Holi Spirit,” larim holi spirit i stiaim yu. Bilong kisim laip oltaim, yu mas bilip tu long ofa bilong Jisas Krais.—1 Jon 4:10.
3. I gat wanem as na sampela i no stap moa olsem Witnes Bilong Jehova?
3 Sampela em bipo ol i bilip, ol i no stap moa insait long laikim bilong God. Ol i bin makim rot nogut long bihainim, olsem na ol i no stap moa olsem Witnes Bilong Jehova. Yu ken mekim wanem na bai dispela hevi i no ken painim yu? Tingim gut ol tok i kam bihain long dispela paragraf, ating dispela bai helpim yu long sakim sin na stap insait long laikim bilong God.
Kamapim Olsem Yu Laikim Tru God
4. Pasin bilong bihainim tok bilong God i bikpela samting olsem wanem?
4 Kamapim olsem yu laikim tru God long rot bilong bihainim tok bilong em. (Matyu 22:37) Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Sapos oltaim yu bihainim tok bilong God, dispela inap strongim yu long sakim ol samting i laik pulim yu na helpim yu long stap amamas. Man bilong raitim song i tok: “Man i no save bihainim tok bilong ol man nogut, . . . dispela man i ken amamas tru. Dispela man i save laikim tumas lo bilong God.”—Song 1:1, 2.
5. Pasin bilong laikim tru Jehova bai kirapim yu long mekim wanem?
5 Pasin bilong yu long laikim tru Jehova inap kirapim yu long abrusim pasin bilong mekim bikpela rong i daunim nem bilong God. Agur i beten olsem: “Yu no ken larim mi i kamap maniman o rabisman. Nogat. Yu ken givim mi kaikai inap long skel bilong mi. Nogut mi gat planti samting tumas na mi givim baksait long yu, na mi tok, ‘Bikpela em husat?’ Na nogut mi kamap rabisman na mi stilim ol samting na mi daunim nem bilong yu, God bilong mi.” (Sindaun 30:1, 8, 9) Tingting strong long no ken ‘daunim nem bilong God.’ Olgeta taim wok strong long mekim ol stretpela pasin i litimapim biknem bilong em.—Song 86:12.
6. Wanem samting inap kamap sapos long laik bilong yu yet yu mekim sin?
6 Oltaim beten askim gutpela Papa bilong yu long heven long helpim yu long sakim ol samting inap pulim yu long mekim sin. (Matyu 6:13; Rom 12:12) Oltaim wok long bihainim ol tok bilong God na bai i no gat wanpela samting i pasim ol prea bilong yu. (1 Pita 3:7) Sapos long laik bilong yu yet yu mekim sin, dispela inap nogutim yu, long wanem, Jehova i no save harim beten bilong ol bikhetman; i olsem em i karamapim em yet long bikpela klaut na bai beten bilong ol i no ken kamap long em. (Krai 3:42-44) Olsem na daunim yu yet, na beten long yu no ken mekim wanpela rong na bai God i pasim yau long ol beten bilong yu.—2 Korin 13:7.
Kamapim Olsem Yu Laikim Tru Pikinini Bilong God
7, 8. Olsem wanem pasin bilong bihainim tok bilong Jisas inap helpim yu long sakim rot nogut?
7 Kamapim olsem yu laikim tru Jisas Krais long rot bilong bihainim ol lo bilong em, dispela bai helpim yu long sakim rot nogut. Jisas i tok: “Sapos yupela i bihainim gut ol lo na tok bilong mi, orait yupela bai i stap insait long laikim bilong mi, olsem mi bin bihainim gut ol lo na tok bilong Papa bilong mi, na mi stap insait long laikim bilong em.” (Jon 15:10) Sapos yu bihainim dispela tok bilong Jisas, olsem wanem dispela inap helpim yu long stap insait long laikim bilong God?
8 Pasin bilong bihainim ol tok bilong Jisas inap helpim yu long bihainim stretpela pasin. Lo God i givim long lain Israel i tok: “Yupela ol marit, yupela i no ken mekim pasin pamuk.” (Kisim Bek 20:14) Tasol Jisas i kamapim wanpela stiatok bilong dispela lo. Em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:27, 28) Aposel Pita i tok sampela long kongrigesen long taim bilong em ol “i save aigris long ol meri na tingting long mekim pasin pamuk” na ol i “grisim ol man bilip bilong ol i no strong, na pulim ol long mekim sin.” (2 Pita 2:14) Tasol yu inap abrusim kain pasin olsem sapos yu laikim tru God na Krais na bihainim tok bilong ol, na tingting strong long lukautim pasin bilong yu long pas gut wantaim ol.
Larim Spirit Bilong Jehova i Stiaim Yu
9. Wanem samting inap kamap sapos man i strong yet long mekim sin?
9 Beten askim God long givim holi spirit long yu na larim holi spirit i stiaim yu. (Luk 11:13; Galesia 5:19-25) Sapos yu strong yet long mekim sin, God inap tekewe spirit bilong em long yu. Bihain long Devit i mekim sin wantaim Batseba, em i krai long God olsem: “Nogut yu rausim mi na mi stap longwe long yu. Spirit bilong yu yet i stap long mi, na yu no ken rausim long mi.” (Song 51:11) Sinman King Sol i no tanim bel, olsem na God i rausim spirit bilong em long Sol. Sol i mekim sin taim em i wokim ofa bilong paia i kukim olgeta, na em i no kilim i dai olgeta sipsip na bulmakau na king bilong ol Amalek. Bihain Jehova i rausim holi spirit long Sol.—1 Samuel 13:1-14; 15:1-35; 16:14-23.
10. I gat wanem as na yu no ken tingting long wokabaut long pasin bilong sin?
10 No ken tingting long wokabaut long pasin bilong sin. Aposel Pol i tok: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin.” (Hibru 10:26-31) Sori tru sapos long laik bilong yu yet yu kirap wokabaut long pasin bilong sin!
Kamapim Olsem Yu Laikim Tru Ol Narapela
11, 12. Pasin laikim na tingim marit i samting holi, olsem wanem dispela inap helpim man long abrusim pasin pamuk?
11 Pasin bilong laikim tru ol narapela bai strongim yu long sakim pasin pamuk. (Matyu 22:39) Dispela pasin laikim bai kirapim yu long was gut na bai bel i no ken pulim yu long grisim poroman marit bilong narapela long laikim yu. Sapos yu kirapim narapela long laikim yu, pasin pamuk inap kamap. (Sindaun 4:23; Jeremaia 4:14; 17:9, 10) Bihainim pasin bilong stretpela man Jop, em i no save aigris long ol meri.—Jop 31:1.
12 Tingim marit em samting i holi. Dispela inap helpim yu long abrusim bikpela sin. God i makim marit na maritpasin i rot bilong kamapim pikinini. (Stat 1:26-28) Tingim: Sem bilong man na meri i gat wok bilong kamapim laip, na laip em samting i holi. Ol man i mekim pasin pamuk na ol man i slip wantaim meri bilong narapela man, ol i sakim tok bilong God, ol i no tingim marit na maritpasin em samting i holi, na ol i mekim nogut long bodi bilong ol yet. (1 Korin 6:18) Tasol pasin bilong laikim tru God na ol narapela na pasin bilong bihainim tok bilong God, dispela bai helpim man long abrusim ol pasin inap mekim na em i raus long kongrigesen Kristen.
13. Man i mekim pasin pamuk, olsem wanem em i “bagarapim ol samting i dia tumas”?
13 Yumi mas rausim ol tingting nogut bambai yumi no givim pen na hevi long famili bilong yumi. Sindaun 29:3 i tok: “Man i save go long ol pamukmeri, em i save tromoi olgeta mani samting [“bagarapim ol samting i dia tumas,” NW ] bilong em.” Man i pamuk na i no tanim bel, em i bagarapim pasin bilong em long stap gut wantaim God na famili bilong em. I gat as na meri bilong em inap katim marit. (Matyu 19:9) Maski husat i mekim rong, man o meri, taim marit i bagarap, dispela inap mekim na poroman i no gat asua, na ol pikinini, na ol narapela, ol i kisim bikpela pen na hevi. Taim yumi save pinis long ol hevi em pasin pamuk inap kamapim, dispela i mas kirapim yumi long no ken mekim.
14. Yumi kisim wanem skul long pasin bilong mekim rong long Sindaun 6:30-35?
14 I no gat wanpela samting man inap mekim bilong stretim rong em i mekim long slip wantaim meri bilong narapela man, olsem na dispela i mas kirapim em long abrusim dispela rong. Sindaun 6:30-35 i tok ol man inap sori long stilman i stilim kaikai, long wanem, em i hangre, tasol man i trabel long meri bilong narapela man, ol bai tok nogut long em, long wanem, em i gat tingting nogut long bel bilong em. Em i “bagarapim em yet.” Sapos em i bin stap long taim bilong Lo Bilong Moses, ol bai kilim em i dai. (Wok Pris 20:10) Man i slip wantaim meri bilong narapela man bilong em i ken inapim laik bilong skin bilong em yet, em i givim bikpela pen long ol narapela, na sapos em i no tanim bel, em i no stap moa insait long pasin laikim bilong God. Em bai raus long klinpela kongrigesen Kristen.
Holimpas Klinpela Bel
15. Wanem samting inap kamap sapos bel i no “pilim moa sin”?
15 Bilong stap insait long laikim bilong God, yumi no ken sakim maus bilong bel. Nogut bihain bel i no pilim moa sin bilong yumi. Olsem na yumi no ken larim pasin nogut bilong dispela graun i stiaim yumi—yumi mas makim gut ol poroman, ol buk yumi laik ritim, na ol amamas yumi laik kisim. Pol i tok lukaut olsem: “Long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol. Ol man bilong giaman bai i autim dispela tok giaman long ol manmeri. Tingting bilong ol dispela man i paul tru, na ol i no pilim moa sin bilong ol.” (1 Timoti 4:1, 2) Maus bilong bel i no “pilim moa sin” em i kain olsem hap skin bilong man em paia i bin kukim na sua i kamap, na taim sua i drai pinis, dispela hap skin i no pilim moa wanpela samting. Sapos bel bilong yumi i kain olsem, em i no inap givim tok lukaut long yumi bilong pasim yumi long stap longwe long ol apostet na ol samting inap kirapim yumi long lusim trupela bilip.
16. Bilong wanem i bikpela samting yumi gat klinpela bel?
16 Bilong God i ken kisim bek yumi, yumi mas i gat klinpela bel. (1 Pita 3:21) Bilip bilong yumi long blut bilong Jisas i bin pinisim asua bilong yumi na yumi stap klin tru long ai bilong God, yumi inap “mekim wok bilong God bilong i stap oltaim.” (Hibru 9:13, 14) Sapos long laik bilong yumi yet yumi kirap mekim sin, bel bilong yumi bai kamap doti na yumi no stap klin moa bilong mekim wok bilong God. (Taitus 1:15) Tasol long helpim Jehova i givim, yumi inap i gat klinpela bel.
Sampela Narapela Rot Bilong Abrusim Rong
17. Sapos yumi “bihainim olgeta tok” bilong Jehova, dispela bai helpim yumi olsem wanem?
17 “Bihainim olgeta tok” bilong Jehova olsem Kalep bilong Israel long bipo i bin mekim. (Lo 1:34-36) Mekim ol samting God i tokim yu long mekim na no ken tingting liklik long kisim kaikai long “tebol bilong ol spirit nogut.” (1 Korin 10:21) Sakim pasin apostet. Kisim ol gutpela kaikai bilong spirit, em yu inap kisim long tebol bilong Jehova tasol, na sapos yu mekim olsem, ol tisa giaman na ol spirit nogut bai i no inap giamanim yu. (Efesus 6:12; Jut 3, 4) Tingim ol samting bilong spirit, olsem stadi long Baibel, go long ol miting, na autim tok. Bai yu amamas tru sapos yu bihainim olgeta tok bilong Jehova na wok strong long mekim wok bilong Bikpela.—1 Korin 15:58.
18. Pasin bilong pret na aninit long Jehova bai mekim wanem long yu?
18 Tingting strong long “litimapim nem bilong [God] na pret long em na aninit long em.” (Hibru 12:28) Pasin bilong pret na aninit long Jehova bai kirapim yu long sakim rot nogut. Dispela pasin bai helpim yu long bihainim dispela tok Pita i bin givim long ol wanlain Kristen God i makim: “Yupela i save singaut long God na kolim em ‘Papa.’ Dispela Papa . . . i save lukim pasin yumi wan wan i mekim na em i skelim yumi. Olsem na olgeta taim yupela i stap hia long dispela graun, yupela i mas save olsem dispela graun em i no ples tru bilong yupela, na yupela i mas aninit tru long God.”—1 Pita 1:17.
19. Bilong wanem olgeta taim yu mas bihainim ol tok yu lainim long Tok Bilong God?
19 Olgeta taim bihainim ol tok yu lainim long Baibel. Dispela bai helpim yu long “skelim wanem ol pasin i gutpela na wanem ol pasin i nogut” na abrusim ol bikpela rong. (Hibru 5:14) Was gut long ol tok na ol pasin bilong yu, wokabaut olsem man i gat save. Dispela taim nau yumi stap long en, em i taim nogut, olsem na “nogut dispela taim i lus nating.” Wok long “save gut long laik bilong Bikpela,” na oltaim bihainim.—Efesus 5:15-17; 2 Pita 3:17.
20. Bilong wanem yumi no ken mangal?
20 No ken mangal long ol samting bilong narapela. Wanpela bilong ol Tenpela Lo i tok: “Yupela i no ken mangalim haus bilong narapela man. Na yupela i no ken aigris long meri bilong narapela man. Na yupela i no ken mangalim wokboi o wokmeri bilong en o bulmakau o donki o olgeta arapela samting bilong en tu.” (Kisim Bek 20:17) Dispela lo i lukautim gut olgeta samting bilong narapela, olsem haus, ol wokboi, na ol animal bilong em. Tasol bikpela samting moa em tok Jisas i mekim olsem pasin bilong mangal i mekim man i doti.—Mak 7:20-23.
21, 22. Kristen i ken mekim wanem na bai bel i no pulim em long mekim sin?
21 Mekim sampela samting na bai bel i no ken pulim yu long mekim sin. Disaipel Jems i tok: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap, em i olsem meri i kisim bel, na bihain em i save kamapim sin, olsem meri i karim pikinini. Na taim sin i kamap bikpela, em i save kamapim dai.” (Jems 1:14, 15) Olsem: Sapos bipo wanpela i gat hevi bilong dring planti tumas, ating i gutpela sapos em i no putim dring long haus bilong em. O sapos long ples wok, Kristen i gat hevi long narapela i wok long pulim em long mekim pasin pamuk, ating i gutpela sapos em i go sindaun long narapela hap bilong ofis o faktori samting o kisim narapela wok.—Sindaun 6:23-28.
22 No ken opim rot long yu mekim sin. Pasin bilong aigris long narapela na larim ol tingting bilong pasin pamuk samting i stap long bel bilong yu, dispela inap pulim yu long mekim pasin pamuk o slip wantaim meri bilong narapela man. Pasin bilong mekim ol liklik tok giaman inap strongim yu long mekim ol bikpela tok giaman. Pasin bilong stilim ol liklik liklik samting inap bagarapim maus bilong bel na bihain yu kirap stilim planti samting. Na sapos yu orait long sampela tingting bilong ol apostet, dispela inap mekim na bihain bai yu insait tru long pasin apostet.—Sindaun 11:9, NW; KTH 21:8.
Olsem Wanem Sapos Yu Bin Mekim Sin?
23, 24. Olsem wanem 2 Stori 6:29, 30 na Sindaun 28:13 inap mekim gut bel bilong man?
23 Olgeta man i save mekim sin. (Saveman 7:20) Tasol sapos yu bin mekim wanpela bikpela rong, beten bilong King Solomon long taim bilong dediketim tempel inap mekim gut bel bilong yu. Em i beten long God olsem: “Sapos wanpela bilong mipela Israel, ol manmeri bilong yu, i pilim tru dispela hevi i bin kamap long en . . . na i beten long yu, orait Bikpela, yu stap long ples bilong yu long heven na yu ken harim beten bilong en na lusim sin bilong en na helpim em. Yu tasol yu save long tingting bilong ol man, olsem na yu ken skelim pasin bilong olgeta wan wan man na bekim pe long ol inap long pasin ol i bin mekim.”—2 Stori 6:29, 30.
24 Yes, God i save long tingting bilong ol man na em i save lusim sin bilong ol. Sindaun 28:13 i tok: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” Sapos yu tanim bel tru na kamapim rong bilong yu na givim baksait long en, ating God bai marimari long yu. Tasol olsem wanem sapos yu no strong moa long ol samting bilong spirit? Wanem samting moa inap helpim yu long stap insait long laikim bilong God?
Bai Yu Bekim Olsem Wanem?
• Yumi ken mekim wanem bilong stap insait long laikim bilong God?
• Olsem wanem pasin bilong laikim tru God na Krais inap helpim yumi long sakim rot nogut?
• Sapos yumi laikim tru ol narapela, olsem wanem dispela inap pasim yumi long mekim pasin pamuk?
• Wanem sampela samting yumi ken mekim bilong abrusim ol pasin nogut?
[Piksa long pes 21]
Jut i tokim yumi long rot bilong stap insait long laikim bilong God
[Piksa long pes 23]
Marit i bruk inap givim bikpela pen na hevi long poroman i no gat asua na ol pikinini
[Piksa long pes 24]
Olsem Kalep, yu tingting strong long “bihainim olgeta tok” bilong Jehova?
[Piksa long pes 25]
Oltaim beten askim God long helpim yu long sakim ol samting i laik pulim yu