Stap Olsem Gutpela Piksa Long Toktok na Pasin Bilong Yu
1 Aposel Pol i bin kirapim Timoti long i stap olsem gutpela piksa long toktok na pasin bilong em. (1 Ti 4:12) Yumi tu i mas kamapim wankain gutpela pasin, na mekim moa yet taim yumi autim tok, long wanem, dispela inap mekim na tok i go daun long bel bilong ol man o nogat.
2 Yumi gat wok long bihainim olgeta kain gutpela pasin, olsem daun na tingim gut man, na mekim gutpela pasin na gutpela tok long em. Taim yumi bihainim ol dispela pasin, i olsem yumi save, pasin bilong yumi i mekim wanem long ol narapela. Yumi ken tok, gutpela pasin yumi mekim long taim bilong autim tok i olsem sol bilong mekim kaikai i swit. Sapos i no gat sol, gutpela kaikai i no swit na yumi no laik kaikai. Na i wankain sapos yumi no kamapim ol gutpela pasin long ol man, ol i no amamas long harim gutpela tok bilong yumi.—Kl 4:6.
3 Stap Olsem Gutpela Piksa Long Toktok: Pes i lait na tok gude long gutpela pasin, ol i bikpela samting taim yumi autim gutnius. Taim yumi mekim gutpela pasin bilong kirapim tok, man bilong haus bai save olsem yumi gat bikpela laik long helpim em. Taim man i toktok, putim gut yau na daun long tingting bilong em. Taim yu toktok, mekim long gutpela pasin.—Skelim wantaim Aposel 6:8.
4 Sampela taim yumi save bungim wanpela man i no amamas, o em i kros. Yumi ken mekim wanem? Aposel Pita i tok, yumi mas bekim ‘tok isi na long gutpela pasin.’ (1 Pi 3:15; Ro 12:17, 18) Jisas i tok, sapos man bilong haus i no laik harim tok bilong Kingdom, yumi mas ‘rausim pipia graun i stap long lek bilong yumi.’ (Mt 10:14) Taim yumi mekim ol gutpela pasin long kain taim olsem, dispela inap mekim na bihain dispela man i no birua moa long yumi.
5 Stap Olsem Gutpela Piksa Long Pasin: Taim yumi autim gutnius long ol rot na ol ples bung yumi mas tingim gut ol man, yumi no ken bikmaus, o strong tumas, na no ken pasim rot bilong ol man i go i kam. Taim yumi stap insait long haus bilong ol man i laik harim tok, mekim gutpela pasin, na kamapim amamas bilong yumi long gutpela pasin ol i mekim long yumi. Ol pikinini i go wantaim yumi, ol tu i mas daun long man bilong haus na tingim gut ol samting bilong em, na makim gutpela pasin na putim gut yau long ol tok. Sapos ol pikinini i bikhet, dispela bai mekim ol man i tingting planti.—Snd 29:15.
6 Skin na klos bilong yumi i mas kamapim klia olsem yumi wokman bilong autim tok bilong God. Yumi no ken pasim klos i doti o bruk na i narakain stret. Bilas bilong yumi i mas stret na bihainim tru gutnius. (Skelim wantaim Filipai 1:27.) Sapos yumi tingim gut bilas bilong yumi na ol buk na paus samting, bai yumi no pundaunim ol man na ol i no ken tok nogut long wok bilong yumi. (2 Ko 6:3, 4) Na gutpela pasin na toktok bilong yumi tu, dispela inap pulim planti man long harim tok bilong Kingdom, na litimapim nem bilong Jehova.—1 Pi 2:12.