Ol Gutpela Pe Bilong Givim Biknem Long Lapun Papamama
OL MAN i lotu tru long God ol i save tingim gut ol lapun papamama bilong ol na ol i givim biknem long ol na lukautim gut ol, long wanem, ol i laikim tru ol. Em hap wok lotu bilong ol. Baibel i tok: “Namba wan wok bilong [ol pikinini o tumbuna pikinini] long ai bilong God em wok bilong lukautim gut . . . mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin.” (1 Timoti 5:4) Maski yumi yangpela o lapun, i stret long yumi mas “bekim olgeta hatwok” papamama na ol bubu i bin mekim bilong lukautim yumi. Long dispela rot yumi kamapim long ples klia olsem yumi pilim tru pasin sori na hatwok ol i bin mekim bilong lukautim yumi inap planti yia pinis. Na tu, yumi bin kisim laip long papamama bilong yumi, olsem na yumi gat bikpela dinau long ol!
“God i laikim tumas” pasin bilong bekim hatwok papamama na bubu i bin mekim long yumi. Dispela pasin i stret “long ai bilong God.” Olsem na taim yumi wok long bihainim dispela tok, yumi save kisim gutpela pe—yumi save God i amamas long ol samting yumi mekim, na dispela i mekim yumi amamas.
Pasin bilong givim samting i save mekim yumi amamas, na yumi amamas moa yet taim yumi givim samting long man i bin givim planti samting long yumi. (Aposel 20:35) Olsem na yumi kisim gutpela pe taim yumi bihainim dispela tok bilong Baibel: “Yu mas bihainim ol dispela gutpela pasin, na bai papamama bilong yu i belgut tru na i amamas”!—Sindaun 23:25.
Yumi ken mekim wanem bilong bekim hatwok papamama na bubu i bin mekim long yumi? Yumi ken helpim ol long 3-pela samting: ol samting bilong skin, na bel, na spirit. Ol dispela 3-pela samting i gat gutpela pe bilong en.
Helpim Ol Long Ol Samting Bilong Skin
Ol man i mekim wok bilong God ol i save olsem pasin bilong lukautim famili tru long ol samting bilong skin, em bikpela samting. Aposel Pol i tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.”—1 Timoti 5:8.
Tunji na Joy i stap long Wes Afrika. Maski ol i no gat planti mani, ol i bin singautim lapun papamama bilong Joy i kam sindaun wantaim ol. Papa bilong Joy i gat sik na bihain em i dai. Tunji i tok: “Taim Papa i dai, Mama i holim meri bilong mi na i tok: ‘Yu bin mekim olgeta samting yu inap mekim. Nogut bel bilong yu i gat tok long Papa i dai.’ Mipela i sori tru olsem Papa i no stap moa wantaim mipela, tasol mipela i save olsem mipela i bin baim ol gutpela marasin long em, na oltaim mipela i bin mekim wok na bai em i ken pilim olsem em inap helpim mipela na mipela i amamas long em i stap wantaim mipela; mipela i bin wok strong long inapim dispela wok em God i bin givim long mipela. Mipela i bin mekim olsem, na mipela i belgut tru.”
Tasol i no olgeta man inap helpim ol narapela long ol samting bilong skin. Wanpela man long Naijiria em i tok: “Sapos man i no inap lukautim em yet, olsem wanem em inap lukautim ol narapela?” Long planti kantri ating ol samting bai go moa nogut long ol yia bihain. Wanpela lain bilong Yunaitet Nesen i tok, i no longtaim na wanpela long olgeta tupela tupela man long hap bilong Sahara bai stap rabis olgeta.
Sapos yu no gat planti mani tumas, ating stori bilong wanpela rabismeri, em man bilong em i dai pinis, bai mekim gut bel bilong yu. Taim Jisas i stap long graun, em i lukim dispela meri i tromoi liklik mani long bokis mani long tempel. Em i givim “tupela liklik mani” tasol. Tasol Jisas i save long i stap bilong em, na em i tok: “Mi tok tru long yupela, dispela rabismeri, man bilong en i dai pinis, em i givim bikpela mani moa, i winim mani olgeta dispela lain manmeri i bin givim. Dispela olgeta manmeri ol i gat planti mani i stap, na ol i tromoi hap tasol i go long bokis. Tasol dispela meri em i sot tru, na em i tromoi olgeta mani em i holim bilong baim kaikai bilong en.”—Luk 21:1-4.
Olsem tasol, sapos yumi wok strong long lukautim papamama na bubu bilong yumi long ol samting bilong skin, orait, maski yumi no inap mekim planti samting tumas, Jehova i lukim ol wok yumi mekim na em i amamas long dispela. Em i no askim yumi long mekim sampela samting yumi no inap mekim. Ating papamama na bubu bilong yumi tu i pilim olsem.
Helpim Ol Long i Stap Bel Isi
Tasol wok bilong lukautim papamama na bubu bilong yumi i no olsem yumi lukautim ol long ol samting bilong skin na em tasol, nogat. Yumi olgeta i laik stap bel isi. Olgeta manmeri, ol lapun tu, ol i laik bai ol narapela i laikim ol, na pilim olsem ol inap mekim gutpela wok, na ol narapela i amamas long ol, na ol i gat wok insait long famili.
Mary, em i sindaun long Kenya, em i bin lukautim lapun tambu meri bilong em inap 3-pela yia. Mary i tok: “Mipela i save lukautim em long ol samting bilong skin, na tu, oltaim mipela i save toktok wantaim em. Mama i no inap mekim planti wok long haus, tasol mipela save toktok wantaim em na nau mipela i pas gut wantaim em olsem gutpela pren. Sampela taim mipela i stori long God, na sampela taim mipela i stori long ol man long hap em bipo mipela i bin stap long en. Maski em i gat 90 krismas samting, em inap tingim yet planti samting. Em i tingim yet ol samting i bin kamap paslain long 1914 long taim em i liklik, na em i save stori long dispela.”
Mary i tok moa: “I hatwok liklik long lukautim ol lapun, tasol lapun meri i kam sindaun wantaim mipela na dispela i bin kamapim gutpela pe. Pasin wanbel na bel isi i stap insait long famili. Mi helpim em na dispela i bin kirapim ol narapela insait long famili long bihainim pasin bilong givim samting. Man bilong mi i litimapim nem bilong mi. Na sapos Mama i harim narapela i tok strong long mi, kwiktaim em i kamapim sampela tok bilong helpim mi. Taim em i stap, narapela i no inap sutim strongpela tok long mi!”
Helpim Ol Long Ol Samting Bilong Spirit
Pasin bilong givim samting bilong helpim narapela long ol samting bilong skin na bel, em i save givim gutpela pe long man bilong givim samting, na i wankain tu long taim man i helpim narapela long ol samting bilong spirit. Aposel Pol i raitim pas long kongrigesen Kristen long Rom, olsem: “Mi laikim tumas long lukim yupela, long wanem, mi laik givim sampela presen bilong Holi Spirit long yupela bilong strongim yupela. Tingting bilong mi i olsem. Mi laik bai bilip bilong yupela i ken helpim mi na bilip bilong mi i ken helpim yupela tu, na dispela i ken strongim bel bilong yumi olgeta wantaim.”—Rom 1:11, 12.
Na olsem tasol, ol lapun i mekim wok bilong God, taim yumi helpim ol long ol samting bilong spirit, dispela i strongim bel bilong ol na i strongim bel bilong yumi tu. Osondu i sindaun long Naijiria, na em i tok: “Mi amamas long toktok wantaim bubu man na bubu meri bilong mi, long wanem, long dispela rot mi inap kisim save long ol samting i bin kamap bipo. Ai bilong bubu man bilong mi i lait taim em i stori long ol hap em i bin raun long en na mekim wok autim tok long olgeta de long 1950 i go inap 1969 samting. Em i skelim kongrigesen bilong nau i wok olsem wanem, wantaim kongrigesen long taim em i nupela Witnes. Ol dispela stori i helpim mi long mekim wok bilong mi olsem wanpela painia.”
Kongrigesen Kristen tu i ken helpim ol lapun. Tunji, em pastaim yumi stori long em, em i toktok long samting i bin kamap insait long kongrigesen bilong em olsem: “Ol i makim wanpela yangpela brata i mekim wok painia long mekim pablik-tok, na em i bin bringim autlain bilong en i kam long Papa na bai tupela wantaim i ken redim. Brata i lukautim Stadi Wastaua i bin kam na tokim Papa: ‘Yu bin mekim dispela kain wok bipo. Tok bilong yu inap helpim mi long mekim gut moa dispela wok.’ Papa i bin givim sampela gutpela tok long dispela elda. Sampela taim ol brata i bin kolim nem bilong Papa long beten ol i mekim long kongrigesen. Olgeta dispela samting i bin mekim na em i pilim olsem ol i amamas long em.”
Gutpela Pasin i Kirapim Ol Man Long Kam Long God
Taim yumi givim biknem na mekim pasin sori long papamama na bubu bilong yumi, sampela taim dispela i kirapim ol narapela long kam long God. Aposel Pita i tok: “Yupela i mas wokabaut stret namel long ol haiden. Na sapos ol i tok nogut long yupela, bihain ol bai i lukim gutpela pasin bilong yupela, na ol bai i litimapim nem bilong God.”—1 Pita 2:12.
Andrew, em wanpela elda Kristen long Wes Afrika, na tupela taim insait long olgeta wik em i bin raun inap 95 kilomita bilong lukautim papa bilong em i no wanpela bilipman na em i gat sik. Em i tok: “Taim mi kamap wanpela Witnes Bilong Jehova, papa bilong mi i kros nogut tru long dispela. Tasol taim em i lukim olsem mi lukautim em taim em i sik, em i wok long kirapim ol liklik brata na susa bilong mi olsem, ‘Yupela tu i mas insait long lotu bilong brata bilong yupela!’ Dispela i kirapim ol, na nau olgeta nainpela pikinini bilong papa bilong mi ol i Witnes Bilong Jehova.”
Tru, pasin bilong givim biknem na lukautim lapun papamama bilong yumi em i gat bikpela wok bilong en, na taim mani i sot i hatwok moa yet. Tasol taim ol Kristen i wok long mekim olsem, ol i kisim planti gutpela pe. Na bikpela samting tru, ol i kisim amamas long givim samting, na ol i belgut, long wanem, ol i save ol i mekim ol samting God Jehova i laikim, em yet em i “Papa bilong yumi olgeta.”—Efesus 4:6.
[Blok long pes 6]
Sampela Tok Bilong God Bilong Helpim Ol Man i Kisim Helpim na Ol Man i Givim Dispela Helpim
Strongim Bel Bilong Narapela: “Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong.”—Rom 15:2.
Stap Strong: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”—Galesia 6:9.
Daunim Yu Yet: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.”—Filipai 2:3.
Mekim Ol Gutpela Wok: “Yumi no ken ting long helpim yumi yet. Nogat. Yumi mas ting long helpim ol arapela.”—1 Korin 10:24.
Isi Long Ol Man: “Yupela i mas isi isi long olgeta man na larim ol i lukim dispela gutpela pasin bilong yupela.”—Filipai 4:5.
Mekim Pasin Sori: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol.”—Efesus 4:32.
[Piksa long pes 7]
Save bilong ol lapun inap helpim ol yangpela elda