Bihainim Pasin Bilong Jisas Long Was i Stap
“Yupela i mas was i stap na beten.”—MAT. 26:41.
BAI YU BEKIM OLSEM WANEM?
Olsem wanem ol beten bilong yumi i soim olsem yumi was i stap?
Long wanem ol rot yumi ken soim olsem yumi redi oltaim long autim tok?
Bilong wanem em i bikpela samting long was i stap taim ol traim i kamap? Yumi ken mekim olsem wanem?
1, 2. (a) I gat wanem ol askim long pasin bilong Jisas long was i stap? (b) Jisas i stap nambawan gutpela piksa, olsem na yu ting man i gat sin inap bihainim pasin bilong em? Kamapim tok piksa bilong dispela.
OLSEM WANEM? Yumi inap was i stap olsem Jisas i bin mekim? Jisas i gutpela olgeta, olsem na nogut yumi ting yumi no inap bihainim dispela pasin bilong em. Na tu, sampela taim Jisas i save long wanem samting stret bai kamap planti tausen yia bihain. Olsem na yu ting Jisas i gat wok long was i stap? (Mat. 24:37-39; Hib. 4:15) Yumi ken bekim dispela 2-pela askim pastaim na bai yumi ken kliagut olsem pasin bilong was i stap em i bikpela samting tru yumi mas mekim long nau.
2 Yu ting man i gat sin inap kisim skul long man i gutpela olgeta? Yes, wankain olsem wanpela sumatin inap kisim skul long wanpela gutpela tisa. Piksaim long tingting namba 1 taim man i lain long sutim banara. Pastaim em i no inap sut stret long mak, tasol em i kisim sampela skul moa na em i wok long prektis. Bilong mekim gut moa, em i save skelim gut pasin bilong tisa bilong en, husat i hapman bilong sutim banara. Sumatin i lukluk long pasin bilong tisa long sanap, holim han, na holim string bilong banara. Isi isi, sumatin i kisim save long pasin bilong taitim banara na olsem wanem win bai sakim supsup. Sapos em i wok strong na bihainim pasin bilong tisa, pasin bilong em long sut stret long mak bai kamap gutpela moa. Long wankain pasin, yumi wok strong long kamap gutpela Kristen moa long rot bilong bihainim ol tok bilong Jisas na long bihainim pasin bilong em i gutpela olgeta.
3. (a) Jisas i mekim wanem tok i soim olsem em i gat wok long was i stap? (b) Bai yumi stori long wanem samting long dispela stadi?
3 Tru tru Jisas i gat wok long was i stap? Yes. Olsem, long nait paslain long em i dai, em i tokim ol gutpela aposel bilong en: “Was i stap wantaim mi.” Na em i tok moa olsem: “Yupela i mas was i stap na beten oltaim bai yupela i no ken pundaun long traim.” (Mat. 26:38, 41) Taim Jisas i stap long graun, oltaim em i was i stap. Tasol taim em i pilim bikpela hevi tru paslain long em i dai, em i laik was i stap moa yet na stap klostu tru long Papa bilong en. Na em i save olsem ol disaipel bilong en tu i mas was i stap, long dispela taim na long taim bihain tu. Olsem na bai yumi stori long as na Jisas i laik bai yumi mas was i stap. Na yumi bai kisim skul long 3-pela rot we yumi ken was i stap olsem Jisas.
AS NA JISAS I LAIK BAI YUMI MAS WAS I STAP
4. Bilong wanem yumi mas was i stap?
4 Jisas i laik bai yumi was i stap, long wanem, maski yumi save long planti samting em bai kamap bihain, yumi no save long olgeta samting. Taim Jisas i stap olsem man long dispela graun, em i no save long olgeta samting bai kamap bihain. Em i mekim pasin daun na tokaut long dispela samting olsem: “I no gat wanpela man i save long dispela de na dispela aua, ol ensel long heven i no save, na Pikinini tu i no save, Papa tasol i save.” (Mat. 24:36) Long dispela taim, Jisas, em dispela “Pikinini,” i no save long taim stret pasin nogut bilong dispela graun bai pinis. Olsem wanem long yumi long nau? Yumi save long olgeta samting bai kamap bihain? Nogat ya! Yumi no save long taim stret Jehova bai salim Pikinini bilong em i kam bilong bagarapim ol man nogut. Sapos yumi save long olgeta samting bai kamap bihain, orait yumi no gat wok long was i stap. Jisas i tok, pinis bilong pasin nogut bilong nau bai kamap wantu tasol, long taim yumi no tingim. So yumi mas was i stap.—Ritim Matyu 24:43.
5, 6. (a) Olsem wanem save bilong yumi long Kingdom Bilong God i helpim yumi long was i stap? (b) Bilong wanem save yumi gat long Satan i mas kirapim yumi moa yet long was i stap?
5 Jisas i save long planti gutpela samting em bai kamap bihain, em ol samting planti manmeri long taim bilong em i no save liklik long en. Yumi no save long planti samting olsem Jisas i bin save long en. Tasol em i bin skulim yumi long planti samting bilong Kingdom Bilong God na ol samting klostu nau Kingdom bai mekim. Klostu olgeta manmeri em yumi stap namel long ol, em long skul, ples wok, na long teritori, ol i no save long ol dispela gutpela samting. So dispela em narapela as na yumi mas was i stap. Olsem Jisas, yumi mas redi long tokim ol arapela long save yumi gat long Kingdom Bilong God taim rot i op. Em bikpela samting long yumi mekim olsem, olsem na yumi no laik pasim maus taim rot i op long autim tok. Laip bilong ol man inap lus!—1 Tim. 4:16.
6 Narapela samting Jisas i save long en i helpim em long was i stap. Em i save olsem Satan i laik traim em, mekim nogut long em, na bagarapim pasin bilong em long i stap gut long God. Oltaim dispela birua nogut i “wetim narapela taim” bilong traim Jisas. (Luk 4:13) Oltaim Jisas i was i stap. Em i laik redi i stap, maski wanem traim i painim em, o man i birua long em, o mekim nogut long em. Wankain samting i painim yumi olsem i bin painim Jisas. Yumi save Satan i raun yet “olsem wanpela laion i singaut strong na i painim ol man bilong kaikai.” Em long dispela as tasol Baibel i tokim ol Kristen olsem: “Yupela i mas holimpas gutpela tingting na was i stap.” (1 Pita 5:8) Tasol hau bai yumi mekim olsem?
BETEN I HELPIM YUMI LONG WAS I STAP
7, 8. Jisas i mekim wanem tok long pasin bilong beten? Yumi kisim wanem skul long pasin bilong em long beten?
7 Baibel i tokim yumi olsem beten em i bikpela samting bilong helpim yumi long was i stap, na long dispela rot yumi ken lukautim pasin bilong yumi long pas gut wantaim Jehova. (Kol. 4:2; 1 Pita 4:7) Bihain liklik long Jisas i tokim ol disaipel long was i stap wantaim em, em i tok: “Yupela i mas was i stap na beten oltaim bai yupela i no ken pundaun long traim.” (Mat. 26:41) Yu ting Jisas i tok ol i mas beten long dispela taim stret we ol i gat hevi na em tasol? Nogat, tok em i mekim i olsem wanpela stiatok yumi mas bihainim long olgeta de.
8 Eksampel bilong Jisas i soim yumi olsem beten em i bikpela samting. Ating yu inap tingim wanpela taim we Jisas i bin beten long Papa bilong en inap nait olgeta. (Ritim Luk 6:12, 13.) Piksaim long tingting: Taim bilong kol i laik pinis na Jisas i stap klostu long taun Kaperneam. Taim ples i go tudak, Jisas i go antap long wanpela maunten klostu long Raunwara Galili. Em i lukluk i go daun na ating em i lukim ol liklik lait bilong ol lam long Kaperneam na ol arapela viles i stap klostu. Jisas i kirap beten na em i no larim wanpela samting i pulim nabaut tingting bilong en. Planti aua i lus na em i no luksave olsem isi isi ol lait bilong ol lam i dai, mun i kam antap na i go daun, na em i no harim krai bilong ol animal i stap klostu. Ating em i beten long bikpela disisen em i mas mekim. Em i mas makim 12-pela man bilong kamap aposel bilong em. Yumi ken tingim olsem Jisas i beten strong tru long Papa na tokim Papa long tingting bilong em long ol wan wan disaipel. Em i askim Papa long stiaim em na givim savetingting long em.
9. Yumi kisim wanem skul long eksampel bilong Jisas long beten inap nait olgeta?
9 Yu ting eksampel bilong Jisas i skulim yumi long yumi mas lusim planti aua long beten? Nogat. Long gutpela pasin Jisas i tok olsem long ol disaipel bilong em: “Tru tumas, bel bilong man i redi long mekim olgeta samting, tasol bodi i no gat strong.” (Mat. 26:41) Maski dispela tok i tru, yumi ken bihainim pasin bilong Jisas. Olsem wanem? Yumi save toktok wantaim Papa bilong yumi long heven paslain long yumi wokim disisen we em inap mekim bikpela samting long pasin bilong yumi yet, o famili, o kongrigesen long bilip na stap gut long God? Yumi save beten askim God long helpim ol wanbilip? Yumi save kamapim bel bilong yumi long beten, o long olgeta taim yumi save kolim wankain tok tasol? Na tu, Jisas i pilim tru pasin bilong i stap em yet na kamapim tingting bilong em long Papa. Long nau i gat planti samting bilong mekim, olsem na em isi tru long lusim tingting long nambawan bikpela samting. Sapos yumi lusim inap taim long stap yumi yet na beten long Jehova na kamapim bel bilong yumi, orait bai yumi strong moa long was i stap. (Mat. 6:6, 7) Bai yumi go klostu moa long Jehova na mekim olgeta samting yumi inap mekim bilong strongim pasin bilong yumi long pas gut wantaim em, na yumi no laik mekim ol samting i pasim yumi long stap gut long em.—Sng. 25:14.
WAS I STAP LONG TAIM BILONG AUTIM TOK
10. Wanem stori i kamapim pasin bilong Jisas long was i stap na redi long autim tok long ol arapela?
10 Jisas i bin was i stap taim em i mekim wok Jehova i givim em. Long sampela wok, man inap tingting long ol arapela samting taim em i mekim wok na hevi i no inap kamap. Tasol long sampela wok, man i mas was i stap na em i no ken tingting long ol arapela samting taim em i mekim wok. Wok autim tok i kain wok olsem. Oltaim Jisas i bin was i stap long wok em i mekim. Oltaim em i redi long autim gutnius long ol arapela taim rot i op. Olsem, Jisas na ol disaipel i bin wokabaut long moning olgeta na ol i kam kamap long taun Sikar, na ol disaipel i go long baim kaikai. Jisas i malolo i stap klostu long hulwara bilong taun, tasol em i was i stap na nau rot i op long em i autim tok. Wanpela meri Samaria i kam bilong kisim wara. Jisas inap slip i stap, o em inap ting olsem em i no gat wok long toktok wantaim dispela meri. Tasol em i toktok wantaim dispela meri na em i autim gut tok i tru long em na dispela i bin helpim planti manmeri bilong dispela taun. (Jon 4:4-26, 39-42) Olsem wanem? Yumi inap bihainim moa yet eksampel bilong Jisas long was i stap na redi long autim tok long ol manmeri yumi bungim long olgeta de?
11, 12. (a) Jisas i tok wanem long ol lain i laik pulim em long lusim wok bilong em? (b) Olsem wanem Jisas i soim olsem em i gat stretpela tingting long wok autim tok bilong en?
11 Sampela taim ol gutpela manmeri i laik mekim sampela samting we i pulim tingting bilong Jisas na em i lusim wok bilong em. Long Kaperneam Jisas i oraitim sik bilong ol man, olsem na ol man i no laik bai em i lusim ol. Yumi ken save long as na ol i laik bai em i stap wantaim ol. Tasol wok bilong Jisas em bilong autim tok long “ol sipsip bilong lain Israel i lus pinis,” na i no long ol man bilong wanpela taun tasol. (Mat. 15:24) Jisas i tokim ol dispela manmeri: “Mi mas autim gutnius bilong Kingdom bilong God long ol arapela taun tu, long wanem, em long dispela as na God i salim mi i kam.” (Luk 4:40-44) So nambawan bikpela samting long Jisas em wok bilong em long autim tok. Em i no larim wanpela samting i pulim nabaut tingting bilong em.
12 Yu ting Jisas i bisi tumas long mekim wok bilong em na em i no gat taim long kisim amamas? O yu ting em i bin bisi tumas long wok autim tok na em i no tingim ol samting ol man i nidim? Nogat, Jisas i bihainim stretpela tingting long wok em i mekim bilong autim tok. Em i stap amamas na em i painim amamas wantaim ol poroman bilong en. Em i save sori long ol famili na em i kliagut long ol hevi bilong ol na wanem ol samting ol i nidim. Na em i kamapim klia olsem em i laikim ol pikinini.—Ritim Mak 10:13-16.
13. Olsem wanem yumi ken bihainim pasin bilong Jisas long was i stap na holim stretpela tingting long wok autim tok?
13 Taim yumi bihainim pasin bilong Jisas long was i stap, olsem wanem yumi ken bihainim stretpela tingting, olsem em i bin mekim? Yumi no larim ol samting bilong dispela graun i pulim yumi na yumi lusim wok bilong yumi. Sampela taim ol gutpela pren na ol wanblut inap tokim yumi long lusim sampela wok bilong autim tok o mekim ol samting em ol i ting i nomol tasol. Tasol sapos yumi bihainim pasin bilong Jisas, orait wok autim tok bai stap bikpela samting olsem kaikai. (Jon 4:34) Wok autim tok i save strongim pasin bilong yumi long pas gut wantaim Jehova na i givim amamas long yumi. Tasol yumi laik bihainim stretpela tingting, no ken ting olsem yumi yet i stretpela man o ting olsem yumi no ken insait long sampela amamas. Olsem Jisas, yumi ol wokman bilong “God bilong amamas” i laik bihainim stretpela tingting na stap amamas.—1 Tim. 1:11.
WAS I STAP TAIM TRAIM I PAINIM YUMI
14. Taim yumi karim ol hevi, yumi no ken lusim tingting long wanem samting? Bilong wanem?
14 Jisas i givim sampela strongpela tok long ol disaipel long taim em i karim ol hevi, em ol tok ol i mas harim. (Ritim Mak 14:37.) Taim yumi karim hevi, yumi mas tingim eksampel bilong Jisas moa yet. Long kain taim olsem, ol man i save lusim tingting long wanpela bikpela tok i tru. Em wanpela bikpela tok i tru, olsem na Buk Sindaun i kolim 2-pela taim: “Sampela man i save ting, pasin bilong ol i gutpela na ol i bihainim gutpela rot. Tasol nogat. Ol i mekim i go i go, na bihain bai ol i dai.” (Snd. 14:12; 16:25) Sapos yumi bihainim tingting bilong yumi yet, na moa yet long taim bikpela hevi i painim yumi, orait taim nogut inap painim yumi wantaim ol lain yumi laikim tumas.
15. Ating wanem traim inap painim het bilong famili husat i hatwok tru long lukautim famili?
15 Olsem, ating het bilong famili i hatwok tru long lukautim “lain bilong en stret” long ol samting bilong skin. (1 Tim. 5:8) Ating em i pilim olsem em i mas orait tasol long kisim wanpela wok we i pasim em long go oltaim long ol miting, o go pas long mekim famili lotu, o mekim wok autim tok. Sapos em i bihainim tingting em yet i ting i stret long mekim, orait em inap ting olsem i stret em i kisim dispela wok. Pasin bilong em long i stap pren bilong Jehova inap lus na nogut em i givim baksait olgeta long Jehova. Mobeta em i bihainim tok bilong Sindaun 3:5, 6. Solomon i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”
16. (a) Eksampel bilong Jisas long bihainim savetingting bilong Jehova i skulim yumi long wanem samting? (b) Planti het bilong famili i mekim wanem bilong bihainim eksampel bilong Jisas taim ol hevi i painim ol?
16 Taim ol hevi i painim Jisas, em i no bihainim tingting bilong em yet tasol. Tingim, dispela man husat savetingting bilong en i winim olgeta arapela man i bin stap long dispela graun, i no laik bihainim savetingting bilong em yet. Olsem, taim Satan i traim em, Jisas i tokim em: “Rait Holi i tok.” (Mat. 4:4, 7, 10) Taim traim i painim Jisas em i bihainim savetingting bilong Papa bilong en. Taim Jisas i mekim olsem, em i kamapim pasin daun, em wanpela pasin em Satan i no gat na em i save heitim dispela pasin. Olsem wanem? Yumi save bihainim savetingting bilong Jehova? Het bilong famili husat i bihainim pasin bilong Jisas long was i stap, i save yusim Tok Bilong God bilong stiaim em, na moa yet long taim bilong hevi. Long graun olgeta, i gat planti tausen het bilong famili i mekim olsem. Ol i putim Kingdom Bilong God na lotu i tru i go pas, na ol samting bilong skin i stap nambatu. Long dispela rot, ol i lukautim gut tru famili bilong ol. Olsem em i bin promis long mekim, Jehova i blesim hatwok bilong ol long lukautim famili bilong ol long ol samting bilong skin.—Mat. 6:33.
17. Wanem samting i kirapim yu long bihainim pasin bilong Jisas long was i stap?
17 Yumi save, Jisas i stap nambawan gutpela piksa long pasin bilong was i stap. Eksampel bilong em i save helpim yumi, na long rot bilong en ol man inap abrusim bagarap. Tingim, Satan i gat bikpela laik long yu no ken tingim moa ol samting bilong lotu, na bilip bilong yu i no ken stap strong, na em i no laik bai yu givim bel moa long lotuim Jehova, na em i no laik bai yu holimpas bilip. (1 Tes. 5:6) No ken larim em i win! Yumi mas was i stap olsem Jisas i bin mekim. Makim taim long beten na kamapim tingting i stap long bel, redi oltaim long autim tok, na bilip long Jehova taim traim i kamap. Taim yu mekim olsem, laip bilong yu bai i gat as bilong en na bai yu amamas na belgut nau long dispela taim we yu lukim olsem pinis bilong pasin nogut bilong dispela graun i kam klostu. Sapos yu was i stap, orait taim Jisas i kam bilong bagarapim ol man nogut, em bai lukim olsem yu was i stap na bisi long mekim wok bilong God. Jehova bai amamas long blesim pasin bilong yu long stap gut long em!—Rev. 16:15.
[Piksa long pes 6]
Jisas i autim tok long meri long hulwara. Yu mekim wanem na bai yu ken autim tok long olgeta de?
[Piksa long pes 7]
Pasin bilong helpim famili long pas gut wantaim Jehova i soim olsem yu was i stap