Sapta 11
‘Wok Long Painim Kingdom Pastaim’
1. (a) Bilong wanem Jisas i tokim ol man long painim Kingdom pastaim? (b) Yumi mas mekim wanem askim long yumi yet?
WINIM 1,900 yia bipo, taim Jisas i stap long Galili, em i tokim ol man olsem: “Yupela i mas wok pastaim long painim kingdom bilong God wantaim stretpela pasin bilong [God].” Planti handet yia i mas lus pastaim na bai Krais i kisim wok king bilong Kingdom, olsem na bilong wanem em i bikpela samting ol i mas tingim Kingdom long taim bilong ol? Ol i mas tingim, long wanem, long rot bilong dispela Kingdom i stap long han bilong Mesaia, Jehova bai stretim bek nem bilong em na kamapim ol samting em i tingting pinis long mekim long graun. Man i pilim tru ol dispela bikpela samting, em bai putim Kingdom i stap nambawan samting long laip bilong em. Sapos ol Kristen long taim bilong ol aposel i bin mekim olsem, em i bikpela samting moa long mekim olsem long nau, long wanem, nau Krais i kamap King pinis! Olsem na askim yu yet olsem: I stap bilong mi i kamapim klia olsem mi wok long painim Kingdom bilong God pastaim?—Matyu 6:33, Nupela Testamen na Ol Sam.
2. Ol manmeri i save wok strong long painim wanem ol samting?
2 Long nau, planti milion man long olgeta hap ol i wok long painim Kingdom pastaim. Ol i soim olsem ol i sapotim wok bos bilong Kingdom taim ol i givim bel long mekim laik bilong Jehova, na ol i dediket long em. Tasol klostu olgeta narapela manmeri i wok long painim ol samting bilong graun. Ol i wok strong long kisim mani na ol samting bilong skin na ol amamas em mani inap baim. O ol i wok strong long kisim namba long wok ol i mekim. Pasin bilong ol long wokabaut i kamapim klia olsem ol i save tingim ol yet tasol, ol gutpela samting bilong skin, na ol amamas. Ol i putim God i stap namba tu, na planti ol i no bilip olsem God i stap.—Matyu 6:31, 32.
3. (a) Jisas i kirapim ol disaipel bilong em long bungim wanem ol gutpela samting? Bilong wanem ol i mas mekim olsem? (b) Bilong wanem yumi no ken tingting planti tumas long painim ol samting bilong skin?
3 Tasol Jisas i tokim ol disaipel bilong em: “Yupela i no ken bungim ol gutpela gutpela samting bilong yupela hia long dispela graun,” long wanem, ol dispela samting i no save stap oltaim. Em i tok ol i mas mekim wok bilong Jehova na bai ol i ‘bungim ol gutpela samting long heven.’ Jisas i tok ai bilong ol disaipel i mas “gutpela,” olsem ol i mas tingim na givim strong bilong ol bilong mekim laik bilong God. Jisas i tok: “Yupela i no inap i stap aninit long God na long mani wantaim.” Tasol olsem wanem long ol samting bilong skin—olsem kaikai, klos, na haus? Jisas i tok, “yupela i no ken tingting planti.” Ol i mas tingim ol pisin—God i save givim kaikai long ol. Jisas i kirapim ol long tingim ol plaua—God i bilasim gut ol. Na Jehova bai lukautim moa yet ol manmeri i mekim wok bilong em, a? Olsem na Jisas i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu [ol samting bilong skin] long yupela.” (Matyu 6:19-34, Nupela Testamen na Ol Sam) Olsem wanem? Ol samting yu mekim i kamapim klia olsem yu bilipim dispela tok?
No Ken Larim Ol Samting i Karamapim Tok Bilong Kingdom
4. Sapos man i tingting tumas long ol samting bilong skin, wanem samting inap kamap?
4 I stret long man i tingting long kisim mani inap long em i ken lukautim em yet na famili bilong em. Tasol sapos man i tingting planti tumas long ol samting bilong skin, dispela inap nogutim em tru. Maski em i tok olsem em i bilip long Kingdom, tasol sapos em i putim ol narapela samting i stap namba wan samting long bel bilong em, dispela bai karamapim tok i tru bilong Kingdom. (Matyu 13:18-22) Wanpela yangpela maniman i askim Jisas: “Bai mi mekim wanem na mi ken kisim laip i stap gut oltaim oltaim?” Man hia i bihainim pasin i stret na i mekim gut long ol man, tasol em i tingim tumas mani kago bilong em. Em i no laik lusim ol dispela samting bilong kamap disaipel bilong Krais. Olsem na em i lus long kisim gutpela samting, olsem em inap i stap wantaim Krais long Kingdom bilong heven. Long dispela taim Jisas i tok: “Ol man i gat planti samting ol bai i hatwok tru long i go insait long kingdom bilong God.”—Mak 10:17-23.
5. (a) Pol i kirapim Timoti long ting wanem ol samting em inap long em? Bilong wanem Pol i tok olsem? (b) Olsem wanem Satan i save mekim wok long pasin bilong “laikim tumas mani” bilong bagarapim bilip bilong man?
5 Sampela yia bihain aposel Pol i raitim pas i go long Timoti. Timoti i stap long Efesus, em wanpela biktaun i gat planti wok bisnis long en. Pol i tokim em: “Taim mama i karim yumi na yumi kamap long graun, yumi no bin karim wanpela samting i kam. Na taim yumi lusim graun yumi bai i no inap karim wanpela samting i go. Tasol sapos yumi gat kaikai na laplap samting, orait yumi ken tok, ‘Em inap long mi.’ ” I stret yumi mas mekim wok bilong lukautim yumi yet wantaim famili long “kaikai na laplap samting.” Tasol Pol i mekim tok lukaut: “Ol man i laikim tumas long kisim planti mani samting, ol traim bai i kamap na holimpas ol . . . Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.” Satan i save wok hait. Ating pastaim em i pulim man long ol liklik samting. Bihain em inap pulim strong dispela man—olsem opim rot long man inap kisim bikpela namba o gutpela wok i gat bikpela pe, tasol dispela nupela wok i kisim hap taim bipo em i bin lusim bilong mekim ol wok bilong spirit. Sapos yumi no was gut, pasin bilong “laikim tumas mani” inap karamapim ol samting bilong Kingdom, em ol bikpela samting tru. Pol i tok: “Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”—1 Timoti 6:7-10.
6. (a) Sapos yumi no laik pundaun long pasin bilong laikim tumas mani kago, yumi mas mekim wanem? (b) Long nau i gat hevi bilong mani, tasol yumi inap bilip long wanem samting?
6 Pol i laikim tru brata Kristen bilong em, Timoti, na em i tokim em olsem: “Givim baksait long ol dispela kain pasin nogut na abrusim olgeta,” na “bilip” na “ran strong long dispela gutpela resis.” (1 Timoti 6:11, 12) Yumi mas taitim bun tru na bai yumi inap abrusim pasin bilong ol man bilong dispela graun long laikim tumas mani kago. Tasol sapos yumi bilip na wok strong, Jehova i no ken lusim yumi. Maski pe bilong ol samting i go antap na planti man i no gat wok, Jehova bai lukautim yumi long ol samting yumi mas kisim bilong i stap laip. Pol i tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ Olsem na yumi ken strongim bel bilong yumi, na yumi ken tok olsem, ‘Bikpela i save helpim mi na mi no inap pret. Ol man i no inap mekim wanpela samting long mi.’ ” (Hibru 13:5, 6) Na King Devit i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.”—Song 37:25.
Ol Disaipel Bilong Pastaim i Makim Pasin Yumi Ken Bihainim
7. Jisas i tokim ol disaipel long bihainim wanem kain pasin taim ol i mekim wok autim tok? Bilong wanem dispela tok i stret?
7 Bihain long Jisas i skulim gut ol aposel bilong em, em i salim ol i go long ol Israel bilong autim gutnius na tokaut olsem: “Kingdom bilong heven em i kam klostu pinis.” Em i gutpela tok tru! Jisas Krais, king bilong dispela Kingdom, i stap namel long ol. Ol aposel i givim bel long mekim wok bilong God, olsem na Jisas i kirapim ol long bilip tru olsem God bai lukautim ol. Em i tok: “Yupela i no ken kisim ol samting bilong wokabaut i go wantaim yupela. Yupela i no ken . . . karim hanbek samting na bret na mani. Na yupela i no ken kisim tupela siot. Na sapos yupela i kamap long wanpela ples na yupela i go insait long wanpela haus, orait yupela i mas i stap long dispela haus tasol inap long taim yupela i laik lusim dispela ples.” (Matyu 10:5-10; Luk 9:1-6) Jehova bai kirapim ol narapela Israel long helpim ol, em pasin bilong ol Israel long mekim gut long ol man ol i no save long en.
8. (a) Paslain liklik long taim Jisas i dai, bilong wanem em i givim narapela tok long pasin ol i mas bihainim taim ol i mekim wok autim tok? (b) Wanem samting i mas stap yet olsem nambawan samting long laip bilong ol disaipel?
8 Tasol bihain, klostu long taim Jisas i dai, em i tokim ol aposel olsem pasin bilong ol man bai senis. Ol hetman bai birua long wok bilong ol, olsem na ating ol man Israel bai i no lukautim moa ol aposel. Na tu, bihain liklik ol bai kisim tok bilong Kingdom i go long ol narapela lain. Nau ol i mas kisim “mani” na “bret” i go wantaim ol. Tasol ol i mas wok yet long painim Kingdom bilong Jehova pastaim wantaim stretpela pasin bilong em, na ol i mas bilip tru olsem God bai blesim hatwok ol i mekim bilong painim kaikai samting.—Luk 22:35-37.
9. Pol i lukautim em yet long ol samting bilong skin, na em i mekim wanem bilong tingim Kingdom pastaim? Em i givim wanem tok long dispela samting?
9 Aposel Pol i stap olsem gutpela piksa long pasin bilong bihainim tok bilong Jisas. Wok bilong autim tok em i nambawan samting long laip bilong Pol. (Aposel 20:24, 25) Taim em i go long wanpela hap bilong autim tok, em i lukautim em yet long kaikai samting. Em i samapim ol haus sel, em i no ting ol narapela man i mas lukautim em long kaikai samting. Nogat. (Aposel 18:1-4; 1 Tesalonaika 2:9) Tasol taim ol narapela i laik kamapim pasin bilong ol long laikim tru Pol na ol i givim ol presen long em o singautim em i go long haus bilong ol, em i amamas na i tok tenkyu tru long ol. (Aposel 16:15, 34; Filipai 4:15-17) Pol i kirapim ol Kristen long skelim gut ol wok bilong ol na bai ol inap lukautim gut olgeta wok ol i mas mekim, em i no tokim ol long lusim wok bilong lukautim famili na bai ol inap autim tok. Nogat. Em i tokim ol long ol i mas mekim wok, laikim tru famili bilong ol, na givim ol samting bilong ol long ol narapela. (Efesus 4:28; 2 Tesalonaika 3:7-12) Em i kirapim ol long bilip olsem God bai helpim ol, mani kago nogat. Na olgeta samting ol i mekim i mas kamapim klia olsem ol i save long wanem ol samting i bikpela samting tru. Ol i mas bihainim tok bilong Jisas na wok long painim Kingdom bilong God pastaim wantaim stretpela pasin bilong em.—Filipai 1:9-11.
Tingim Kingdom Pastaim
10. Wanem mining bilong dispela tok painim Kingdom pastaim?
10 Yumi save mekim wok bilong autim gutnius bilong Kingdom long ol narapela inap long wanem mak? Sindaun bilong yumi na pasin bilong yumi long pilim tru ol samting bilong Kingdom inap helpim yumi long bekim dispela askim. Tingim, Jisas i no tok, ‘Yu mas painim Kingdom taim yu no gat narapela wok bilong mekim.’ Em i save Kingdom em i bikpela samting, olsem na em i tokaut long laik bilong Papa bilong em: “Wok oltaim long painim kingdom bilong em.” (Luk 12:31, NW ) Tru, planti bilong yumi i mas mekim wok bilong lukautim yumi yet na famili long ol samting bilong skin. Tasol sapos yumi gat bilip, bai yumi tingim wok bilong Kingdom pastaim, em wok God i bin givim long yumi. Na bai yumi mekim wok tu bilong lukautim famili bilong yumi.—1 Timoti 5:8.
11. (a) Jisas i mekim wanem tok piksa bilong soim olsem olgeta man i no inap mekim wankain wok bilong autim tok bilong Kingdom? (b) Wanem ol samting i makim hamas aua samting man inap lusim bilong mekim wok bilong Kingdom?
11 Sampela bilong yumi inap lusim bikpela hap taim moa long autim gutnius bilong Kingdom, winim ol narapela. Tasol long tok piksa Jisas i mekim long narapela narapela kain graun, em i soim olsem olgeta manmeri em bel bilong ol i olsem gutpela graun, ol bai karim kaikai. Ol bai karim hamas kaikai? Sindaun bilong yumi olgeta i no wankain. Krismas, strong bilong skin, na wok bilong lukautim famili i no wankain long olgeta man. Tasol taim man i laikim tru gutnius bilong Kingdom, wok bilong em bai karim planti kaikai.—Matyu 13:23.
12. Gutpela sapos ol yangpela i tingting long mekim wanem gutpela wok bilong spirit?
12 Em i gutpela long putim sampela mak i helpim yumi long mekim bikpela wok moa bilong autim tok bilong Kingdom. Ol yangpela i mas tingim gut bikpela wok em yangpela Kristen Timoti i bin mekim. (Filipai 2:19-22) Taim ol i pinis long skul, gutpela sapos ol i kirap mekim wok bilong God fultaim, a? Ol man i lapun liklik ol tu i ken putim mak bilong mekim sampela wok moa bilong spirit.
13. (a) Husat i makim ol wok bilong Kingdom yumi inap mekim? (b) Sapos yumi wok tru long painim Kingdom pastaim, yumi kamapim klia wanem samting?
13 Yumi no ken skelim ol narapela man na ting ol inap mekim sampela wok moa. Nogat. Bilip bilong yumi i mas kirapim yumi long skelim ol samting yumi yet inap mekim na bai yumi ken mekim bikpela wok bilong God inap tru long skel bilong yumi. (Rom 14:10-12; Galesia 6:4, 5) Olsem stori bilong Jop i kamapim, Satan i tok yumi tingim mani kago, gutpela sindaun, skin bilong yumi, i olsem yumi tingim yumi yet tasol na dispela i as na yumi mekim wok bilong God. Tasol sapos yumi wok tru long painim Kingdom pastaim, yumi insait long wok bilong kamapim long ples klia olsem Satan em i man bilong giaman. Yumi kamapim klia olsem nambawan samting long laip bilong yumi em wok bilong God. Long ol tok na pasin bilong yumi, yumi kamapim bel bilong yumi olsem yumi laikim tru Jehova, na yumi daun long wok king bilong em, na yumi laikim tru ol narapela man.—Jop 1:9-11; 2:4, 5; Sindaun 27:11.
14. (a) Bilong wanem i gutpela long yumi gat sediul bilong mekim wok autim tok? (b) Planti Witnes i mekim wanem bikpela wok bilong autim tok?
14 Sapos yumi gat sediul, dispela inap helpim yumi long mekim bikpela wok moa. Jehova yet i save “makim taim” bilong mekim ol samting em i tingting pinis long mekim. (Kisim Bek 9:5; Mak 1:15) Sapos yu inap, em i gutpela long autim tok inap wanpela o tupela taim long olgeta wik. Planti tausen Witnes Bilong Jehova long olgeta hap ol bin mekim wok painia haptaim, na ol i lusim tupela aua samting bilong autim gutnius long olgeta de. Planti tausen moa ol i mekim wok painia oltaim, na ol i lusim inap tupela aua na hap long olgeta de bilong autim tok bilong Kingdom. Ol painia salim na ol misineri i lusim planti aua moa long mekim wok bilong Kingdom. Yumi ken painim rot bilong autim tok bilong Kingdom long kain kain taim na ples long ol man i laik harim. ( Jon 4:7-15) Yumi olgeta i mas i gat laik long givim bel tru long dispela wok inap tru long skel bilong yumi, long wanem, Jisas i bin tok profet olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14; Efesus 5:15-17.
15. Taim yu tingim wok bilong yumi long autim tok, bilong wanem yu ting tok bilong 1 Korin 15:58 i stret long nau?
15 Maski ol Witnes Bilong Jehova i stap long wanem wanem hap, ol i wanbel long wok wantaim bilong mekim dispela gutpela wok. Ol i bihainim dispela tok bilong Baibel: “Yupela i mas i stap strong, na i no ken surik liklik. Yupela i save olsem, hatwok yupela i save mekim long Bikpela, em bai i no inap lus nating. Olsem na oltaim yupela i mas wok strong long mekim wok bilong Bikpela.”—1 Korin 15:58.
Stori Gen Long Ol Dispela Tok
• Taim Jisas i tokim yumi long painim Kingdom pastaim, i olsem em i tok wanem ol samting i mas i stap nambatu?
• Yumi mas i gat wanem tingting long wok bilong lukautim yumi yet na famili long ol samting bilong skin? God bai helpim yumi olsem wanem?
• Yumi inap mekim wanem ol wok bilong Kingdom?
[Piksa long pes 107]
Long olgeta kantri long nau, ol Witnes Bilong Jehova i autim gutnius paslain long pinis i kamap